Thusim lui
!……✍ Smartmyn Doungel
Masang laijin leng thupi tah khat ana um min ahi.
lengpa sepai tehi gam lenga ana che ji uvin ahi.
lengpa sepai te jong gam lenga ache seh leo gam mang lah aphah seh uhin, thing on chung khat na nungah melhoi tah khat ana tou jin, sepai hon jong aveo vin hoi asah val jeh uchun, lengpa kom ma asei tao ve.
vo lengpa hing sot nin dam sotnin, nasoh te gamleng a ka che seh un gam mang lah a nungah melhoi tah khat thing on chunga ana tou jin, amel hoidan khu nang ji lou din apam maije atio vin ahi.
hichun lengpan jong asoh te thu apen numei nu chu aga puisah in aki chen pi tan ahi.
lengpa hin asoh te lah a asin thei pen khat ana um min ama chu amin kaithei akitin ahi .
lengpa jinu sibalnu hin leng inpi sunga aki chat le agin koima ana umpon, hinla lengpa sinthei pen kaithei kiti pa hi ana ki chan hijeh hin ama hi thana ding lung thim ahin gong pan tan ahi.
Sibalnu jong nikhat aki nat lhem sah tan, lengpa ave a ahungtan ahile,
vo lengpa kanat nahi vompi noitui don leng dam tange ati. lengpan jong kate vompi noitui la dinga koi kisol tante atile,
sibalnun jong lengpa pi nalung kham naham ..nasoh te lah a kaithei khu soltan ati.
hichun lengpan jong kaithei akouvin vompi noitui ladin asol tan ahi.
kaithei jong aka aka le.. vongbulngahpu kom ma aga kap lut tan ahi.
vongbulngah pun katei nanghi la ka vet le pathen cha nahin epi dinga kap nahim tin ana dong tan ahile, kaithei in jong kapi sibalnu don ding vompi noitui la a kapu lengpan eihin sol ahije ati tai.
hichun vongbul ngah pan jong che le chun gam mang lah nalhun teng vompin nahin ngih intin,
vo pa vom vompi nei ngih hih in na nao don na hung kahi bou ve tin lang , apot doh teng anoitui nahin lah a nahung jam ding ahi ati peh tai.
hichun kaithei jong akipat doh in gam mang noija achetan ahile vompin ahin ngih tan, aman jong vo pavom vompi lung hang hih o nanao donna hung kahi bou ve ati tan ahi.
hichun vompin jong ema lo talouvin anao adon sah tai, nikhat vompi nu jong apot doh gotan ahile, kaithei in jong nao akiphin teng adon ding noitui dalhan atin vompin jong anoitui alhoh lhan ada lhah peh tai, vompi pot nungin kaithei in vompi noitui chu ahin jam pin leng inpi ahunglhung tan, hijo sibalnu vompi noitui hi don ninlang dam nan phat nan neitan atin ape tai.
sibalnun jong vompi noitui chu adon nin nithum sung aki pot jol selsul lin kana kit ta atin aki nat lhem sah kit tai.
lengpa jong sibalnu vedin ahung kit tan ahile, sibal nun jong vo lenga , kanu chang pal neiga lampeh taovin chu tile damtange ati.
lengpan jong koijong aki sol tadem nanu changpal lam din atitan ahile, sibalnun jong epi na lung gim ham nasoh pa kaithei khu sol tang ngem ati.
hichun lengpan jong kai thei akoutan, sibalnu anu changpal lamdin asol tai.
kaithei jong aka aka le, vongbulngahpu kom min aga kaplut kit tan ahi.
vongbulngah pun jong nanghi la pathen cha hilechun naki lom min epi nalung kham pi akap nahim ati tai. hichun *kaithei* in jong kapi sibalnun anu changpal lam da eisol ahi ati tai.
vongbulngahpun jong vongdo ho chu aloulhan
parrot/kepi aso sah tan, ahi.
hichi kepi ho chu alen sah in sibalnu anu changpal lei laija aleng lut nun, changvui khat cheh ahin pet tan tao vin ahung leng doh tao ve.
sibalnu anu jong chun ahmol van nol akipat nin kepi te chu ban jep lhah ding atin ahin jep tan ahile, chunglam ajeple kepi techu noilam ma aleng ngun, noilam ajep le, chunglam ma alengun,
changvui khat cheh vongbul ngah pu kom ma ahinpo lut tao ve.
hichun changvui hochu achil khom hon nin ahile bengbit dim set aphan,
*kaithei* jin ahin pon sibalnu kom min, vo sibalnu nanu changpal hi nen lang dam nan phat nan neitan ati.
sibalnu jong alung kham lheh jengtai, eti dan na tuchan geija hi *kaithei* hi thithei nai lou ham, vompin la ahin that ta pon, kanun la ahin that kit pon atin alung kham lheh tai.
hichun anu changpal chu aki hon nin, nithum sung aki kui jol sel sullin kana kit tai ati.
lengpa jong ave in ahung kit tan, ahile
sibalnun jong vo lengpa hingsot nin lang dam sot nin , nithum sungin kadam min tun kakipan kit tai ati.
lengpan jong enaki lo le nadam ding hitam ati.
hichun sibalnun jong,
vo lengpa, kanu baldong neiga kal peh taovin chuti le dam tange ati.
lengpan jong, koijong kisol kit ding hitam atin alung dong kit tai.
hichun sibal nun jong, nasoh pa *kaithei* uma khula em ati.
hichun lengpan kaithei chu sibalnu anu baldong kaldin asol kit tai.
*kaithei* jong aka ka le, vongbulngahpu komin aga kap lut kit tan, vongbul ngah pun jong tuchung epi thu umkit hitam ati.
hichun kaithei in jong kapi sibal nun , anu baldong kal la eihin sol ahi ati.
hichun vongbulngah pun, *kaithei* chu naocha aki sosah in vadunga tui alhoh sah tan ahi le,
vadung to langa chun sibalnu anun baldong ana sopmin, *kaithei* chu amu phat kaden changmai toidong kaki mui kivah ingting alet phat le kine nan te atin alu ato achop min ahi.
hichun a in nin ahin puijin aum sahtai.
hichun, *kaithei* in patsai khat amun hepi hichi pi ham ati le, khoiloh hih in napi sibalnu ting ngu ahi ati.
hichun tehsepin jong kaithei kom min hitin asei tai.
ken nang hi kaki vah nahin hoima cha napot doh lou ding ahije. ejem ta in khel la napot di le nasei masat ding ahi ati.
tehsepi pot doh phat nin,
*kaithei* jin jong patsai chu ahin kipoh in ahung jam tan ahi.
tehsepin kaithei nache tam ati le henge ka chetai ati.
tehsepin jong ahmolvannol lin ahin vei tan ahile avei pha ta poi.
kaithei jong leng inpi ahung lhung tan ahi.
hichun lengpa kom min asei tai.
vo lengpa, lengnu sibalnu toh naseimang pachong jouse mipi masanga houlim na ka nei nom me ati tai.
hichun lengpan jong
a seimang pachong hole mipi akou khom min , lengnu sibalnu jong akou tan ahi.
*kaithei* in jong ahoulim ahin pan tan, apat na pat achai na geijin sibalnun ama thana da athil gon ho chu aban nei chan ahin sei tai.
hichun sibalnu ahung kilijah jengin jouthu ahi kaithei thu sei hi tin apang tai.
hichun kaithei in lengpa jah a, vo lengpa , na sel naloi na gan cha ho khom tem min ati.
lengpan asel aloi agancha akhom tan ahile hopthum ma hop khat bou aum tai.
hichun kaithei jin vo lengpa tun na soh nakol na sepai te khom tem min ati le,
lengpan jong asoh akol asepai te akhop kit le hop thum ma hopkhat bou aum kit tai.
hichun *kaithei* jin,
nasel naloi, nagan cha, nasoh nakol nasepai te hi, naji nu sibalnun aneh chai gam ahitai.
ajo teng nang jong nahin neh ding ahije, hijeh a chu keijong tha dinga thil agon ahi ati tai.
hichun lengpa jong alung hangjah jengtan, sibalnu chu ma
nun lang that doh un tin thu ape tai.
hichun sibalnu jong atin aha ahung sao doh tan ahi.
*kaithei* jin jong gang chellin patsai ahin poh chu alan, hichi sibalnu ting ngu atin patsai chu alho boh jeng le, apet petnin sibalnu tingu abongtan tolla matdah in achun athi tai.
sibalnu thi jou vin lengpan *kaithei* chu amaban tah in apan sah in nom tah in lengvai apo taove.
The End
