Bro. Hegin Haokip
Maranatha Cottage
Hebron Veng, Phaipijang Langol, 16/04/2020.
Ven, chatehi Pakaija kon gou ahin, Naobu sunga pengdojong kipa man ahije. Ps.127:3.
Leiset chunga mihem ten ingai sangpen loikhat u chu ipiham itleh, NEILE GOU ahin, hiche mu-na dingin mitamtah in athi ding ahinding jong ngaito lou khop in aholin, ajeh chu neile gou kitihi mihem tedinga athahat na, aminthana, mi ja a aumtheina chuleh atha neina ahi. Ahinla neile gou tampi ho lah a hin, CHATE hi Pakaija kon gou ahi akiti. Atah tah in, neile gou ijat kinei jong leh chate toh tekah pithei khat cha aumpon, hijeh a chu, gou lah a goulupi pen chate ahi kiti ahi.
Minu mipa dinga agoulupipen chu, Chate ahin, hijeh a chu anei agou lhon jouse chu chate a ding ahibouve. Chugohkeo hilouvin, minu mipa jonghi chate dinga kihing ahibouve. Hijeh a chu nulepa chu neile gou ahao leh achate a ding ahijengin, ajeh chu anule apa nei jouse chu tamle lhomleh achate ding ahijenge. Minu mipan alungtoh achate dingin imacha it anei ngaipoi, ajeh chu aman anule apa alungset sanga anule apan ama alungsetjoh ahi tihi sumil pouhite. Achuti a ahileh nanule napa neilegou chu nangdinga kison naleh thahatna ahi. Chapa ham chanu ham khat hia nulepa neile gou bon chuchangeija kison nathei, kinepnathei a naneitheileh, Pathen chapa khat, chanu khat hikha tale chun, itabang in nakipah tadem ? Nanu le napa haona vang chu chomcha khatna ding ahibouvin, nasempa Pathen chapa chanu khat nahipoupou leh leiset chunga nahinlo chu umah ahitai. Pathen chapa chanu khat nahinia pana chu, Pathen a dinga Goulou pikhat chu nahi ahitai. Chapa Chanu dihtah dinmuna nadin poupou leh napan naboipi ding ahitai. Hijeh a chu nasempa Pathen chu kihol dohin kiti ahi.
Nangma hi Pathen chapa, chanu khat nahi poupou leh napan ichan geijin nakhohsah tadem? michonse minu mipa eihon bon ichate ikhoh sah behseh jeh uva imutheilou, netheilou khopma aki umtheija ahileh, milungset them Pathen chun, iti khohsah louvin koijinte natiham. Ajeh chu tahsa a nanu napa chu nalungset lheh jongleh amani chu very limited ahilhon in, vanna Pa Pathen vang chu, unlimited ahin, ama din imacha ahimo aumpoi.
Hijeh chun, hinkho a nabol masat pen ding chu, Pathen chapa, chanu channa/hina dihtah hi nanei masatpen angaije. Ama chapa chanu nahi mongmong leh Pathen Lenggama din gotsa hin natin, chuleh leiset chunga jong akul akhohho jouse namutha ding ahi tihi Mathew 6:33 aseitoh kibang ahi.
