(Ngai-um Hinkho Thusim)
Part – Li na
Written by :- Thangboi kip’s
(9531808617)
Arranged by : Ngul Kipgen
Somasa banjom…….
KA U : “Seitango ineova pat lunggel seina a nei-neiji hinalou ham Thangneo?” ahintin..
KEIMA : “Heu, sopi dang neilou ihin neolai hinkho kagel jileh kahin ngai-ji lheh’e. Tuni chan a kachunga nalunghan nalhaset naho jouse nei ngaidam o, nei kithopi naho kaki pah’e. Tunia pat hinsuboi kit lou ding kahi tai. Sumle pai vat jong kahipoi. Keimajoh hi Noucy koma kachedi bou vat ahi. I-ham tia henu hepan eihin holmo leh ngaidam einathum peh in heu. Ateh nung lhon geiya keijeh a jumle ja gentheina athoh lhon kaki-oi tapoi” kati leh, ka U ahung kap lhatan..
KA U : “Thangneo, eini sehseh sopi kihiya boi ibola neidalhah got ham? Hichu nabol mong mong le vang kalha se ding ahi. I-neolaiya lung ngapna nei-nei ahin tua keileh henu hepa lung ngapna nahi nahet lou ham boi.? Hoiya naum ham seiyin” atin akatoh athon..
KEIMA : “Heu, nangle henu le hepa kinep nathei leh loile pai nung phajou ding lah kahi tapon, keidin hinlo aum poi” katin phone switch off kabol tan ahi.
Lei (Bridge) chung’ah kading doh in kachop lhah masangin,
“Cy, nang louvin hiche lei hinkho-hi kamang khop val tai. Chungmangpa phatsah ahile, pen kitkit langleh leilungtup molso mai hite. Tunin keijong nakoma din, kahung tai” kati’a kachop lhah got chet leh! Kanung langa konin kanun “Thangneo, neopu,” tia laina tah a eihin kou kajan! Kaki nung hei lelah koima lah aum kit pon, kalung adong lheh’e. Kanu aw kajah jah chun kaden kalunggel alam danghel jeng’in, Maicham a anasei “Neopu napa le ken nakhut lang khat khat a kanakaiji lhona huisi mutdia jong kanaphal lhonlou nahi. Keini kahung lhahsam lhon teng nangin nakhut lang khat khat ah neihin kai lhonin lang neihin dalha lhon hih in boi” tia alhiso chu kahin geldoh in, kapan
jong College a eihung thah a “Neopu eini sehseh pasal ihin, nachangin gari’a ihamkhat hungti le chun napa kei i-kati ding ham?” tia amaiso ahung kikhel jong chu kahin geldoh in.. Athah beh’in kanule kapa ngailut na kahin neiyin, Noucy beiya kagenthei banga kei beiya kanule kapa agenthei ding chu kahin geldoh tan kakisih valin kakap tan ahi. Chuphat chun kei le kei kakihouvin,
KEIMA : “Henu le hepa neingaidam lhono! Koi kahi jong kihet louva keiya ding seh seh a kana hin jeh ahi. Kathi jongle thi jeng inge! Tunia kipat khamnathei kiti bolkit tapong ting, nangni jong nagenthei sah lhon taponge.” Katia amel lhon mukal ngah lel’a inlang kahin del hai thethu laitah in kanunga gari HORN ahung gin a eihin suh khah jap chu kahen aban ima kahe tapon ahi. Adan chu TATA (DI) nung jui helper pa driving hung kithemchuh dan ahin, vangse le vangse kisukha dan kahiu’ve. Apet pet in District Hospital eilhut un ahing dia vang eitahsan lou dan u ahitai. (ICU) ah eikoiyun Oxygen eitopeh un, ka phone last call avet u leh ‘My sister’ kiti amu phat un a call uleh ka u nun ahin lan..
DRIVER : “Sister hiche phone neipa hi nahet em?”
KA U : “Henge kanao ahe ipiti ham, hoiya ham? Nang koi nahimo?”
DRIVER : “Sister nanaopa gari’n kasu khan tun District Hospital (ICU) ah kaum uve.”
Ka u hin kaki hou chai chai lhona kanule kapa anahet sah a holna theichan eina hol uva ka phone ma switch off ahikit le athi mong mong a eina geluva anakap lham dan u ana hitai.
Ana chuti ka jing lai uva hospital ka um thu ahin jah uleh, alang khat a kipah u hinlah dipchah pumpum a eihin del ule keivang houpi thei kanahi tapoi. Kanule kapa hin Doctor pa koma, “lungset tah’in nei huhdoh peh tei tei lhonin, amabou chapa a kanei lhon ahe” tia akatho jeng hon le!
DOCTOR : “Henge kajo chan in hin jen nange, hinlah aboi ni (2) aum’e.”
- Akeng akisuh khahna langpa hi tan tei-tei ngai in tin.”
- Atahsa sunglang inner bleeding ahin, a danger lheh’e. Hijongle Pathen thuthu ahin vang’ve mai ute.” Keng tanding ahin sei phat chun kanu akap jengin,
KANU : “Doctor pu lungset tahin akeng tan louvin neijen peh teitei o..”
DOCTOR : “Henu, akitan loule adam lang jong se thei ahi.”
KANU : “Ahipoi doctor pu aboi aum le keiman mo kipoh jeng inge.” ati phat a chu doctor pan jong tanlouva eina jan dan ahintai. Noucy nule pan jong niseh in eihung vilji lhonin eikhoh sah lheh hone. Keivang lhani (2 Months) lhingset coma a uma kho kahet lou ahi.
Ei-sukhaten jong kiphalam in ngaidam athum un, adam kah a keihon kajen diu ahi atiu vin kapan vang kiphatlam angai poi, vangse le vangse ihiuve atin ahi. Lhani (2 Months) jouva kho kahin het chun (ICU) a um kanahin, kakitho got le kakhut kakeng achat tapon, Glucose kikhai a Oxygen kito peh kanahi. Kalungthim vang alipset tan. Kavetle nurse khat kagal mun, kakhut gin ahin jah chun eihin ven. “Hey hey, adamlou pan kho ahin hetai” tin kipah tahin eihin dellut in..!
NURSE : “U, lungmong tahin umin, adam di nahitai” atin. A name plate kavet le Chingmuan Taithul akitin,
KEIMA : “Ching, ipi kati ham? Itih a pan kaum hitam? iti’a katho thei lou ham? Kanule kapa kamu nom’e” kati tan ahi.
CHINGBOI : “U, nang gari accident nahin (ICU) a naum kal lhani alhing tai. Hijong le olmo hih in nadam ding ahitai, nanu le napa jong aum nai” tin ahin kou lhonin athisa hingkit tobang kahi jeh chun, kanule kapan eimumu lhon chun eikoi lhonin “boi ibola neidalhah got lhon ham?” tin akap lhontan ahi. Kenjong kanule
kapa toh khenna ding leh khamnathei bolkit talou din ngaidam kathum tan ahi. Kho kahin het phat chun kanule kapa jong alung mong lheh lhon tai.
Chingmuan hin niseh in phatah in eive kolin khatvei eidong tai.
CHINGBOI : “U, iti dan na hiti kisuhkhah na ham? Nahinkho thusim neokhat neisei peh thei dem?”
KEIMA : “Henge, seithei inge” katin, ka hinkho thusim leh kathilto abonchan kaseipeh tan ahi.
CHINGBOI : “U, nahinkho thusim hi kahin kithopi theilou vangin, pohnat umtah le lainat umtah ahin, athoh hah lheh jenge. Hijongle tehse hon vangsetna itoteng vangphatna jong imu kon ahitai atiuve. Unahinkho thusim hi thusim jih them ho kom’ah seile chun, phatchompi thei thusim ngaitah hinte.”
KEIMA : “Ching, hichangei’a kavangset na kalungset pen kachan na kahinkho kisan kachan dehchat nunga ipi vangphatna kamu nahlai di ham? Tun damdoh jong leng lupna ngah ding bep kahitan, kamakho ding ima aum poi. Nangin hichan geiya nei khoh sah a neikhoto nahi kasah jou hoi ahi poi. Pathen in phat thei naboh hen.”
CHINGBOI : “U, kisonglel hih in hing jing Pathen aume, hiche damlouna jalkhun dalha a masang bang bang a nadam ding katah san e. Hiche ni phat chule napen khompi nanao bang bang in neihin geldoh in ong” atin, eilhamon in kalung among lheh e. Hinlah, keivang dam jong leng paralyse hita dingin kaki gelin, kaki ngaise lheh e.
Jingkah khat khovah di kon’in kahung khang in ahile! Khovah kon vacha ho ahung eu sousou uvin, pengpalep ahamin kalung ahel lheh jenge. Kakomah koima vang aum pon, kachanga phat chesa ho ngaiya lung lengvai tah’a kaum laihin gamla thim khat ahin, thilgin khat kaja mang jen-jen in, phatah in kangai tan ahile, Pu Manglun haokip in asah..!
“Vo gospel kholjin hoilam’a che ding nahim? Nangma ngaiya dang chah sang tampi aum’e, mujinga mulou le! Jajinga jalou ho, athilbol thei lhatdam na ngah jinga. Mol le lhang sang jongle, che ding kahi. Pakai thupeh juilou thei kahi poi, angailut nan eisol kacham louvi’n. Pakai natoh kakin ahi. Vo sopite gospel kouna sangloi ute. Gospel lahtou nading rapture ni anaitai.”
Hiche laa hi MIC a ahung kilha mang jenjen kajah chun, kaden kalung sung atongkha val jengin phat chesa a kahinkho man ho kakisih’in kakap in kapeng jah jengin hitin kasei tan ahi..! “Achonse chu kei kahi. Alhing lou chu kei kahi. Gospel kouna sangnom lou chu kei kahi. Mujing’a mulou leh ja jing a jalou kisa chu kei kahi. Kahinna dia calvary lhang najot laiya pujou louva nalhuhpi chu CROSS hilou vin ka chonsetna joh anahi. Nanga kon jamgo jong leng nakhut laisung’a um bou kahi, Nang dinga lungtol tobang bep keiman hiche dammona khun chunga konhin kalung kaheitai. Neingaidamin kakhel naho! Nacha hina kaki hechen tai. Nei khoton lang neisang kit tan! Nalung dei lamin chon tange. Hepa nalung ahi’a nathoh na thoh hu thei ding kahile hiche dammona khun chunga konhin neikai thoukit inlang! Hinkho chomcha neipeh sunghin keibanga lhagao mitcho ho koma kipana thupha polut din neimang cha tan. Golnung phajoulou, alhasam pen ahatlou pen alhing lel pen hijong leng nanga kahi! Neidalha hih’in” katin, kakap tan ahi. Hiche ni’a pat chun kahinkho akipum khel heltai.
Pathen deilam hinkho mang dia kaki pehdoh nichun, Pathen natoh nadin mihemte hinkho hi chom kasah behseh’in kadamdoh pou pou leh Pathen thu jila anatong din kaki gotan ahile, kalung thim’ah toh ding list ahung kigol lha jengin keilah thile hin kikah a umnalai bou kahi. Kumkhat lhing deh chet hospital kaum nungin Pathen lungset in kahung dam doh tai. Midang din tahsa damna bou hijongle keidin vang tahsa leh lhagao kadam na mun ahung hikhatai.
Kakigel lhah na chu kanule kapan jong aphat sah jeh chun, keijong pathen thu jildin Harvest Mission Bible College, Kerala ah admission kaki boltan ahi. Kerala ahin, eimi atam thounan hinlah keiho colledge a vang mi nga (5) bou bou kahiuve. Keitoh kaloipa Haopu toh nungah thum (3) kahiuve.
Part – 4 chu hichan ahi tan,
Next episode.. (life in Kerala Bible College) ina simkit diu ahi…..
Nasim chai jeh’in kaki pah’e…
©️Copyright, Thangboi Kip’s
Thusimbu Machal jing thei na ding a pan lanom ho kipah tah in lem ahijing in ahi anoiya button “Click Here” khu meh utin details anasim ute.
