(Ngai-um Hinkho Thusim)
Part – Thum na
Written by :- Thangboi kip’s
(9531808617)
Arranged by : Ngul Kipgen
Kaki phatlam thim man’in abeng kameh peh in ahile, amajong akipah lheh in ahi..
NOUCY : “Heu, atah tah in kahin ngai valle.”
KEIMA : “Cy, kenjong kahin ngai nama’e, hapta khat jouleh lungtup imolso ding ahitan, ngalel aum lheh jenge.”
NOUCY : “Heu, SHARON PARK hi amin jong angaijin, anomin einidia suhmil thei hitalou, i-sanakhang lhah namun lhon ahin kum ijat che jongle sharon park iphah seh leh tuni ihinkho manlhon hung kigeldoh jing inte na..!”
KEIMA : “Henge nao khang ijat chejong le tunikho leh Sharon park hi eini din suhmilni umta ponte.” Katia abeng kameh kit le kakoma umhon eihin vet saosao untin, ei-ochat u ahilou leh val eisah uchu hidi dan ahe. Chomkhat jouvin kenjong ama pheichung kaki khap in, kichen jouva inchen semdi dan ho kaki houlim lhon le, phat chelam kanahe lhon pon, Pung kagah vetle 2:30pm lang anahi phat chun,
KEIMA : “Nao, inkote analung gim kha untin, ikile di tam?”
NOUCY : “Ole ole heu” atin, inlang jonding chun kahung kipat doh kit lhon tai. Kahung lhaijing lhon laiyin, Noucy in kanunga patin kangchan eihin koi chah kheh in kakol ahin semin ahile..! Kahai nemhut jenge 😄😜
KEIMA : “Neiha sem hih o gari pumin eisemlhu khan nate,” tia katot na kagah ki-nunghei le..
NOUCY : Anui pumin “Gari tool nahi chu namasang kivet tang” ahin’tin. Nuiheu heu va kipahtah a kitot toh kopma kahung lhaijing hon laiyin.. Ccpur to Imphal bus khat ahung lhaiyin vangset nalot lot in kakipel di kontah uvin, Bus chunga von kihap dimset hochu akhao ahung tantan ahile von hochu kamasang lhon tah a ahung kheh lhah phat chun brake kamat vangin akan tapon, von hochu katah khah lhon phat in gari pumin kaleng lhonin, keichu culvert senan kaki neijin, Noucy vang culvert noilang song chung lah a gachu dan ahe.
Kamit kamai athim jengin, kasa phel pholin, kamang abange. Noilanga Noucy in “heu heu” tia aka kajah phat in kading doh in ahile, tol senan kaki neijin, kadin got kitle kalung avai jin kading thei tapon, ka dong manin katom katelin kaki lihsuh in Noucy kavetle apumin thisan amat e. A-aw jong soh doh joulou vin, “henu” akah le “heu” tia aka chu kalai anaval in kakoiyin angol bangin kamoh penjah jeng leh bus a touhon eihin dellut uvin kani lhonin District Hospital eilhut taovin ahi.
Lou eikap un kathoh lel lheh vangin keichu kalip dohtan, hinlah, kalungsett pen Noucy vang hah jong ahah jou tapon, Doctor pa koma
KEIMA : “Doctor pu lungset tahin kaji hi neihuh doh peh tei teiyin” in tia kap puma akeng katuh jengle.
DOCTOR : “Henge henge, kabol theichan hinbol nange, vang ivet diu ahimaiye” atin, OT Room ah atollut taovin ahi.
Kakho hetna jouse amanghel jengin, kalhoh akichem tapon, ka inkote phone boldi jong kageldoh tapon ahi. Kanao Oxygen atopeh uva atollut uchu kilom-mo kasah valin, houpi theiyin kanungmu dem? Ailou leh houpi theilou ahunghi khadem? ti kagel leh kadip achah in ka-it valin, angol banga kapthei lou nuithei louva mitlha loubeh a Operation room lang chu kana chutivet jing laiyin..! Nurse khat in notebook le pen khat ahin kichoiyin.
NURSE : “Heu, na addres hinseiyo” ahinti le kakin dotin, address aban ban’in kaseijin, “phone no” lah ahinti chun “hey” katin, kasakhao kaso gangchel-le ka-phone anaum vanglah. Kavet le ka u Nengboi number kamu masan ka call paitan ahi.
KA U : “Thangneo”, ahinti panpan
KEIMA : “Heu, District Hospital Surgical ward ah kaum’e, henu le hepa toh gangchel in hung uvo.”
KA U : “Thangneo ipithu umham? ipi iti nahim?”
KEIMA : “Heu, Noucy” katin aban seithei talouva kamoh ka jengle.. Ka u in jong kanule kapa ahin puiyin, eihin dellut paipai taovin ahi.
KANU : “Neopu, ipi nati lhon ham? Nanao lah em?”
KEIMA : “Henu, hilanga khu” katin, OT langchu kakoh in ahile! Amajong tija valin, ati akithing in achuti lhiso tan ahi.
Kapan Noucy nule pa jong ahetsah in ahile, amanin jong apet pet in ahin dellut lhonin.. Anu vang achuti kaka jeng tai. Kenjong thil umdan hojouse kasei peh uvin hitia kanganga jing lai uvin, Doctor pa ahung potdoh in, kei eihinmu phat chun amaiso akikhel jengin kenjong kamoh doh ngamlou ahitai.
KANU : “Doctor pu kamounu” ati laitah in..
DOCTOR : “Henu, neingaidam uvin! Mihem bolthei na khel-lam peh ahitai. Alhoh’a thisan lut ahin, ivaigei tauve. Nahol hol jeng uve gakimupi uvin,” ahinti chu kagelmo behseh in ka ulchim’in eivuh tan amaijong vengam talouvin, pam’ah kakap den tan, katha jouse eikilah mangpeh bangin kading laiyin kamoh lhuh tan ahi.
KA U : “Thangneo, nanaovin nahol hol jenge ” ati phat chun kintah’in kalut in ahile kei eihinmu mu chun hamthei hih jongle kipa mel ahinpun, abeng’ah amitlhi ahung long lhan, kenjong amaitoh kamai kasuton kakoyin hitin kasei tan ahi.
KEIMA : “Nao, Iki lungsett honkho’a hi athangse a-engse umngap ahidem? Alam dange i-hinkho hi ven hinkho lamsao jotkhom pi dia i-lelsa thimthu cheng, chung tonisa bon molpang leplou laiya kangai pen’in thongnu neise got hitam? Ikitep nacheng koitoh hinmolso hen neiti ham? Kahin ngai nalom lom’e Cy…! Apen na anapeng lou himai lehen kanom ngeiye. Nang umlou na hiche leiset nahin, keidin jong mun aum deh pooi. Na umlou na a keijong umdeh lou ding, najot namun thangvan sanga chun keijong neipui maitan.” Katia kachuti ka jeng leh room sunga um jouse chun eilainet peh lheh uvin, koima alhisoh lou aum pon ahi.
Nute pate hon “ahipoi boi, nanao agenthei valtai, lung monga ache thei nadin phatah in lhajotan” ati jeh u chun, kenjong suna kaphei chung akikhap bangchun kapomin hitin kavai lhah tai.
KEIMA : “Lung set kiti eihet doh sah a, damsung hinkho mankhompi dingle chun le jo ngai banna dia kadeilhan leh ka-it pen, kahin ngaiyin kahin it nalom lom’e Cy. Hinlah ki ngailheh jong lehen Pathen thilgon lei mihemten ipel theipouve. Deikip lelna leiset ahin lungdei jouse kimolso thei hilou, phatle ni chal banga i-hinkho jong chal ahi. Lhaolha se hih in boi, genthei kana lhilon puldou umlou na Pakai gamsem salemthah noma choldo din lung mongin che maitan. Nalungset kei lung sung’ah hin boi chul lou ‘SHARON PAH’ bangin hung pah jingtan,” katileh amaiso ahung kipah lheh jengin hinlah, ka angsung a chun ahai tan paipai tan ahi.
Keivang hiche ni’a pat chun angol chu kahi maitai. Along chu kaji ahin ka in a kaki vui ding ahi kati leh,
NOUCY NU : “Boi, gelse hih beh’in kicheng tahtah nahi lhonlou laijeh in nanao keile napa chunga lhasethei ahi” atiphat chun kagel leh dihjoh kasan amaho in ah kavui tauvin ahi.
Chapang khut na anehban nehthei kindot na kilah peh bangin, kanop lei nikho eikilahpeh a ka angsung dimset a kana leh lhilon puldou hinkho eikipe vang chu kagelthei himhim poi,..! Leiset a keisanga vangse umtalou din kana
gelin ahi. Hiche nia pat chun Pathen joh bel talouvin, kana nungsun jotai. Jule sa khamna thei jat chom chom kahinbol pantan hinlah, ka lungset pen milni aumthei deh pon, kavet najouse Noucy melin alangin kagenthei chehcheh jotan ahi.
Kumle lha ache jingin, keijong kalim kamel akikhel soh heltan..! Vet thei jong kahi tapoi. Kanule kapan hou lamkaiho toh eitil khou jiu vin, kon ipi seijong leh keidin vang song chunga twi kisunglha bep bou ahi. Nikhat Noucy nun eivet joulou phat in,
NOUCY NU : “Thangneo, boi nanao nalungsetna hohi keijong kakipah’e, hinlah vangse ihiuvin ibah ilodiu ham? Kapi-pi jongleu hen akan tapoi. Nangni khankho semphat thei hita hih jongle, namalam hinkho kisemphat jotan boi.”
KEIMA : “Henu, kamalam hinkho ima aumpoi. Keijoh hi amakoma kache ding bou vat ahitai,” katile,
NOUCY NU : _”Kanao hiti chun gelhih beh’in, nanao vin keile napa eidalhah hon bon iham kiti’a nangin jong nanule napa ding nagel loule..! Keiho tehsen hoilang kasuh diuham? ahinti le dih kasakitin ima kasei tapoi.
Hinlah keivang hinjong kahin nom tapon, leiset na kapen kit loungal leh kisemthah kit theidin kakigel tapoi. Hijeh chun khamnathei habola bola thidoh ding bou kagel jotan ahi.
Nikhat kapa loite khat in kanule kapa koma khamnathei neho kikoina (Rehab Centre) a koidin aseiyin ahile kanu vang apum nop poi.
KANU : “Thangneo, vin eidalha theilhon ponte. Keileh apa chunga Pathen lung hanna chu jong hithei mai ahi. Chapa eipe ama ahin, amabou kanel ding ahi. Pathen in eihin geldoh nikho hung um teiyinte, Ama thuthu himaihen. Neopu in vang adam sungin a-in leh anu apa dalha theiponte,” atin amoh lhiso tan
ahile kanu chu kalung ase lheh jenge.
Hijeh chun kenjong thilpha lou kaneh kadon ho kanga nomtan, hinlah khamnathei joh’in kei eimat ahi phat in kamoh ngah thei tapoi. Hijongle kanule kapan vang. Khatvei cha jong aw ngailou in eihou kha lhonpon, eidal bol kha lhon poi. Khamnathei kabol masanga eihomtho hon bang bang a jingkah nilhah a keidia akisah boi jing lhon chu kavet leh nule pa ngailutna vang thildang toh tethei himhim ahilou dan kamu chen in, keijong kaki khel nom mama jengtan hinlah katahsa kathunun jou tapon ahi. Nikhat..
KAPA : “Neopu, In anangah inlang anapot doh hih in boi, nanu toh kinkhat na gache vah lhon inge,” atin eidalha lhon tai. Sunthip laichun kachang in kaki ngaiton kaki vet leh keile keijong kaki deimon, hitin kaki geltai.
Kaloi kagol hon service kimu’a jile cha neiya imajouse’a eidalha gamtau, kangai pen Noucy inn jong eidalha ta. Gol nung phajoulou keidin hinlo aum poi. Ateh nung lhon kisan na kanu kapa genthei nale aloi apai ho anga ajumna lhon bep kahi hi sangin keijoh che masang ting, Noucy kom jon tange.
“Henu hepa neingaidam lhono neiholmo lhon tahih in” katin, kot kakhah in kahung potdoh tan ahi. Kakho kom uva vadung lentah chunga (Bridge) chu kahin jontan ahi. Sun ahijeh chun koima aum behsah pon, lei (Bridge) kalhun hin achaina ding katin, ka u Nengboi ka phone leh ahin lan…
KA U’NU : “Thangneo sum nakivat hikit meithei vehta na” ahin tin.
KEIMA : “Heu, ahipoi nakoma seinom neijoh kahibouve.”
KA’ U : “Sei tango ineova pat lunggel seina a nei-neiji hina chume. Ipia kankithopi thei ding ham Thangneo?” atin..
Part – 3 hichan hin ana nga utin,
Part – 4 tengle Lei (Bridge) chunga ipi soh ding ham anangah kit taute….
Thusimbu Machal jing thei na ding a pan lanom ho kipah tah in lem ahijing in ahi anoiya button “Click Here” khu meh utin details anasim ute.
