Home Crosby Haokip THINGLHANG GAM

THINGLHANG GAM

19
0

Published by Thusimbu

Crosby HaokipConvenor KWC

Heiha…hoiha…heiha…hoiha…heiha…hoiha;
Nathange, nathange, setleiyah
O kathinglhang gam! Kapu kapate tolkonna.

Khaiye khannou gol, hung un lamdil del in jaila oiyute,
Agam thinglhang kichoi sil sel hi;
Sangmol tampi jong lung kitoh tahin;
Ajemchoi sil sel ui ilennau thinglhang gam.
Chung Pathen semsa igam leiyu, tin
.

Chunga jangva ahamin, leiya janggol aham e.
Ahamhing dum jin jen nuse jou louvin;
Sihtwi dap jin jen donin khisa chun,
Taikhovah ngah lel in bu-al akhong khonge.
Lomgol cheng lomvai kon din akitol ui,
Somnu, sompa somleng ui,
O kathinglhang gam nom a.

Ipu ipa cheng laitol lenkhomna gam,
Khankho sihtwi bang along khom ui;
Doupi dougal umlouva, chamdel a alennau gam;
O thinglhang gamnom hi ahi.
Twidung khat banga long khomin;
Khankho nunkho aheikhom ui,
Ka zalen ui kathinglhang gamnom a.

Sim le mal, kol le phai haijong leng;
Kachunnu gam, thinglhang gamnom haimil jou ponge.
Ju le va hamgin ngei cheng leh
Mol le lhang, dam le phai cheng in;
Ajemchoi sel ui kathinglhang gamnom.
Chunga pengpalep khankho jong anome kathinglhang gam a.

Gosem, pengkul le pheiphit mut utin,
Khongpi dahpi chum ute;
Hanla saute igam-u huhna din.
Chungmang Pathen nammite ihiuve;
Chule ningju aisa lonna gamnom,
I-thinglhang gam-u thongnuse poute.
Kathinglhang gamnom chullouvin pah jing hen.
Li-li-li-li-li Ha-ha-ha-ha-ha

Previous articleI-KIMU KIT KAHSEN-3
Next articleMARAM NUNGAHNU

LEAVE A REPLY

Please enter your comment!
Please enter your name here