Home Crosby Haokip THUSIM ABANGE-1

THUSIM ABANGE-1

470
2

Crosby Haokip

PART 1


Chamkang lai ahivangin, jingkah khat hi go ahajuh jehin dap kasa valin hijeh chun ka thou jou tapon ahi. Chutia nomtaha mang kanei laiyin kanun ahin thoukhangin,
KANU: “Boi,thouvo mi ahung e,” ahung tin ahile, kaihmut nop laitah ahijehin kanu chunga kalung hang lheh jengin;
KEIMA: “Ipithu ham henu?”
KANU: “Kahepoi, achanu a ding home tuition ngaicha hinte.”

Chuin keijong kakithou dohin ahile, insunga nupi khat anatouvin ahi. Chuin keijong kalutin ahile amanun kakoma,
NUPI: “Boi, nangin tuition nabol khah ji ham?”
KEIMA: “Henge henu, kana bol ji e. Itile nati hitam?”
NUPI: “Boi, kachanu class 10 simlai, ama dingin home tuition kangai chan, hijeh-a chu na on thei khah le lekha hung hil tang o.”
KEIMA: “Chutia nei ngeichat le hung tah tang.”
NUPI: “Kakipahe boi, ahithei le jing ma ma le hung tang o?”
KEIMA: “Henge henu,” katin amajong akile tan ahi.

Ajingin keijong kaki gongin home tuition a dingin kache tan ahi. Chuin kalhunin nupi nun kajah a,
NUPI: “Boi, tuni kachanu potdoh chu o, jing johle hung tan o.”
KEIMA: “Akhoh hihe henu, akiman man phat leh kilah peh tante,” katin keijong inlang kahin le jot tan ahi.

Chuin keijong kamut asohin lupna a kalum kit tan ahi. Chutia nomtaha kalup laitahin kanun eihung thou kit in ahile kalung ahangin,
KEIMA: “Ashh, nang tah jong hi mi imut nop pet pet jongleh nei thou nom ji e.”
KANU: “Boi, na-Loipa Lelen ahung e,” atin; chuphatin keijong kakithouvin ahile, kaloipa insunga anatouvin, chuin kaloipan kakoma,
LELEN: “Min, tunile nungah gollhang ho Saheibung peak a picnic che ding atiuvin, kigong o, eini jong che hite.”
KEIMA: “Chechu hichu me kajahnom, ana kigong o, kahung pei pei ding ahi,” katin ahile amajong ache tan ahi. Chuin keijong kaki gongin, kakichai chaiyin kaloipa kom kajontai.

Chuin kei le kaloipa jong kache lhonin, ache ding jouse Tuibong Bazaar a kakisu khom uvin bus khatin kakipatdoh tauve. Kaloipa jong anungah nu koma atoutan keijong thip chetin kachangin katouvin earpiece kakilah dohin, Luvjoy in asah, “Thusim abange kahinkho hi” kiti la kangaiyin ahile, kajah masat nipen jong ahin athu gil kasa valin kalhi toh kanap toh apan akai leovin ahi.

Chutia mitsing puma la kangaiya kana lunghel laiyin eihung kibengin, keijong kakin valin ka-earpiece kabil a konin kabotdoh kinchelin kavet leh nungah khat kakoma ana dingin, amel kamu chun hoi kasa valin kakam a-oh leotan ahi.
NUNGAH: “Heu, la nangai leh kakou na o jong najah phah lou dan ahita e na?” atin ahung nuiyin ahi.
KEIMA: “Kalunghel hichu o, nunlui ho kingai hih ta,” tin kale totin ahile ahung nuiyin,
NUNGAH: “Ngaival hih o, ajole kap khan nate. Heu, nakoma chu kahung tou thei ding ham?” atin ahile kajaman pon,
KEIMA: “Hung tou tang, nang touna dinga kana koi ahiye.”
NUNGAH: “Heu, nang vang napha tave.”
KEIMA: “Tou loi loi kom o, ahidan danin kamthem kisa hihin,” tin kadaiyin ahile, ahung nuiyin,
NUNGAH: “Mikhoh!” atin anuiyin,
KEIMA: “O, khoh neisah kitta tua,” katile hanuiyin ahung nuiyin ahi.
NUNGAH: “Heu, nangkoma kium le kinui nui jeng ding ahiye, heu, tuni le eini kivop hite ong?”
KEIMA: “Umba, lim jong ikilah khom ding ahi nalaiye,” katile ahung nuiyin,
NUNGAH: “Keitoh lim nakilah leh nanungah hon nahin houpi nomlou ding hita chu.”
KEIMA: “Hoilah nungah, nungah mel jong kamu kha hih e. Nang hi apatna nahi nalaiye,” katile eihin sonin,
NUNGAH: “Ko val hiho nangpa jong hi. Adih dih seiyin.”
KEIMA: “Adih kasei chula!”
NUNGAH: “Ngadoh hite, kajah nom hihe.”
KEIMA: “OK, ngadoh hite,” katin ahi.

Chuin keini jong thip chet in akihou jo sang umlou vin katou lhontan ahi. Keijong kalung dongin kakiheiyin kaven ahile, ana lhisohin; chuphatin kakiphat lam in akoma,
KEIMA: “Ibola nalhiso ham? Nadamlou ham?”
NUNGAH: “Heu, ima kati po e,” atin ahung kap dohtan ahile, kenjong kajet kavei kave loi chelin koiman eimu doh lhon lou jehin ka-handkerchief in alhi katheh pehin,
KEIMA: “Ipiti nahi ham seiyo?”
NUNGAH: “Heu, tu le tu chun kanu damlouvin hospital a apolut uve, kei kile tange,” atin alhisoh soh tan ahi. Chuin kalhem lungmong in,
KEIMA: “Nao, henu chu ima ti ponte, lunggim hihin, mihem chu nikhat leh kidammon tin; nikhat leh kihat hihta, lunggimna ding ahipoi,” katin amajong ahung bi nah nah in kakoma,
NUNGAH: “Adih e heu nathusei chu. Nang umhih le chun tua hi kachanga kakile ding agam alei kahetlou toh.”
KEIMA: “Nao, ahile namin ipiham?” katile ahung nuiyin,
NUNGAH: “Heu, nao, tia neihin kou chu kakija pin, ahin kakipahe, kamin Nengcha ahiye.”
KEIMA: “Nao, hepan ipi abol ham?”
NENGCHA: “Heu, hepa sotin abeita e. Hepa abei phat’a henun genthei taha Tuibong Bazaar a hol ajoh ahiye.”
KEIMA: “Henu chu lungset aum vale, lunggim hih ta o.”
NENGCHA: “Kalung agim po e, henu chu Pathen jalin damtei nante, ahile heu, nangin class ijat nasim hitam?”
KEIMA: “Kei tua Ccpur College a 5th Semester kabol laitah ahiye. Ngla?”
NENGCHA: “Keina heu, kumkit leh class 10 board exam kapeh ding ahiye.”
KEIMA: “Ahile, tulah lekha naha sim ngai ding tachu la na? Tuition nalah lou ong?”
NENGCHA: “Tulah kaha sim e, ajeh chu henun hoitahin eitoupi ji in chule eihil thei ding home tuition bol ding mi ahol’a mu jong amu hita le kilom.”
KEIMA: “Thangset saha, na-ojapun hung kipang thei le pha ding hiya,” tin kadaiyin ahile amanjong:
NENGCHA: “Heu, tah tah a nangin neihil tang o, thusei nathem e.”
KEIMA: “Aboi tave na? Janhia chu nupi khatin achanu hil dinga eina sei hita chu o.”
NENGCHA: “Khoh loupi chu heu, hoitahin hung pang tang o, keivang henu adamlou leh tuition jong lajou ta ponge.”
KEIMA: “Nao, lunggim hihin, henu damhih jongle nalah thou thou ding ahi.”
NENGCHA: “Um, Pathen phatsah himei hen,” atin nomtahin kakihoulim lhonin ahi.

Chuin sot louvin keiho jong kaga lhung tauvin ahi. Amun le alhang ho anomin thanop nop aumin ahi.
Chuin nomtahin picnic kamang uvin, Advent Christmas jong ahijehin Christmas la kasauvin, lamkol kabol uvin anom lheh jenge. Chule hiche nikho chu keidinga memorable day khat jong ahitan ahi.

Chuin keijong chair a katouvin lamkol bol ho kaven ahile, Nengcha in eihung kaidohin kalam khom tauve. Nom kasa lheh jengin Nengcha kaven ahile amajong kipahtah’a alam chu kaven kalung amongin, ahin chutah chun ka-phone ahung gingin kavet leh sms khat ahung lutin kenjong kasim tai, “Boi, achanu tuition lah peh dinga hung sei nupinu chu damlouvin tu le tu chun hospital a ahinkho abeitai,” tia kanun sms eihin thot chu kamu phatin kapona valin kalhisoh lhatan ahi.

Chuin Nengcha kaven ahile aman vang kho ahepha poi. Nomtahin alamin mailhaisel selin alamin ahi. Anu thi ahin hetdoh a ahin pohnat ding kagelleh kalung ase masan, amakhelin achunnu pul douvin kalhisoh tan ahi.

Kalhi lon min eihetdoh ding phatin munthip a kachangin kache dohin tan ahi. Oh, pasal taha kikigel’a, nu le cha leiset a melmu kit talou dinga ahung kikhen u vang hi ka-pasal hina amang jengin kakap tan ahi.

Chuin keijong sottah pi kakingaiton; chujouvin lamkol kibolna lang kahin jon kittai. Ahinla lhase taha kaum laiya kipahtah a Nengcha alam kamu chun kahung nuidoh ham ham in, ahinla aban ding kagel kit tengle lonlhin eichup thou thouvin ahi.

Chuphatin keijong lam talouvin chair a katou kittan, Nengcha umchan joh chu kave vetan ahi. Chuin Nengcha’n eihin koukitin kanompon; ahinla eikaidoh tei tei phatin thangkong lam atibang uvin lam mo sasan kalamtai.

Chuin Lenkhom jong akichaitan anneh na ding phat alhingtan ahile, kakile vah diu ahi kahetan kalunggim lheh tan ahi. Khojing thei hih hen lang Nengcha in anuthi hedoh hihle kanom ngeiye. An kaneh kon uvin jong bu le me eihin koipehin keini jong munkhat’a an kane lhom lhontai. Ahinla ka-anneh hoilang gei ahijong kahe tapon, kalungthimin, inlhun a Nengcha hinkho man ding dan bou chu kangaito to tai.

Chuin Nengcha’n eihin son khangin,
NENGCHA: “Heu, ipi lungnop mona nanei ham, namai athim thim jenge.”
KEIMA: “Ima katipoi, kadam thim hih e.”
NENGCHA: “Aboi tave na nadamlou chu, koiman la lou hinpo pontin, naha boi ham heu?”
KEIMA: “Ima katipoi, kapha nae,” katin kalunggim jehin, “Nangin tuitahin hin ne ta o, l kei kagil akel hih e,” katin kakhut kakicham tan ahile aman jong anga’n,
NENGCHA: “Heu, keijong kagil akel hih e, nehda tange,” atin kanung ahin juitan ahi.

Chuin aman kajaha, “Heu, ipi thu um ham seiyo,”
KEIMA: “Nao, ima aumpoi lunggim hihin kati ahibouve.”
NENGCHA: “Naha kiletsah thouve na?”
KEIMA: “Kakiletsah le aphatai, neiha houpi hih o, ka-mood ahoi hih e,” katile ahung lhisohin chuphatin kathusei chu kakisih lhehin, “Nao, lungkham hihin kati hilou ham? Ibola lungkham na ding naki hol ham? Nalungkham nomleh lungkham na ding tampi aume. Kahin peh ding ham?”
NENGCHA: “Heu, nangin neipeh ahipou le kadeimo poi. Neipen ipi ham nalunggim na?”
KEIMA: “Kei lunggim lou nang joh nahiye alunggim.”
NENGCHA: “Ahile heu, kei lungneo jeh joh hitan te, nei ngaidamin,” atin keini jong lungnommo tahin kaum lhontai.

Ahinla kaloihon inlang kile dingin kholhang ahin sam pan tauvin, Nengcha kavet le kamaiyah thimpi ajingin ahi. Nom le dale in alhun tengle achunnu longdamsa amu tei ding ahitan; kagelle kaponan van le lei kamoh vet vet tan ahi.

Keiho jong inlam kahung kile tauvin ahile, lampi jong anai chom chomin akilangin ahi.
Chuin in kalhun kon lhonin Nengcha koma,
KEIMA: “Nao, thukhat kaseiding nei ngai peh ta o.”
NENGCHA: “Um seiyo, kangainom e,” atin me seu seuvin aseiyin ahile, amel vetnom nom aumin ahi.
KEIMA: “In nalhun le koi anaum ding ham?”
NENGCHA: “Heu, henu hospital a konin damselin anapot tante, henu ana umin te.”
KEIMA: “Nao, nahinkhoa na-Wish thupi pen hinseiyo.”
NENGCHA: “Na heu, kei ka-Wish len pen chu; loi le pai phatah nei ding nang tobang,” atin jahcha tahin akam akisip in anuiyin, “Ahile nang a la heu?” atin ka-Wish len pen eidongin ahile,
KEIMA: “Nao, kei wish len pen chu nang nahiye,” katile alungdongin,
NENGCHA: “Ibol a mo heu kei pen tah hi,” atin in alhun le anu ngaiya aka ding kapohnat jeh chun,
KEIMA: “Nao, ka-Wish len pen chu nahinkhoa lhasetna mitlhi twi apot lou ding chu kadei pen ahiye,” katile akipahin,
NENGCHA: “Wow! Ka upa chun eilungset tave. Heu, lhisoh ponge. Nangin nei lhamon laisen nanao kei kap lou ding kahi. Lhisoh hih vehtang heu.”
KEIMA: “Henge, lhiso le ka kiti hi migenthei nu le pa neilou ho a ding bou ahiye. Nangin vang henu jong naneiyin nahin lungset pen na u keijong naneiye.”
NENGCHA: “Heu, kakipah vale, kap mong mong ponge,” atin ahile kakum na lhon dinga bus akingachet in keini jong kakum lhontai.

Ahinla keivang lunggimnan kadimtan; Nengcha, anu longdamsa musah sangin munchoma jampi ding kanom lheh jengin ahi. Hijongle ahithei lou thil ahijehin keijong kicha det detin inlang kahin jon lhontai.

In lam kajot kon lhonin akoma,
KEIMA: “Nao, na in chan u nahung thah inge, nain u het toh gomin.”
NENGCHA: “Heu, henge, kachangin kakicha e.”
KEIMA: “Nao, ajouva kathusei chu nahet nah chuna, kamitmua nalhi nahin potsah leh kakihoupi tahlou ding nahiye.”
NENGCHA: “Ash! Heu, nangtah jong hi; avel velin kasei nom hih e. Kap mong momg ponge kiti,” atin ahi.

Chuin keini jong kahung lhontan ahile, khojin noi ahitah jehin light avahin ahinla Nengcha te in chu nidang toh banglou vin light amun muna avahchan the thu tan ahi.

Chuin Nengcha alungdongin kakoma,
NENGCHA: “Heu, kain uva khu ipi kibol ham tunilhah chu, light avah lheh jenge,” atin seiding kahet lou phatin,.
KEIMA: “Henu, hospital a kon a damsel a ahung kile jeha min ahung vet u hinte,” katin kalhamon tan ahi.

Ahin in kaphah lhonna ding anaitel tul jengin kalunggimna jong asang cheh cheh tan ahi. In kalhung lhonin gate kaphah lhon chun insung a ka le mao ogin kithong kaja lhontan ahile keini jong seiding helouvin kakive to lhontan ahi.

Chuin kenjong Nengcha koma,
KEIMA
: “Kathusei chu nahet nah chuna? Kamitmua nahung ka leh nommo kasah ding ahi,” katile aman jong hoitahin eiven, chuin kadah bula akingamin akaptan ahi.

Chuin ajah a, “Nao, kasei sa hilou ham, ibola tua naka ham?”
NENGCHA: “Heu, nasei banga ka kiti hi migenthei nul e pa neilou hoa ding ahibouve, nati hilou ham? Kachunga aguilhung tai,” atin akap kaptan ahi. Ahinla seiding kahe tapon kaki-pasal saha Nengcha kapho pho vangin keijong kakitim jou tapon kalhisoh mantan ahi.

Chuin Nengcha’n kakoma,
Nengcha: “Heu, kap ponge; nanao kei neilungset jing poule,” atin kenjong;
KEIMA: “Henge, nao, na u keiman kanao bangin kahin gelin kahin lungset mama e,” katin ahile, amajong ahung kitim nah nah in insung kalut lhontai.

Insung kalut lhonin ahile anu longdamsa amittah a amu phatin keilam ahinven hakan ahung kaptan ahi.

Aban part 2 anasim ute. Kakipahe asim jouse Pathen in phatthei boh tahen.

©2018, Crosby Haokip All Rights Reserved.

Thusimbu Machal jing thei na ding a pan lanom ho kipah tah in lem ahijing in ahi anoiya button “Click Here” khu meh utin details anasim ute.

Previous articleNANGMAHI IPI A GILKEL DANGCHAH NAHIM SOPI ?
Next articleLUNGSET MASAPEN (First Love)

2 COMMENTS

Comments are closed.