(Poem)
Crosby Haokip(7085168510)
Kanam ngailutna thisan bangin along e;
Koiham aselmang jou dinga?
Egypt gama thisan lon bang ei me?
O kei thisan lon jong bang deh lou ding.
Kam in kaseiyin kalung in aphu tun tunin;
Setlei kaka-na itih le bang ding hitam?
O he! Kaka lai ni bang jou louding!
Kagam le kanam dinmun kavetleh;
Peogal lhung theilou kabange.
Mose’n Canan gam agaldot chun;
Akhel din Joshua thaneina apei.
Sim le mal sah le lhanga konin,
Leng le lal loupi tah hon ajabol ui;
Kanam mite kijabolna hoiba ham?
Laijon le laijon namchem in kisunton;
Khat changin Nengju Aisa kigot in;
Katham den ui Paran gamthip noiyah!
Melma saki’n eisulung jing ui;
Kanam thaneina beijou ding ahitai.
Marah twikha donin pu le pa gam ago jou tai.
Thutah kasei jehin lungmonna aum tapoi.
Vo kanam mite, hung kikhom un;
Keiman thuguh khat naseipeh vinge;
‘Pu le pa te chu itiha soh chang khauvem?
Itih-a chu sopi le sopi kisun to khauvem?’
‘Pu le pa chon’a chonlou miho chu;
Kanam mite ahipoi,’ tin seiyuvin;
‘Ban thahat ima ahipoi,’ tiuvin.
Vo Pakai, namite kahilouvu hitam?
Sunggil kel puma kanuteu taona,
Phaimit sing moa kalamkai hou panna chu;
Athon’a kile sah ding nati ham?
Athon’a nakile sah pou pou leh;
Kadanga kalei be den sah jengin,
Kamit muthim’in koi jengin.
