IPI DINGA KITAO JUI HAM?
CHOLNGAH NI PATHEN THUHIL
TAONA thucheng hi hoilai hoikom hijong leh ngaichat khat akinei jeha THUMNA kinei ahi.
Asun:
N.Lhungdim
Thangting House
Molnom- West
26th July 2020
Pathen koma taona akiti leh mihem in ama changa abol theilou midang in jong amoh bolthei louding mulou Pathen kom a ngaichat thumna ahi. Hiche taona kiti hi Pathen aum e ti jousen anei ahi in Pathen aumpoi English a Atheist kitihon ahilou leh Agnostic kiti Pathen um ding umlou ding tahsan theilou ho bou in tahsan ponte.Hindu hou jui ho hi atao hat na khat chu a in cheh uva Puja Room khat anei uvin houlang a lunglut ho jousen jing kah natoh akipat masang tichu office kaihon office chemangsang in minute ijaham khat Puja a bol jui u ahi.
Muslim ho hi ahileh Quran in nikhat a 5 vei taoding atijeh in Hou lam a lunglut hon 5 vei taojui u ahi. Tot le tah koma midang hon asei uchu ahi leh Muslim ho hi a lungchang khoh beh jeh uva Mohammed in 5 vei tao uvin kitileh thilphalou bolna man aneilou nading uva anasei ahi tin asei un ahi. Amaho hin thisan so kiti ho hi imacha agel lou u ahi. Hou thu jeh a miitha leh vangam durect a kilut thei ahi ati jeh uva Jihad kiti abol bol kom u ahi. Muslim ho taona hi NAMAJ atiovin ahi.
Atao hat hoi atao hat lou loi aki um nai.Kei hi taohat lou loi lah a jao tei ing e.Kataojong leh katao sot ngaipoi. Kaseiding ho aban chan kasei in katao ahi.Mi kim khat hi sottah tah ataovin kageldan a sottah taoleh ogin tah tah a tao ho chu katah san poi.
.
Alhangpi a sei dingin political party lah a Communist Party ho atamnapen West Bengal a Chief Minister 1977-2000 chan kum 23 ana po Jyoti Basu kiti ho Pathen tahsan lou ahiding u ginchat aumpon politics a vaihom nom na kiloikhomna pha ahi tia ana jui u joh hiding in katahsan in ahi. Vetsahna ding in Durga Puja kiti hi India sunga West Bengal adeh a Calcutta a thupi tah leh loupi tah a kum seh a kimang jui ahi. Bengali Communist party member ho jong chu ahapan loi a panglou umding in kagingcha pon ahi. Political creed a anei uh ahi. Religious creed hiponte.
Tuni a iseinom uchu Christian ten Pathen koma tao ibol bang uva hi Hindu hon jong Pathen atahsan pen uh koma niseh a taona anei jui uh ahi. Hindu ho hin leiset chung ah Pathen haupen tichu tam nei pe ahiuve Pathen sim joulou crore 33 anei uve kiti ahi. Aphatna chu amichang cheh a adei dei uh akilhen uh ahi. Ram houloi aum in Hanuman houloi aum in hiche tobang chun Shiva, Vishnu chuleh adang dang adei dungjui uleh aginchat dungjui uva ahou uh ahi.
Aphatna kit chu eiho Christian te banga Pathen khat ahi iti uva kiloikhomna chom chom inei uva houin chom chom iche uhi abol pouve. Hindu ho lah a eiho Christiante bangin Presbyterian, Baptist, UPC, 7th Day Adventist, Evangelical tiho bangin akikhen pouvin Ram Temple aum in Ram tahsan jouse Ram temple ah ache uvin, Shiva Temple aum in Shiva tahsan jouse ache uvin. Ram pen na ahi tia atahsan uh Uttar Pradesh a Ajodhya ah pangal hon vai ana hom lai uvin Babri Masjid kiti muslim houin khat ana sadoh uvin amun akichu nalai tah uchu Supreme Court in Hindu te apeuvin Muslim ho dingin munchom ah acre 5 ape uvin athip nah nah in ahi. Tulai tah hin BJP Govt. in Ram Temple sahna ding leh thenso na ding aboipi in ahi. Thenso ni a mi 50 kou ding aboipi laitah uh ahi. Hitobang chun amun amun ah West Bengal ah Calcutta ah Shiva Temple khat aum in Guwahati ah Kamakhya Temple aum in Assam ah Sibsagar ah Shiva Temple khat aum in atahsan jouse atahsan dungjui a Pathen ahou uh ahi.
Leiset chunga Hou kidang tah khat chu Buddhism hou ahi. Pathen min kimin phah loubeh Hou ahi. Hiti jeh ahi China gam communist gam ahi Buddhism hi hat hitei ding in ginchat aum in ahi.
Tuni a iseinom pen uh Christian ten tichu Pathen aum e ti leh Pathen chapa Jesu Christa in mihem chonset a kona tahsa, lungthim leh lhagao ahuhhing thei in adam sah thei e tiho hin taona hi iti nei ding ham chuleh iti tao ding ham tihi isei nompen uh ahi.
Anoi a hohi taona guidelines ahi tin gel ute.
- Pathen koma taona chu thugil leh thutah hiding ahi.
- Pathen koma taona chu totna, nuijat naho tobang hilou ding ahi.
- Pathen koma Tao chu ahoilou, aphalou leh adihlou ho lhungding a taolou ding ahi.
- Pathen koma Tao chu nature toh kitohlou ahithei lou ding hohi thum a taolou ding ahi.
- Pathen heng a Taona chu GINGTAH le SOTTAH a taose se angai pon ahi.
Achung a ho chu hitin ahilchen in ahi.
- Pathen koma itao phat leh thugil leh pthutah hilou ginchat thu, thulam leng ho chung chang hi seilou ding, hinkho a insung hileh kho le venga igel khoh ho bou sei ding ahi. Genuine needs.
- Masang chun Tengnoupal District a Tollen kiti kho khat ah hiche houbung a kiginni taoni a mipi atao uleh houbung lamkaipa Chairman pa vetda, munomlou gollhang khat in “Vo Pathen ka houbung lamkai pau anop phat leh ahcha, vohcho gu jui tobang neipe hih un“, ati leh houbung lamkai pan adonbutna a ,”Vo Pathen hiche chapang donthi ho thusei tahsan hih in ajong sang hih in” atin ahi. Hiche tobang thim chun Chengkonpang a ECA Central Church kiti hon atao uleh mi ni Letson kiti khat leh Vumkhothong kivetda ni atoubom lhon in
Vumkhothong in ,”Vo Pathen ka koma toupa ajou anal seijui pa thusei hi sang hih in,” ati leh Letson chun ataopet lhon in , “kikhen phat leh houin mai ah kihe nate, tin ana donbut in ahi. Iseinom uchu Pathen koma hiche tobang ho a hi taolou ding ahi. - Bazar khat ahin SUMKOLVEI mi ni in dukan anei cheh lhon in khatpa dukan a chun mi ache alhom in khatpa dukan a chun aphatseh in mi ache in a dukan mi chelhom napa chu ahung engset thangset jeh in aman Pathen komah atao in, “hiche dukan neipa koma khun mi chelhom sah in kei dukan a mi hungding tamsah in”, tin atao in ahi. Aban ah aman Pathen kom ah hiche pa napeh ding sanga ale ni kei neipen tin atao in ahi. Pathen in achuti leh ipi nadei em tia adoh leh ka rival pa khu amit langkhat chot sah in atileh achuti leh ama kapeh ding a double a nadei leh ama amit langkhat cho ding nang namit alang ni a cho ding ahitai tin asei e ti thusim khat a um in ahi. Mi ivetda vang a thilphalou lhungding a tao lou ding ahi.
- Ningkum lai chun Chengkonpanga Siempu Gangte in a mounuin [achapa jinu] in chapa pengkop 2 ahin nei in akipah behseh in loupi tah in alom in kagache leh Houbung dang khat a Pastor khat in nao avop e ti kahet ni a kipat a chu chapa ahi na dinga asun ajan a katao ahi atin ahi. Hiche chu taona dihlou ahi ajehchu nao avop joua chu chapa hisah ding leh chanu hisah ding chu mihem taona vanga hithei ding ahipon Pathen jeng in jong ahisah thei ahipon ahi.A nao vop theinading a tao chu adih e. Ajehchu pasal pa thisan leh numei nu thisan X leh Y chrosome kiti kigop khom leh kimuto dungjui a pasal leh numei kikhen ahi. Hatao a tao a phachom ding ahipon ahi.
- Calcutta a posting kahilai 1985-1988 lai chun khatvei Assembly of God ho Hou in kaloi pa Kaihao Vaiphei toh kaga kikhop lhon leh kikhenna taoding a Philipines langa hung kholjin Pastor khat taona neiding a aseoleh saotah a tao ding ham kiti chu aman , O LORD THANK YOU SO MUCH atin akichai tan ahi, Taona lah a achom pen a kahet khat ahi.
Thumnom ngaichat chu chomcha leh nem heova thum ding ahin, aSot vang leh Oging tah a hapen jeh a Pathen chun a san chomding leh ajah chomding ahipoi, Pathen chu Na ngong DEAF ahipon ahi.
Phat lhemna leh mihon eihet nading tobang bep hiding ahi.
Tuni a isei nompen uchu Pathen koma tao chu totna hilou ding, atah tah giltah a ingaichat lhung tei leh tia igel leiset hina natural toh kitohlou hilou ding chukit leh ahoi leh apha hiding tiho hi thum a taona nei ding ahi. Mikhat ivetda vanga athi baina ding a ahilou leh accident ato na ding a taolou ding ahi. Chujong leh tao jong leh chun Pathen in asan louding ahi.
Jesu Christa in Mark 11 :
Chang 24,
“Hijeh a chu najah uvakasei ahi, Na taova thil na thum jouseu namu san gel leu chun namu diu ahi.
Chang 25
Tao dia nadin pet leh van a um napan jong nasuh khel jouse angaidam theina din nalung dou chu ngaidam in ,
Chang 26.[ Nanghon mi na ngaidam lou uleh van a um napa uvin jong nangho na ngaidam louding ahi].
Hiche hin asei chu Pathen koma ithum uchu muthei dingho thum ding, muthei lou ding ho thumlou ding ahi. Mivaicha khat in India sunga mihao pen Mukesh Ambani neihisah in tin Pathen koma tao jongleh phachomlou ding ahi.
Chukitleh aman mi suhkhel neo cha cha sam jang te jong ngaidam lou a Pathen koma thil lentah tah atohkhel abolkhel ho ngaidam dingin taona neiyin kinepda leh phajo ding ahi.
Hijeh chun taona hi thaneitah, thil bolthei tah ahi.
Labu in,
Mite taona sang Pathen nahi jeh in,
kiti banga chu Christian hihen lang Hindu hijongleh Parsi hihen lang ipi hou hita jongleh atahsan dungjui a taona chun ahou Pathen in aguilhun sah mo ahipon ahi.
1960 -1970 lai a India a Weekly Magazine minthang tah Illustrated Weekly of India kiti Journalist leh Novelist minthang Khuswant Singh Editor a ana pan na magazine chu regular tah a kana sim ahi. Khatvei chu mikhat [Christian hilou]
The Power of Prayer kiti Article khat anasun in hichu kasim chun taona thahat dan leh aphatchom dan kahet be in aphachom lheh in ahi. Pathen tahsa leh anatoh a khasam tah hijong leng tu ichan in Pathen kom a katao naho hi alo lhung jing in kahen ahi.
Achaina in Jesu Christa in Matthew 7: 7,
“Thum un kipeuvin nate, holun namu diu ahi, kiu un nakihon peh diu ahi.
8’’ Ijeh inem iti leh athum chan kipe ding, ahol in amu ding, akeo kihon peh ding ahi.
Thusimbu Machal jing thei na ding a pan lanom ho kipah tah in lem ahijing in ahi anoiya button “Click Here” khu meh utin details anasim ute.
