Introduction:
Hiche Jaila hi adeh a Sepai pang gamlha tah tah a umho, gam sung boijeh a suty hung thei louho, Covid-19 jeh a Gamsung pumpi Lockdown in ahomden jeh a aji achate toh phat sottah kimuto thei talou ho, inlanga ajiteu numei hon ajipa teu ngai nale lungsetna anei nau chunga, kho ahungphat a damsel a ajipa inlanga suty ahungdoh uva insung mite toh akimuto diu lunghel a agal dot jingu geldohna a kasut ahi.
||Jaila||
SUUL’ANG HINLEL KIT’O
By~ L. Seikholen Khongsai
Agal lenin vanpi nim bangjongle dama navaikon bang,
Suul’ang hinlel kit o kaseng angkoipa
Suul’ang hinlel kit o nasingsung ngaicheng din,
Sunggil kelin jaitha pat bang nemlou jeno,
Navai konna amol alhang sangin chol jong lechun
Vendong khankho lunngah langjing bouve.
**
Gallu sai na sing gam mang ah ka angkoi,
Mel’a mulouna kumkho asot te
Dougal nona gamjong gamvangla tantin,
Chunga Muvanlai nun ngaina thimthu eigalel peh to
Solkar thouna danthu khaona noiya naselunghel
Sen angkoinu jong selung among joupoi..
***
Mimbang penna o ithinglhang gamnom hi,
Dougal chaiya jatin somai loitwi’ang kigop teng
Singsung mi ngaicheng Vabang bolkhom nikho chu,
Lungmit a kadot chim lou Janghaiva bang ilending,
Vonchoi cheng le ka sen angkoi banjal jet a kisan nadin
Chung Pathen in lim solang neikhu teijun..lamlhuong lhungin..
_____________________________
Aledohna (Translation):-
Hung kile kit teijin
*
Gal le tol hat hen vanpi niem bang jongle damsel a navaikon bangin
Damsel in hung kile tei teijo kangaipen kajipa
Na-insung mite din damin hung kile tei teijin.
Gilkel dangchah thoh in hung lamva hih o,
Navai konna amol alhang sang jeng jongleh,
Nachate ding gelna jeh ahi ti sumul hih in..
**
Kajipa galsatna mun gammanglah hihen hoilai hileh
Kimelmu louna kumkho jong asot val tai,
Agalmun la agamin agamlha val jengin
Sorkar Dampi khaoval jeh in ama la ahung thei tapon,
Chunga Muvanlai nun kajipa kalungset kangailutna thu eigalhut peh to,
Najinu jong nang ngaipul dou nan among joupoi gatitan
***
Ipen nau leh iseilet nau thinglhang gam nomhi
Nat le sat, gal le tol kichaiya mijouse ngaicheng toh akimu to tengleh
Insung mite lungkhat a ina lenkhom lainiu bang chun,
Lungmit a kagal dot chimlou Vahai te lenkhom banga
Kaji kacha tetoh banjal jet a kakisan nikho hunglhun kah in,
Kakholjin nau lamlhuong lhungin Pathen in neiveng jingun…
______________________________
