Home Lahkhom TUNIN MINU LEH MIPA TEN CHATE DIA ETOBANG GOU NADALHAH PEH UVEM?

TUNIN MINU LEH MIPA TEN CHATE DIA ETOBANG GOU NADALHAH PEH UVEM?

214
0

KHAAL TWI THENG
presents

|| Thusim Chomcha ||

~St kuki
(7085383639)

Tunin minu/mipa ten igel diuva kidei sah chu “Chate dia etobang gou nadalhah peh unam?” tihi athah beh’a igel diuvin kahin tahlang nomme.

Ajeh chu khonung a chate khankho di gelna jalla nang in na leiset hinkho beikah a nadalhah ding chate ho dia nadalhah peh chu apha ham? Apha lou ham? tihi apoimo in ahi.

Khonung’a Chate dia gou thupi dan thusim khat akon anave khom ute.

Tom Smith kiti mipa khat hin athi ding konin nikhat achate akou khom in, achate ahung kikhop kim jou uhin apau chun achate jah’a, “Boi,keila kateh tan kaleiset hinkho beikon hin kakho nung hinjui tei uvin” tihin availhah in ahi.

Ahinlah achate ho chun apa komma, “hepa..! Na account balance lah zero balance ahin keiho dia ima lah neida lhah peh’u aumpon, eti nakhonung hin jui ding’a nei sei uham?” atiuvin anom tapouve.

Hinlah chomkhat jouhin, apau chun ahin thisan tauvin, achate chu adon cheh uvin aum tauve. Amaho lah a Sarah Smith kitinu chun International lah a dia Company lentah khatna hin Interview agajao tan, interview a ding chun mi tamtah hin kigot na anei uve, amajong agajaovin ahile chomkhat jouvin ama interview phat ahung hitan agalut tai.

Hichea Interview bolpa chu hiche company a alenpen pa chu anahi, aman Sarah chu amin ahin dong tan ahile numei nujong chun kamin “Sarah Smith” ahie sir, ahinti chun Company neipa chun ahet khah bang chun, “Napa min ipi ham?” tia adoh peikit leh hichun Sarah injong kapa chu “Tom Smith” ahie sir! ahin tikit phat chun, Company neipa chu ahung mae seuseu in Sarah jah’a, .”boi, Tom Smith chanu nahile Ken ima doh be ding kanei tapoi, interview a pass sa nahitai. Jeng jingkah leh hung inlang na appointment lekha hung kilah tan” ahinti peh’e.

Hichun Sarah chu alung adong tan ahile company neipa chun, “lungdong ta hih in tunia hichan kahin phahlo najeh hi napa thutah jeh leh akitah najalla hichan hi kahin phah ahi, napa akitah bang’a acha nang ho jong nakitah tei diu katahsanne.”

Hiche thu chu Sarah Smith in ajah jah chun apa ageldoh jing in abei ding konna “kakho nung hinjui uvin ” ati chu apetna ipi aseina ahi anahetlou jeh uva anada uchu achainan Sarah Smith chun ahin hedoh bep in apa chung’a kisihna lentah aneiyin hinlah apan adalhah peh’u “kitahna” chun amaho ding chun gou thupi tah khatnin ahung pang tai.

Chomkhat jouhin hiche anatoh na company neipa chu ahung tehtan ama pension che phat ahung hiphat chun a company a ama khel ding chun ahin hol leh akitah ding koima amutapoi, hinlah alah uva Sarah Smith chu ahin kouvin aseitai, “boi..! Keihi pension che ding chu kahitan, hiche company vetup dia mi kahol vang in kamujou poi, hijeh chun napa kitah bang a nang jong nakitah ding katahsan in keikhella hiche company vetup dia tahsanna neitah a kahin lhen nahitai” atin Sarah Smith chu ama company vetup ding chun atung doh tan ahi.

Hiche chu Sarah Smith in agel leh apan ima adalhah peh louvang uva kitahna ana dalhah peh chu alainatpi in hinlah apan amaho dia apha ding anagon peh jal chun kapan jong kana hetthem lounau eingaidam nante tin aum talou apa chung’a kipana mitlhi pum chun ama hung lolhinna thuguh ahi chu apa kitah najal ahi mipi ang’a mit twi vachut chut chun anahoulim in ahi.

Hijeh chun eiho lah a jong minu/mipa hon tuchanna khonung’a chate ding’a etobang gou nadalhah peh nah uvem? kithah gel tem uvin, nang man nadalhah peh chu sum leh pai seh-seh hitam? Sum leh pai chun echanna ahinkho u asem jou ding hinam? Sum chu alam louva ajah khah diu jong tijat aum’e. Hijeh chun leisetna naum laiyin chate dia kisem thah nethei gou chu sana/dangka, sum leh pai sehseh chu gou ahipoi, nang ma kitah na seh seh jong chun nabei nung teng nachate khankho chu sum leh pai dalhah sang’a mantam tah a anei theiyu ahi.

Sum leh pai chu apoimo nai, hinlah hiche sang’a poimo joh leh mantam joh chu nang ma kitah na chu ahi. Hiche nakitah nachun acham louva nei leh gou, sum leh pai alam doh thou+ ding ahi tihi minu/mipa ten ihet diuvin akidei sah’e.

NOTE: Hiche thugol kahin jih nasung’a sutkhel, alhinglel, lunggel kibah lou na ho aum khah leh ina kingaidam diuvin kahintem’e.

Kakipah’e.

Thusim hi anom lheh e nati le anoiya “LIKE” button khu meh in writer ho na support nau vin, chule seinom nanei le anoiya comments nahin bolthei u ahi.

Thusimbu Machal jing thei na ding a pan lanom ho kipah tah in lem ahijing in ahi anoiya button “Click Here” khu meh utin details anasim ute.

Previous articleSEPAI HINKHO THUSIM-I
Next articleKUM 50 VAL KAKHOL JIN THUSIM KIDANG