Home Chaga Thusim “SANGGA’MON” KA HINKHO KIKHELNA-I

“SANGGA’MON” KA HINKHO KIKHELNA-I

359
0

 (ORPHANAGE HOME)

( Part – 1 )

Narrator – Thangboi Haokip
Contact no. – 9531808617
February 2021
Arranged by – Ngul Kipgen

Hiche thusim hi, adeh a numei chapang hung nungah pan pan ho gelkhoh naa hung kijih keima thusim ahi. Keihi nu le pa mantam dan helou le thu ngailou kanahi. Last episode “ORPHANAGE HOME” a ka-hinkho kikhelna chan anasim teiyin.

Keihi ka min, Kimneithem ahin; Kanu le kapan deichom in Boithem eiti lhone. Pen khompi ka nao pasal ni (2) kaneiyin, Kapa hi Army sepoy ahijeh in atamjon in’ah aum puon; Kei le ka nao teni toh kanu bou kaum jiu’vin ahi.

Ka nu le ka pa dinga laigilga somai amu masat pen lhon leh, numei changkhat kahi jeh-in; Sanatum le ahtui bangin eidem lhonin ahi. Kalhaset le kalhiso ding mong mong anom lhon pon, kamaiso anoplou thim jongle kakom’ah atouji lhonin kakipa nading abolji lhonin ahi.

Thil khat ka deichat aum le a mantam a manlhom umlou’va eiki chohpeh jengji ahi. Ka loiho boarding’ah aum sau sau tauvin; keivang ka nu le kapan eihomtho val lhonin vaikon vailhun a kamel amu lhon loule anopthei lhon lou jehin; Boarding’ah eikoi lhon pon home tuition joh eilahpeh lhonin ahi.

Hinlah, kenvang eingailutna lhon chu hethem louvin kana ki-engsahin! Ngailutnaa lethuh a akipana lhon boltah sangin, alhasetna lhon joh kahung hikha tan ahi. Ajeh chu ka damsunga amani koma uma nomsa jing din kana kigelin; kaki pasal sahin, kajing thounom jipon ahi. Kanu’n tohding eiseipeh a na katohji jongle, ka elcha-jin.. Bukong mekong pohlah lahin kalhajin, kanu toh kakina jin ahi.

Itih ahunglen in, kithopi theile kivop-pi thei ahung hidem tia eingailu ka chunnu chu akinepna loulam tahin; kakinahpi jin alhisona joh kahi tan ahi.

Class – IX kahin simtan, nungah pan pan chu kahung hitai. Gollhang kethoh honjong eihin hel pan pan tan, ahidan danin mobile in kahungboi pantai.
Jingkah nilhah mobile a kaboi jing phat chun, kanun eiphoh jin ahile; kakinahpi ji’e. Hinlah, kanun eingaiji danchu..! School kikhen a In kalhun dingchu anangahlel lhejjin, ahi. In kalhun phatle kipah tahle mailheisel’in, “boi nahung hitam?” tin, einalam tuo jin ahi.

Ken ka hetlou vanga kanu hin, aloiho achanu toh golkhat banga akivopjiu khu guhthim’a ana ochat mama jidan ahe. Keijong kanu’n loi le pai banga kivop-pi eigojin, hinlah, keivang phatchomna bei mobile a kana lunglut valjeh chun; Ka lekhasim asuhboi keu hilouvin, tuni chan na kakisih-na mangtheilou eingailu pen ka chunnu lungthim kana kasah-jin ahi.

Ka nu le kapa hi mikitah, Pathen ging a kingailutah leh vetton theitah chu ahilhon e. Kapa jong sepoy ahi vangin, khamnathei ima bollou maicham khohsah tah mikhat ahi.

Khatvei hi kaum chan valthim hitantin.! Kanu’n aw sang thim’a eipho jeh chun, kakina lhonin ahile; kanu joh lhasetah-in alhisoh tan ahi. Alhiso pumchun, kapa phone abol’in, hinlah, kapa kei chunga alunghan ding anoplou jeh chun hitijoh hin aseitai.

KANU : “Boithem pa, gelsehih behin thukhat kaseinom’e.”
KAPA : “Boithem nu, tuni chana naseiho kadana um kha em? Ipi ham seiyin kiphatlam angai poi.”
KANU : “Heu, numei lunglhom kahin hungmoh ham ham ding kahi. Heu mihem hinan inchen khosahna leh minung phah nadin, Sumle pai apoimo nai! Hinlah thil jousen phat aneiyin, phat jousen sum hi No..1 ahideh jipoi. Pathen lungset in chapangho jong nungah gollhang ding ahitau vin; hetna nei lou ken nakinepna bangin ana khoukhah jouhih khaleng, khonung leh neihin oimoding ahi. Itih chan meithai chaga banga hinkho kaman mandiu ham? Chate khonung ding gelnaa gamchom’a hahsa taha sumhol nahijeh in; naloi napai masanga lung genthei khannate tin, hahsatna ijat’in toh jong leng minu hinaa katoding mong ahe tin nakom’ah kanaseiji poi. Hinlah tuphat hungkipel le chapang hon kei thusei ahinlah loudiu ahitai. Hijeh chun hahlheh jongle tulai hinkho jong seithei ahitapon, Service ngain lang in’ah umkhom taleu hen phalou ham?” atitan ahi.

Kanu’n keijeh a asei ahiding chu kapan ahe jengin.
KAPA : “Henge, nao adih’e nasei kahe them’e! Kenjong kanagel jingsa ahin, upai aumlou jeha kitong nah nah ahi. Ahin tunvang dongman a penson lathei chu kahitan; kahung phatle phatah-in ngaito khom hite o! Ipi hile boithem jong khatvei nei kihoupisah temo?”

KEIMA : “Hepa,” kagahti le..!
KAPA : “Boi, na nao teni leh na nu toh nadam dam u hinam? Lekha phate’a nasim jing’u hinam?”
KEIMA : Seiding kahetlou mani’n, “henge hepa” kamoh ti tan ahi.
KAPA : “Boi, na neo laiyin, nangle na nu bou bou in’ah kana dalha jin; Nanu ana thomhao lhehin keijong kana mongmo lheh ji’e. Ahin, tun na nao teni aumtan nang jong na nu kithopi’a kivop-pi thei nahi tan, kalung among tai. Phat ong na nei seh le na nu kithopin lang, umchan khanchan thusei lasah na nu kidoh jingin khonunga nakisihlou nadin, kinah pia lhaset sah lunghan sah tiho bol hihin” tin eihil’in ahi.”

Kenvang ka lungthimin, nga dohle pha ding ipi seiya kinei ham katin ahi.
KEIMA : “Hepa, kinkhat kaneiyin ki-ol houkit taute” katin; phone kathat tai.

Insung sose kholai tongnem ati houkhu kanahi dan ahe. Ka nao te lungset ji jong helou’va kinahpi jing jeng! Kipa je helou khonung khoma ding gellou leh phat dung juiya hinkho mangthei lou angol’a ngol chu kanahin ahi.

Nikhat ka phone ahung gingin; amin ki-save lou ahijeh chun kadonpon ahile! Kalah lou beh phat chun, WhatsApp message eihin thoh-in hitin ahin seiye. “Them nahoival’e, Dp a nalim chu Korea ho kanahi sah in namin kavetle eimi nanahi chu kipa aum’e, eimi nungah hibang melhoi kamu khapoi,” ahinti chu kikipah thimdan hintin. Ama dp kavetle Kakai akitin amel ahoithim jeh chun ka reply in..

KEIMA : “Kakipah’e, heu nang koila?”
AMA : “Kei kakai kahi’e, atah behin nahoi mong mong e, them nadongma pa chu ochat aum’e” tin ahung totin ahi. Hitia nilhah seha eihin houpi jing jeh chun, kenjong akah kahle kahoupi jitan ahile akihesa kabang doh lhontan ahi. Ahungsot jep jep ma lha 4/5 lang ahunghi phat chun eihin joltan ahi. Dongma neiding kajah achan kanop kanoplou jong kaseipoi. Hinlah ahasei val jeh chun, anomdan in kaum tan ahile ama ding chun phat kahin pe jep jep tan ahi.

Aguh a dongma neidan kahi phat chun, aguh-in kaboi lheh jengtan; Ipi kabol vangin lunglutna him him kanei pon, ama bou bou kalungthim’ah aumtan ahi. Thil dang mong mong kalung alut theitapon, kalun ggel jouse kilamang abang jeng’e. Kahetlou kahin class – IX kumlhun final exam ahung-hi dohtain, lekha simlou tobangin exam kahung toutan ahi.

Aphat achang loule, kumlhing louva dongma nei akhohdan dan chu; kalung thim’ah ama jeng bou aumtan, lekha iti kasim vangin alut-thei mong mong tapon ahi. Hiche phat sunghi, chapang jong kihitalou! Pilhing tah tah jongla kihijep nailou, afarak laitah danger age tiding ahijenge. Inu/Ipan chapang hila eihil le lah kichapang nom talou, pilhing hila eihilguot le lah ima kihethem thei tah tah nailou. Khonung khoma ding ima gelsaona umlou’va eima’n pha i-sahchu aphapen dana igel laitah ahin, imajouse kimoh thanop-nop hinkho cheset bai laitah anahi dan ahi.

Koi ahi jong kahetlou, khatvei jong kamu khahlou! Alim le phone mai maiya kahet ahivang’in, kangai lheh jengtan, kamu nom ma ma jenge, hinlah eikimusah khapon, aboina ngen ngen le natohna lenthim khat neidanin akisei’jin ahi. Phone a eihoupi’a eilungset jidanho chu kagel leh keidia (Stranger) hetkhah lou ahi vangin, ka first love ahitah jeh chun kangai lheh jengtan; angol bangin kamoh tahsan tan ahi.

Part – 1, Hichan hin chai phot utin,
aban anangahkit taute. Nasim chai jeh-in kakipah-e.

©️Thangboi Haokip, 2021

Thusim hi anom lheh e nati le anoiya “LIKE” button khu meh in writer ho na support nau vin, chule seinom nanei le anoiya comments nahin bolthei u ahi.

Site nalut a notification pop up hung potji ho allowed anabol ji uvo maban a thusim thah ahung ki post teng notice namu ji diu chule. Nahon teng u le Homescreen a add un kiti aum le allow ana bol un thusimbu apps na phone a hung um ding hichu offline a jong simthei ji ahi.

Previous articleKUKI INPI MANIPUR SEISET KITETNA UM DAN HAM ?
Next articleKAN NGAI JI DAN