Home L Seikholen Khongsai Vacha hinkho akon kihilna

Vacha hinkho akon kihilna

66
1
Vacha
Vacha

Khankhology Online Textbook

By- L. Seikholen Khongsai,
Pantha Chowk, Srinagar,
(09/08/2022 (Tuesday)

Vacha hi Pathen thilsem, chunga lengthei ho lah a khat ahi. Vacha hinkho hi lung gil tah a gel thei tampi a ume. Vacha te kilungset dan hi thilsem ganhing ho lah a kilungset hinkho a atheng loi ahitai.

Masang laichun Vacha te nupa khat ana umin ahi. April lha ahung kipan tan thingna louna hojong anou thah kit tan ahi. Ju le va te din jong tui thah phat le nou keu phat chu ahung lhung tai. Hiche Vacha te nupa jong chun Tui thah nading Bu/Buh asa lhon in kiseimo tah in pon hal, thingna go leh hampa nangbu go tampi alhoh khom lhon in Go le dai kai jong leh gotwi daitwi in asuh kot thei lou nadin Bu akisem lhon tan, api chun lung monga tui a-op thei nadin akisem tup lhon tai. Phat chom khat jouvin api chun tui ahitha tan ahi. Tui thum athah jouvin api chun atui a op tan ahi. Api tui opsung chun achal chun api ding neh le chah ahol in, an athah ji in chule api chun lungmong in tui aki op theijin ahi. Jan teng leh achal chun api tui opna koma chun atou khovah vah ji in, api le atui chu asuse thei ding le sihmi chenaija kon in aveng doh in ahi. Achal chun jan seh leh duty abol in, jankho vah vah chun ihmu louvin api le atui kitup theina din jan hah khovah vah chun duty chu apoji in ahi. Sun jong le api neh ding chun an le neh le chah ahol in ahung thah thah ji ahi.

Hiti chun api tui keu kahse chun an thah in apangin gun chu tah le thachol louhel in ajinu vah chun apang jingin ahi. Hitia an athah lai tah nikho khat chu ahung vailhung geitan ahi. Api jong alung adong tan, ipidia kajipa hi tunia hibang lom a hung vai gei ham tin alung kham lheh tan ahi. Alung kham vangin atui op chu dalhan apot thei kit pon, chule ahol a che ding jong hoilang gam a vaitham ham ahet lou jeh chun ahol nading jong ahe kit pon ahi. Chulema, atui thahna mun chu adlhah leh Sihmi te Chenai ten Va tui chu asuhset peh diu ahi kit jeh in adalha nom pon ahi. Api jong agil kel tan hin lah apot thei dehpon ahi. Kho thim kon chun Achal pa jong nah nah in ahung vailhung tan ahi. Hinlah nidang vailhun toh kibang louvin, ajipa keng lang khat beijin ahung vailhung jotai.

Akeng umlou chu ajinu amusah nom pon, asel guh in hahsa tah chun abuh umna mun chu ahung lenglut in, abuh geija chun atouvin thachol tah in a umtan ahi. Hichu ajinun amu in, amul hochu thisan naisan anat deh duh in ahi. Abuh geija akeng lang khat bouva atou chu api chun amudoh tan ahi. Ahipoi ipidia hibanga nahung vai gei ham tin adong tan ahi. Achal injong ima atipon kahung kisuh khah ahi tin aseipeh tan ahi. Jan khang ahitan achalpa jong ihmu thei louvin akeng langkhat kikap bong chu thisan along in, na asah in athoh lel in hiti chun genthei tah in akhovah tan ahi. Hinlah ajinu kom ah ahet sah pon ahi. Ajingin matah in athou kit in api ding neh hol in avaikon kit tan ahi. Ama keng langkhat chu pasal khat Vacha kap a che khat in ahin kap boh peh ahin vangphat umtah a thilouva aji nu kom langa hung kilethei kit ahi. Hiti chun tibukim louvin ajinu din neh le chah ahol in genthei tah in hinkho amang tan ahi. Hitia akeng langkhat min akap boh peh chu ajinu kom ah seileng genthei val in te tia agel jeh a asei peh ngam lou ahi. Chutia ajinu tui op laitah hijongle ajinu dia kitah tah a hinkho mang ahi jeh in vacha dang kiti mong mong toh kivop louhel a hinkho aman ahi. Ajinu dia kitah tah pang jinga, ama dia neh le chah jong genthei tah a ahol a an athah jing ahi. Hitia chu vacha te hi aji dinga kitah thh a pah cheh ji ahiuve. Hiche hi lei mihem te dia Vacha te hinkho akon kihil nathei tah khat ahi.

Hitia min akap khah nikho apat aman jong ching thei tah in a anhol na ah hinkho amang tan ahi. Phat le nikho achal jingin api chun atui ahinkhe lha tan anou keutai. Anou ahung keu laitah chun Vacha chalpa jong akeng bong chu ana set dam tan hi. Hitia akeng umlou chu abohna lai adam phat in ajinun nikhat ahin mudoh tan ahi. Nakeng ipi ti ham tia adoh le tui na oplaitah a min eikap boh peh ahi. Hinlah seileng nalung neo ding jeh a kasei peh lou nahi. Tun vang i-nou te jong alenthei tan chujeh a kaseidoh ahi tin asei peh tai. Hiti chun anou keu jouva pat chun anupa lhon in anou te ding neh le chah hol in apang lhon tai.

Hitia anou te ding neh le chah ahol laitah lhon in nikhat chu mikhat vacha kap pa khat chun Vacha api( femaile) joh chu ahin kap lhatan ahi. Api akap lih phat chun achal jong ahungjam in abuh umna anou te umna mun chu ahin del tan ahi. An amu kham kham chu ahin kipoh in anou te chu avahva tan ahi. Hinlah anoute chu neo nalai ahiuvin api umle umlou jong ahepouve. Achal chun anoute chu genthei tah in avah in ahi. Ajingin ajinu kikap khah namun chu guh thim in agahol in hinla ajinu mel chu anung mu tapon ahi. Aji angaijin akap in amu lou phat in lhase tah in ahung kinung letan ahi. Hiti chun gunchu tah in anoute avah in ahile nikhat hi anoute jong anqkhqng tou un cjile ahung lengthei gam tauve. Ol ol in anou te chu lhaving jah a lendan akipatepsah in ahile ama hojong ahung leng thei gam tauve.

Hitia vanou te jong ahung lenthei phat uvin len gang dan, len ngan dan, lentou dan len suhdan chule kisel dan, kichop dan abon chan ahil them kit in ahi. Lendan athep sel masang seuvin apa chun anou te chu munchom ho ah apuidoh pon ahi. Ama banga alen thei kahseuvin anou te chu avah in akhou khah in ahi. Hitia anu um tahih jongleh apa in ijakai ahil them phat uvin Vanou te jong Abu dalhan aleng gam tauve. Alen len uleh apa/achal pa dalhan aleng mangun khat cha ahung kinungle tapouve. Apa chu achangseh in adalhauvin, anou te jong ama ama hitheina cheh in aleng mangun anopna thei chan in hinkho amangun apa umn lam lam jong ahepha tapouve.

Hitobang chun mihem te jong nupa kikah a kitah na hinkho hi ichan a thupi ham igel doh jing diu ahi. Numei jong ajipa dia kitah ding, pasal jong ajinu dia kitah ding angaijin ahi. Insunga cha te khankho ding gelna a minu mipa hi vaikon jing hinkho aman lhon dan iheuve. Inu ham ipa ham chun atoh atham na ah alei hinkho hung bei taleh ahing jo jo chun 100% acha te chunga mopohna anei ahi. Minu seh seh in achate chunga mopohna anei ahipon pasal seh seh in jong anei ahipon, anilhon a mopohna kibang chet a anei gel lhon ahi. Insung semna dinga neh le chah sum le pai holna a jong mihem in hetlou kah a thina le manna kitoh thei ahi. Chate khankho ding gelna leh neh le chah sum le pai jong genthei tah le hahsa tah a ahol lhon a hinkho aman u ahi. Hinlah Vacha te ahung let doh uva anu apa dalha a alen mang jel banga mihem ten inu ipa idalhah uva kengmang thwi ihipouve. Isen itoija pat ihinkho khohsah jing inu ipa hinkho hi, khonunga eiho ihung khanlet teng uleh inu ipa hinkho ile vet diu ikho to diu ngai ahi. Inu ipa ahung tehset tengu leh athau bei ja hat jou talou u ahi. Ineo lai uva inu ipan ihin khou khah banguva khonung jong leh eihon inu ipa te chunga vetsui nading a mopohna len tah inei u ahi tichu Vacha hinkho a kon a kihilna ineiju ahi.

Asim jousen kihilna a ineinthei nadiuvin lunggil in ana gel khom cheh ute. Kakipah e.

©️ copyright: Hiche articles hi asunpa phalna bei a mundang a publish louding in temna ahung kinei in ahi.

Articles hi anom lheh e nati le anoiya “LIKE” button khu meh in writer ho na support nau vin, chule seinom nanei le anoiya comments nahin bolthei u ahi.

Site nalut a notification pop up hung potji ho allowed anabol ji uvo maban a thusim thah ahung ki post teng notice namu ji diu chule Bell button a subscribe kiti chu meh un.

Thusimbu mobile app ki install nom hon Google playstore a “thusimbu” tia search nabol u le namu lei diu ahi.

Previous articleLIM LE MEL, JAT LE NAM’A KITHET BOL LOU DING
Next article5 MINUTES WITH TANGPA MINNEO DOUNGEL

1 COMMENT

LEAVE A REPLY

Please enter your comment!
Please enter your name here