Home TechSupport Youtube a kon iti sum lo thei ham?

Youtube a kon iti sum lo thei ham?

220
0

Vannoiya amin chepen le mipi in aha man pen chu Youtube ahi in ahi, chuleh online a thil holna a jong Google ban chat ahi in ahi. Ajeh chu google a thil ihol jiu bang in hiche a jong hol a video a vetthei khat ahi jeh chu min aha man chah in ahi. Chule social media lampang a jong Twitter, Facebook ho jou a Google hi min nitin kiman chah na aha man pen khat jong chu ahi. Beilam tah a seiding chun online video vetnading akiti le YouTube hi aphachom le abei pen khat chu ahi. Hitia vannoi mipi in nitin a avet jing thil khat ahi jeh chun, video ho a advertisement koina ding in Vannoiya company len tahtah ho akichu tho jeng in ahi. Hiche a company thil ho advertisement abol uva kon mince ahi jeh un sum le pai tampi asen u ahi. Hiche a sum le pai kisen hochu YouTube ten video neiho ahin hop u ahin. Hiche video neithei chu abolnom chan chun channel akisem uva akoi thei u tina ahi. Hitoh lhon a chun tuni hin iti Youtube channel sem a iti sum mu thei ham ti chu ban neichan ana seilha ute.

Angaicha ho: gmail account chule Youtube app or na computer a jong nabol thei ahi.

Step 1: Channel sem ding dan;

Youtube a sum mu ding itiu ahi tohlhon a amasa pen a angaicha chu Channel nei hi ahi, hiche channel sem hi abei a bei ahin anoiya kisei bang a hi bolding ahi.

Na gmail account a lut masapen in lang, nanei lou le athah khat kisem in gmail account sem jong bei tah ahi. Tulai phone thah inei le hiche gmail account hi nei teitei angai in ahi.

Na computer a youtube.com a nalut ding, hiche teng youtube website hung kihong ding ahi. Veiling a aning pen a chu youtube logo namu ding ahi, hiche noi chat a chu line achom thum namu ding hichu meh in.

Nameh jou teng drop down tampi hung um ding ahi, hiche a chu my channel kiti pen chu nameh ding ahi.

Option khat nanmu ding ahi ‘Set up your channel on YouTube’ hiche a chu min ho le adang ho suhdim na hung um ding hiche jouse chu suhdim ding ahi.

Step 2: Nangma thepna ipi ham mi navetsah nom chu – i.e. The Niche

Hetding khat chu Youtube channel chu mijousen akisem thei ahin, chule vannoi in na video koichu avet ding tina ahi. Hinla video hi asang aja sim joulou um ahi jeh in na video chu min avet tei tei ding ahi tina aum dehpon ahi. Ahivang a achung a kisei Niche kitipen hi nakoi toh a la min anhol doh a avet thei ahi. Tidan chu nangma thepna bolthei na min avetnom ding chu ipi ham, hichu nan koi teng min ahin vet ding ahi. Anoiya hi vetsahna themkhat ahung kitah lang in ahi;

Lasahthem

Lasah lampang a thepna nei mi nahi le nala hochu video in sem inlang koi in, ajeh chu min hitabang a private a video kisem la hohi angainom uvin ahi. Studio a kikhum ho khu mi achim nakom um ji ahi toh lhon a eima original a kisa a la ngaitah a hinsa ho khu vannoiya avetnom tam ahi.

Lekha hilthem

Mi lekha hilthem na nei nahi a ahile, nathipna lam subject mathematic, science, English etc. hochu topic wise in sem inlang kicheh tah in hoisel a helchetna neipum in video tampi sem inlang koi in. Ajeh chu tu khang a hi min lekhasim a topic a hetlou na anei teng u le Youtube ho a hi aholjiu ahi. Youtube a video kikoi hohi free ngan ahi tohlhon a mi ding a thilpha chom tah khat ahi jeh a chu topic or lesson kihol chu aum khah le view tamjeng ahin. Hiche view tam chu channel nei ho ding a thilpha chom tah khat ahije in ahi.

Online store

Thil online a nachoh khat chu nahon doh ni masat pen a video nanam a athil umdan ho mi hetthei ding a nasem le ave mi tampi namu ding ahi. Ajeh chu tulai khang min online a thil aha choh khang ahi toh lhon a thil thah khat achoh masang uva akhol masat jiu ahi. Hitoh lhon a chu a video review ho hi avetnom u ahi athil akichoh masang uva hi. Chule hitabang channel nabol na a subscriber le view nahou a ahile, company hon jong amaho product athah ho free a nahin thot uva athil u review nabol man jong nadei jat napeh kit diu ahi.

Atotthem

Totna lam pang a thepna neitah mi nahi le, nangma chang a video nakisem a nakikoi thei ahi. Natot thepna chu min ahin vet teng avetnom u le aloi apai kom a share abol uva na popular jeng thei ahi. Hiche a kon subscriber tampi le view tampi namu thei ahi, nathep na chu mohseh hilou tina ahi. Chule vannoiya hi mi atamjon youtube a hi totna video hohi aha vetdeh sat uvin ahi.

Ann honthem

Nehle chah hi mihem in akikhohsah pen ahin, hiche numei jousen atamjon ann hon lamapang aneo a pat ahin bol jeh in athem atam in. Ahin ann hon khalou hel jong aum in amaho ding a chu ajinei teng u le ann hon hung ngaitei ding ahi jeh a chu kithem chuhna ding a Youtube ahin man chah tei ding ahi. Chule pasal ann hon lung lut tah tah hon jong ahetnom avetnom abolnom ding ahin hiche lampang a thepna nanei a ahile bu le me jat chom chom a tuitah a honji dan chu video ho nakoi thei ahi. Vetsahnan sijou cha al me jong ihon khel a le tuiji lou ahin, ahon themkhat bol chu min avet a ahon thei ahi. Hiche video hohi mi ding a thilpha chom tah khat ahi jeh a view jong kitam mu thei hichu eiding a phachom ahi.

Achung a kisei ho hi tekah na kipe ahin nangman nathepna chu iti bolle chun min avet nom ding ham chu nangma khut a aum in ahi. Ahin video nabol na ding a kicheh tah in bol in gamtin bol hih in ajeh chu na subscriber hon nathepna nabol theina pa chu ahe avetnom.

Step 3: Na YouTube a ipi nakoi ding ham (Content) chu kisem toh chat in.

YouTube a video sem kiti hi thilbei tah ahin hiche a na video sem a hi hiche mong nasem ding ahi ti aumpon ahi. Ahin na video sem chu min avetnom ding hinam tichu ahi naboi ding, hitoh lhon a chu content hi thil thupi tah khat ahi.

Hitoh lhon a na video sem chu content ahoi a ahi le mi lah’a thang ding (Viral)  tina ahin, hichu nangma YouTube sum mu na ding a thilphachom tah khat hiding ahi. Na video viral hina ding a angaicha pen chu ipi tabang video nasem ham chun apo in ahi. Chuleh na video chu mi ding a thilpha chom le thilpha ahi a le min aloi le pai kom a share abol teng u le nang a ding a phachom tah hiding ahi.

Step 4: Adsense apply bolding.

Tuchan a ihin sei u chu YouTube channel iti sem ding ham chule itabang ho video nasem le min avetnom a nahung minche ding ham ti chu ahi. Tun iti YouTuber hon sum muna annei u ham chu ana sei pan kit tau te. Hiche bolna ding a anoiya kipe ho hi najui ngai ahi;

  • Na YouTube account a nalut jou teng le “My Channel” option a lutding.
  • Aban a “Video Manager” kiti option chu meh in.
  • Veiling a Nevigation kiti menu namu ding, hiche a chun “Channel” kiti pen lheng in,
  • Hiche a chu Monitization kiti khat namu ding ahin, hiche pen chu “enable” nabol ding ahi.
  • Hiche jouteng Term & Condition ho namu ding hichu “I Accept” nabol ding ahi.
  • Channel kiti noiya Monitization nahin mu ding ahi.
  • Monitization kiti option pen chu nameh teng window khat pop up hung um ding ahi.
  • Hiche a chu “How will I be paid” kiti pen nameh ngai ahi. ‘Associate an AdSense account’ hiche pen hi meh in. aban next kiti pen meh in.
  • Window khat hung kihong ding nag mail account mangcha pum in lut in hung kiti ding ahi.
  • Aban a form khat hung um ding hiche a het ding ijakai abon in henglut in. chuteng “submit my application” meh in.
  • Hiche jou teng na application chu approval a ding a kithot ahitai.

Na account chu itih a approved hung kibol ding ham tichat aum pon, approval ahi le ahilou chu gangtah a na email a ahin thot diu ahi. Hiche process ahung kichai a approval nahin mu a leh video sem nakipat a phat nanei jouse a mi ding a vetnom umle aphachom ho chu na upload jing thei ahi tai. Hiche video ho chu Youtube team hon avet diu hiche hi ads kikoi le phachom ding ahi tiho a ahin koi diu. Hiche dung jui a chu na video chu min aha vet dungjui a sum namu ding ahi. Hetding khat chu video nakoi jouse a chu ads jao ding ahe tina aum pon ahi. Ajeh chu video aphachom lou ding min aha vetlou ding ho a ads akoi ngai lou u ahi.

Masang lai chun Youtube Video channel sem phot phot in view ahou phot a ahile monitization bei tah in anamu ji uvin ahi. Chuleh hiche dungjui chun sum mu na jong ana beilam lheh in ahi. Ahin tu khang hin mi jousen hiche sum mu na ahin hetdoh toh lhon in. Sum mu  nading ahi phot le tin video amoh sem sem un apha ham aphalou ham ti helou amoh upload jing uvin. Hiche toh lhon chun Yotube ten dan thah ahin sem tauvin hitabang alamdih lou a sumhol na neiho suhmang thei na ding in. Hiche dan thah dungjui a chu nangma Channel khat nanei a ahile alhompen a 1000 subscriber nanei angai in ahi. Chule video tampi nakoi ding na video jouse kivet jat agom a 4000 hour alhin angai in ahi. Hiche 4000 hour kiti pen hi channel nahin nei a pat lha som le ni (12) sung a kisim ding ahi. Hiche masang a ana lhin khah a ahi jong le monetization kipan pei jeng ding ahi.

Youtube channel sem kiti chu thil bei tah milham khat in jong asem jeng thei aboina ima umlou ahi. Ahin channel nanei man a sum kamu lei ding ahi ti vang hijeng lou ahi. Sum mu na kiti chu nangma kihabol na leh thipna chihna a kon namu ding ahijeh in na talents chu ipi ham iti naman chah ding ham. Naman chah chu mihon avetthei a nakoi ding ahijeh a chu iti aphat chom pi thei diu ham chule thilthah nitin a mipi ho vetding a iti napoh doh thei ding ham chu ahi athupi pen. Chuleh na sum mu ding chu nangma nakiha bol dungjui a namu ding ahi subscriber tampi nanei ngai ahi amaho hin nei ding jong chu thil bei hilou ahi. Subscriber nahou a ahile video thah nakoi seh le amaho kom a notification kithot ji ding video thah aum tai ti a. Ahin subscriber jousen avet tei tei ding ahi tina jong aum pon ahi.

Hetding a pha tampi aum nalai in hiche ho chu aban articles le ana seikhom kit u tin ahin video nasem teng nahet ding a pha ho chu;

  • Youtube a umsa mi video ho nangma channel a nakikoi thei lou ding ajeh chu copyright ahung umkhah a ahile aphachom lou ahi.
  • Na video sem jouse hi YouTube team hon hoisel a avetchil u ahin, chujeh a mi vetding a melse ho nakoi a ahile na video ki block ding ahi.
  • Music na video a naman ho jong chu anei hon claim ahin bolkhah uva ahile hiche jong chu boina khat ahi.

Youtube video sem mi itam u tohlhon a ithil bol u chu eiho phatchomna khat ahung hi khah ding deisah na a hung kibol ahi.


Achung a kisei ho kal val a hetbenom hihen doh nom neihon anoiya Comments section a khu nahin doh jeng thei u ahi. Thil ahung kidong dungjui a donbutna hung kibol jing ding ahi.

Previous articleInternet Banking manchah ding dan
Next articlePAN Card semding dan le apoimo dan