By Shonkhogin (Hegin) Haokip
Maranatha Cottage Hebron Veng
Phaipijang Langol Imphal West
9774096152
Vadung jouse Twi khang lena alonglut in, Twikhanglen la adim dehpoi.
Thuhil.1: 7.
Ihetma banguvin, Solomon lengpa chu mihao tah michingtah chuleh mi minthangtah anahi. Aman lengvai anapoh laitah in leiset nopsahna hohi ichangeija nom mong mong ham ti het na dingin, thilgon khat ana neijin, hiche leiset nop sahna man na dingin, mun nomtah khat analheng dohin, hiche muna chun amatah dingin in hoi tahtah ana san, lengpilei tamtah anasemin, pahchalei theilei chuleh aleilhou ding mitamtah analan, lasa them numei pasal tamtah analan, avetna jou se emsilsel jengding, anakol a jong langeitah tah gingjing ding tiho hin anagongin hiche chung chona jong chun ji 700 jen ananeijin, ajite jong chu mohmi ahipouvin, leng chanute jeng tabang anahiuvin, chubana jong leng chanute sohho lah a mi 300 ama ji dingin anakilah kit in, athil gon ho jouse achaisohphat in leiset nopsahna kitiho chu itabanga nom mong mong ham tin ana patep in, ahinla alosamdeltan ahi.
Hiti ho jouse aman jou keijin, aman ipi ana seijam itileh, Pannabei, hui nung dellele tabang bep kahibouve anati. Hiche hin avetsah chu ahileh leiset thila hin lungmona, chamna chuleh kipana him him aumpoi tina ahi. Ajeh chu Solomon michingpan bon ahaona ho jousele, achihna hojouse Chuleh aminthanna ho jousea abolthei top a abol vanga imacha lunglhaina lungkimna umdeh lou chun aphot chetna chu, leiset thila hin lungmon na kipana chamna nape theiponte tina ahijenge.
Achunga kisei Vadung jouse twikhanglena alon lut vanga twikhanglen adimchomlou bangin, leiset thil kiti hin mihem lungthim alunglhai sah himhimpoi. Itabang kipe jongleh chomkhat kipah intin, chomkhat jouleh abep bep ahijitai. Hijeh chun, leisetna kipana, lungmonna chuleh chamna muding natileh leiset thil ah kinepdan, leiset thil a aumpoi. Hiche kipana, lungmonna chuleh chamna hi Pathen Lhagaotheng nasunga achenni leh hiche kipana le, chamna chuleh lung monna naneikham khama lungmonna kitihi nanei ding ahi. Ajeh chu Pathen Lhagaotheng isunguva achending ingaichat uhin, ingaichat pao ihetlou jeh uva leiset thil suhko touko itholo jiu Ahin, ahinla vangset umtah khat chu leiset thil lah aumpoi. Nasunga Lhagaotheng chenna dingin kisalalin, nalung sunga Lhagaotheng umna thei nabolpeh tokah in, leiset chunga lunglhaina,lungmona muponate.
Keiman jong, hiche thu Pathen in eihetsah nia pat in, Vannoi leiset thilhi kangailu tapoi. Ajeh chu, leiset thila hin kipana lungmona chuleh chamna aumpoi ti phate chan kahechen tai. Ajeh chu Solomon lengpan bon leiset thilhi pananbei hui nung del lele kahibou ve atileh eihon hoija ipi kipana le lungmonna imu diu ham? Kipana dihtah, chamna dihtah chuleh lungmona dihtah chu Pathen Lhagaotheng isunguva achendinghi ahipenne. Mihem ten suhdel toudel ithou chu. Aholje ihet lou jeh uvin, aumna loupouvah i-nilhum i-khovah uvin, aumna muna la i-kithah nom pou ve. Bible in ibola nanghon mithi ho lah ahing nahol uham kiti chu ibol u ahitai. Hijeh chun, Pakai Jesun, koi hijongleh hiche twi(leiset thilho) ho don jouse chu dangchah kit ding ahin, amavang keiman kapeh twi(Pathen thu/Lhagaotheng) donkha jouse chu dangchah kit talou ding ahi ati.John.4:13-14. Mijousen atuple adoi chu ahileh kihao poupou leh nom kisanan te atin, ahinla ahaopenpa Ipu u Solomon ahoupen alenpen, achingpen, aminthangpen anahin aman ipi anasei jem itileh, pannabei hui nung del lele tabang bep kahi anati.
Aman achaina keijin, Pathen ginna neija a thupeh phatecha juiding kitihi mihemten iboldiu kin pipen chu ahi ati. Thuhilp.12:13. Tunjong koi koi hijongleh leiset thil a ki- nema umho jouse henga hetsah nom pentah chu leiset thila hitabang kipana chamna lungmona kitihohi aumpoi. Pathen Lhagao theng neija kona bou ingaichat chat hou kipa cham lungmon ineikham a lunglhai kitiho hi kineithei ahi.Mathew 6:33 in Amasan Pathen lenggam le achonphatna hol masauvin, chuteng hichengse jong chu nakipeh be diu ahi ati. Leiset thilho ngailut ding hilouvin, akul akhoh dungjui ja kidei ahi. Hijeh a chu eihon Pathen lenggam lutnathei ikiholdoh pou pou uleh aman ani ania ingaichat ho jouseu chu eipeh jingdiuva kitepna umsa ahitai. Pa Pathen in asim ho jouse phatthei boh tahen.
Thusimbu Machal jing thei na ding a pan lanom ho kipah tah in lem ahijing in ahi anoiya button “Click Here” khu meh utin details anasim ute.
