(Lhadam nungah toh kilungset hinkho)
Written by: Crosby Haokip(7085168510)
Nisim 6 July 2019 nikhon Lamka langa che dingin kakigongin kavon apha lai jouse suitcase sunga kakhum tan ahi. Ahin hiche ni jan chun huile go akithon thingphung phabep asem lhun ahi. Chuin kanun kajah a, “Boi, kumhei tengle bou inlanga hung ji tan, vadung lei hoilou toh, tujan gojuh jeh hin twiyin lei lhoh lha kit tante,” atin, kanu thusei chu hahsa kasa lheh jenge. Ajeh chu inlanga che na ding suty ngahlel a kaum jing ji ahi. Hijongle kanu koma kanopna thu aminin kaseiyin, chujouvin kanutoh Sajiktampak bus delin jingkah matahin lamjot kakipan lhon tan ahi.
Chuin KANA-DUNG kiti keiho lhang langa vadung long kaphah lhon chun vangset um tahin twiyin lei analhoh lha tai. Vadung twi abongin, alenin twi akinongin ahi. Chuin kanun kajah a, “Boi, kei gapampot vah tadinge, ” atin, chuin kanu nga to gomin song chung khat’ah katouvin twilong chu kaven ahi. Chutia twilong kavet laiyin twiyin numei longdamsa khat ahin lhoh kamun, ahin twinoiya alhum lut peiyin kamu kitta pon ahi. Chutah chun kakithingin kichat nan kadim tan ahi. Chomkhat angol bangin kakitungin ahi. Chuin kanun eihin beng khangin kajah a, “Ipi chu mitlha louva navet ham? Hungin Twipel lama che tahite, ” atin, kakile lhonin twipel lama kache lhon tan ahi.
Ahinla kalung akihong thei tapon tijatna ngenin kadim in, chuin kanun, “Boi, ipiti nahim? Namaiso chu kichat mel apui, ” atin, kathilmu chu kanu koma seiding katile kaseidoh thei pon ahi. Hitichun ima seithei louvin Lamka chan kaumin ahi. Lamka kalhunin Koite a insana kaumna mun a kaum lhonin ahi. Koite lhanmol kaphah lhon chun mitampi anakikhom uvin, ahin kalel val jehin hoitahin jong kave pon ahi. Nithum sungin kanun eiumpin, chuin amajong inlanga akile tan ahi. Ahinla kathilmu chun eisu lunggim jingin ahi.
Ache ding konin kanun kajah a, “Boi, jingkah nilhah a namoh um sangin tuition bolin lang nakimanchah na ding sum kilo jin, ” eitin, kenjong NITINTHUSOH WhatsApp Group mangchan home tutition ngaicha kaholin ahile tuition ngaichaa hin call atam lheh jenge. Chuin K. Salbunga mikhat toh kakihou tohin achate mi ni hil dingin kaum tan ahi. Hiti chun lhathah in tuition kakipan in nilhah seh le kachen jan nidan 9 le in kakile jin ahi. Hiti chun lhakeh khat jen Home Tuition kahinbol tai.
Nidang bangin nikhat home tuition kache kittan ahi. Hiche ni jan chun ka-tuition lah na nun anne dingin eijolin kacham louvin eineh sah tai. Hijeh chun an kaneh jouvin pung kavet le nidan 10 alhing tan; kenjong, “Henu, jan asot tan che tange, ” katin inneinu koma kaseiyin, hiti chun mangpha kithot to pumin inlam kahin jon tai.
Ahin hiche ni jan chu nidang jan toh abang pon gari lhai atam lheh jenge. Kache tan, Koite lhanmol kaphah konin gari khatcha alhai akimu kit tapon kalung aneo lheh tan ahi (Nidanga ima kati jilou vangin, hiche ni jan chun kalung thim anop mo lheh jenge). Koite lhanmol kaphah chun lhanmol a konin, “Heu, ” tin, eihung kakouvin katija lheh jenge. Ahin nungah gollhang ho kimutoa kikou pou hinte, katin kache pei tan ahi. Ahinla kanung aja jengin, koiham khat kanung lama hung danin kahe he jengin, kimat kimatin kanung lam kaven ahi.
In kalhunin an kakihon in, in maiya menal(Lady’s Finger) umho phabep louvin kapotdoh in ahile hontho(Fencing) a konin numei khatin eihin ven panpi ngaicha hile akilom e. Kalung thimin, “Koi numei jong hiya tu janlaiya vah ham? ” tin, keima le keima kakihouvin insunga kalut tan ahi. Anhon toh phone kichep kathon kaloiho toh kaki-text in ahi. Chutah chun invel a mikhat khonung kajan, koiham tin, window kahongin ahile tho(Fencing) pam langa numei(nungah hinte, tin kagel e) khatin amasanga Pahcha san khat achoiyin ahi. Chuin kenjong ajah a, “Hilaiya chu ipi nabol ham? ” tia kadoh le iman eidonbut pon ache pei tan ahi. Hiche nu umchan chu kajan gelin imu mo helin kakhovah tai.
Hapta khat jouvin nikhat keijong Home Tuition din kache kittan ahi. Nikhat a bangin inneinun an eineh sah kitin ahile kavaigei lo kittan ahi. Koite lhanmol kaphah chun amasaa bangin, “Heu, tin, eihung kikou kaja kittan, kakiheiyin kaven ahile lhan chung khata kamu ji numei nu chu anatouvin akeng akisip in na satahin anaumin ahi. Chuin akoma kachen kaven ahile akeng to chu linghem saotah khatin anasut peh ahin, chuin linghem chu kalah doh pehin ajah a,
KEIMA: “Hilaiya hi ipi nabol ham? ” tia kadoh le ol chan ahung dah dohin kajah a,
NUMEI: “Heu, hilai, tua katouna mun hi kanu lhan ahin…, ” tin, asei nalaiyin akap den tan ahi. Kaponan kalhemin ahile kakoma, “Heu, kanu kangai val jeh a alhana kagache le hiche ling hin eisut ahin, eipanpi ding mi ijat kakou vangin koiman eidon poi. Tua nangin neipanpi jehin kakipah e heu, ” atin, kakhoto lheh jenge.
KEIMA: “Hoiya naum ham? ”
NUMEI: “K. Salbung a kaume. Ahin tuchana in kakile talou jehin numei din amel sen in kakile ngam tapoi. ”
KEIMA: “Nao, hijongle nainkoten nahol mon te. Nachanga nache ngam lou leh keiman nahung thah nange. ”
NUMEI: “Ahipoi heu, tujan nangho koma um ingting jingle che tange, ” tin, aseiyin, chuphatin kaumna muna kapuiyin ahi.
Akivonna jong ahipon, pasal von hijongle kavon nei sun sun ahoilai kala dohin avon kakhel sah tan ahi. Chuin akisil in ahile tahmel mu lou Jonlhing hoiyin ahoiye. Chuin me heuvin eihinven ahile vetna ding kahe tapon ahi. Chuin aman, “Ken an hin hon’inge,” tin aseiyin an ahon tan ahi. An kaneh lhon laiyin anneh vang ahat lheh jengin kane khop lhon tapon ahi. Akiphat lamin ahi. Chuin kenjong ajah a amin kadongin,
KEIMA: “Nao, namin ipi ham? ” tia, kadoh le aman jong,
NUMEI: “Heu, kamin Mercy ahiye. ”
KEIMA: “Heu, tin neikouvin lang, boina le hahsatna nanei le kakoma hung ji ji tang o. ”
MERCY: “Henge, heu, ” atin hiche ni jan chun lupna nomtahin kasempeh in amajong nomtahin akichol tan ahi.
Ahin janlaiyin eihin thoukhang in kajah a, “Heu, kakicha e, ” atin, kenjong kadongin ajah a,
KEIMA: “Ibola nakichat ham? ” katile,
MERCY: “Heu, koiham khatin tha dingin eihol hol jenge, ” atin, chuin akichat louna din kakoma kalup sah tan ahi. Jing khovah anneh jouvin Auto a katou sahin kasol tan ahi.
Kavaigei val jehin kakigong loiyin kathemjilna mun CCPUR COLLEGE kajon tan ahi. Class akipan in touna 4th Bench aning langa kachang sehin katouvin ahi. Chuin, “Heu, an naneh lou lai ham? ” tia, kabil a thu hung kisei kajan kakin jengin ahi. Kakiheiyin ahinla koima kamu deh pon ahi. Chujouvin ima ati tapon ahi. Class athumna kalah pet un kalah uva nungah khat angol bangin ahung lhun akap tan ahi. Hiche nu min chu Neopi akitin, chutia adammo phat chun emergency in Distt Hospital a apo tauvin, apoh doh ding kon-un eihin ven, mitlha louvin eihinven ahile tijat nan kadim e. Ahin kikhen konin Class ahung jao thou thouvin ahi.
Class kichaiyin kaumna mun jon dinga auto a katou doh got laiyin Neopi’n eihin kouvin, kache lhonin munkhat a katou khom lhonin ahi. Chuin Neopi’n kajah a,
NEOPI: “Min, thukhat kahin doh nome. Lungset tahin neisei peh tango?” atin, kenjong,
KEIMA: “Seiyo, ipi thu um hitam?”
NEOPI: “Class lah pet le nakoma touva nachunga kingai ji numei chu koiham? Nahin lungset toh nalom lome! ” atin, ahile katija valin ajah a,
KEIMA: “Najou seihih o, koima bon kakoma umlou. ”
NEOPI: “Ahinai, koiman mu ponte. Kenvang kamu theiye. Amanun eihin vet tengle kadammo jin ahi. Amel vang ahoi lheh e. ”
KEIMA: “Imacha kahe hih beh e. Ipi kati ding hitam? ”
NEOPI: “Ahile, masanga dongma lama navangsetna um kha’m? ”
KEIMA: “Dongma jong kanei kha hih e. ”
NEOPI: “Lunggim hihin, kei dammo jeh joh hinte, ” atin, ahinla kalung among thei tapon ahi.
In kalhunin, lupna chung senan kakineiyin Neopi thusei chu kagel gel tan ahi. Ole, nilhah khat’a kakimupi nungahnu chu ahidem, tin kalung atheh lheh tan, hiche nungah nu chu avela mu katup lheh tan ahi. Chujouvin lekha chomkhat kasimin tuition a din kache pei pei tan ahi. Ka-tuition lahna mun kalhunin inneinun kajah a, “Boi, tuni nanaote ni potdoh chu o, ” atin, chuphat chun kihoulim to gomin katouden tan ahi.
Chuin inneinu kadongin,
KEIMA: “Naote mi ijat hiuham? ”
INNEINU: “Amani bou chu ahiye. Atah pen nu la aum tapon. ”
KEIMA: “Itih a chu beiya hitam? ”
INNEINU: “Lhalui chu ahi nalaiye, boi, ” atin, achanun athisan apohnat dan aseiyin ahi.
Chutia inneinu thu kadoh be got laiyin kaloi hokhat ahungin kajah a, “Min, nanu ahungin, nang naum lou jehin inpolama nangah e, ” atin, chuin keijong kaumna lam kajon tan ahi.
Kalhunin kanu anaumin damle damlou thu kakidong lhonin, chuin kanun kajah a,
KANU: “Boi, tulah namelso akikhel e, iti nahim? ”
KEIMA: “Henu, kamelso iti ham?”
KANU: “Aseidan kahe pon, ahin nidang namaiso abang tapoi. ”
KEIMA: “Henu, kamel namu khah tah hih a le hinte, ” katin, kanun kamelso akikhel asei chu kahethem pon, ahin kalung adong lheh jenge. Ni ni sung aumin kanu jong akile kittan ahi.
Nikhat college’a kaum laiyin Neopi ahung boi kittan, chuphat in mu anei hinte, atiuvin principal office a apuiyun thudoh aneiyun ahi. Chua chun mihon adongun, “Ipi nati ji ham? Ipi namu ji ham?” tin, adongun ahile aseidoh ngam pon ahi. Ahinla ajol jol phat-un aseiyin: “Class kalah laiyule ka-classmate pasal khat koma numei khat atoujin, abangle achunga akingaiyin, abangle eihinven einuisat ji e. Amanu chun pasal pa khu alungset hinte, ” atin, aseidoh tan ahi. Chuphat in koiham, tin ahin khol un principal office a che din eihung kikou tan ahi. Principal office kalutin thudoh tampi eidongun, ahin adonbut ding dan kahepon ahi. Kadonbut theilou phat chun eihin soldoh tauve.
Chujouvin kaumna mun kajonin lunggim tahin lupna chunga kakingaito to tan ahi. Hiche nilhah jong chun jan nidan 10 donin in kajon kittan ahi. Koite lhanmol kaphat pet in kanung aja pan tan, kino thimtahin kache tan ahi. Chutia in kalhun ding konin kanunga mikhat hung bangin kahen kakinung heiyin ahile masanga kamu nungah nu chu kamu kittan, kanung langa anadingin ahi. Chuin aman, “Heu, ” tin, eihin kouvin ahile kakithing den tan ahi. Ahin eihin naiyin kakhut ajutin ahile kakichat na jouse abei tan ahi. Chuin aman kajah a,
MERCY: “Heu, nitinin kichat nan eibome. Ipi kati ding hitam? ”
KEIMA: “Nainkote umlou ham? ”
MERCY: “Aumnai, ahin eipan pi thei pouve. ”
KEIMA: “Ipi jeh a em nao? ” tia, kadoh le kakoma ahung kikhin naiyin kamai le amai asuton alhisoh in akap in ahi. Chutah chun kalung ahung kikhelin ama lungsetna kahin neidoh tan ahi. Chuin amai kajutin amitlhi katheh pehin ajah a, “Nao, iti nahim? Ipi boina nanei ham? ” tia, kadoh le ahinkho thusim kakoma ahinsei tan ahi.
To be continued. Please wait… Thusim ngei nasah le Writer contact bolin.
©2019, Crosby Haokip, All Rights Reserved
