Part-I
Writer: S.Lien.
Arrange: Naocy Haokip
Mi sanga kavangset joh nakhat chu ka neulaiya konin vei khat khat leh kichat um tah tah katoh kha jing keiyin ahi.
Mun chom choma kathil to ho kahin seiding ahijeh-in Thusim dan’a hungche lou maithei ahi.
Thilha kiti hivang aum mong ahinai, Vannoi Leiset hi amaho let nagam ahi jeh-in mun khat khat’ah amu/atohkha anaum jin atahsan lou beh jong aumda pon, atahsanlou ho jong oimo thei hideh lou ahiuve, atoh khalou dinga chu, ginchat lou thei khop’a umjong atamin ahi,
1987 lai ahitan, Nagaland Arm Police a kapan laiyin Dimapur khopia kona 15 km, lah vel’a gamlha, thinglhang gam inn jong umlou mun nomtah khat outpost’ah NSCN faction ho vesui dingin eikoiyuvin ahi,
Bol dingla umlou camp a chun lekha kap (playing card) pou ka kap jiuvin, loikhat sakap’in kavah jiuvin, jinei thah til panbep kahin kaji ka-ngai toh ka thomhao ji lheh jengin ahi,
Nikhat kagam len nauvah dop lentah khat katoh khaovin akimvela chun sa nung adim jengin janleh ga chan di chu ka lunglut tan, kaloi ho’n dop-lah’ah Thilha atame atiuvin, khatcha jong anom tapouvin ahi,
Nilhah in ka Lamkai pao, Naga ho khat koma kasei leh, na nop leh gache-in sa duchat ba aume atin, keijong kavon kaki got tup chet-in akhoh leh geh den jeng din von bulhing set’in kaki got tan ahi.
Kalhun phat’in thing chung khat kapan nading kaki do-in 303 Rifle khat toh megazine 3 achang dimset toh kapang tan ahileh khojin chip chep’in Sajuh chal khat ahungin kakap leh amun’ah alhu ngal’in, kin tah-in abat bat’in ka-at lhan meipi kasep-in kalhut tai, akoma chun kalumin meichu athi phatleh kagah tih kong kitji in jan 10:00pm vel jep-in mikhat kei um nalang chu hinjon hileh kilom thim khat husa kajatan, ka meithal load san kakoiyin kana vet leh ka ngai mama jeng kajinu ana hitai, kidang kasaval’in meithala kadoi jeng phat’in, ahung nui hiu heuvin, lom lom naha kiven na-e, kahin ngaival’in tin Dimapur a kanu neo te inn a kahung chu kahungpaiya na camp uva kahung leh na loihon che a meivah naa khu um ahi atiu va kahung hichu-o He-Umang, ahin tin
Kei : Ash..!! kahin tahsan mo na-e, katileh
Aman: A-ipi chu hamo nei tahsanlou, lha masa a sum neithot jong chu alhingin kamunai 15 thousand chu ahin tileh
kalung aboi lha jeng tai aleh kajinu hi mi hilou khat ahidem kati kom jong aumin, cheva ahung thei nading chu iti kagel jong leh ahithei pon, ka lungdon phat’in hitin kahin sei tai,
Oo, apha-e leh Lamneo nahung leh kei kalel valin hung lum ingting nangin mei hin tih-o na? katileh
Aman, Umm kicholin eiti phat’in kaki ihmut lhem sah-in aguh chan kave-in ahileh olchan kadip ahin khoiyin nomtah a ih-mu dana ka umleh, alu ahin sudot-in meipang chu ajonin, Sa ki lhut hochu ahin loilhan ane jah jah jeng tai, ahung kihei leh Vo Henu…!! Asam lang leiloi jeng ahatu gachang te te aphan amit chu a kou letlut jengin vetngam ding san jong ahi tapoi,
Chephat chun ka Rifle kasat doh-in einung ngat pet tah chun adip jon tah kakap-in, ahileh vohcha penin apeng choi choi jengin, chuphat’in keijong ka lhai tai,
Kanunga chun tao hut hut’in eihin delin, torchlight a kagah kho chu, kakap khah naa athin alung hung lot doh chep chup hopi chu a khut jetlanga chun aheng lut’in athisan akhut’a beh hochu agah leh jin, alel thou hiding ahin alei chu tongchan hel’in akai lhan ahat dungjuiya agiljang hung pot ho phu dup dup chu asim beh-in eihin del tei teiyin ahi.
keijong ka tha nei jouse abeihel tan ka kichat toh kahaisam goleu tan ahi, kamasanga chun Tehsepu khat’in thaomei (Larnteen) khat ana khai gong gongin, mitah ahilou ding chu kahenai,, ka thi leh kathi katin ama lang chu kajonin kaki surender jengin ahileh Insung khat’ah eipui lut-in eilup sah tai, kot bula chun apangin, ahileh pasal chem choi mini ahungin,
Tolthat pa chu hoilaiya um ham Sir ati uchu kagah jan kadip’in tung tung tia sadoh jengta ipi bepseu ahin sei tadem tia dipdom sa a kangai leh Tehsepun, Kile kit’unlang na mithi uchu kipoh doh uvin, ahol’in ajon amu hikhu phamo behseh-a, atileh Henge Sir atiuvin, akile kit tauve, chephat chun kalung mong hiding ahin kalel val toh itih kah-a kana ihmut ham kahepoi, khovah phat’a kahung khah leh Mongpi jung pheng kah-ah kahung thou doh-in, kahung tho leh lhang langa kasa kap namun lah-a chun kaloi hon eikou gin’u kajan kagah kikou leh meithal 3vei ahin kap ginguvin chom khat jouvin kaloi hotoh damselin kaki muto tauve.
End of Part -1
Aban leh Burma, Tedim gama ka pute kholanga kache naa kagam man na isim kit diu ahi.
Note:
Lunglut tah-a simchai jouse chungin kakipah-e.
©️Copyright
Thusim hi anom lheh e nati le anoiya “LIKE” button khu meh in writer ho na support nau vin, chule seinom nanei le anoiya comments nahin bolthei u ahi.
Thusimbu Machal jing thei na ding a pan lanom ho kipah tah in lem ahijing in ahi anoiya button “Click Here” khu meh utin details anasim ute.
