Home Crosby Haokip SCHOOL ADMISSION

SCHOOL ADMISSION

408
0

Slno. 347

(Fiction)

By:M. Lalcha Haokip(8730999926)
__________________________________

Thinglhang louvat ijakai akichai soh tan, nu leh pa tampi khosunga tapkong kihoulim na chu ” Tu kum nachate hoilai school a nakai sah ding ham? ” ti hi ahi.

Kimkhat chu kumlui a chang le mim ana phatlou jeh chun neh leh chah nengtah a aneilou jeh un, chapangho school kai na ding lungdon nan abomin ahi. Chuleh nu le pa kimkhatma chun ” Hoilai school a kachate kaisah leng apha pen dem “? Tin lungdong tah in aum in ahi.

Alangkhat a nu Nemchin in jong nei le neilou umlouvin achate lekhasim doh ding khohsah leh gelkhoh najal chun, achanu tah pen Kikim leh anaoteni a din admisson a dingin muntheh ahol pan tan ahi. Ijat a sum ahol ji vangin numei thalhom le lunglhom ahijeh in, dei bangin amu jipon ahi. Alangkhat a insung mipa asenji Haopu vang jingkah a kipat nilhah chan kham(drunk) tailou bol ding dang ahepon ahi.

Kikim : Henu, itih le SCHOOL ADMISSON nabol ding ham? Kaloi kapai jouse school kai gamta.

Anu : Boi, jing nikhoa kipat nanaote toh school nakai patdiu ahitai.

Kikim : ( Kipah lheh)

(Ajing nikhoa school headmasterpa aga ki mutope)

Nemchin : Kahunglut thei ding ham sir?

Headmaster : Hunglut o sopi. Ipi ti leh nati tam?

Nemchin : Hiti hi chu o sir, insung hahsat jeh in kachateho school aphatcha’n kahin sol joupon, tua jong sum um kingah ngah jong leh chapangho school kailouva hung um kgadem ti kagel in, hijeh a hi nakoma taona nanom khat neiya hung kahi.

Headmaster : Ipi thu ham seiyin sopi.

Nemchin : Sir, nagel theiya chuleh ahithei ding le lungset tah in, jing nikhoa kipat chapangho sum kanei kham khamin lekhabu le uniform hin choh peh in katin, SCHOOL ADMISSON hi chomkhat neina khongaipeh thei ding ham tia nahenga kahung tao ahi.

Headmaster : Ahipoi sopi, itobang hahsatna naneiya SCHOOL ADMISSON ding kisan nanei lou ham? Oleh insung mipa um lou ham? Ipina atoh ham?

Nemchin : (Sei ding ahetlou, amaiso hung kikhel jep) Sir, sei ding jong jachat aume, ajeh chu kaloipa hi jingkah nilhah a kham ji a aji acha hinkho man dan hepha louva ju-phunga kitung ji ahi.

Headmaster : Ahileh sopi nasei bang chun jing nikhoa kipat chate chu uniform leh lekhabu chuleh angaicha dang dangho hinchoh peh in lang hinsol in, hinlah SCHOOL ADMISSON vang chu nahahsat dan u kavet joulou jeh a phat chomkhat bou kive ding ahin, nangin jong hingel khoh in lang lhakhat jou leh hinpe tei dingin kahin tem e. Chuleh ipi jeh a hitih chan changpang chu school nakaisah nailou u ham? Aloi apai sot a kai pan ahitai.

Nemchin : Kahe tahih e sir, amaho beh in school akai masang uva natoh ikithopi lou uleh eidia hahsaji, atha u ihom tho jeh a hitia hi aphatcha hung kikai sah tho jilou ahi.

Headmaster : Sopi, chutia chu nabol lou ding ahi, ajeh chu aphatcha chapang school ikai sah lou teng ahet dingdoh aheji povin, ahet dingdol ahin hetlou ji teng exam ahung failed ji in, exam ahung failed ji teng aloi apai masanga jachatna anei jeh un ajo jo na leh school kai ahung thase un, khonung leh alung gim leh alhohsa ding chu nu leh pate hithou thou ji ahi. Maban teng aphatcha’n SCHOOL ADMISSON bol peh ji un lang aphatcha’n chapang school kaisah ji un.

Nemchin : ( Kiphatlam leh jachatna maiso aput, Sei ding ima helou)

Headmaster : Kahin thuseiho chu ima lungnopno nan neihih in sopi, tulai inam sung uva minu mipa tampi dinmun kapoh nat val jeh a kahin sei ahi. Chapangho chun class ijat jat asim diu ham?

Nemchin : Alenpen nu chu class vi asim ding, anoiya nun chun class iv asim ding chuleh aneopen nu chun class ii asim ding ahi.

Headmaster : Kasei ma bang chun chapangho chu jing nikhoa kipat school hin sol pan jengin.

Nemchin : Kakipah val e sir.

(Chibai abol)

Kikim : ( Anu hungvai lhun kal kipah tah a ana nga jing)Henu, SCHOOL ADMISSON nahin bol hitam?

Anu : ( Kahin bolpoi ti ding chu nopmo asah thim jeh in) Henge boi, jing nikhoa kipat nanao teni toh school nache pan diu ahitai. SCHOOL ADMISSON kahin bol chai ahitai.

Hiti chun kai lhanga sum aneisun po in achate din uniform ijakai agachoh peh tan ahi. In ahung lhun lhunin, insung chu avet le ana thang deh in ahi, ajeh chu khomite alen aneo in JING JUKHAM tia ahet u asenji Haopu chun akham jeh a insunga thil leh lo ana suh thangdeh ahi.

Nemchin : ( Ka awchenga) Vo ! Kikimpa ibol a ba nang toh kakichen khah hitam? Kakisih val e..! Khatvei beh jong hi nachate school kai ding nakhoh sah lou ham?

Chutia anu aka jing lai chun..

Kikim : Henu, kap hih in kei le kanaote lekha kahung thep uva sap kahung hi teng uleh kapa idalhah diu eiho munchoma ichen diu ahitai. Henu kap hih in..

Nu Nemchin jong chate ding gel nan alungkhamna chuleh asenji chunga alhasetna tampi umjong le gellou bang kisan atoh ding atham ding ijakai abol pan kit tan ahi.

Hiti chun chapangho jong hiche nikhoa kipat chun school ahung kai pan un, aloi apai toh kipah le thanomin akichem khom ji un ahi.

Phat le nikho ahung chal in chomlou kah in headmasterpa toh SCHOOL ADMISSON peh na dia akitepna phat leh nikho chu ahunglhung pai tan ahi. Hinlah dei banga sum amu theilou jeh in akitepna nikho lhakhat ahung val kit tan ahi. Alangkhat a school a konin lekhathot khat ahungin,

To,

Kikim nu le pa, nakomlhon a kahin hetsah nom chu ahileh SCHOOL ADMISSON peh nadia nakitepna phat le nikho lhakhat ahung val kit tan, hijeh hin jing nikhoa kipat nacha te thumho hi SCHOOL ADMISSON nahin bol kah uva nahin sol tah lou dingin kahin hetsah e. Chuleh attendance register a konna amin u jong kiladoh ding ahitai.

KAKIPAH E.

Headmaster.

Hiche lekha amu mu-a kipat chun nu Nemchin jong alung ah an-neh twi don ding ima aum tapon ahi. Alangkhat a chateho hetsah ding ati le ajo leh lungneo khat tou vinte tia agel jeh chun ima aseipeh pon ahi. Chuleh chate hinkho semna dia akithopi ding mipa jingkah nilhah kihelouva kihoupi thei louva aum jing chu avet leh adong manin mitlhi twi in ahin donbut pai paiyin ahi.

Jingkho ahungvah paiyin school che phat ahung hipai tan, Kikim le anaote jong angeiya school che kit dingin akigo pan tauvin ahi. Ajeh chu school a konna lekha thot chu anun aseipeh lou jeh uva ima ahet lou u ahi. Alangkhat a nu Nemchin in jong kham ding ati leh kipah tah a akigut u amu jeh chun ima asei ngampon ahi. Adong manin ama jong room sunga alut in hakap in aga kap tan ahi. Room sunga aumkah chun Kikim in anaote cheng akipuiyin school a ana che man tauvin ahi. Ajeh chu genthei tah hi jong leu school kai thanom te ahiuvin ahi.

Class teacher pan roll call ahin bol in ahileh Kikm rollno.ajao tapon ahi.

Kikim : Sir, kei rollno. nakou hei e..

Teacher : Na rollno.ijat ham?

Kikim : Sir, rollno.23 kahi e..

Class teacherpa’n aven ahileh Kikim rollno.chu ana kisuh mang tah jeh chun office a headmasterpa toh kimuto din asol in ahi. Alangkhat a anaoteni jong hiti chun class a konin office lam jonin ahinsol doh tauvin ahi.

Kikim : Sir, ipiti ham? Ka rollno.ana jaotapoi..ka rollno. 23 ahin ka ojapun eikou poi.

Headmaster : Kikim, boi nopmo sahih in nanu leh napa kitah lou jeh a kho hephalou nang le nanaote chunga thil jouse chu ahitai. Ven, kumlhung ta dinga tuchan gei a SCHOOL ADMISSON bol louva nakai thei u hi alang khat a navang u pha ahi. Ajeh chu kol leh vai school hileh sot a konna school nana kai tahlou diu ahitai. Nanaote kipui in lang nanu leh napa’n SCHOOL ADMISSON ahung bol kahse a nahung kai tah lou diu ahi.

Hiti chun Kikim in jong anaoteni chu ahin kipui in lhase le jachatna dimset pumin in lam ahin jon pan tauvin ahi. Alangkhat a window a konin alen aneo in Kikim le anaote umchan chu ahin ve sou sou un, kimkhat chun athu umdan ahet them jeh chun apona lheh un akap leh alhisoh lou koima aumpon ahi.

Khosung aphah kon un Kikim in jong anaoteni koma chun,

Kikim : ” Boi, nangni ana masan lang ken jun kahin thah ding ahi.
Tin anaote ni chu asol masan ahi.

Ajeh chu in lhun a aloi apai chuleh khosung mihon ” Kikim ipi jeh a school nahung kimakhan u ham? Ti donbut je ahet lou ding jeh a khomoul a khojin anga ahi.

Alangkhat a in mun a um anu chun gal a konna achate school ahung ki le a kon chun thil ijakaiho chu ahesohtan ahi. Ama jong kitim joulouvin nao bangin akap in hiti chun achate angong koi in ahi.

Anu : Boi, na u Kikim la?

Gracy : Henu, ka u chun nang ni ana masan lang ken jun kahin thah ding ahi ati.

Hiti chun aman jong khomol lang adel paiyin agavet a ahileh thingphung noiya chun kinuh pum puma lhase tah a anakap Kikim chu aga mudoh tan ahi.

Hiti chun aman jong angong koi in..

Anu : ( Kap puma) Boi, insung vaichat jeh leh nanu leh napa kitah lou jeh a tuni khoa kho hephalou nang le nanaoten jachat nathoh ahitai.. neingaidam lhon tei tei in boi..
Tin hakap in anucha lhonin aki ngongkoi lhon akap lhonin ahi.

Phat leh nikho ahung chal in nu Nemchin in jong chapangho school kai kit ding khohsah najal chun kichol man louvin thakon in sum alo jingin ahi. Alangkhat a nasatah a insung ahung hahsat tah jeh chun achai chai nan pa Haopu’n jong ju choh nading sum ahin nei tapon kahkom leh achamlouvin ju adon ji tapon ahi. Hijeh hin nu Nemchin in jong tahsanna neokhat khat ahin nei dompan tan ahi.

SCHOOL ADMISSON ding sum ahung lhin tah jeh chun alangkhat a Kikim le anaote jong school kaikit ding atiu le athanom lheh un ahi. Kicholman louva na atoh jing jeh chun achai chainan nu Nemchin jong ahung dammo lo tan ahi. Ama adammo jeh chun SCHOOL ADMISSON a dia sum amu cheng..

Nemchin : Ahipoi, Kikimpa keila kadammo lheh in hijeh hin nangin chate SCHOOL ADMISSON adia kimu kham kham paisa hi chapnaghon alekhasim aban jom thei nading uvin gape o…tin asol tan ahi.

Kikim leh anaote jong jing nikhoa school kikaipan ding atiu leh kipah tah in uniform akisop theng un chuleh lekhabu ijakai akigut tup pan tauvin ahi.

Chung toni jong lhumkon ahitan hijong le SCHOOL ADMISSON bol a che pa Haopu ahung kile mong mong tapon ahi. Jan khang kim in anah nah-in in ahung lhungin chutia akham lou vang chun ahung nam thim thim in ahi.

Jingkho ahungvah paiyin school a che dingin Kikim le anaote jong akigo chai un hiti chun kipah tah in school ajon pan tauvin ahin.

Sunkim don in nu Nemchin jong neokhat ahungdam dom jeh chun verandah a atouvin ahileh, gamla tah a konna ” Henu, henu ” tia kisap gin chu aja mang chapchap in ahi. Aman jong phatah a angaiya ahileh Gracy aw toh kilou asah jeh chun aven ahileh Gracy le anaonu chu ahunglhai tho jeng lhonin ahi.

Ama lunggel a chu tunia school achepan jeh uva kipah u hinte tia agel jeh chun koima hetlou kah in ahung moh nuilhah in ahi. Chutia kipah tah a aum jing lai chun insunga wall-clock a konna alarm hung ging chu angaiyin ahileh jingkah pung 10 beh ahi nalaiyin ahi.

Ama jong ahung kidot in ” Katei kei chunla nilhah lang kihisah in pung som bou ahi nalai vet ta la ” tin ahung nuilha kit in ahi.

Gracy le anao ahung lhun in…

Anu : Boi, na u Kikim la? Ipi bol a matah a nahung kile lhon ham? Ole school suty nahi u ham?

Gracy : ( Ima a don butlou, thipchat a room sunga lut)

Ama jong lungdong tah in room sunga alut in ijat a thu adoh vangin Gracy in adonbut deh pon ahi. Ajeh chu pa Haopu in achate SCHOOL ADMISSON a dia apoh sum jouse chu SCHOOL ADMISSON bolna mang talouva hiche nikho mama a chu judonna anei moh chengse chu masanga ju hotel a abat ho ahin kisah ahi. Hijeh a headmasterpan ahin nungsol kit u ahi.

Hiche thu ajah doh doh chun nu Nemchin jong naobangin lhasetah in akap in ahi. Alangkhat a Kikim vang loi leh pai masanga jachat athoh chu thoh jou talouvin in hung kile kit talou dingin hiche nikhoa kipat chun akiholmo pan tan ahi.

Khonunga pa Haopu ijat a akisih a. akisem thah vagin ama dingin phat jouse ana geisang tan ahi.

BEITA.

● Aphatcha chapang school admisson bol peh ding, aphatcha school a sol ding ahi.

● Chapang lekhasim na a hi nu le pa te pankhom ngai ahi. Nuteho bou ngense lou ding ahi.

● Ahithei channa aphatcha school a peh dia lomho kipeh doh ding ahi.

● Insunga khamna thei bol aum laisea lhagao le tahsa lama khantouna umlou hel ding ahi. Thu tampi nasei sangin na umchan nakhan chanin chate hil jon, phachomjo ding ahi.

.

Previous articleTHISAN BANGIN ALONGE
Next articleTHE RIVER OF DEATH