Home Gogou Chongloi THUSIM NGAINOM UM-I

THUSIM NGAINOM UM-I

157
0

Episode-(1)

Written : Gogou chongloi

Masang lahin lenggam lentah thupitah khat ana um in ahi. Heche lengam a lengpa chun ji gup aneijin ahinlah lengpa jite chun lengpa din chapa aneipeh ana umpon hijehchun lengpa kipani hihen lhaset nikho hijongle ama dinmun hinkhel ding chapa aneilou jeh in ipi hijongle lengpa kipa nading chu aum theiji pon ahi.

Nikhat lengpa injong a semang pu kipui in agam sung umdan le mipi chendan le kiman chahdan kholding a semang pachong pa kipui in ahung vaikondoh lhontan ahi.

Hiti chun thil lelo avat apa kipoh in lam saotah ahin jot lhontan ahile lengpa leh asemang pa jong alamjot nalhon alal var lhon phatchun thingphung lentah khat noi munkhat in akicholpa lhontan ahi. Chomkhat jouhin lengpa chu alal var jeh in thingphung lim noija chun ana imu lhatan hinlah a semang pa vang imu lou in lengpa vekol din lim geu chan aummin ahi. Chomkhat jouhin chung a leng vakhu teni nupa hi lengpa kicholna thingphung chung abah leh a chun hiche vakhu teni nupa chu ahung kichol lhontan ahi. phat chomkhat jouhin hiche vakhu teni nupa lah a achalpa chun hitin ahin seitan ahi.

VAKHU CHALPA– Kaden lengpa hi lungset aum nalom me ahin tin ahi.
VAKHU ANUPA– Edia lungset um hitam?? tin adongpai tan ahile

VAKHU CHALPA– Lengpa hi achena ding lampi ahin thina thei thang ana kikam intin hiche thina thei thangkol achun thi teitei tante. atipeh tan ahi.

VAKHU ANUPA-Chuti chu ahile ipi bolle aki hinso thei dem?
VAKHU CHALPA– Lengpa kihinso nathei dinghin, asemang pa achih theija ahile a huhdoh thei ding ahi. Atipeh tan ahile thingphung limnoi ja um semang pu chun chung’a vakhu teni nupa kihoulim na thu chu aja in aki kelchih tan ahi.

Chomkhat jouhin vakhu achalpa chun hitin ahin seikittan ahi.

VAKHU CHALPA– Kaden lengpa hi lungset aum nalom lomme ahin tikittan ahi.
VAKHU ANUPA– Epi dia lungset um hitam?

VAKHU CHALPA– Lengpa hi damsel a akinung le phatle in alut ding konle in gate aphah phatle hungchim lha intin hiche achimlha chun lengpa chu adel lihding ahi. Ati peh tan ahile

VAKHU ANUPA– Chuti chu ahile ipi abolla pha hitam??
VAKHU CHALPA– Lengpa asemang pa achih theija lengpa alut masang leh aman vohchim peh masat leh lengpa hindoh thei tante atipeh kittan ahi.

Phat chomkhat jouhin, vakhu achalpa chun hitin ahin seikittan ahi.
VAKHU CHALPA– Lengpa hi lungset aum nalom lomme ahin ti kittan ahile
VAKHU ANUPA– Edia lungset um hitam??
VAKHU CHALPA– Lengpa hi damsel a in alhun phatle jan hungki chol intin, janphat le ana imu mil tan tin chuteng jankhang hunglhung pai intin, jankhang lai kho helou a aum laitah le a room sung’a gulpi sampi hunglut intin lengpa chu atha lih ding ahitai.

Tia ahin sei chun, VAKHU ANUPA chun akihinso nathei din ipi bolle akihinso theidem?? tin adongkittan ahile

VAKHU CHALPA– Lengpa semang pa hi achih theija lengpa imut nungle hiche lengpa imut chu aman lim geu chan umpi henlang phaten vengbit le kihinso thei tante atipeh kittan ahi.

Phat chomkhat jouhin VAKHU CHALPA injong hiti mama hin ahin seikittan ahi.

VAKHU CHALPA- Lengpa hi lungset aum nalom lomme ahin tikittan ahile
VAKHU ANUPA– Edia lungset um hitam??

VAKHU CHALPA– Lengpa hi damsel a jing hungthou intin chomlou kah in anneh phat hunglhung pai intin, chuteng chule an hinne intin hiche a anneh nasung a chun ling ana jaotha intin lengpa chun hinki neh khah intin chuteng alol a kikam den intin thitan te. tin aseikit tan ahi.

VAKHU ANUPA-Chuti chu ahile aki hinso nathei din ipi bolle apha dem tin adongkittan ahile
VAKHU CHALPA– Hiche a semang pa hi achih theija lengpa neh khella aman aneh ding chuteng le lengpa sohpa hi hungthi tantin hinlah lengpa hin asemang pa hi a it na ahileh asemangpa thinung leh atahsa hi phate chan koi henlang lengpan ajite lah a aneopennu in chanu ahin neija kum sagi ahung lhinphatle achanu chu alol tan henlang athisan the khumle asoh pa asemang pahi hung hingdoh kit tante atipeh tan ahi.

Hitia vakhu teni kihoulim nathu chu lengpa semang pan abon in abulla pat achaina geijin aja sohtan ahi. Hichun chung a tou vakhu teni nupa jong alengmang lhontan hichun lengpa jong a imut nakon ahung kingkhang tan amani jong maban jondin ahung kipat doh kit lhontan ahi.

Lengpa le asemang pu jong akichol na lhon a kon in ahung kipandoh kitlhon in lam ahin jot kitlhon tan ahile ejou a akichollhon pet vakhu teni nupa kihou lim ajah jehchun lengpa masang sang in ase mang pa ahung peh in ahi. Hitia ahung jinglai lhon hin nilhangkai chin hin khopi neocha umna khat aga lhung lhon in hinlah langkhat a seidin hiche khosung chu tu masang jep chun lhomi anaha lan varjeh in khopi lutna dingkon chun munkhat kokhuh akilai tong in sounang akam un hiche thangkol a chu khosung mipi te chun lhomi ho a kon kiven bitna dia anakam u hidan ahin abul tella patsa lengpa masang a asemangpa hungmasa jing ahijehchun lengpa semang pa chu hiche kokhuh sungchun alhalut tan ahi.

Vangphat pi in lengpa semangpa chu aha kisuh khah pon thina lomlom vang atohpon semangpa jong sou kikam ho in amal phei ho akeng ho asut peh jehchun na asa varlin apengtan ahile khosung a um gollhang thahat jousen aja in lhomi hiteidin aging cha um heicha chempong kichoi pum in khopam a sounang kikam namunchu ahin dellut taovin ahile lhomi hilou in gamsung a lengpa leh asemang pa anahi phatchun khosung gollhang honjong agangthei pen in lengpa semangpu chu aladoh un khosung a apolut un ajen taovin ahi.

Chomlou kah in janmu ahung thimlha paitan hichun lengpa injong khosung a thil umdanho jouse hiche khosung mipi te chu adongtan ahile khosung a um ahan lang jepjep hochun athu umdanle achennao gamsung hi agimnei danho chuleh solam tuikul pang a chengte lhomi numei sagi ho akhan set danho jouse chu lengpa kom in asei soh taovin ahi. Hiti chun akihou limlim un ahile janjong ana sotthim tan amaho jong akichol gam taovin ahi. Lengpa semangpu kisuh khah jehchun lengpa leh asemang pu jong aban machal theita lou in hiche khosung chun lengpan asemangpu chu asohte ajensah in hilai khoneocha chun chomkhat a din apansa lhontan ahi.

Nikhat lengpa jong asemangpu imut pet hin thalpi kichoijin sakap din avahdoh tan ahile hiche khosung a um uicha achal khat achih a chingthei gamlen sakap kiti ho a ana kipui jing uicha khat aum in hiche uicha chun lengpa nungchu ajui in lengpa toh sakap din ache khom lhon tan ahi.

lengpa leh asemang pu’n ahin jui nungah nu chu hiche khosung a haosapu chanu ana hitan ahi. Lengpa leh asemang pu jong in alhun lhon chun khosung a haosapu chun thupi tah in ana vailhun in akho chaga hotoh lengpa vailhun na an neh khom abol uvin nom asa thei lheh jeng un ahi.

Hitia nomtah a aum jehchun jansot jo ana cheman tan haosa pun jong akho chaga te chu jan choldo din ama ama incheh jondin asol gamtan ahi. Jan in haosapu injong lengpa jah in hitin aseitan ahi.

HAOSAPU- Aw lengpa tunni lhah ka inna kavai lhun hi nakipa hinan?? tin adongtan ahile,
LENGPA- Kaki pah mana ae Haosapu nikho khatle kipa thilpeh kapeh teitei ding ahi. atipeh tan ahileh,
HAOSAPU- Keijong kakipah ae lengpa nalung got bangtah leh nalung nachim a kana vailhun hi neiki papi jeh in keijong kakipah ae tunni lhah ka inna nomtah in choldo lhon inlang jing nikho leh nomtah in vaikon kit lhontan atin lengpa leh asemang pu lupna dingchu achanu asemsah in lengpa leh asemang pu chu akichol do sah tan ahi.

Janjong ana chal jing in khovah ahung lhung in lengpa jong amut na kon ahung khah leh janna haosapu inna donlop tabang a nom lupna chung a akichol do chu hita lou in gamthip lah gammang sung a lhemlhung pang khat a nachang abong khat ana kikhap a ana imut chu ahin hedoh tan ahi.

ABAN OLLIN ANA SIM TAOTE
KAKIPAH-AE

Thusim hi anom lheh e nati le anoiya “LIKE” button khu meh in writer ho na support nau vin, chule seinom nanei le anoiya comments nahin bolthei u ahi.

Site nalut a notification pop up hung potji ho allowed anabol ji uvo maban a thusim thah ahung ki post teng notice namu ji diu chule Bell button a subscribe kiti chu meh un.

Previous articleThangminlen Samuel Haokip
Next articleMEL A KIHETTONA VANGSET CHUNG