A complete mockery of Justice & legitimacy.
Drama thothem tah ho drama tho jong akah lah leh ivet le kisuhhalnan anom thou e.
Asun:
N.Lhungdim
Thangting House
Molnom-West
Date- 27/06/2020
Tunaicha a Manipur Govt. N.Biren Singh luboh hina BJP lamkaina coalition Govt. a MLA ho leh party danga MLA ho drama tho chu anom lheh jeng in a commentary sutlou ding in apamai in kamudan leh kahet dan kisuh halnading in themkhat sei ute.
Govt. hung boina hi Chemtatpa thusim tobang ahin Chemtatpa thusim a chu koiham thu sumo kipatna chu tia akikhol leh KAIKONG jeh ahi. Tuchung a thu sumo pa jong hi Chief Minister N.Biren Singh Kaikong a apan na thusim ahi.
Amasapen in Finance portfolio achal nom jeh in Deputy Chief Minister Y. Joykumar Singh Mona asem in Finance portfolio alahpeh in midang jong pelou in aman LUTPU PAIPEH poh in akipoh in ahi.
Thunei vaihom na
Hitichun amachu Home Minister jong ahi in Finance Minister jong ahi. Minister dang power nei chu Th. Bishwajit Singh ahi. Amachu Power, Works, Commerce & Industry leh Rural Development apoh ahi. Minister dang hohi amin a Minister ahivangva thunei vaihom na Chief Minister pan akeh khat tobang akipoh ahi.Chandel MLA pa Flood umlouna a hung kaidoh pa chu Flood Control apohsah in ama jong thunung tah in Imphal a tui alet leh abung bu a kitung leoin tuiting in apang in ahi. CM pa ji no.2 chu Chandel lang mi ahijeh a Pu Letpao toh 50:50 a kihom ahi ti thuthang jing akijan ahi. Adih adih lou chu Chandel lang mihon henaovinte.
Hiti ho jeh ahi a Minister hou jong lung lhailou pump um a Minister kahipou leh tia um mai 2 hiuvinte.
Hiche kahlah ah BJP MLA 15 lang in Chief Minister lheh dinga group asem uva Delhi chan gei a camp aga sem uh ahi. Ahinla amaho lah a Minister 3 chun a minister hina ahai ngaplou jeh leh Chief Minister tuh thei ding alhahsam jeh uva ana lolhing lou ahi.
Hiche lah a chu Henglep MLA Pu. T Thangjalam Haokip jong Delhi Camp a ana jao jeha Chief Minister in Henglep MLA a approved ana kibolsa Project jouse Ukhrul langa guthim a anatol mang jeh a Pu.T Thangjalam Haokip alunghan behseh jeha BJP a kon haina apeh keo hilou a MLA kisan adalhah ngap ahi.Koi ham amatobang a Hang ? Politics langa sei dinga amahi apet pet a MLA cha jong ahilou vanga akhonung ding akisem ahj. Akai kit kaikit lou chu Pathen phasah ahin ahinla Henglep mipi ho koma dindoh a maivah pel a thu seina ding maichang ana kisem ahi.
N.Biren Singh Govt. ahung ha boina pen hi NPP MLA 4 Y. Joykumar Singh, L.Jayanta Kumar, Letpao Haokip leh N Kayasi ho in Congress ho koma aumlai Govt. kahin dalhah ding uh nangho toh Govt. Sembom ute tia ahung chopdoh phat uva Congress hon jong achutileh Secular Democratic Front min in Govt. kisem hen tia pan ahinlah uh ahi.
Imajouse a kikumtho jou
Ahinla hiche kahlah chun akikum ngailou beh Meghalaya Chief Minister Conrad Sangma in Assam a Health Minister imajouse a kikumtho jou Hemanta Biswas Sharma toh ahung lhailut lhon in Biren Singh Govt. lhuh lou nading leh ama Meghalaya Govt. lhuh lou na dingin NPP MLA 4 ho kelngoi chingpan a kelngoi ho adei lam lam a ahoi bangin Delhi a BJP Party President J.P Nadda leh Home Minister Amit Shah Bong buh sungah aga hoilut lhon in ahi. Hicheva akimuto uva ipi asei uva ipi kinoptona uham ti hohi amaho tailou koima ahe aumpon ahi.Hung ki ol hetnante ngah lal hih un.
Milham ho geldan leh lahdan a Minister jong nahi ding uh portfolio jong nadei dei nakilhen ding uh chuleh sum jong nadei dei jat uh naki pe naovinte tia ahinlhep uh hiding a tahsan umtah ahi.Hiche hi dihjong dih mai thei dih lou jing hithei khonung ipi hung tibep uvem kive leh adih chu hung kiphong doh tante.
Hiche NPP MLA 4 hohi itobang mi bep hiu ham tihi mipin seilou a amaho hin Hitobang Bep Kahi atiuva lhangphong a kiphongdoh ahi. Leiset chunga mihem khat in ideipen uleh ikhohsan pen uhi MIN ahi. Mihem in amihina integrity aniseh a lheh leh kon atahsan ding ham? Manipur State Branch a NPP President Pu Thangminlen Kipgen in Biren Singh Govt. adalhah na point 9 tah aphongdoh in Health Minister a anahi L. Jayanta Kumar Singh in kinungle lou dinga [NO TURNING BACK] kahungdoh uh ahitai tia Press Conference akou in hiche jannia athusei houchu tuni a iti dan a akale lang hidoh hitam?
TRUE POLITICAL TURN COAT
kiti chu amaho seina hiteiding ahi.
Amaho dinga Political and Personal Integrity huhbit ding gong hioleh Conrad Sangma koma chu keiho kihei le le thei ta pouvinge nasei nah nah uleh NPP member a kahi tahlou diu kabon uva Congress kahi diu ahitai tiuleh Anti-defection law asuhkeh lou jeh uva achung thu uh thengding ahi. Chukit leh vangset a election kintah a ahung um jongleh a constituency miho kom a maivah pel a mipi ho lah a dingdoh ngam diu ahi. Tua hi Currency Note sum avetsah lou uleh vetsah ding dang aneilou ding u ahitai.
Mainei lou MLA.
Ahinla hiche kahlah ahi Manipur Assembly Speaker Y. Khemchand kitipa jong hi akichat uh himaithei ahi. Amahin gucha loubeh Thanga MLA T Robindro Singh jong chu gucha loubeh a Court a jong case umlou gucha ahi tia a songkul a akhum ahi.
Hiche tobang Assembly Speaker hi India a Speaker ana um khalou khonung jong leh umding a ginchat umlou ahi.Manipur Political History RED INK a kijih ahiti a Mangibabu Congress MP kaidoh joulou pan aphondoh ahitai. Speaker pa hin INK ahipouleh Red Ink,BlueInk,Black Ink khohsah lou beh a jihthei thei a ajih ahitai.
NPP MLA hohin ana thim kichat uh himaithei ahi. Ajehchu N.Biren Singh leh Y. Khemchand hin manthei jouse heicha, tucha, chempong,tuphul khenlou a a Govt. hinna dingahipou leh atoh thei jouse ana toh lhon ahi.Ki ngol pei anahi lhon in ahi.
Congress MLA ho Camp Patsoi a ana um jong Saikul MLA Jamthong Haokip leh Wangkhei MLA O.Henry leh Lilong MLA Nassir ho jong a inko ten complaint abol e tiu police hon aga mandoh un ahi. Nassir kitipa vanghi kahepon O. Henry leh Jamthong Haokip hi khat drug case a matding a um leh Jamthong Haokip chu Manipur Rifles a Pistol kigu mang ho ajoh e tia case nei Jail a umsa ahijeha jail a aumnom lou lhon man a BJP jail a lhailut lhon hikhat inte.BJP jail a chu Sajiwa jail sang a gamcheng nomjo neh le chah nom jo ahi.
Amani hi hikhat nante. Anatoh lhon ivet leh kiveimi ahijeha politics a min neiding chu ponse kise lhah banga ana selhah lhon hinte.
NPP MLA 4 ho vang amani tobang ahipon kivei mijong ahipon ahinla tukah a aumchan uh akhanchan uhi ivetleh min aja nao Dignity and Prestige jouse Meghalaya Chief Minister Conrad Sangma in BJP ho Houin a maicham semna a aneidoh ahitai. MLA tet kit nading aum phatleh Conrad Sangma mai ve a a voter hon vote ahin peh kitdiu hi tahsan aumpoi. Mikhat phatchom na dinga amaho mi 4 mihina akijoh doh uh ahitai.
Hiche amansah uh MIN hi sum crore ija in choh kit ding gel ujong leh chojou tapouvinte. Vangset umtah tuchung boina a Kaikongpa kithopi a Chemtatpa thusim a jao chu velechun hedoh taovin nate.
Assembly Speaker Y Khemchand Singh natoh MLA 7 achonsetna thakhat chet 3 ho achonset nao buhbang abah sah a MLA 4 ho nang chonsetna hi Meihol bang Vom ahi tia aphon doh chu thuchom ahin Thanga TMC MLA T Robindro pa nang chonsetna naneilouvang in tunia kipan a tolthat leh gucha bang Cross a khailih ding nahitai tia June 19 ni thutana hearing um lou beh a ana khailih ahitai .India sunga Assembly Speaker thunei pen leh kichat umpen Speaker kaidoh ahitan ahi.Manipur a hi KIDANG DANG gamdanga soh ngai lou soh juimong ahi.
