Home L Seikholen Khongsai SINKHUP

SINKHUP

49
0
Sinkhup
Sinkhup

Khankhology Online Textbook

By- L. Seikholen Khongsai,
Tuibong Churachandpur, Manipur
(30/07/2022), Saturday

Sinkhup:
Sinkhup hi Kuki te dia manchah poimo tah khat ahi. Sinkhup hi Go akona kisa doh neigun khat ahi. Hiche sinkhup sunga hi insunga manchah neocha cha hijongleh poimo tah tah kikoi ji ahi. Jucha gan hingin asunga thil kikoi ho suhset aman sah lou na dinga asin kisem a, kising khup ji ahi. Che jeh a Sinkhup kiti ahi.

Iti kisem ham?
Sinkhup kisem doh nadin Go angaije. Go lah a jong Gongel le Gopi toinem a kisem Sinkhup hi alhoi jep teije. Hijeh a chu amasa a Go ngel ham gopi ham eiman iman nom pen go chu kikeh a, kilem kit a chule kimet naam ahi. Sinkhup kisa ding chu lhing tan te ahilou leh changtan te iti tengleh go kikeh a naang banga kisem chu kinga a, kisa pan ahi. Akisah dan hi Pocha neo kisa banga ato kipan a ban neicha a kisa bit chet ahi. Pocha banga akisah chai banga akisah chai teng agei ki heh a, kitupsel a akiheh chai tengleh ato a akam kisem kit ahi. Atokam kisem dan hi ning li lah a ning khat le ningkhat kikam to a, kipel to a kikam pel (cross) a kikhen chah ahi. Chujou teng leh asin khup ding alusin kisem kit ahi. Asin ding hi atahsa alu sin ding ahijeh a hoitah a kite toh a, atahsa sanga nemcha a kisem a, asin akito thei nadia hoitah kite toh a kisa kit a kisem ahi.

Hitia Sinkhup chu asathem khat in asah chai teng leh akoi got kit u ahi. Agotset nadinga chu akisah jouteng Gaplheng a akhai uva, meija alhut got set u ahi. Hitia meija kiha goset chu nget in jong aneh tah lou ahin kumsot tah tah kikoi thei ja lhou tah a kiching tup thei ahi. Chule Sinkhup keu hilouva Go a kona kisem doh Thiem hohi alhou nadinga Thing le Go hi alah phat um ahi. Kumbul a Khohui ahung nun masang ngeija hi Them a sah ding Go hochu analah doh jiu ahi. Khopi hui ahung nun tengle Vaothing hungpah intin chutengleh thing le Go ilah leh nget ji ahitai. Khopi hui nun jouva thil le go kila jouse lhou thei lou ahijeh a, masang lai tehse hochun inthil ajon tengu leh hiche Khopi hui nun masangle Vaopah masanga ngeija ana jon doh jiu ahitai.

Sinkhup kimanchah dan:
Sinkhup kiti hi alen jep le aneo jep jong um, ahin eima deidan dan a semthei ahithouve. Sinkhup kiman chah dan hi, insunga ahilou leh mikhat dinga thil poimo tah tah koina a kijang ahi. Masang lai chun Kuki ten thingthem bolna lampangah khantouna ana nei behseh pon ahi. Tulai banga machine jat jat a kimangcha a, idei dei kisem thei khang anahi lou jeh in amahon abol thei pen pen uva kona thil le lo akilam doh uva hiche ho chu insung thil a aman chah u ahi. Hibanga chu Sinkhup jong Chem a-um pouleh Go kitu a, kimet a che akona chu kisa thei ahi. Kitup keija man thei le thil lu le thil gun ho koina thei ahi jeh a anaha man chah u ahi. Hiche Sinkhup sunga chun hinkho a poimo tah tah kiti leh numei thil le numei manchah ho adeh a, sangkhol toka khui nathei -Heujang, Pat jang alhou thei pen ho, thihpeh neo hem (blade), Tintanna, Khoilu, Sakuling, Damdoichang (tablet), Samthingat, Samthikhou, Bilkol thaina, Milbeh/mitkam, Sam kanna, Bahche neo, ahilou leh insunga dinga thil poimo chom chom ho koitup na a kimang ahi. Tua heujang iti leh imacha a kigel lou, a umlou jong leh khoh kisa talpu ahi. Ahinlah, chulai khnnga chu Heujang khat chohna dinga jong Phaipi tol a kenglam a che a gachoh ngai ahi. Ahilou leh thinglhang kho gamlha thim tah a kona Kailhang kaina ding mun gamlha tah a galah ngai ahi. Ajeh chu Kang (gari) jong ana um loulai khang ahi. Chulai a Belsa khat tou neijou te chu mi incheng te tah a anahet u ahi. Tulaija Phaipi (Imphal) che jong idei phat phat a kipha jouva idei phat ohat a kihung kile thei khang ahitai. Chulai khanga mite chu kum khat sunga Phaipi phajou chu Khosung khat a jong kaht le ni kal um jou lou ahi. Hitobang khantou na lhahsam jeh a chu thil neocha hijong le hiujang khat jong koitup na thei chan a akoi tup uva hiche akona chu Pattah a kona kisem doh le kikhongdoh Pon ho a chu Sangkhol toka le Boitong akikhui uva, sil le chen thupi pen a ananei thei u ahi. Hijeh a chu Sinkhup hi Kuki te thil mantam tah koitup na abou anajah u ahi.

Hijeh a chu Kuki te dinga hiche Sinkhul kiti hi neocha hijongleh nei gun khat a ananeiju ahi tihi tulai khang thah ten isuh mil lou nadiuva chom cha igah tah langu ahi. Kakipah e.

©️ copyright: Hiche articles hi asunpa phalna bei a mundang a publish louding in temna ahung kinei in ahi.

Articles hi anom lheh e nati le anoiya “LIKE” button khu meh in writer ho na support nau vin, chule seinom nanei le anoiya comments nahin bolthei u ahi.

Site nalut a notification pop up hung potji ho allowed anabol ji uvo maban a thusim thah ahung ki post teng notice namu ji diu chule Bell button a subscribe kiti chu meh un.

Thusimbu mobile app ki install nom hon Google playstore a “thusimbu” tia search nabol u le namu lei diu ahi.

Previous articleJoumol Vangkho munkai kum 7 analhingtai
Next articleLEITHANG AHILOULEH TAMTHANG

LEAVE A REPLY

Please enter your comment!
Please enter your name here