Home Chaga Thusim THIL JOUSEN PHAT ANEIYE-I

THIL JOUSEN PHAT ANEIYE-I

237
0
THIL JOUSEN PHAT ANEIYE
THIL JOUSEN PHAT ANEIYE

(Part-1)

By: William Lhonga Madrid.

william kwc writers
william kwc writers

THUMAKAI:

Changtu phat aum bangin, chang-at phat jong aum kit’e. Anhon phat aum bangin, anneh phat jong aum kit’e. Lunggim pet aum bangin, lung-ol pet jong aum kit’e. Genthei ni aum bangin, nopni jong aum kit’e. Kani aum bangin, nuini jong aum kit’e. Lhaset ni aum bangin, kipa ni jong aum kit’e. Chule pen nikho ana um banga, thi nikho jong hung um kit ding ahi. Chamkim louna mun, ilennau setlei chunga hin nopna jong asot pon, kipana jong chomcha bou ahi jin ahi. Khang che dungjuiyin, masanga mivaicha’a ana kisei minthang pa jong tuhin mihaosa tah ahitan chule masanga mihaosa tah ahi jeh a, ana minthang pa jong tuhin mivaicha tah ahi kittai. Ipi jeh ham? Thil jousen phat anei jeh himai louding ham? Thumaikai hichan chun chaiyu hitin, anoiya hin thusim simpan tau hite.

Kakhohet masanga kajopan eina dalhah lhon ahitah jehchun, kachunnu toh genthei tah in, kana kikhosa lhon’e. Kachunnu hi miveise ahijeh in, aloi le apai ho nung jong apha jou jipon, hijeh chun genthei tah in, kailhang dunga meding ana joh in, aholdoh kham kham chu kei lekhasimna le insunga akivat ho chohnan kamangcha ji lhonin ahi. Meithai-cha kahi jehchun, kalengol chengin jong eithet’un ahile kivoppi ding jong kana nei jou jipoi. Amin mai maiya “neilou genthei hole chaga ho lungset ding” tia lhangsap atam lheh vangin, ngailut jal’a akhoto ding le apanpi ding vang koima ana um deh jipoi. Ajehchu leiset mihemte hin kamchenga “ngailut, hepi, khoto” tin apha pha isei nauvin, aseiho tah jong tahsan thei alhom lheh jengin ahi. Keini nucha khoto ding le ngailu ding vang, leiset mihem penglou hileh akilomin, ngailut jal’a anchang honkhat eipe lhon ding jong koima aumpoi. Kagenthei lhon dan dan chu atepi ding jong umlou ahi. Kachunnu adammoa, mejoh a ache theilou teng jingson janson ding jong kanei ji lhon tapon, hijeh chun changlong/motlong hopou metamin kahon ji lhonin, hiti hopou chu oiva na dingin kana neji lhonin ahi. Ka-insung genthei naho kavet jiteng lekhasim ngah jeng ding bou kanomin, ahin kajopan alaicha kona eivailhahna kamcheng ho kageldoh jiteng kajopan eivailhahna banga umlou ding chu kanom jipon, hijeh chun gentheina tincheng thoh pumin, lekha pontho tah in kasim jingin ahi. Keini nucha kilhamon napen le kinep napen chu Pathen bou ahi jingin, Pathen chu akhatnaa kakoi jing lhonin ahi.

School kai dinga kache teng jongle meithai-cha kahi jehchun, lhon khompi ding jong loi le gol kanei jou jipoi. Loi le pai hovang kipah tah in alhon khomun, lamlen pam’a dukan hoa chun, nehthei tuitah tah kijoh ho chu akichoh uvin, lamlhungin nehthei neh pumin, akihoulim jiuvin ahi. Keivang kachangseh in kache jin, kaloi le kapai ho umchan chu kave jin ahile ka-otcha lheh jeng jin ahi. Mitvet a gollhang akihi jeng tah vang chun, neilou genthei akihi jehchun, loi le pai hon nehthei aneh jiu chu kaduchat kom jong abeida jipoi. Ahin koiman “Haoneo, nehthei hi neo” ahilou jongle “hungo kivop’u tin, lhon khomu hite” kamcheng khatbeh a, eiti ding jong koima aumpoi. Koijin ba kei eikivop pinom ding ham? Keitobang kivoppi mi chu min amuset ding jeh a, koiman eikivoppi nom jilou ahi. Keivang kalengol cheng kivona bangin jong kaki-von joupon, vonse deduh ho chu kaki vonin, jahcha pum pumin School kajon jingin ahi. Kagenthei lheh vangin, lekhasim vang kapontho lheh jenge. Ahin, loi le gol ho banga Tuition jong kila joulou chule School kikhen seh a, natong jing kahi kit jehchun loi le gol ho nung vang kapha jou jipoi. Hijongle, Pathen lungset kachan naho jalin, exam tina kalolhing jingin ahi.

Neilou genthei kahi lhon jehchun, ka-inko ho jong keini akonin akikangse un ahile ka-inko ahi vangun, inkoa simthei jong kanei jou lhon poi. Ajehchu mihem khat chu ahaosat a, insunga nehding le donding ninglhing sel’a akoi jinga chule sum le paiya kivatlou hel’a aum jing theile, a inko ho goh hilouva, midang dangin jong “eiho, inko louko ihiuve. Pu le pa khanga kona guikhao jamsa ihi jeh un, kikhen thei ihi pouve” atiuva, amaho dinga a-inko alouko diu le aloi apai diu tam ji ahi. Keini din vang inko ho jong inko lou abangun, “amate khu kapute ahin, anchang honkhat beh kithum hen” tia, kineppi ding chu umlou tahbeh ahi. Kachunnun nilhah sehle, Maicham eisempi jingin, mitlhi long pum pumin taona amang jingin ahi. Ahin, ken ipi jeh a? Kachunnu chun kap pum pum’a taona aman ji ham? kana hethem poi. Kachunnun eitilkhou jin, “Boi Haoneo, genthei naho jeh in, kisonglel hih-in. Pathenin neilou genthei ho angailun, chanvou jong agon peh jie. Tua igenthei naho hi kitilkhou nan neijon lang, lungneo nan vang nei hih beh-in. Pathen’a nakingai jinga, natohna jousea pontho tah a pan nalah jing poule, tua igentheina hohi nikho khat teng, kipana le lung-ol na joh in, ahinle kitding ahi. Thil jousen phat anei bangin, haosatna le nopsahna jong koima achangsot ngaipoi. Chule gentheina jong chutima ahi. Boi, kenvang imacha kabolpeh joupoi. Hijongle thil jouse neitu hingjing Pathen koma, mitlhi long pum puma katao peh jing nahi. Kasei nangai jing poule, nikho khat teng kataona banga Pathenin nachunga aguilhung sah teiding ahi” eitin, kachunnun ngailut jalin thugil le thupha tampi aseiyin, acha kei ei-tilkhouvin ahi. Kenjong phat ong kanei teng Pathen Lekhabu Theng kasim jin ahile keima dinga kitilkhouna thei thupha tampi kaki mudoh jin, hiti ho chu kalungsunga kaki melchih jingin ahi. Pathen vahchoila hojong kasa jin ahile kipah nan kadimset jin ahi. Ajehchu Pathen thu hi ahelou ho dinga ngolthu hijongle, Pathen thua kimangcha jing ho dinga, Pathen thu hi lunglhaina pen chule sum’a choh jong ngailou, ahivanga amantam pen sum’a choh jou hoi chu hikit lou ahi. Kagenthei lheh vang chun, Pathen vahchoila kasah a, taona kaman jiteng kalungmongin chule Pathenin lung-ol na jong eipe jin ahi.

Pathen thu kakhohsah jehchun, Pathenin ngailut jalin chihna le hetthem theina jong eipen ahi. Ajehchu keiman jong kataona jousea, chihna le hetthem theina Pathen koma kathum jing ahi. Ahin, neilou genthei kahi jehchun, koiman kei thusei ho chu thun jong eisimpeh ji pouvin ahi. Koijin ba kei tobang neilou genthei thusei pou “adih e” ati ding ham? Migentheiyin thudih kamcheng som asei sanga, mihaosa khat in dih hih jongle kamcheng khat asei jong chu mipin “lamkaipu, nathusei chu adih val’e” tia amen abol’uva, ajui joh u ahi. Ole, kahetkhel jeh ham? Kenvang hiti chun kahe-e. Hiti ahijeh chun kenjong japi ang’a ima kaseinom jipon, mithusei ngaiyin joh kapangin, adih adihlou chu kalungthim’a kalheh khenin, adihlou ho chu kapaimangin, adihcha cha chu kalungthim’a kaki chin jingin ahile chihna le hetna lamin kakhangtou jingin ahi. Ajehchu aseitam pen’a ipan sanga, angaitam pen’a ipan johle, kikhangtou jo ahi. Miten eimuse hen lang, eithet jong leu Pathenin eiumpi jinge ti kahet jehchun, kalungmong jingin ahi. Keini nucha anneh jiho vang, dampet a neh dingin aphanan, dammo veiset petle, nehngam ngam jong ahi jipoi. Ajehchu gilkel’a thisanga, oivana ding ahipoule, tia mineh nomlou hopou chu keini nuchan kaneh ji lhon ahi. Kei gentheina ho chu iman kasimpon, kachunnu gentheina ho vang kave jou jipoi. Dammo pum pum’a nisa noiya mejoh a, acheji chu vetjou um jilou ahi. Ahin, khonung khankho ding gelna jeh a, lekhasim kahi kit jehchun, ila kalo thei dehpoi. Kachunnu kathakhel le lekhasim kangah ding chu ahi maiye. Hijeh chun kenjong kabol dinga lom joh chu gunchu tah le pontho tah in kabolin, genthei naho jong kathoh ham ham’in ahi.

Kum le lha kihei jing bangin tahsa le lunggel jong akhangtou touvin ahile nungah vetnom na phat jong ahunglhung tai. Nungah kamu jouse chu hoi kasan, hoi kasah jouse vang kadei deh kit poi. Nungah dang jouse sangin Hatneo chu hoi kasan, kadei lheh jenge. Hatneo chu mihaosa ahi jehchun, kadei lheh vangin kahel ngampon, hijeh chun gel milding tin phat tin’in lung kagel jingin ahi. Milding kati chan’in koi miltah sangin, kalungsetna le kangaina chu phat le ni chal jing bangin achal jingin ahile kalungsetna chu asang lheh jeng tan ahi. Ihmumo toumon phattin le nitin a Hatneo chu kagel jingin ahile lungdang him him kagel thei tapon ahi. I-deipen nu milding kiti chu thil hahsa tah khat vang ahi. Kalungset val jehchun hel jeng ding kanomin, ahin neilou genthei kahi jehchun kisonlel nan kadim’in, hijeh chun kalungsetna thu seidoh ding vang kangam poi. Khatvei kom komle lungset letter kajih jin, ahin kisonlelna jeh in kasumang kit jitai. Loipha golpha khat beh kineile lungsetnu helding jong bailam jep ding ahin, eipanpi ding koima kanei joulou jehchun, lungsetnu koma laitol lenga cheding vang kei dingin ahahsa lheh jengin ahi. Ajehchu inchenna kiki-bang moval ahi. Kalungset nan vang “nalungset na thu chu nalungsetnu koma sei jengtan” eiti jingin, ahin kamchengin aseidoh ding vang agamla lheh jenge. Ajehchu nei le gouva kibanglou kahiu tilouva jong Hatneo somai mel kamu jiteng jachatna le kiphatlam naa, kadimset ji ahi. Tahmel’a kamule bon chubanga kijahcha jia, lungsetna thu akoma kaseiding vang chu gal ginna kagin jeng kit ahi. Hatneo guhthim lungset kahin chan nia kipat’in, kahinkho chu nopna avang ngeiyin ahi.

Milna ding ijat kabol vangin kamil thei dehpon, ahin kalungsetna thu vang seidoh ngam louvin, kaim jingin ahi. Mikhat ilungset a, akoma iseidoh ngam loule, koi dinga jong nom dehlou ahi. Kumtam lhatam achetan, kalungsunga Hatneo lungsetna vang acheng jing nalaiyin, milni him him kanei thei poi. Kalungsetna chun eigenthei sah lheh jengin ahile kipatah a hinkho jong kamang thei tapoi. Hijeh chun kenjong “kamoh hel jeng ding hitam? Ole, milni ahung um kit dem?” katin, kei le kei question kaki bolin ahile keima man answer jong kabol paiyin, “ilungset khat chu, iti kimil thei ding ham? Milni hung um ponte. Koi miltah sanga, lungsetna le ngaina joh hungsang deo deo ding ahi. Hijeh chun nalungsetna thu chu sei jengtan. Chutile nalungsunga napohlel lungset natna chun, nalha kang tante.” Chuin kenjong kalungsunga kapoh, lungsetna thucheng ho chu kalungset Hatneo’va dingin letter kajih tan ahi.

Lunglai gil’a kamil joulou, phattin le nitin a eigenthei sah jing, kalungsetpen Hatneo, hinkho noma naman jing hinam? Tunia kahin thusei ding hohi, keisei dinga vang lomlou chu ahinai. Hijongle golin keikhel’a kahin sol, hiche lekha-thot a thucheng kajih hohi neina simpeh a chule neihin donbut kit dingin jong, kahin tem’e. Hatneo, nangin neina hetpeh lou vanga ken phat sotpi lungset kahin chan nahitai. Kalungset lheh vangin neilou genthei kahi jeh in, nakoma seidoh ngam louvin, phat sotpi kana im-min ahile kalungset nan eina genthei sah lheh jenge. Lungset jeh a, genthei kathohna kumkho asot phat’in, katahsan jong adoujou tapoi. Hijeh a chu kisonglel pum’a, kalungsetna thu seidia hiche lekha-thot hi nakoma kahin sol ahi. Golin lunghan nan vang neisan peh hih-in lang, lungset jalin neina simchaipeh in lang chule kamcheng khatbeh in, neihin donbut kit teiyin. Nungah melhoi le donghoi nahi jeh in, jatam laiya nahin lungset ding le nahin khoto ding tangpa asang ajan um nante. Hijongle ven, ken kahin lungset banga nahin lungset ding goldang um ponte. Kei sanga nahin lungset chu Pathen bou ahi. Hinkhoa ding monga lungset kachan nahi jeh in, kalungsetna vang asang lheh jenge. Kalungsetna asandan hi khut’a jihchai thei jong ahipon chule kam’a seichai thei jong ahipoi. Kalungsetna hi damsung hinkhoa ding mong ahijeh in, kadamsungin kalungsetna thu hi seijou ponge. Hatneo kalungset val jeh a, jahcha pum pum’a kahin sei jeng ahi tihi neihetthem peh-in lang, goldang chihna, haona, hoina, thepna le boltheina ho toh vang neite kah hih beh-in. Mibol theina jouse phajou hih jong leng, lungsetnaa neivetle vang nanga dinga lungsetnaa, dimset kahi. Hatneo, kalungsetna thu kaseichen joupoi. Golin, ol olin hin hethem nan nate. Hiche kalekha-thot hi namule, kamcheng khat beh a neihin donbut kit dingin, meithai-cha Haoneo keiman kahin tem’e. Hichan hin chai tange. Seikhel aum’a chule nalunglou lam kasei doh aum khah tah jongle, lungset in nei ngaidam’in. Kakipah e.

Hiche lekha thot kajih chaiyin, lung kagelin “lekha thot hi ipi kalo ding hitam? Kenla pengam pong ting, koiba kapehsah ding hitam? Ole, kasuhmang kit ding hitam?” katin, kei le kei kaki houvin ahi. Chuin kenjong “phatsot tah kiboipia, suhmang kit ding vang apamaiye. Pu le paten Sai matna dinga Sai angaiyin chule sum holna dinga sum angai masae ana ti banguva, agolnu Chingnu khu pehsah ding hitante” katin, hiti chun lungset lekha-thot chu agolnu Chingnu pehsah ding kagel tan ahi. Jankho asot tah jehchun kenjong taona kamangin, jan samang kajal paitan ahi. Jingkho vah in Chingnu koma kache in, seingam lou sasan ajah-a
KEI: “Chingnu hiche lekha thot hi, nagolnu Hatneo ana peo na?” katin, lekha thot chu kape tan ahi. Chuin Chingnu in kajah a aseiyin
CHINGNU: “Heu, koiyin nahin choisah ham? Ole, nanga ham?”
KEI: “Henge keiya ahiye. Anape tei teiyo na Chingnu?”
CHINGNU: “Henge, anape nange. Lekha a kijih thucheng hi kisimle, gil lheh jengin te na?”
KEI: “Manlou pou kasei hih e. Lungset in ana pe tei teiyo. Chingnu ahijongle kei che kit tange” katin, inlanga kahung kile kittan ahi.

In kalhunin an kane loiyin, School kai dingin kache tan ahi. Chingnun lekha-thot chu apeh ham? Ole, apeh nailou ham? vang kahe them pon, hijongle hiche nikho chun Hatneo umchan chu akikhel lheh jengin ahi. Eivet lou teng kathimvet jin, keilang ahin vet teng kaki heimang kit jitai. Aumchan le amaiso chu kavetle, lunghang thim toh akilouvin ahile nopna eipeh ding vang kinep aumpoi. Ahin, i-lungsetpen nu chun lunghang pum’a eivet jongle akilungset jingin, aumchan jouse chu aki-vetnom jinge. Thudang le ladang jong gelthei louvin, kalungsetnu chun ipi lung agel dem? tin, koima hetpeh louvin kaki saboi cheng jengin ahi. Phat chomkhat jouvin keiho jong School kaki khen kit tauvin ahi.

Thusim hi phat tampi sumanga nasim ahi tahle, anopna mai maiyin simdan lang, jildoh khatbeh neitei ding joh gel thupi jon. Ajehchu loi le gol chule nu le pate hon, “thusim hin jih kit in” eiti jeh uva, mikhat le nin aphat chompi jongle “aphai” katia, genthei tah a kageldoh kham kham kahin jih ji ahi. Lunglut tah a simjouse chunga kipathu kaseiyin, Pathenin phatthei naboh cheh tauhen. Kakipah e.
Keima William Lhonga Madrid.
8731974334.

Thusim hi anom lheh e nati le anoiya “LIKE” button khu meh in writer ho na support nau vin, chule seinom nanei le anoiya comments nahin bolthei u ahi.

Site nalut a notification pop up hung potji ho allowed anabol ji uvo maban a thusim thah ahung ki post teng notice namu ji diu chule Bell button a subscribe kiti chu meh un.

Previous articleENGLISH THUCHENG OWN KITI LE POSSESS, KITI IPI TINA HAM?
Next articleKUKITE KHANKHO A KHOSUNG GOLLHANG HO MOPOHNA LE KIMAN CHAH DAN