SEIBOI LE KIMNEO CHA HIN NEI
EPISODE – 1
Seiboi Khongsai
8473864702
Thusim i-sim masang uvin, I KAH A LING LE KHAO TAM JONG LE ANA PANG DET JINGIN. Seiboi leh Kimneo Lungset Hinkho Thusim chu, akichen (marriage) lhona chan Part – V chan, ina sim tauvin, tua Cha ahin neina lhon le adang ho, ina sim kit diu ahi. Het ding chu Laa hihen,Thu hile, lunglut na beiya ngai thei ahi, sim thei ahi timan’a, moh ngai jeng, moh sim jeng nu/pan, aphat chom pi deh poi. Hi jong leh, lunglut na neitah a, ngaiya, sim ma chun thule la jong khantou nale phat chompi nan anei theije.
Khai le nangin jong lunglut tah in, ana sim pan tan.
{KIMNEO CHANEI LE AHILNA LHON}
Seiboi le kimneo jong a kichen kal lhon, kum khat (1) kum ni (2) ho ahung lhing tan, Pathen thilgon bangin kimneo in jong nao ahin vop tan, ama nin jong acha lhon mel, mu ding kal ngah lel tah-in, lungkhat, thakhat in pheiphung, asong khom lhon tai. Seiboi in jong a jinu chu, nao vop ahi tah jeh chun, toh hahsa ho atoh ding anom jipon, ahi jeh chun, in mun na, nom tah a um din, asei peh in,kimneo in jong moh um jeng sang intin, in sunga thilneo neo ho toh jing pum chun, nom tah in aki chol ji tan ahi. Seiboi jong niseh le pontho tah in, a service natoh chu, pha tah le kitup tah-in, ahin tong jing tan ahile, Pathen lungset nale apon tho jal chun, toh munlen tah khat ahin kimu tan ahi. Hiti chun anu te, apa te, chule aji ngai tah kimneo chu to kipah le tha nom tah in, hinkho ahin mang jing tau vin, in jong thupi tah in aki sah uvin, chule Pathen deilam le, miho kinep na, hi thei na din, a genthei ahah sa aum jong leh, kipah tah le kiphal tah in, sum le pai hihen ipi hita jong le, anei kham kham u chun, mi angai cha jouse chu akitho pi jing tau vin ahi. A jinu kimneo jong anao nei na ding, aphat alhing tan, lel jong alel lheh jengin, a u seiboi, angai na chunga, nao nei dia ahung um phat chun, angai chat na, asang mama jeng tan, hi jong le, seiboi jong office akin khoh tah tah, anei ji jeh chun, ajinun ngai hen lang aman jong ngai lheh ji jong le, che lou thei ahi ji pon ahi. Jingkah khat seiboi jong ajinu kimneo nu le pa, chule ama nu le pa kom chun, asei yin, “Henu kimneo hi ahung boi naval auma, nao nei ding, din mun na, ahung um khah tah jong le nei hin hetsah jeng tauvin,” tin, asei yin, jalkhun chunga lum, ajingai tah kimneo nao nei ding kon cha jong chu, phate chan asei peh in, aman jong ajinu ngailut vetsah nan, kiss abol’in office adin, adalha tai. Office alhung in, athil ho abol chai jou, chom khat jou hin, ajinu kimneo nun phone ahin bol tan, “Sei, kimneo hi aphat alhing mong mong ahi taije, gang tah in, hin del loiyin, hospital lama, kana pui diu ahi ta e,” tin ahin seitan, seiboi in jong phat chom khat adin, suty aki lah in, a garia atou doh in, kino tah chun, hospital lam chu adel loitan ahi. Hospital alhun lhun chun ajinu teho um na room, ahet lou jeh chun hospital a, na tong nurse khat chu a dong tan, nurse nun jong room no (5) ahi atipeh in, seiboi jong room no (5) a chun achen ahile, ajinu kimneo chu, nao nei na room ma, ana koi ju ahi tah jeh chun, ajinu le ama nu tah tah chu ana um tapon, aum cha sun chu, adammo hole kimneo nu bou ana hin, kimneo nun jong seiboi amu phat chun, “Na hung hitam sei, kimneo chu nao nei dinga, room ma apuiju ahi taije, nao jong hin nei vah tante,” tin, ahin seiyin, seiboi in jong ajinu kimneo, angai val jeh leh, nao ahung pen lhah a, amel mu ding kal, angah lel val jeh chun, neo neina room ma, che ding atin hi jong le nao neina room ma, pasal lut ding aki phal lou ahi jeh chun, ajipa lele hijong le, ache sah ta pou vin ahi. Phat chom khat jou vin, kimneo in jong, Pathenin ahin peh chapa pasal melhoi tah khat chu, ahin nei tan, chom khat jouvin aboi pi apang numei khat chun neosen dei um tah chu, pon nemchet khat in, achun tup in, kimneo nu chu ahung pen ahile, seiboi le kimneo nun jong, chapa melhoi tah chu, amu lhon phat in, akipah lhon val jeh chun, amoh nui nui jeng lhon taije, kimneo le a tehpi nu jong ol tah in nao neina room sunga kon chun ahung doh lhon tan, kimneo in jong, a u seiboi chu agah ven meseu vin, kipah tah in ahung nuiyin ahi. Hiti chun doctor hon jong nikhat, nini ho um den din asei peh un, ama hose jong hospital chun, aum den tau vin, nikhat nini ho ahung hi phat chun, ama hose jong, in-lam’in, akile kit tauve. Damsel chan in mun jong aga lhung kit tauvin ahi. Kimneo jong anao neina jeh a, alhahsam naho, alel naho, chule angai chat ding jouse jong, a u seiboi jin, achoh peh in hiti chun, kimneo jong chingthei tah in aum jin, a useiboi jin, angai khoh ding jouse, achoh peh ho chu pha tah in, ahin bol jing tan ahile, phat chom khat jouvin, ahung pha gamtan, anao vahna ding jong Pathenin, ahin pen, dam jong ahung dam theng tai. Seiboi in jong aji ngai tah kimneo ahung dam phat chun, in sunga, a mopoh nale, chapa pasal khat jong, anei lhon tah jeh chun, amo poh na lhon jong, ahunglen cheh cheh in, ahi jeh chun, ama nin jong kilungtoh tah le, kingailu tah in, hinkho jong Pathen dei lam’in, amang jing lhon tan, chu jong le, ama ban lhon na, naosen in jong kho ahin het thei apat a, Pathen ging jing, ahung hithei na ding leh, amani kinep nale, mite kinep pi thei, ahung hina din, pha tah in, avah lhon nin, chu kitle, amani jeng jong tahsa lam hihen, Lhagao lam hi jong leh, mihon kihil nale, Pathen akimu doh jing theina diuvin, Pathen komin taona, amang jing jeng, lhon tan ahi. Ni khat ama nin jong achapa lhon, melhoi tah naosen chu, amin sah ding ati lhon tan, akho sung uva kou dinga kilom jouse le, khosah, kho lhanga um, api apu te ho jouse jong akou khom uvin, nilhah in nao min sahna, maicham asem tau vin ahi. Seiboi in jong phat amang in, hitin asei tai, “Pathenin ei-peh lhon ka chapa, apeng masapen ahi jeh chun, keipa min kahin losah e, amin [Haominthang] tia ikou diu ahi taije” tin, apa min chu ahin losah in, chu jong le, ajinu kimneo in jong phat chom khat amangin, achapa Haominthang chu, dei chom tah a, amin kou na din, amin lhem (Nick Name) chu, [@Minthang] tin, asah in, khosunga houbung upa pun jong, nao min le, chapa melhoi tah Haominthang@Minthang chu Phatthei, aboh in taona amang khom tauve.
Seiboi le ajinu kimneo in jong, achapa lhon chu phatah in ahin vah jing lhon tan ahile, Minthang jong kidai pi thei, ahung hitan, deichom aum lheh jeng tan ahi. Phat le nikho akikhel jing bang le, mihem jong akhan jing bangin, minthang in jong ase apha jong ahin hethei tan ahi. Hiti chun seiboi le kimneo in jong achapa lhon, minthang chu Pathen thule la hon, ama hetthei tah din, bailam chan, asei peh ji lhon’in, hi bang chun, nusei pa sei ngai, pi le pu thusei ngai chuleh, ahung khanlet nung jongle mite kinep pi thei ding le, khonunga Pathen phatthei boh na, ahung chan thei nadin, phatah in, achapa lhon chu, akihil jing lhon tan ahi. Hibang chun minthang jong chapang sei ngai tah le mija jethem tah, asempa Pathen ging jing chapang phatah in, ahung um doh tan, aloi agol ten jong angai thei lheh jiuvin, chu kit le api te apu te hon jong atupao minthang chu angai mama jiuvin, adeh in anu le apan vang, achapa lhon, ajinu kimneo vin, deichom tah a, amin lhem asah pah minthang chu, angai na lhon le, alungset na lhon asang deh set in ahi. Chapang dei um tah minthang jong Pathenin aumpi jing in, ama jong ahung khangbe jingin, kum (8) kum (9) ho jong ahung hitan, anu le apa ten, asol le thei, amanchah le thei ju, ahung hi phat chun, minthang in jong anu te apa te ho thusei sei, angai yin, asol sol naovin jong thase lou vin, genngai tah in, ache peh jing yin, chuleh, anu le apan jong, angai mama jeng lhon in, minthang in jong anu le apa chu angai lheh jin, adeh setin anu angai chu, asang chom lheh jin ahi, anu umlou na ho in, nidan khat jeng jong achang in aum nom jipon, mong jong among jou jipon ahi.
[ Ajeh chu nang le keiyin jong ipa sanga ichunnu/inu chu akingai sang deh jin na, koiman kanu umlou kanu abei chu kahinkho anop chome, ti ding ium pou vin ahi. I-pan jong eingai nante, ei lungset nan te, ei khohsan nante, hi jong leh, ichunun, aoi sunga lhako (9) jen, eina poh a, thile hin kikah a, natna thoh puma, athi san’a, eina hin ahi jeh chun, ipa sanga, inun ei ngailut nale, ei khoh sah na, ei lungset nachu asang jon, chule eiyin jong akingai jin, ilunggel jong ipa kom sangin, inu komin aha ki seinom jin ahi. ]
Hito bang ahi jeh chun minthang in jong anu somai chu amu jilou teng, ahinkho man anop sah thei jipon, apa sangin anu to chun aki sin theijon, akingai na lhon jong asang in ahi. Seiboi jong a office lam uva alen loi khat ahi tah jeh chun, moh che da jeng thei ahi tapon, ahi jeh chun, ajinu kimneo le achapa minthang to chun, aum khom pi man ji tapoi. Minthang jong apan office adia, ada lhah jiteng, apa chu angai lheh jin, hi jong le apa chu, che lou thei ahi jipon, chapang dei umtah minthang adin, apa toh aum khom na phat chu, apa office hung kikhen jou ham, jan ahung hi jeng tilou vin, apa toh nom tah a, umkhom na ding, phat dang amu jou ji poi. Nikhat seiboi jong a office lam uva, boina khat aum jeh chun, suty ahin mutan, aman jong phat homtho tah in, nikhat lele suty kimu a, tin kipah tah in, achapa le ajinu, chule anute ho toh chun nomtah in, aum khom uvin ahi. Seiboi in jong achapa Minthang kom chun, kachapa mama hi kangai jipene..tin, akihou lim pi in, aman jong Pathen thu hileh, thil dang dang hijong le, asei peh to, ahil akop in, achapa minthang in jong apan aseipeh hole ahil na ho chu pha tah in, angai peh in, hiti chun apan jong achapa kom chun asei kit in, boipu thukhat nadong inge ong, ti-in, hitin adong tai, “Boipu na hung khanlet a, gollhang lhingset na hung hiteng, ipi na hinom pen em? tin adong tai. A chapa Minthang jong chapang…
[ TOBE CONITINUE EPISODE – 2 ]
Hiche i-sim ban le, Seiboi nulepa le, Kimneo nulepa hung thi dan ho ina sim tha diu ahi
