THASET JEH LEH JOUSEI JEH A GIHSAL NA
By Shonkhogin (Hegin) Haokip Maranatha Cottage Hebron Veng Phaipijang Langol Imphal West # 9774096152
Vo mithase, sihmi henga gachen, alamlhah ho ngaiton lang, chihnan neijin.Proverb.6:6.*__
Semtila ipu le ipiu Adam le Eve in Pathen danthu anasuhkeh lhon nia patna mihempa koma kigaosap chu ipiham itileh, Nahinkho lhum keija tohgim genthei puma tol natuh a neh ding nakihol ding ahi. Gen. 3:17b. anati. Hiche dungjuija hi mihem kiti phot hin ulsalonga an akihol dinga thupeh ana umah ahitai. Hijeh a chu, natohlou kitijong hi pathen thupeh sukeh akihitahjeh chun, eimajong akikipah thei poi. Kigen-thei jongleh na itohmama leh hinkho noma ahi, ajeh chu hiche hi Pathen thupeh ahi.
Hijeh a chu, Solomon michingpan, thaset nahin phulou helouva vaichat na hunglhung ding ahi anati. Pathenin mihem tehi athase dinga asem ahipoi ti jong imudoh theijuve. Mitheng Paul in jong Na tongnom lou chun an jong nehda hen atijeng ahi.2.Thess.3:10. Hiche lai muna, thaset jeh a Sihmi koma eikisol naohi jachat umtah ahi. Ahivanga athase dinga kitilkhouna lentah ahijeh a chu eikisol u ahi. Sihmi te khu, gan hing laha aneopen ahi vangin achih dan u leh apot thodan u akitho thei nao khu veuvin lang kihil nan neijuvin tinajong ahi.
Amaho khu itabanga ching hitaovem itileh, chele vale anomlaileh nehlechah akikhop tup uva, chele vale ahahsat phatleh noptah a anehjiu ahi ti imuve. Hichehi mihemte jousen ibol diuva lom chu ahin, akibol lou tamtah ium nalaijuve thaset jeh in. Abana sihmite a kona imu chu ipiham itileh, athase aumpouvin ahi. Eihojong khutedingdol khu ihiuve. Adihtah in, mi hin Pathen cha hina dihtah hi neipoupou henlang hileh thaset kitihi umlou helding ahi. Mi thase kitihi khununga dinga kinepna neilouho ahinom jiuve. Chukitleh akithothei danu khu mihemte bolding mong mong ahiuve. Sihmi khatin thilkhat ahinpoh leh khat alangkhat na hungpangje, tiho khu ivetleh kihouthei jong ahipouvin, khubangtah akithotheinao khu eiho dinga kihilna lentah ahi. Hijeh a chu Thaset kitihin imutsetna hinpolut intin, imutsetna chun vaichat ahinpohlut teitei ding ahitai ti heu hite.
Jousei jeh a gihsal na kitihi phabep khat gahve leuhen, Jousei kiti hi hoija hung kipan ham itileh, Eden hona gul’in Eve koma Nathi loubeh ding ahi atihi ajoujou asei ahi. Gen.3:4 Hiche a kona chu hung kipan ahin, hijeh a chu Jou kitihi Satana ahi kiti ahi. Bible in satan hi abultila patna tolthat ahin, thutah himhim umlou, aman jou aseiphat leh hiche Jou chu amaho pao ahi. Hijeh a chu amahi mijou ahin, Joupa(father of lies) ahi. Jousei kitihi eihon ima a ingaito lou vanguvin. Jousei kitihi thina ahi. Thuph.22:15 chu veleuhen, Uicha hole doichoiho,chuleh jonthan hoi panhole tolthatteho, chuleh milim doihouho chuleh Thu jousei ngailu asemdoh ho pamah aum ui, atie. Achutileh thujou sei kitihi thina ahi ti ihet uleh tukal isei kit tahlou heldiuvin ikitem uve. Pathenin asimho jouse phatthei bohtahen.
