Home L Seikholen Khongsai THINGSAN (T.PHAICHAM) VANGKHO SIET THU

THINGSAN (T.PHAICHAM) VANGKHO SIET THU

82
0
BATTLE OF TWIBOM (SAJIK) IN ANGLO-KUKI WAR 1917-1919
BATTLE OF TWIBOM (SAJIK) IN ANGLO-KUKI WAR 1917-1919

SAHNIT

Writer: L. Seikholen Khongsai,
Laijon Sauson, Tuibong
Nisim 13th Septemeber, 2022

1993-1997 laija NASCN (IM) lamkaina a Naga ten mona bei Kuki milham tampi anatha uva chule kjo veng tampi ana suh mangu toh kilhon in Thingsan kho a kitha gimneina thusim jong Kuki te thusim a suhmil thei hilou ahi. Hiche thingsan kho thusim Pu Semlun Haokip, Haosapu seidung jui in noija hin ana sim kit ute.

T.Phaicham (Thingsan) kho hi achsa 1975 May lha a Pu (L) Onkhogin Haokip in ana sat ahin, Chandel Dist. Chakpikarong Sub-Division hopsunga um khoneo khat ahi. Agamkai hi Kana Area tin akihen akinaipi kho hochu ahileh Longja, Gelngai, P.Salem, Paldai, Haika(L), Sajik Tampak leh Chahkap kiti hohi ahi. Houlam(sakho) thua KBC Gambih No.12 sunga umjing houbung ahi. A khomin hung kisem danhi ahileh hiche T. Phaicham gamsung ahi. Vakom khat aum in hiche vakom bul/kun langa chun Thingsan kiti thing jatkhat abeh changa akena khat ana umin, hiche kom chu THINGSAN kom tin kho kiphu doh masanga konin ana kiminsah tan ahileh hiche mun koma kho T. Phaichan hi ahung kitundoh leh agam mipi akho min hechen louhon akom min a Thingsan ana tiu leh Thingsan a chepei thu ahin, Govt.record avang T. Phaicham ahijing nalai e. (Khomin kikhel khalou ahi.) Hijong leh hiche thusim ahin Thingsan tin sei taute. Akho mite hi thinglhang ahitoh kilhon in loulhouva kivahte aki hi e.

1994 KUM’A TUINOU KHOMITE THINGSAN A A HUNG PEMLUT DAN’U THUSIM:
Thingsan thusim akisut leh Tuinoute chom koithei ahilou nau ajeh pipen chu a chenkhom laitah uva hitabang tosetna gimnei hi ana tokhom uva ana thikhom ahiuve.Tuinou khohi Chandel Dist.sung mama Chakpikarong khopi apat 3-4 kms a kigamlat bep aum kho ahin, aum talou Pu Jangkhongam Haokip leh asopi hon 1949 Kum a anatundoh u ahi. Khopilhing hihih jong leh khopi (bazar) kom a um ahijeh chun neh le chah kihol, Tuineh, communication lam hijong leh mun lemchang tah khat ahi. A kho ah jong chun World Vision (NGO) in run abol school khat jong ana um in ahi. Hitichun noptah in ana khosau ve. Hijong leh 1993-94 vel a NSCN-IM hon Kuki te Chung a khanset ahin bolpan utoh lhon chun vangset umtah in Tuinou jong chu achesa 18th Feb.1994 khovah kon 3:30 am velchun NSCN-IM ten kho ahin bolu un Inn le Lou nei le gou jouse abon in ana hallha tauvin ahi. Hiche Tuinou kibulu nahin vangphat nakhatchu khomite koima athi amang akitongkha vang aum poi. Chuin khovah jou in khomite chu Govt.sepoy gari leh gamsung mahajon ho gari (shaktiman) in khomun le gam le go hin dalhan Thingsan khomun ahin jonlut un hilai achun akhoneite leh agam mipi te kithokhom in refugee camp anasah un, hiti chun chomkhat kumlhun kah din Thingsan khomun ah ana Cheng khom tauve.

NSCN-IM A KON KIVEN NADIA KHOMITE PANLAH DAN:
Kum1994 lai a muntin a khatvei vei leh Kuki te chunga NSCN-IM khanset nathu ana umjing toh kilhon chun kiven lou akhoh tahjeh chun Kho kihoukhomna Innpi pu Inn ah ana kinei in, kihoulhah na bang in kho kimvel ah Duty Post mun nga ana kisa in, khokimvel ah go in suonang ana kilheh in, hiti chun duty post mun khatcheh a pumpi khat cheh ana kisem in, meipum ho leh pumpi hoa manchah din kho in meilou anakisu khom in hiti chun jan seh leh kivennan duty ana kipo ji in sun (daytime) vang loulho thingpoh neh le chah kiholna phat in akinei in genthei tah in hinkho ana kimang e.

NSCN-IM HON KHO AHUNG BULU DAN’U LEH HICHE PHAT LAI A GOVT.SEPOY HO UMDAN THU:
Phat le nikho achaljing to lhon in khomite ding in kumlhun lou lhoga khop phat ahung lhung tan, mijouse chang at, changden in akisalal gam tan ahi. Hiti chun 18th Nov’1994 nikho ahung lhungtan khosung adin jong chang den achaina nikho ahung hitan ahi. Hiche nikho jingkah 6:30 am velchun Govt.sepoy(para Regt.) Sugnu mun a anaum Major Kurdeep Singh lamkaina noi a Chakpikarong outpost a umho hidinga ginmo um sepoy ho chu khosung ahung lut un, kho adalhah kon uvin khomi ho kom ah nilhah Teng hungkit diuvin thu adalha vin akile kit tauve. Chutia Army hon thu asei jeh u chun khosung miten lungmon nan anei un Lou natoh chol lai ahitoh tin hiche nilhah khel khel chun duty po talou vin nom in akichol tauve. Hitichun khomi nom’a kichol phat laitah jan 11:40 velchun melmate NSCN-IM hon Indian Army ho umchan thopum in, ui hinkai loi leh kol (hindi) pao hin tholoi pum in khosung ahunglut un, housapa athoudoh un, Innson ah akihomjah uvin pasal pilhing amu sun sun u aman’un hitichun janthip nung lhavah noiya chun amatdoh u pasal somni le li (24) ho chu melse tah in kholai sung leh khopam lah achun chem in ana tulih gam tauve. Chuin melsetah a mi atha jou uchun Inn ho banneichan ahal lhauvin chujou vin galjona thucheng sap pumin ana kinung le tauve.

Kho hephalou nunao chapang kimkhat mi kitha lamjong he phalou Indian sepoy khosunga hunglut danna ana gelloi ho inn mei in akah ahin mu uchun govt.sepoy hitalou melma joh anahi chu ahin hechen tauvin ahi. Ahinlah thil ahetchen kah uchun aji acha teu pasal 24 hinkho anamollem man tan ahi. Hiti chun khovah lhah tokah chun um nading Inn mei in akah phatchun nunao chapang ho chu inna kon potdoh in belding bei hel in gamnoi ah thingnoi, songnoi bel in acha teu akhovah pi tauve. Hiti chun khovah lhah Innlam ahung kile u leh aji achateu pasal mi 24 ho melsetah a athisa a anaum u ahin mudoh tavin ahi. Kholai chu kale mao na in alodim tan ahi. NSCN-IM hon amitha nalah uva amelse dehset chu:-1. Pu Thongkhomang Haokip leh 2. Gl. Lunkholet Touthang, amani hi alu leh atahsa kikhen hel in alol ana vat tan peh un ahi. Hetthei khat chu hiche kho kibulu naleh kitha melset na ahin melma ten numei leh chapang ho vang don louvin ana koi uve. Hiche thilsoh gimnei tah umjou Nisim 20-11-1994 nikho in Manipur Governor anahi V.K Nayal in amun vetlhahna ahung nei in ahi.

KHO KI BULU JOUVA KHOMITE HO :
Nisim 18th Nov,1994 jan thilsoh gimnei umjou Nisim 19-11-1994 jingkah kho ahungvah toh kilhon in khojet khovei, sah le lhanga um SOPI ule nao thilsoh hepha jouse ahung kikhom tan, athi ho amelset thei behseh jeh chun mipi chu tijat nan alungthim u alodim jong hintin kivaihomna kitup behlou in aki um in hijongleh lunggel thei mi phabep khat vaihomna noiya chun mipi leh athimoh Cheng khosung mi hon SOPI pasal 24 longdamsa chu mun khat ah ana kivui tan ahi. Hijou chun khomi athimoh Cheng hochun kho le veng gam leh go dalhan Haika (L) VANGKHO ana jon tan hilai khomun (Grouping Centre) ah phat sotpi tichu 1994 Nov, – 2002 chan akium den in ahi. Hiche kah lah a chun khomite ama ama hithei nacheh in mun chom chom ah aki thejah pantai.

MELCHIHNA SONGPHU/MEMORIAL STONE:
Athi thi tahen lang Inn le Lou nei le gou jouse hallhah in ana um tajong leh khonung in Innsung mi ho leh khomi athimoh Cheng in achesa Nisim 18-11-94 jan a NSCN-IM hon lungset na beihella mona neilou SOPI pasal 24 Melse tah a ana thau MELCHIHNA SONGPHU nakin loupi tah ana kigong in Pathen lungset na jallin Nisim 15-2-1997 nikho in Pathen lhacha Rev. Lensei Kipgen, Pastor KBC Gambih No.12, kin Thempu hinan hiche song hi leiset kichai tokah a mang talou ding in ana kitung doh tai. Hiche programme ahin 41- Chandel MLA ana hi Pu Hangkhanpao Taithul jaonan mi 4000/5000 vel ana kihom doh in ankong umkhom na jong aki nei jin ahi. Nam sung a CSO lamkai tampi in jong eihunglhahpeh un programme lolhing tah in anakichai tan ahi.

THINGSAN/T.PHAICHAM KHO HUNG KINUNG PHUDOH DAN :
Khosung leh houbung sunga dinga aluboh cheh SOPI it um tah tah hon eina dalha tau jong leh Pathen PHUDOH sakho khat chu mihem suhmang thei ahilou jeh in phat chomkhat kho umlou in ana umta jong leh Pathen lungset naleh mapuina jallin Thingsan (T.Phaicham) kho hi avel housapi Pi Lamkhoneng Haokip leh anaopa chuleh Pu Solet Haokip lamkai nan 2002 kum kimvel in tundoh in aum kit tai Tuhin Pu Semkholun Haokip housat nan khomi jouse kikim in hungnung chen tahih jong leh Inn 23 akinung chen tan Pathen Houbung jong avel in tundoh in aum kitai.loupina Pathen chang tahen.

KIPA THUPHON :
Achesa phat ana hitajong leh manga mat dia jong dei umlou tah, chuleh leiset a i galmi khat chunga alhun ding jong dei umloulai damlaisunga milni um talouding khophel a hitobang vangset nale hamsetna kana chan na Chung uva aphat leh nikhoa ina lainatpeh u leh ina khohsah uva lam chom chom a eihung kithopi hou:-

  1. Sopi Chahkap te, anikho a thilong ho hung phong a pon eihung khu masat pih u.
  2. Thilong 24 vuina ding a kisalal a phatecha eivui peh’u gamsung mipi te.
  3. Genthei hahsat mitsin khojin pet’a neh le chah sil leh chen a eihung kothopi ho.
  4. KBC Relief Committee
  5. Sugnu St.Joseph parish, Rev.Fr.George Baite leh a houbung mipi te ho,
  6. Rev.Fr.Mani,Parish priest,St.Mary Kholian 5. Pu VK Nayal, Governor of Manipur.
  7. Nunao chapang ho kitol le nadinga hongphal tah a gari hintoh doh gamsung mahajon ho chuleh adehset a mitlhi nap twi pum’a kho leh veng dalhah nung a puldou hinkho kanaman laitah uva akho a eina lamto uva kithopina jat chom chom toh a khosung a phatsot tah eina chensah u Haika housapu Pu Helkhothang Haokip leh akho mite ho chuleh a dang dang hojouse jong tunin kum 24 anache tajong leh hichi KIM magazine mangchan nachungu vah kipana seijoulou kahin phong in ahi. Lethuh nathei ima neijou hih jongleng, Pathen in nabon un phatthei naboh Jing tau hen. keima ,Semkholun Haokip
    T.Phaicham(Thingsan housapu) THINGSAN KHOSETNA LAA
    1.Penna bullun mang Cheng toh.
    Donsong theilou lumsong.
    Mang Chung a kalal uve.
  8. Lumsong Chung a kalal u.
    Son le toi Cheng lal ding in.
    Mang o kumsot chan mangjem koi.

Asem – Pu Chungkhojam Haokip.

LAA ANI CHANNA

  1. Melma te khosung ahung lut ui sepoy von aki von un.
    Sepoy ahung e pasal jouse hung kikhom un tin.Innpi pun kholhang ahinsam.
    Ohe thina kholhang samjoh ana hi tai.

Chorus
Phallha vahnoi o zan gimnei thisan lonjan.
Insung mite le pasal hat lai jouse.
Melma ten gamsa bang in athat un.
Thingsan khosung thisan tuibang a vei tai.
Lungdon jankho asot ngei o thisan lonjan.

  1. Kumhei golnop bolteng teh le khang naobanga veikhomna mun.
    Thingsan lentol a thikon kholhang ahung kisam e.
    Aw ka nam mite ngaijuvin.Keiho thisan phulah Lou a nakoi diu ham?.

Chorus

  1. Melma te galjona kholhang chu asam un a aotaove.
    Nunao chapang te hon thingnoi,
    Ongnoi bel un.Lungdon lonlhi atang theipoi. Ohe Lungdon jankhola avahthei deh poi.chorus.

Asem: Pa. Lunpao Haokip
Asa:Nu,Chongboi Haokip

Articles hi anom lheh e nati le anoiya “LIKE” button khu meh in writer ho na support nau vin, chule seinom nanei le anoiya comments nahin bolthei u ahi.

Site nalut a notification pop up hung potji ho allowed anabol ji uvo maban a thusim thah ahung ki post teng notice namu ji diu chule Bell button a subscribe kiti chu meh un.

Thusimbu mobile app ki install nom hon Google playstore a “thusimbu” tia search nabol u le namu lei diu ahi.

Previous articlePAO KITI HI KOIMAN HUTKHATA ASEMTHU THEI AHIPON, KOIMA ANEITUM JONG UMTHEILOU AHI.
Next articleGOLPHA KITI HI LEISET HINKHO A INEI LEH MANLU TAH AHI

LEAVE A REPLY

Please enter your comment!
Please enter your name here