Writer: S.Lien.
Arrange: Naocy Haokip
(Part-III)
Kah lah lah leh kidangtah tah-a tokhah kaneiji jeh chun kaji kachaten gamlah-a kache ding jong ei janom beh tapouvin, hijongleh loukon lou kah leh kavah jing thouvin ahi.
Ka pension jou til chu ahitan nilhah khat kakho languva Simui kiti vadung lenbeh lou khat’a lensep din ka kigo tan ahileh, ka kho hou khat’in hiche vadung khel khel’a nache got, nga vang tam di ahin, hijongleh a gam ngah ho tidiham agam neite (thilhaho) aumuvin koima ache ngamji poi atin, kikigo tachu ipi jong umchom diham, vadung jousea umveh tau , cheho hi kichat jejong kahe tapoi katin ka che thou thouvin ahi.
Kho kakhel jep’a kon chun kanunga mikhat’in eihin del hileh kilom kasan eihin phah dikon chakhat leh athip ji-in hitia chu nivei thumvei aum phat’in nom mo kasa thimin, inunga thom tobang aumleh, masa o itin, lampi i-ot leh aphai atiu kagel doh-in, kagah bol leh eihin tongkha um hileh kilomin lamlhang lang ah kalon lhu dehchet-in katimul ahung thou sul sul’in akhel chu athip tahbeh-in ahi, ka che che leh vadung ka lhung tan, Songpi chunga kagah kichol leh, ipi ham khat thingchunga kon a hung khelha hileh kilomin kasah jep chu apoh thut jengin akhel abanla ima thomgin dang aumkit lou phat’in, kakhouva hapta ni masanga mikhat (amin sei lou di) thinga khelih chu kahin geldoh-in nom kasa beh pon ahi, vaikit theila ahipon len chu kahin sep panin ahileh,
Tuili chung khat’a chun thinglong vom beh buh khat kijam aumin, che thinglong noi chu kagah se leh nga atam lheh jengin thumvei kase jongleh kamat jat ma kamat kit leh, katha anom val’in ka paipeh tuili pama chun ka koiyin kase kit leh kanung lang’ah thom ging khat ka gah jan, thil gim namse tahkhat nam jong kajan, ka nga boipi pet ahijeh chun kalim-sah pon, nga phabep pi chu kalen puma chu lipam langa kahin dop doh leh tuili chunga kijam thinglong pichu ana dingdoh geng gung jeng tai, vadung noi lang jon’a ache suh leh thingbah hochu huiyin asem bangin aling sul sulin, a cheh suh nemnumin, kidang kasa val’in amun chu dalhah vah ding ahe katin ka paipeh chu kagah vet leh ka ngamat jouse chu ana beihel tan ahi, chephat chun len jong kasep nom tapon, ka paipeh jong chu ka tong kha nom tapoi.
Anamset dan chula imadang nam tojong kilou lou, a-ui toh ahingnam akitho-in haina ngam jong ahipoi.
Kalen chu kakhit tup’in ka paipeh chu kadalhan inlang chedin ka kigo tai, kache na langa chu che kit ding kati leh Thinglong tobang, ipi ham che suh na lang ahi jeh chun kanom kit pon, vadung chu kajui tou tai,
Saotah kapha tan kaimun lhun nading naicha ahiphat’a lungmong tah-a kino beh louva kache laiyin, thing chunga kona hung khelha hileh kilom khat chun vadung chu ahin sep poh hut kit-in, asena mun don lah-a chun atao hut hut jeng tai, akimu gao gelgolin mi danin kamun thipbeh-a kavet leh, ahung kheh na thing phung ma ma achun akal doh kit-in, ahung khe lha kit-in a tao hut hut-in,, ahung kipatdoh kit-a athing kheh na lang chu ajot kigo kit-in ahileh akeng bong hileh akilomin akeng lang khat chu akai thon, akal kit got phat’in akal jou tapon, thing bula chun akap dup dup jeng tan ahi, chomkhat kidang satah-a kavet jinglai chun ka lhang chakhat chu ahin sep mat dah kit-in, amuna chun ahung tao kit tai, tinading kahet lou phat-in, ka hung ki pasal sah-in,
Thinga khelih pa min chun ka kouvin, Kachunga ipi lhasetna naneiya hiti lom loma hi nei bol hita, katia kahung kisen jah jeng leh, tui eihin the khumin, ahung nui sul sul’in ahi, lhavah noi ahijeh-in thingnoi hijong leh avah gelgol thouvin ahi hoi tah-a kavet leh tuilah-a chu mikhat ding danin akimu thei phel pholin, thil-ui gim chu ahung nam kit tai, chephat chun mihem ogin tojong kilou beh lou khat-in ahung paovin, ipi pao ahijong kihelouvin thu khat ahin seiyin, kahung kipat doh kona kicha lou dinga kasei masat chu, angailou khat ham, kati akithing in kalu ahbom te phan kahe’n ka timul athou sul sul’in ahi, che phat chun gamlah-a chu peldoh kagot leh kho kamu theipon, khaogui khat ah kahung kipal lhun ahileh ka toka sakhaova ka torchligth neu poh chu ahung khe lhan, Oh..! Chejong hi kapoh hija hime katin, kagah khovah in, kanung lang chu kagah kho leh, Mikhat kanung lang tah-a chun adingin amaichang kagah kho leh, Thinga khelih pa chu ana hitai, amel leh afigure a chun ahet thei nakhat aumin, hijongleh amaigu ho chu adoh setsot-in akam leh anah homa chun than ahung kiheh doh sao saovin, ane hojong than in anejou ta’n aha jouse a doh seu souvin leikai henhunin eihin ven ahung nui ging dum dum nalaiyin ahi, che kamu phat chun , ka kicha val’in kalhai leh eihin del pha pon lampi ka lhung doh tai,
Lampi ka lhun leh kalung among domin vadung langa chun a tuhsa voh voh-in ahi,
Olin kahung kipandoh kit leh ka masanga gah muphah lou jep’a chun ipi ham khat tol’a kikai hileh kilom tah thom ging khat kaja kittai, kahlah lah leh mi ni leh thu kilhon bangin asa chul chulin athuseiyu jong chu kahe thei deh deh ji in ahi.
Kaha che jong leh kipha dehlou ka din jongleh ei dalha chom deh lou chun akija ji-in, kichat chomje jong kahe tapon, kahung hung leh Ka khou jong anaitan Ka kholuiyu kahin pha tai, lhavah chu ahoiselin gamlha tah tah jong akimu thei tan lungmon aum tai kiti chu, kholui ga khel jep’a Lhanmola chun, ponkanga kivon lhan song kido chunga tou khat kagah mu kit tai, chom khat kadingin kavet leh akun jemjumin achat loh poi, che phat chun iti kagel ham ka thilmu dang ho sangin ka kicha jo tai, agam chu kapel in ka thom gin ajah lou din thip beh-in kache-in akhel lang peh khonai langa lampi kahin mat doh kit leh lampi ka sodoh natah achun ,
khaikhu jemjumin ana tou kit tai, kakinai val tauvin jam jejong um talou, kei jong lungdong val ta kalel toh ka thi leh kathi katin jamlou dingin, kakonga khukiri (chemkon) kasat doh-in kapan jeng leh ol’in ahung dah doh-in eihin vet chu Vo, Henu..!! A hoimo dan dan chu ate pi di umlou, amit sankeu kou jeng amai chu jongmai to jong akilouvin ahatu ni asao chomin abil chu vohchabil tobang khu ahi, kamu phat’in ki kicha henlang kijam jong leh kisoh cha lou ding kahin ka chem chu kachil kaphi-in ka pan jeng phat’in, pao kicheh sel’in ahung paovin hitin ahin sei tai.
Napu-in Kaputeu tamtah asuh gentheiya anatha jeh-a amajong kana tha-u ahitan chejeh-a chu Nang veitamtah kahin suh kichat-u ahitan, Napu dungsun’a Pasal phatah nahi, tua pat koi machan nahin suh boi lou ding ahitai, lungnom sel’in umtan, eitin alengmang tai.
Hiche jouva pat chun tuni geiyin imacha boina kavel to kit tapoi.
〰️〰️〰️〰️(Beita)〰️〰️〰️〰️
Note:
Lunglut tah-a nasim chai jeh-in kakipah-e, “THE LAND OF GHOST” Part I-III hichan hin akichai tai.
Thusimbu Machal jing thei na ding a pan lanom ho kipah tah in lem ahijing in ahi anoiya button “Click Here” khu meh utin details anasim ute.
