Thusim jih kithem chuh phat

Hin sun Hin sun un!

Vannoi Lockdown ahung hi tohlhon in mun chom chom a mipi hon moh um sang in tia bol thei thei abol un Social Media ho a nasatah a athan ho imu diu ahin.

India sung a jong nasatah a natna hi ahung khan toh lhon a Inn a pat, potlou ding in eihon jong nasatah a support ibol diu ahi. Ahin nikho sotpi inn a kihen a ima bollou chu thil hahsa tah khat ahi toh lhon a bolthei tampi jong ibol diu tahsan aum in. Ahin KWC in hitabang phat a mipi moh umsung a lungmong a asim jing thei nadiu vin thusimbu.com a thusimho atam nathei chan in akikoi jing in. Maban a jong asang aja koi na ding thilgon akinei in ahi, chuleh Apps jong akisemdoh loi chal in ahi. Hiche apps hi Google playstore a akikoi in website a lut jing ahah sat jongle hiche ki install a idei deiphat a lut a isim nom  sim jing thei ding in ahung kibol in ahi.

Lekhasim kiti hi tulai khang in khangthah hon ibol behseh tapouvin, ajeh pen tah khat kisei le smartphone ihin nei u hiding ahi. Thil jouse ibolnom chan phone a akibol thei tan hitoh lhon chu lekhabu sim kiti hi ibol tapouvin ahi. Hijeh a chu sum le pai el tha le jung tampi lut a KWC in website le app hi mipi in eima phone a aphatseh a iman chah thei na ding uva hung kibol ahi. Social media ho tampi jong iman chah thei u ahinan ahin, website le apps iman chah’a isim u chu jatchom ahi chule nomchom ahi.

Crosby Haokip,
KWC

Ipi hile tuchung lockdown  sung hin ipi bolleng apha chom dem? Ipi phachom in kaphat ho kasu mang the idem? Tihi mi jouse nitin a ikigel diu ginchat aum in ahi.

Hitoh lhon a chu tuni a pat Thusimbu mangcha in thusim jih pan nakhat phatpha inei thei diu in temna ihung kinei un ahi.

Mihem chu Pathen in talents ipeh sohkei u ahin, koima talent neilou in aumpoi ti chu ihei lou diu ahi.

Hitabang i talents nei u chu aphatchom na le mipi lungnopna thei a iti iman chah thei diu ham tichu igel phat u ahitan. Hiche a ding thusim jeh hi iphat ong sung uva inbol uva KWC a ihin thotdiu hi temna ahung kinei in ahi.

Hitabang a thusim ngai tahtah sim nom um tahtah hung kisun ho chu thusimbu a hung kikoi ding mipi simthei ding a social media ho a hung ki post ding ahi.

Ipi tabang thusim ho ihin pehthei diu ham?

• True events (eima ina tokhah: kichat um, lungset um, nuijat um etc.)
• Fiction (atah hilou ilungthim a hungpot mi sim a nomtah hi ding)

Ichan a sao a sut a pha ham?

Thusim kiti chu atah hihen alhem hi jong le achom a ahile asim ho ding a jong lungnachim umlou ahin, hitoh lhon a chun asao lai chan in apha in chule 3000 words chunglam ahi ding dei aum in ahi.

Iti sut a pha ham?

Lekhasut kiti hi abei pon ahin koima athemsa a peng aum pon ahi, ikithem chuh pao chu ahi athupipen. Mi lekha sun ho lekhabu ho sim utin asut dan ho vet a pha ahi chule inao uva pat ilekha sim naova ihet diu ahi. Sentence khat a hoilai mun a comma koi ding ham hoilai mun a full stop koi ding ham. Chule mi message ithot teng u le thuchang achom natheipen in imang un, hitabang chu thusim sutna a vang iman lou hel ding u ahi.

Kathil thot thusimbu a hung pang mong mong ding hinam?

Hichu ahile nangma thilsut a akingam in ahi, committee in nathilsut chu vetchil na anei ding ahi. Aphapen vang chu nahin thot masang in avel avel in sim inlang suhdih thei hin sudih le chun hung jao tei tei ding ahi. Namin le na umna hoisel in hinjao sah in nathil sutna jouse a.

Hoiya iti submit ding ham?

Hiche laimun a hi anoiya form submit na khat umding ahin, hichu mangcha a jong thot jeng thei ahi. Ahilou le email id: thusimbu19@gmail.com or WhatsApp number 70851 68510 a jong hinthot thei ahi.

Thusim sun a athem mong mong hohi kipa thilpeh umding ham?

Hiche hi Committee in akidei pen chu ahi, ahin ima neilou a kikipan ahin tu dinmun a vang kibol joulou ding ahi. Ahin khonung a Patron member ahung kinei ding aki kinem in ahi. Hitabang dinmun tichu nathil bol u kahin kipapi uve tia milounglen mihongpha in neiteng u le thusim sunho jong kipa thilpeh ihin bolding u ahi.

Thusimbu nakithopi na thei pen!

Thusim sim lam thanom hon ibol thei pen u chu hiche thusimbu hi inam sung uva muntin gamtin alhun ding akidei in ahi. Hiche nading a chu hoilai mun hijong le na loi napai na innsung mite kom a share nabol jing ding u hi akingai chapen ahi. Mi jousen isim uva lungmonna le kipana inei diu hi akidei sah pen ahi.

Ipi Lunggel Nanei em?

Anoiya form hi nahin fill up a ikijah mat thei u ahi.

[contact-form-7 id=”3594″ title=”Contact form 1″]