Home Crosby Haokip THILPHA BOL

THILPHA BOL

306
0

Script Writer-Crosby Haokip

 

DRAMA SHOW

 

Before curtains open:

 

ANNOUNCER: “Chavang ahung kichai tan, Ollha phalbi jandap ahung lhung tan ahi.

 

—-Curtains open—-

 

“HEKIM LE MAMANG jong akicheng lhonin chanu numei hoitah khat anei lhonin ahi. Ahin Mamangin service ahin mu phatin ajinu le anu akitoh tapon, ajinu thusah bangin ina konin anu adel doh lhon tai.”

 

–KUM 15 JOUVIN—

 

Chuin HEKIM in achanu BOITHEM jah a,

HEKIM: “Boi, kigong loiyo, tunile bazaar a nangding sangkhol, Christmas von cho a iche ding ahi.”

BOITHEM: Anu thusei ajah chun akipah valin, “Tah tah em hema? Keiya ding tunile over coat hoitah khat neichoh peh ta na?” atin akigong loi lhon tan ahi.

HEKIM: “Henge, kigong loiyin napan jong eingahlel lhon e,” ati laitahin pam langa pat in ajipan ahinsam lhonin:

MAMANG: “Nang ni nucha jong nakigot jou lhon lou lai ham, ni sun pei tadinga.”

HEKIM&BOITHEM: “Kakigong chai lhon te,” ati lhonin, chuin bazaar a din ache tauve.

 

—-Curtains closed & Open—-

 

ANNOUNCER: “Amaho inko jong ache tauvin ahile, lam koma chun tehse pi khat dammo lel tahin anatouvin ahi. Hichu BOITHEM in amu phat chun alungset in anu le pa jah a,

BOITHEM: “Henu, khuche va tou tehsepi khu adammo abange. Lungset aume. Nehthei khatbeh choh peh ute, agilkel jong himeithei ahi,” ati le anu le pan ajadan, apan aphoh in,

MAMANG: “Boinu, hung loiyin, ivaigei diu ahitai,” atin ache tauve.

 

Hiti chun von akichoh uvin nomsa tahin aumun ahile, BOITHEM akiheiyin anunglam aven ahile, tehsepin ahinvet chu amun alungset lheh jenge. Avon kichoh ho chu peh ding anomlheh in, ahinla anu le apa akichat jehin akihet mo sah tan ahi.

 

Chujouvin pasal gunda phabep ahungun, tehsepi chu amu’uvin, i-sah lou tahin ahouvun, “Hoilang tehsepi khat jong jum le ja helouva hilaiya tou hina ngei! Nungah koma iche leh kimu mu jeng. Ning kitel aume,” atiuvin, alah uva mikhat in, “Kidah aume,” atiuvin ache tauvin ahi.

 

—-Curtains Closed & Open—-

 

ANNOUNCER: “Boikim in alungin tehsepi chu agel gel jeng tan ahi. Alungset valin, gilkel athoh ding ahet jehin avon phabep le bu le me tiffin in agongin tehsepi kom ajon tan ahi.”

 

(Background Music-Thilpha bol la Lenchung sah)

 

Tehsepi jong analel lheh jeng tan, dammo tahin tollaiyah analum tan ahi. Chuin BOITHEM in tehsepi chu asukhangin akouvin,

BOITHEM: “Hepi, hepi. Thouvo Sangkhol le neh ding bu le me kan dop peh e,” atin ahile, tehsepin jong hoitahin aven, lel sa san akithouvin atoudoh tan ahi. Chuin Boithem in tehsepi jah a, “Hepi, hilaiya ipi nabol ham? Nainkote umlou ham, hilaiya genthei tah a naum jeng hi?”

TEHSEPI: “Boinu, kadam lou phat’a hi kachaten hon jong eidon nom tah louva hitia hi moh um kahi tah hi. Kathi bou kanga hita hi keiya dia kineppna him him um talou.”

BOITHEM: “Hepi, nainkote chu alungmol thei nalom lom uve.”

TEHSEPI: “Ahile boi, nang ba koi nahi ham?”

BOITHEM: “Hepi kamin Boithem hiya..,” ati laiyin miphalou ho loi chu ahung kit un Boithem ahung daicha vei tauvin ahi. Chuin Boithem jong alung hangin akinah pi tai.

 

—Background music stop!—

 

ANNOUNCER: “Chutah chun gollhang phatah le melhoi tah MINLAL jong ahung lhailut in miphalou ho jah a chun,

MINLAL: “Gol te ho ipi thu um hitam? Ibola numei chapang le tehse ho chunga phamo nahiuvam? Hiche ho chu bollou ding ahi,” atin ahile mipha lou ho jong ale lung han un Minlal chu nokhum jeng dingin agouvin,

MIPHALOU HO: “Kate, kate amuh them ji tave, ija kan lou ding. Kiphat sah keiveh ta o. Kataona man jat bon mangdoh lou lai dinga,” atin Minlal toh ahung kidel tauvin ahi. Ahin Minlal in ajouvin mipha lou ho ajam tauve. Hichun BOITHEM in MINLAL chu alungset pan tan ahi.

 

—-Curtains Close—-

 

ANNOUNCER: “Lampi laiya tehsepi tou ji chu koima dang ahipon, BOITHEM pi ma ma ahi. Anu phat lou jeha ajipa athunun a, atehpi ina kona anadel doh ahi. Hichan geiya achon lhonna chunga MAMANG(Boithem pa) akingaito to tan ahi.

 

—-Curtains Open—-

 

Chuin ajinu akouvin:

MAMANG: “Boithem nu, khatvei hung tadi o.”

HEKIM: (Ahung lut pei peiyin) “Ipi thu hitam Boithem pa?”

MAMANG: “Ahipoi Boithem nu. Tua henu khu in le lou neilou banga iumsah lhon khu apap ipoh lhon kaibouve.”

HEKIM: “Kipo va set tah ta iya kan lou,” atin alu ahei mangin apotdoh tan ahi.

MAMANG: “Henu! Henu! Boithem nu tah jonghi. Pap kihol hibou hi.”

 

—Curtains Closed & Open—

 

ANNOUNCER: “Mipha lou mi 5 ho chun nikhat gam noiyah atou kol un ja achep un; ju le sa aneuvin ahi.”

Chuin alah uva SEIPU in kham pum pumin,

SEIPU: “Vetau Lenpu, keihi KUKI Chapa gin neilou ngaltun kahichu. Ahivanga koima kade theilou pi chu. Ahin keitobang a thutah mi kadei hichu.”

LENPU: “Bhai, nathusei chu keilung lam tah ahi. Tua ju kadon vanga hi kain a khu metam jong kahop lou hichu. Twitheng bou kadon ji, kajinu koma, Boisen nu, twi themkhat hinsoh tih, katiji bou hichu.”

SEIPU: “Ipi najitoh nakiboi nalhon milah a nasei sei hih e. Akinthei pen a BOITHEM iguh diu lampi hin ngaitouvun,” atin ahile adang hon jong, “Yes, good, good,” atisap cheh un, kham pum pumin lam jot thei lou leovin aum uvin ahi. Lampi a alon le le u chu akham sa ma ma Boithem pan amudoh in, aseiyin, “Ka ingam keiya kahi, hoilang mahajon hiuva tulai tah a lampi alet aneo ateu ham?”

 

—-Curtains closed—–

 

ANNOUNCER: “Nikhat BOITHEM in anu le apa koma sum athum in ahi. Chuin achen tehsepi lungset umtah chu kithopi ding ati ahi.”

 

—–Curtains Open——

 

“Ahinlah tehsepi chu amu tapon, iti ahol a mi adoh vangin koiman aumna ahe tapon ahi. Ache le le leh, masanga anakithopi Minlal toh chun akisuton,

MINLAL: “Nao hoiya che a hilaiya hi ipi nanabol hitam?”

THEMBOI: “Heu, masanga hilaiya anatou ji tehsepi chu kahol hichu o. Hoiya iti ahi nahet em?”

MINLAL: “Kenjong kamu lou kal sotta chu o. Koiham khat chun adamlou ahi, ati hi le kilom a.”

 

—Background music(Any love song)—

 

BOITHEM: “Heu, nang hoilaiya kon nahi ham? Namin igah het thei diu ham, kati hichu o,” atin kiphat lam tahin aseiyin,

MINLAL: “Eh.. Kamin Minlal hiya, Umin, tin neikou le chun ngei pen in te.”

BOITHEM: “Keimin Boithem,” atin jahcha tahin akinung ngat to lhonin aguhin anui lhon tai.

 

Hiti chun message in akitext lhonin ahung kingai lhon tan ahi.

 

(Back ground music stop)

—–Curtain Closed—–

 

ANNOUNCER: “Nikhat hi anu le apan Boithem in tehsepi chunga thilpha abolna chunga alung hang in anaphoh tai.”

HEKIM: “Boinu, lam laiya tou ji tehsepi koma che hihin kanati hilou ong? Ibol a sangkhol le an nanathah kit?”

BOITHEM: “Lungset um chula henu. Mi khubanga gilkel dinga, tu phalbi ahitoh sangkhol lum jong aneijou lou chu la em?”

HEKIM: “Nang sanga ahao abolthei akithopi thei mi tampi um, chu a nang kikum ngailou.”

BOITHEM: “Henu, midangin abol masanga eiman ibol chu Pathen lunglhaina hichu la.”

HEKIM: “Pathen lunglhaina naholleh nanu le napa sei sei ngaile chun hijeng. Nanu le napa kal vala nathil pha bolna ding umlou.”

BOITHEM: “Henu, Bible in, thilpha bol chimtih neihih un, ati hilou ong? Hiche jeha chu kibol hichu me.”

HEKIM: “Hiche nu minel hattah jong hi o. Ami lou ding kiti amaho tobang hi ahi.”

MAMANG: “Boinu, nanu sei sei ngai tang boi,” atin ahile Boithem jong alhase valin tol’ah atou lhan akap tan ahi.

 

—–Curtain Closed & Open—–

 

ANNOUNCER: “Boithem jong alunggim val tan, achanga abolthei ahitah lou jeh chun akigelin, ‘Uminlal toh kikitho khomleh pha pen inte,’ atin, chuin Minlal koma ache tan ahi.

 

“Insunga alut in ahile, Minlal in analem in….”

MINLAL: “Hung touvo nao, ipi thu um hitam, tujingkah tah in nahung jengin.”

BOITHEM: “Heu, tehsepi isei lhon chu kamil thei tapoi. Amajehin kaihmu thei tapoi. Holdoh hitin kithopi hite ong?”

MINLAL: “Nalunggel chu apha lheh e. Ahin ibolleh nanu le napa lunghang lou ding ham?”

BOITHEM: “Heu, ipi lom lom a agel lhona hibanga hi amah lhon ahidem?”

MINLAL: “Nao, nahet them lou ahi. Ken athusim naseipeh inge ong?” atin Boithem koma akikhin naiyin:

“Hiti hi ahi: tua tehsepi nasei sei nu chu nang dia napi tah tah ahibouve. Nanu khu mipha lou, diabol tobang ahin, naneo laiya chu napi chu nanu le napan ina kona anano doh lhon a, achangseh a anachen sah lhon ahi. Sottah pi achangin akhosa jouve. Ahin tua ahung dammo phat a kithopi ding ngaichaa lampi laha tou ahi,” atin ahile Boithem jong akap tai.

BOITHEM: “Heu, kanu le kapa khun kapi pap apoh tei tei lhon ding ahibouve. Kapi ahi kahet doh leh kalungset na asang chom e.”

MINLAL: “Ahinai. Ilunggel lhon hi hahsatah khat ahin, ibol khelleh i-inkote toh ikinah jeng thei ahiye.”

BOITHEM: “Heu, lungneo po hite. Thilpha bol mite gam leiset alennai. Eini kitho khom hitin chule ikilungset na lhona jong ngailutna thengsel pumin thilpha bol khom hite. Mi ijatin kingai-kilungset na chunga thenmona le chonset nan mang jongleh, einin vang Pakai lungdei bangin hinkho mang hite.”

MINLAL: “Nao, nathusei chu kahin kipapi val jenge. Nalunggel bang tah a chu kenjong kanagel ahiye. Hungin che hite,” atin amani jong tehsepi hol din ache lhon tai.

 

—-Curtains Closed—

 

ANNOUNCER: “Nikhat miphalou loiho chu avah le leuvin ahile, lampama tehsepi khat analumin ahi. Aveuvin ahile, masanga amu khah sau tehsepi chu ahi aheuvin, agim le anatna chu amu’uvin Hospital a apui tauve. Chujouvin alah uva mikhat in aina apuilutin aum sah tai. Chuin amaho loi jong lou cho dingin apotdoh tauve.

Tehsepi hol a hung BOITHEM le MINLAL toh akisutouvin ahile, akidel tauvin ahi. Chutia akidel jing laiyuvin Pakai lhacha khatin ahin kham uvin, “Gollhang ho, ipi thu jeh a nakinah u ham? Kinah lou ding ahi. Nangho khangdong ho nakinah uva, nakidel laiseuva gamsunga khantouna umpon te.”

BOITHEM: “Ojapu, suhkhel kanei lhon poi. Kapi damlou hol a kache lhonleh eihin kham uva, kakiboiyu ahi,” atile alah uva mikhatin,

MIKHAT: “Ipi e? Koi tehsepi nati’m?”

LHACHA PU: “Ahipoi, naote ho. Onem nemin kihouvun. Nampi le society natong ding nangho nakinah laiseuva melma ho khut noiya ium um jeng diu ahi. Tukal kina louvin nampia dinga ibol thei chanin pang jou te,” atin ahile amahon jong, “Ahiye ojapu,” atiuvin chibai akibolsoh kei tauve. Chuin mipha lou laha khatin,

MIKHAT: “Sopi, koi tehsepi nahol lhon ham? Masanga lampi koma touji nu chu nasei lhon ham?”

MINLAL: “Ahiye sopi. Aumna nahet louvu ham?”

MIKHAT: “Adammo namuna alup kamu phat uva keiho ina kaumsah ahiye. Tua hi lou cho a kahung u ahi.”

MINLAL: “Apha e. Cheute,” atiuvin ache khom tauvin ahi.

 

—-Curtains Closed & Open—-

 

Acheuvin ahile Tehsepi jong lel tahin analum tan ahi. Boithem in api amu phatin kap pum pumin api akoiyin ajah a,

BOITHEM: “Hepi, kahin sugenthei nalom lom uve. Neingaidam uvo hepi,” atin ahile apinun ahinven akoiyin,

API: “Senboi, Boithem kanao. Neihung holdoh hammo boi, kakipah vale. Nanu le napan eina pam pei tajongle nangin neihung holdoh hi phattheina tampi changin.”

BOITHEM: “Hepi, kanu le kapa jong kan kou ding ahi,” atin phone abol tan ahi. Anu le apa ahung tei na dingin ajah lhon a, “Henu, gari accident katoh in tun kaloiho ina kaume,” tin kap pum pumin aseiyin ahile anu le pa jong atija lhon valin, akigong loi jeng lhonin ache lhon tai. Insung alut lhonin ahile, Boithem amu lhon pon, ahin tehsepi khat damlou lupnaa lum a, avel a gollhang phabep in atou pi amu lhonin ahi. Kile ding agot lhon laitahin anun achapa ahinkouvin,

TEHSEPI: “Boi, hung sunglha lhon tem o. Kei nanu lhon kahi. Kahai na hu bei masangin thusei nom kaneiye,” atin ahile Mamang jong atija valin akin leo tan ahi. Ahin anu aw ajah phat chun alaina valin alhisoh in anu koma ache tai. Chuin kap pum pumin,

 

(Back ground Music)

 

MAMANG: “Henu, neingaidam o, kahin sugenthei vale. Neingaidam jou ding hinam?”

TEHSEPI: “Tahsan chaten ngaidam lel akinei pon, minun achate ngaidam lel akichan khapoi.”

MAMANG: “Henu, nacha ti dingin jong kakilom tapoi. Hijongle ina che taute,” atin ahile tehsepin ajah a,

TEHSEPI: “Boinu hoiya um ham? Khatvei beh chop inge,” atin ahile Mamang jong akiheiyin ajinu akouvin ahile amanu jong kap pum pumin ahung lutin atehpi koma ngaidam akithum tai.

HEKIM: “Henu, lungset tahin neingaidam o. Kei minu phatlou jeh a hibanga hi genthei kha nahiye.”

TEHSEPI: “Boinu, lungnop mona ding aumpoi. Damsel a ikimutou hi keiya din aval aumpoi. Ahile Boithem lah,” atin ahile akihei cheh uvin ahile, Boithem ahung lutin, anu le pa akoiyin akap tan ahi. Chuin anu le apan Boithem koma jong ngaidam akithum lhonin ahi. Chuin anu le pan Boithem jah a, “Boi, nathilpha bol jehin nachunga nanu le napa keini kalung lhon alhai tangeiye,” atin ahile, aman jong aseiyin,

BOITHEM: “Henu, thilpha lamtah a hichan geiya eihin pui hi eilungset ka-u Minlal jal ahi,” atin ahile amani jong achen Minlal chibai abol lhonin ahi. Chuin amaho jong thanom tahin ina din akipatdoh tauve.

 

—–Curtains Closed & Open—–

 

(Back Ground Music(Christmas la eipaova)

 

ANNOUNCER: “Christmas konin Boithem le Minlal jong akicheng lhonin, chule Christmas ni jingkah in houin kaiyin acheuvin taona amang khom un, la asa khom uve.

 

—–Curtain Closed—–

 

Moral:

ANNOUNCER: “Hiche drama in avetsah chu ahile, Christmas ahitoh lhona iumna cheh uva Pakai jala thilpha tampi ibol diu ahi. Sil ding neilou peu hitin, neh ding neilou peu hite. Thilpha tampi bol utin thase poute. Kakipah e.”

 

 

Previous articleKANEO LAI CHUN
Next articleKUKI CHANU, LAMNEIMOI CHONGLOI