KHAAL TWI THENG
presents
(Love story)
~St kuki
(7085383639)
(Part—3)
Lhingchan kholai leng a kahung lhon jeh chun cha a’hin om in kahung kihoulim lim tauve….
Continue…
Chutia kahung lo najeh lhon
cha seingam talouvin kajol pa chutoh kamitsih lhon in kahung kihou lhon tan, olsei tate tina ding chun kalu kagah pei in a sign chu kagah peh in ahile kajol pa jong chun ahethem Chet kit in, Lhincha cha om chu kadon khom uvin kakihou lim-lim tauvin, kajol pa totset jeh chun kahung nui poh lah-lah jeng jiuvin, chutia kaum jeng phat uchun Lhingcha chu kahin ngam sung dom-dom tan seiding hetlou man chun—
Kei: (Kingam pilsah tah chun) ashh! Lhingcha nacha omchu a tui val jeng’e , tin kagah pahchan ahile,
Lhingcha: (nui heu-heu chun) katee! Heo mang, chini kilhah chu atui lou leh ong tin eihin letot in ahile, henu kaden! A pasal keijoh chu kale kisonlal tan, sei ngam lou sa-sa a hinki pahchah nah-nah a apasal pen keijoh chun kale jachat kittan, hinlah kalung in heraa!! Pasal numei kijosah lou dichu katin,
Kei: Lhingcha nang vang natotseval e, ekom a nakitou sah-sah henlang nakitot sah-sah leh katibouve, tin kagah letot in hitichun kakihou-hou leu phatche lam kana he tapouvin, pung kagah vet leh katou pat nalhon toh teding chun katou sot ma-ma lhon tan phat chu anache sao thoutan a inkote vai hung lhun kah in pot doh teiding chu kagong lhon tan, ka hung lo najeh lhon chu olsei tahding chun kaum lhon tai. Kei nijong kakipat doh lhonin, kajol pachun Lhingcha jah a’chun tot toh tah togom chun—
Kajolpa: Lhing, ahile mi vai lhun phat ahitan, keini jong katou nalhon asot thim tan gachekit lhon tange, tunia ahung kikal son lo najeh la akilhai keh joupon kakom a thingphung bang a kitung jeng hita hi. Ahintin, kon seiyin atijong hilou Lhingcha chu jaan khovah a agel theikhop set amu umtah thucheng chu ahinlha khum tan, (aning lang khatna keichula Lhingcha kive ngam kit talou) a lhingcha machun epi kisei naham amat toh vah loujeh chun keini chu eihin moh vet lhonin ahung moh nuilhah tan, hichun—
Lhingcha: Katee!! Umang epilom lom jong chu kisei a mimat toh ding injong thu seijiute ahintin aginmo thimkhat um sesun keichu kaham ngam loujeh chun ginmo umthim tah chun eihin ven, kei jah a “Umangboi hung vah ji-ji lhon tang, nang ni toh nache kah in kholai beh leng dom tang phat seh a nakimu khala hilouva ahintin, hiche ahintichun kalung got kalung deibang tah chun ahinsei khatan amamai a kiphatlam sesua akium jeng vang chun kalungsung a kipahtah a achop toh apen katho chu ahitai, hichun kenjong—
Kei: henge, lhingcha kahung ji-ji ding ahie nacha om atui in chadon a kahung ji-ji ding ahie tin tot toh tah tohgom chun kaseiyin, hichun kajolpa chun—
Kajolpa: nang nibou nakilen to lhon ding hita ong? Eki lento ji-ji nah hih diu ham tin mi engkap thim chun ahung totnin, kahung kinuisat touvin Lhingcha chu mangpha kahin thot doh lhontan, inn lam jon ding in kahung kile kit lhon tan lampi kahin jot lailhonin kaloi.(kajolpa)chun eihin tot khum in—
Kajolpa: jol, tunilhah ekholai len lhon chu nalung lheinam tunvang nakile thei mong-mong ahite (kapot nomlou ahet thim tah jeh chun eihin jonkap in) kenjong—
Kei: jol, ki jonkap poute eti kahitam lhingcha kamu chu kamit lam hung kikeu bang in naseisang chun hoi kasan etih hijong leh lunglai a mang louva chamden jeng ding in aumtai, ama aum leh etih hijong leh inn lang kilena vang umthei ponte, ama ejol doh tokah a kaum nalang a chelou ding kahitai tin kigah tahchun kaseiyin ahile,
Kajolpa: a hiche ding kahetna jeh a nakipui doh a nanagah dabel bul eitin, kijol aw kei vang ninganse hih in tin dathim sesun ahung kiseiyin ahile kenjong, ” ashh!! Jol nang jal a kimudoh a nang nangtoh kitho a keidia joldoh tei nadia plan nagon louleh nommo kasah ding ahie kachuti tiphat chun aman jong, “heraa!! Pasal hitiboureh ta ejoldoh tei-tei ding ahie atin hitichun kahung kihoulha lhontai. Ka inn cheh-cheh kahin kijot lhon tan, inn kalhunin kapi chu anatou in, “kidangsan in mangboi, hoilang area nagaphah hitam? Sahlang veng a umham? Noui lam veng a umham? Tin eihin totnin, kenjong, “hepi, epi sahlang nouilang nasei hih.e kaloipa toh dukan pha mei-mei kahi lhon bouve tin jachat man
chun kagah lep in, kapi jong chu ngolbol thei ahitah loujeh chun (eisang a voh eah chon masa hejep tei hintin)” dukan che vang hi poh tachun” eihin tikit in seiding kameimo phat chun kamoh kinuisat lhon tai.
Keijong ka room sung a kalut in bolding aumlou jeh chun kajal khun chung a kakijam in kakholai leng na a lhingchan nampon kive a kitup tah a an anahon petchu kalung a akilang dentan, amelhoi naleh umchan, khanchan thep naho chu kalung a akilang denin seidoh theilouvin kahin lungset doh tai, hiche nijaan chu ama gelnan ka emu lhathei tapoi, alang khatna Lhingcha jong chun kapot doh lhon ding konna kajolpan asei, “tunia ahung kikal son lo najeh la akilhai keh joupon kakom a thingphung bang a kitung jeng hita hi.” Atipen chu epi asei na ahidem tichu aman jong ajalkhun chung a emuthei loujen a anagel kitne. Keichula ama mel munom kit tahjeh chun khovah lhah ding kalchu kachuti ngalel kittai, kangalel jengvang in chomloukah in kana emulhutan jingkah khovah in kapalen in eihung thouvin, ” Mang, thouvin tuni inlang kile ding nati hilou ham? Navaigei ding hitahi thouloiyin” eihung titan, hichun kenjong emadang seisei ngailouvin—
Kei: (emutsoh sesu chun) kache louding ahite palen, tin ka blanket kathah kikhu khum kittan.
Kapalen jong chu lungdong thimtah chun, “eitidan na” ahintin eha suhkhah nomlou jeh chun apot pei-pei tai. Keijong Lhingcha jalchun chelou ding in kamoh umtai, an neh konin dokhang chung a kahung toukhom tauvin ahile, kapalen chun eihin dong tan—
Kapalen: ahile mang, eti nahiya chekit louding natikit hita onk? Eihin tin ken jong Lhingcha jal ahivang chun kalep in—
Kei: palen, kaum leh nom kasah cheh-cheh joh e, innlang alah bolding aumpon hilai a nang ho toh etoh khom a eneh khom leh akidam theijo e tin kaseiyin ahile, aninglang a kapi chun ana jathei keiyin hichun—
Kapi: Mangboi, naum ngal-ngal leh apha e hilai a Christmas naman lou najong sotta a tukum hilai a’hin mangkhom tahtau hen ahintitan, ken jong kijen kasacheh cheh tan, “henge hepi, kagel gel leh kihung moh phah jou-jou talou ding’a tukum hilai a kimang den tah ta” tin aumden ding chun kaseichai tauve.
Kaloipa(kajolpa) jah a Lhingcha kalungset dan ho ama jalla kaum den ho kalunggel ho kaseijeng leh aman nilhah khat hi eihin koudoh in, epi bepseu ham tia kigot got ngailouvin anung chu kamoh jui jeng in ahile ground lang a eihin puilut in amun kalhun chun kidang tah in eitih a kana gelphah loubeh chun Lhingcha chun ground a eina nga a kei eimu phatna ajah cha a einung ngat chu kagah galmu in ama hiding in kana tahsan theipoi, hichun kaloipa chu kagah vet leh ahung mae seu-seuvin emadang seilouvin, “Cheloiyo, nanga na sot eitai” ahintin( hiche nilhah chu lhingcha toh kimuto ding nahie ticha jong eisei peh louva ena kimuto sah lhon chu ahi) hitobang dinmun ahiphat chun alouthei louchun tuni kalung gel kakisei lhah lou leh etih lehba kasei ding ham katin Lhingcha um na lang chu kajon phei tai, kagah lhun chun ken kagah totnin, “Lhingcha nahi mong nammo?” Kagan tileh, ama jong ahung nuilhan, “kahilou leh being thei ding ham?” ahi tin ken jong chu phat chun cinema ho umchan kalatan, lhing neina ngana sot hitaimo? kagah tileh,
Lhingcha: henge, heo mang! Ejo lang achu najolpan nangchun seinom khohtah khat anei e atia ahin hasei val ta aleh hung kahie epithu lom-lom hitam naseinom chu? tin doh in dongtai.
Hichun keijong kakiphatlam in seingam lel sa-sa chun kaseitai—
Kei: Emadang jong ahipoi lhing,tunia kaseinom chu aselam invang neilah peh hih inlang nang injong kathil hinsei ding hi nalung thengset in neihin donbutnin ken jong nasei jouse chu alpha a kakilah ding ahimeiye. Ven lhingcha,loi leh gol hon naphat na leh nami khoto themna anasei jeng uvin tahmel a anakimu loulai gal apat kijatho ahinah laijeh chun kana tahsan pon hinlah atah ham photchen nadia na insung kahin chotlut nia pat chun namel kamu chun kalung lai a nacham denjeng tan, loileh gol ho seisang in umchan, khanchan nathem in kisonpi natah khat kahin nei e, inn lam kileding chu kana hitan hinlah nang kom a hiche kalungsung a ka emjeng thucheng hi seidia kana got jengji a’hin, hinlah nakom kageiteng hiche kaseiding khat jong kiseingam jilouvin kana umji e, tunia kahin lungset nahi nang in epi neigel peh em?
Ken vang insung nom semkhom peh din kahin deilhen nahitai, kahinkho in nungah kiti anapum hel taponge katin ka inkoten jinei dia einahiti nojeng vang uvin eina joldoh pouve. Ven, nang toh insung nom semkhom ding hileh insung mite jong kipah lheh intin aum talou chunnu leh jopa jong aum nalhon van akon hinve lhon leh lung lhei lheh lhon inte tin kagel e, hinlah nang in epi nagel ahi kahepon, hijehchun nalung gel thengset in neihin donbut teiyin.
Katin lungthim natah chun kalung gel abon cha kaseilhah jouvin, lhingcha chun—
Lhingcha: heo mang! Chubangse a neilungset mong a ahile neikichenpi mong ding hinam? Hiche kathudoh hi nadonbut na ahile bou kigel lhah nakhat hung umnante ahintitai. Hichun—
Kei: Lhing, ken kahin lungset nahi chapang bang a toul laiya kichem tobang ahipoi, neitahsan louva ahileh tu ma-ma a kakipui ding nahitai.
Katin akhot chu a prove vetsah nan katuh in kagah kai jing leh, kakhot chu ahin petnin na kasah a kagah peng leh hichun Lhingchan—
Lhingcha: heo mang, akisei nakha hileh nang jong nakino val chume tin ahung nuilhan, kape khah nalai chu na nahah sah tenham? Ahintin, keijong chun eihin jen-jen nading chun kale bolthu kittan kakhot chu kakisip den jengtan ahile lhingchan eihung vet peh in eihin jut le-le peh in, “pasal pi-pi numei thilpe hopouva kikisip den” ahintin hinlah keichun anat jeh hilouvin Lhingchan ngailut tah a eihung jut peh a eikhoh sah pet chu munom najal chun kabol thu tai, hitia eijut peh jeng lai a ama kachuti vet jeng phat chun kabolthu chu ahin hedoh kittan hichun lhingchan nangpa hi nabolthu hikit na eihin tin einung ngat in hichun ken jong amai lang a kachen kaseitai—
Kei: Lhingcha, nang in neikhohsah a neijen le ding kal kangah lel lheh jingtai nami khoh sah naleh nami ngailut naho nitin in kamunom jeng in neilungset na echan a sang em kahetnom e, akingai chu ehilhon na hitalou ham na? Tin amasang a kabolthu nachu ngaidam thum na vetsah nan kabil katuh le-le phat chun lhingcha jong ahung moh nuilhah in chomkhat jouvin lung gil tah in kakom a—
Lhingcha: Henge heo mang, nasei mabang chun tunia pat chu akingai chu ehilhon tai, nang in jichan geiya insung semkhom dia kitep na nalah bang in ken jong kahinkhon nang teilou koima dang insung semkhom peh ponge, hiche ekitep nalhon hi petchah jeng hitin, agui lhun tokah in ekah lhonna esuhboui theiding tampi hung um tajong leh eini kilungset najoh kankhom hitin detsah jeng hite.
Ahinti chun chubangse a eikitep peh naho chu kagel in ahile kalungthim atong khalheh jeng’e, athusei chun kalung lai atoh khah valjeh chun acham louvin lhingcha chu kahin angkoi tan, kalhi katheh jouvin Ven, lhingcha tunia nathusei hi amang talou dia kalung a kakoi ahitai, kagui lhun sah tei-tei ding ahi katin kakitep nalhon chu kahung kinop pehlhon tai. Hiche tah chun kaloipa(kajolpa) chun eingalel val lhon hitan tin gal apat chun, “Ahemm!! ahintin nakiseilhah nailou hammo?” Eihintin amajong keini kim a ahung in chephat chun lhingcha jah ah ahile egei thim tauvin nahung thah doh lhonin teng, keini jong kile kit lhon tange katileh Lhingcha chun, “angaipoi umang! Neihung thah dajeng lhontan pung jong agei thim tan, ka inkote komma kaloinu komma kache ahe tia kalep ditai” atiphat chun keini jong gathah talouvin kahung kile lhontai, hiche nia kakimuto lhon chu abon cha khosung gunda patoh kigop theitah chalpu in gouris kitipa komma report ana petan, (gouris kitipa jong chun Lhingcha chu keisang a anajol masatdan ahin, miki ngolsah ahijeh chun lhingcha chun ananop peh loudan ahi)
Hijeh chun hiche nia keinin inn lang kakijut lhon kah chun Lhingcha chu lampi kah a anating in chem anavet sah in lhingcha jah a nakingaipi kahet doh aum ngei-ngei leh katha ding ahi anati ding dan ahin, hiche jouse chu kakicheh thei nadin Lhingchan kakom a kakimuto nilhon khatnin eihung seipeh in hinlah epi asebon kibol lou katin nahsah moa kakoi jenglai in nilhah khat hi Kajolpa toh Lhingcha te inn a kholai leng dia lampi kahin jot jeng lai lhonin lhingcha te inn sah lang jep ground komma chun Gouris toh aloi mi nii anatouvin aum danchu keihi eina nga uchu hiding dan ahin keichun koichu gouris ham kahe naipon, hitia kho helou tah a kahung lhonna ground kahin phah lhonchun eihin mudoh tauvin alah uva khat chun ahung lhonte ahintin kajolpa jong chun, ashh!!
Jol chepa khu ahe Gouris atipau chu ahintitan kagah vet leh asam sao thim a akikan pachu hidan ahin kagah vet mudoh toh kitoh chet chun eihin kou peingal in—
Khatho: hey!! Nang teni chu ana khongai lhon teh tin ahung kisen uvin,
Kei: (eihung nailut lut uchun) keichun mi khosung katin kiphatlam tahchu, “epi thu hita loite ho? E tileh natiu hitam? Tin kagah ding in ahile, Gouris chun—
Gouris: nang nahiham? Mangboi chu eihintin.Henge, kei kahe kagah tileh mantau eihin tin khat teni chun kakhot lang khat-khat ahinmat lhon phat chun, kajol pa chun Gouris jah a ‘Gou’ athu in seithou te cheho akibol ngaipoi atileh , gouris chun “nang jong naneh nom louleh thipmo” atiphat chun kajolpa chun kham a kidoi lou ding ahetphat chun Lhingcha gakou a phalsah ding atin amajong Lhingcha te inn lam jonin anei tai, hiche kah lah chun Gouris chun kei jah a—
Gouris: kum ejat kana hel nahi sah ham? Amakhu hilai kho nahung chutlut masang apet kana lungset hitachu epiham nang jannia hung pan in “neh loudia theiga neivoh lhahsah got” eitin,kamai chu kaginchat manlou kah chun khat vei ahin suman tan, khat teni chun kakhot lang khat-khat atu lhon jeh chun kamoh kitom doh thei pon, hijeng vang chun chutia khot ahin lha jeng phat chun pasal leh pasal (ngelchang lung pucheh) aligning chun kei jong kaki control jou tapon chutia khot kilhato ding ahile katin Sepoy training ma kijoupan ahijeh chun kakhot tuh teni chu kachil lhuh masan, Gouris chun achem chu ahin kisa doh in eihin doikhum vang chun ka sepoy training lah phatchoum danchu kei leh kei kaki defense jouvin Gouris chu khat vei a taibuh tah kalho peh leh akisip dentan, seikham lou chakheh chun ka Sepoy training lah chun cinema a hero ho eibahsah mandeh chetne,
Hinlah film ahilou jeh chun khat teni chu ahung kithou mankit lhontan hitia chu ground sung’a kakiban pheng deljeng leu, Chomlou kah chun kajol pa chutoh Lhingcha chu ahung lhung man lhonin hichun eihung kham uvin Lhingcha chun kakhot kalap got nah-nah leh ahintuh in Gouris chu angei phelep tah ahin beh peh in, “najah chalou ham? Ka dongma kanei henasauva hita nakisah u” atin gouris chu ahouse jengtan, lunghang tahchun kakhot in eihung kaidoh e. Kana ha kidel manthou u hitan tin, kangai lhingcha chun maha pupum a inn kakile ding chu nommo asah jeh chun a inn uva kajolpa chutoh eikai lut lhonin kakisuh khah na maha hochu ol-ol in twisa in eihin jut peh bandages ho eihin behpeh leh nupa kicheng saho hinkho bang in kalung mitchun kamu in ahile, kakisuh khah nalam jong hepha talouvin amabou chu kachuti vetkit jingtai. Hichun Lhingchan keijong chu eihinphoh in kajah a, “nang jong hi mimo nahiya, kicheh theiyin kiti peh-peh a nana kibouipi mankit, eihintin hichun kenjong…..
…… aban anangah kit ute…
Upcoming: abanteng, (nomma lhingcha toh khosung khatna Christmas kaman khom leh ka Sepoy Suty hung kichai chet)…ena simkit diu ahitai.Alhing a simnom jeng hon achung lang a contact number a’khun comment hinbol jeng uvin..
Coming soon.
Thusim hi anom lheh e nati le anoiya “LIKE” button khu meh in writer ho na support nau vin, chule seinom nanei le anoiya comments nahin bolthei u ahi.
Thusimbu Machal jing thei na ding a pan lanom ho kipah tah in lem ahijing in ahi anoiya button “Click Here” khu meh utin details anasim ute.
