Home L Seikholen Khongsai Tangkem /Kemchon / Kem

Tangkem /Kemchon / Kem

68
0
Kem
Kem

Khankhology Online Textbook

By- L. Seikholen Khongsai,
Tuibong Churachandpur, Manipur
August 3, 2022 (Wednesday)

Kem hi ipi kiseina ham? Kem kiti hi Kuki ten achen nao mun tin a kichol do nading le kihuilha nading chule inmun leh loumun ho a ju le va ngatup ventup naleh vetsui na dinga khom aphu uva achunga touna thei leh din nathei chule lou pam jet le vei kimu nathei mun ho a ado sang u, inmun a jong phumphei noija kem leh kemchon asem uva, touna thei leh Chang phou nathei chule phalbi daplai leh Nisa ko/ oina theija adongsang u chu Kem ahilouleh Kemchon ahilou leh Paolui jep in kisei leh Tangkem kiti ahi.

Kem hi hoilaija kido ji ham? Kem kiti hi hiche lai mong a do ding ahi kiti jong umpon, innei pan ahilou leh lou neipan avet a, inmun a leitol a phumphei geija kido leh phante ahilou leh leitol mong langah kkidon leh phan te atina mun a chu ado jeng thei ahi. Ahilou leh hiche laija Buh kisa leh phante atina mun Buhtol a chu Kemchon chu ado jeng thei ahi.

Gamleng hon hoilaija Kem ado jiuvem? Kem kiti hi hiti khat jong a um kit e. Masang lachun Kuki pasal gamleng hat hon Gamsa chan nading mun kilem lai avet uva, hiche lai mun a chu achung sanga kem adouva, hiche kem a chu pansauva Sa achan jiu ahi. Hiche jong chu Kem jat khat ahi. Gamsa chun mihem nam ajah thei ahi. Khal lai leh Hui hi kinubgsuh ahi. Chuti ahijeh a chu Theiga umna khat thingphung mun a kona anoi lang jep a Kem chu akido jiu ahi. Huilhi chu kisuh nun ahijeh a Gamsa ahung jong leh mihem nam chu ja talouva, koima anumpoi tia lung ngam tah a theiga alo chu lungmonga akilo thei jeh a Gamlen pan gamsa ho lungthim amat theina dinga Kem chu adona ding mun chu akihet ngai ahi. Chuleh ijem tia seimo louva gamsa kap pa chun thal alha khel jeh a gamsa hang khat akitham pel leh gamsa chun mihem long asuh thei ahi. Hitobang chu seithei louva a umkhah jongle kivendoh nadinga Kem chon hi ana do jiu ahi.

Kem

Tulai khangthah atam jon Kem ahilou leh Tangkem thupi dan ahe tapouve. Ajeh chu koima thinglhang lei lhouva ju le va hondan jong hepha talouva, India khopi sung munchom choma sum hol a kiveija hinkho mnng itam phat un ichon nau lui ho cheng ipai mnngun chondan thah thah ihol un inei tauvin ahile ichonna tah tah uhi nitin in achul jingin adai jou tan ahi.

Kem kiman chah dan ho:

  1. Inmun a kem kiman chah dan chomcha anasim u hite. Chung langa isei bangun Inmun a Kem kiso na hi Inmun umdan toh kitoh a, Phumpei gei ham leitol monglnng ham khat a kido ji ahi. Kem chu mi tampi touna theija jong kido ahi. Kem lhongpi khat akido chai teng leh ajet avei leh anoilang kaija chu Kemchon kiti kemson chu kido kit ahi. Hiche kemchon chu kem pi pa sanga sangjo a kido kit ahi. Kemchon chu akido chai teng leh kimoh ngah louva, chapang ho kheh lhah theilou na dinga atuhna thei (guard) a thingjol ham Gojol khat kikai/kido kit ahi. Atuh nathei chu jol khat bou hilouva jol ni jol thum ho kikaija kitup tah a kisem ji ahi. Hiche Kemchon chu toun leh Phalbi laija nisa oina kimaag ji ahi. Chule Kempi chu Changphouna, muchi phou naleh kin le dong umteng jongle Sa sem na mun a jong kimang thei ahi. Ahilou leh Khao lem lai jongle Khao pi phou got na a jong kimang thei ahi. Adeh a Vengpam leh Venglai dunga kem kido hochu Khopi Lhangsam pan thukhoh lakhoh a um teng Lhang asap teng le Kemchon chunga chu dinga kholhang anasap ji ahi. Hitia chu Kemchon kiti Tangkem chung chu manchah nathei atam a tam ahi.

Chukeu ahipon, Masanglai Doibom khai lai chun Lom juneh leh Lom kivah ana bol ji tenguleh Leitol a lamkol akai tengu leh numei chapang hichu Kemchon chunga chun atou sah jiuvin Lam juneh lamkol kikai chu anave jiuvin ahi. Chule Lom neo neo hon jong lom kichai nilhah teng leh Changlhah akisuh khom jiuvin ahi. Changlhah min kah chun Kemchon chunga Lhavah noija chun Tumging/Mandolin kiti Pangthing le Vongthing ham a kona kisuija thihjang aguija kisem tumging neo ho asaijun joldeila ho ana sa jiubin ana mao mao jiuvin ahi. Hiti chun Khosung gollhnng ho jong mi li le nga cheng kiloijun kilungtoh tah in khosunga nungah umho chu koichom tia thet bol louvin akho lai leng jiuvin, nungah hon jong gollhang kholai lenga hungho ding chun Chatam a omji in lungset tah in adon sah jiuvin ahi. Ahilou leh Kolbu ham khat chu akan peh jin cha toh adonsah jiuvin, Kem chubga chun Joldei la sa loi, akihoulim loi, anui loi, hiti chu khosung lum thet chan hinkho ana mnng un Jaila an oijiuve. Kon khat in Gosem asem un kon khat in Lhemlhai asai un nomtah in Thinglhang hinkho anamang un ahi.

Kem

Ahilou jong leh hiche Tangkem chunga chun Nungah gollhang kidei lai kingai lai ho jong, Chung Chollha vah noija Kemchung achun atoukhom jiuvin lungset thimthu analel jiuvin, Mandolin saijin Gollhang pan alungset nu ngai ding chun la ana sa ji in, thu tamtah seija kidei te khu hilouva, Joldeila sah a mao maova kona kilungset hinkho anaman khom jiu ahi. Nungah mit ching hon jong Kem chunga chun adongma toh atou khom laijun Khivui jong anathil ji nalaijun ahi. Tulaijin akimang tapon, Thinglhnnga chun Thingphung khat a umin aga chu Vom kei jeng ahin Khi a ithil leh valset a ahoija hoi ahi. Hiche chutoh Saiphi kiti Mimchang tobang khat jong Khi a athil uva adongma pa chu lungset thilpeh ( Gift) abol jiu ahi. Hitia thil neocha cha a ngailut lungset na len tah tah an kisangto jiu ahi. Hito bang hinkho anamang kha jon hinkho man tamdan le lungset mantam dan ana he gil jep uve. Chule tuni chan in chulai khang hinkho hochu agel doh teng leu alung laidipdam in lungset khankho chesa ho amil thei pouve. Tulai in vang sum 1 lakh a jong lungset na kichoh tjo jong dim ahitai.

Loumun a Kemchon kiman dan ahileh Jou leija Kem kiman dan ajat chom jep in chule Den lang Louchul lang kemchon kiman dan achom jep kit e. Joulei a hin Kemsong akidon in aningah Kengke akito in, vaikon vailhun in Kengke akiteh ging lah lah in sun le kichol do nale nisa asat le huilhi neh nan akimangin ahi.

Kem

Changlei a vang Changga ahung gu soh a, chnngmong ahungsan apat Kemvhon chunga chun Soh gui jouse akikhit in loulai mun tin a Soh kikhai jouse loigin nan akimang in ahi. Sun nilhum lhum in Kemchon chung akitou in kahkom a akikijam in Vacha ho akihongin, Kah kom leh pengkul akimut in, kahkom le Mandolin akisai in kah kom le Jaila aki oijin jao nu jaopa hitoh akikidai nilhum lhum ji in ahi. Hiche kemchon chu Go le Dai chule nisa in asah louna din achung chu hoitah in insun inchal leh inkam akisongin hichu hoitah in Bi’ah akikhu kit in ahi. Kem ahilou leh Tangkem le Kemchon jat chom chom a kiman dan chom cha isei u ahi.

Konkhat in Thinglhang in asah teng noilang kaija Kotcha asem un, hiche kotcha achun kem jong ado paipaijun ahi. Hichu kemcha akitin ahi. kemcha cung jong chu mihon kichol do naleh kihuilha nan anei jiuvin ahi. Chule konkhat in Kemcha chu buneh nan jong amangun, nisa ki-oinan jong amang un ahi. Kemcha kidona ajong ajet avei chu khehlhah louna din agol akan un, tuh thei le kivendoh natheijin jol phei (guard) asem un nomtah tah in akido jiuve. Hiche kotcha a kido kemcha jong chu insung kin le dong a um tengleh Sasem naleh chaloh lenan akimangin ahi. Hitia chu Thinglhang khochen dol in chenna in akisah tengleh cha navah nathei leh akilem thei pen in akisem jiuvin, mihem in ama lung nopna thei jin insung le inpolang ahoina thei chan in agongtoh un asem hoi ji un ahi.

Kuki te hinkho mandol lhangpi a Kemchon/Tangkem kiman chah dan chungchang achom lama ihin sut u hichan hi ahitai.

©️ copyright: Hiche articles hi asunpa phalna bei a mundang a publish louding in temna ahung kinei in ahi.

Articles hi anom lheh e nati le anoiya “LIKE” button khu meh in writer ho na support nau vin, chule seinom nanei le anoiya comments nahin bolthei u ahi.

Site nalut a notification pop up hung potji ho allowed anabol ji uvo maban a thusim thah ahung ki post teng notice namu ji diu chule Bell button a subscribe kiti chu meh un.

Thusimbu mobile app ki install nom hon Google playstore a “thusimbu” tia search nabol u le namu lei diu ahi.

Previous articleSITWI LEH SIHTWI or TWI PI
Next articlePOLITICS A KISUH GENTHEI LEH KIPHULAH HI THILPHA HAM?

LEAVE A REPLY

Please enter your comment!
Please enter your name here