Home William SANGGA HINKHO-I

SANGGA HINKHO-I

68
0

Ngailut Thusim

By: William Lhonga Madrid.

william kwc writers
william kwc writers

INTRODUCTION:

Hiche thusim hi ka neolaiya kana jah thusimlui tah khat ahitan, atah ham? Ole semthu thusim ham? tivang kenjong kahe chenpoi. Thusim hi japin asim’a, nu le pa neilou Sangga hinkho mangho ngailutna inei theina diuva, jopbe theichan kahin jopbe a, phat tampi sumanga kahin jih ahi. Khomin le mimin dang hovang kahin semthu ding ahin, pasal pa minvang thusim’a kana jah banga kahin jihding ahi. Thusim simpan tau hite.

Kaboulnau Jemhoi vangkho gamnom dan chu tulaiya atepi ding gam leiset ho kavetkai jile, hitobang gamnom gamhoi kamu joupon, kavaimo hel ji in ahi. Agamnop dan chu Phailei bolnom ho dinga Phailei bolna thei mun phaicham jong aumin chule Zoulei bolnom hole changlei lhounom ho dinga jong gallang khatchu thinglhang gammang nomtah aumkit in ahi. Hijeh chun Phailei bola kihinso loi, thinglhanglou lhouva kihinso loi kaum’un, lamchom chomin louna kana tongun ahi. Thingna louna jong akimselin, thing le go jong atam lheh jengin ahi. Hiche Jemhoi gamsunga chun Changthing, Gelthing, Laithing, Sething, Molgeo, Manou, Thinggai, Sulbeng, Vangkhoh, Khoisuh, Teithing, Vongsel, Vongthing, Phanthing, Thinggi etc. thinghoi thingpha adimset in ahi. Chule gammang lah dunga theiga nehthei jong tampi aumin ahi. Gahhet thei dingho chu ahile Sohlhu, Toilheng, Jongmot, Theipangkai, Theiba, Pelte, Toiki,Theipan, Theikhongchom, Theichang, Theijon etc. Gamlah thei ajat jat aga in ahi. Chukitle go(bamboo) namkim jong aumkit in, hiche hochu ahile Mao, Gotha, Gose, Gotang, Govom, Gova, Chal etc. Agamsunga chun go ajat jat aumsoh keijin ahi. Gammang lah dunga meding jong adimset in ahi. Gahhet theiho chu ahile Ledon, Tongdon, Tingdon, Ankhapi, Mongche, Thingthu, Gotoi etc. ana tamlheh jengin ahi. Gamleng sakap gunchu hole thangkam nom ho dinga jong gamsa atamlheh jengin ahi. Hijeh chun gamlen Sakap gunchu hole thangkam jing ho chun same ana chim dan’u chu tulaiya alu dal ichimset ji bang’uva hi, ana nehchimset jiu ahi. Chule phaicham lah dunga chun vacha-neo tampi aumin, vadung tuilung hoa chun Nga, Twilung, Ai, Kaikong, Sumkong hojong anatam lheh jengin ahi. Hitobang gamhoi gampha kana toupha jeh u chun, thinglhang kho neocha kahi jeng vangun, avaicha kana um pouvin ahi. Hiti ahijeh chun inlhomcha chengkhom kahi vangun, lungmong le lhamongin kana chengkhom un ahi.

Hiche phatlaiya chun, tulai bangin khojong ana tam naipon, khokhat le khokhat kikah jong chu ana kigamlat lheh jengin ahile khochom khat a gache ding jong chu ana hahsa lheh jeng nalaiyin ahi. Chapang kahi jehchun kakhosungu jong kana khel khapon ahin, nu le pate sei danin, kakhosung’uva kon’a gallang khat chu eijatmi ho chenna gam ahi in, gallang khat chu melmate chenna gam le athanei nau mun ahikit in ahi. Keiho kho chu gamgi chinna cheng kana hiuvin ahi. Leiset chunghi chamkim louna gam ahi jeh in, idei ingai jouse vang akim dehpon, hijongle Pathen phatthei bohna gam’a cheng kahi jeh u chun, lung oiselin kana cheng khomun, nehle chah, sille chenin kana boi pouvin, kingailu tah in kana chengkhom’uvin ahi. Sunteng chapang hole tehse ho khosunga eidalha jiuvin, natong thei jouse chu vailou konin, ana che jiuvin ahi. Bolding hetlou manin Kangtalai hopou kasemuvin, pasal chapang keiho chu lamsuh dunga kana kitol jiuvin, numei chapang ho chu kang akikap jiuvin, hiti chun nomtah in kana kichem khom jiuvin ahi. Jan tengle chung Chollha vah noiya chun “lut thel thel, Japan len” tiho in, kana kichem khom jiuvin ahile anopdan chu aseije jang jong ana umpon ahi. Tunikhoa phat chesa ho kangaitoa, kagel jiteng lunghel nan kadim setjin, zaitha kanemji tan ahi. Pathen thilsem ju le va jong sim’a sim joulou alhangjol’a chun adimset in ahile ju le vaten jaila ahin oiji phat leu agamsung chu athongsoh jin ahi. Sim Ngenchal hole jaova Uleng ho ahung ham jiphat leu, lunghel aum dehset jin ahi. Sunteng khosunga athipji jehchun, Va-ah te le mubu hon ahcha te mat dingin ahung hol jiuvin, khopam lah dunga Sangthing chunga chun atou jiuvin ahi. Chuteng chapang keihon Ahchate chu kahoupi jiuvin, zaila in ka oijun “Ah, aw kisel kisel, mun navel navel, thingko noi songko noiyin kisel’o” tin, Ahchate chu kahoupi jiuvin ahi.

Kagal lang’uva melmate toh kana kigamgit nauva chun Vadung twilong ana umin, hiche Vadung chu achuh akhal’a long jing jeng ahijeh chun, Guitanlou Vadung tin kana minvo un ahi. Chubang gamhoi gampha kana toupha jeh u chun, melma ten kagam’u chu ana velel lheh jengun, ipi kibolle akilah peh theidem? tichu ana ngaito jingun ahi. Ahin, keihon melmate lungthim chu kana hepha pouvin, hijeh chun lungmong tah in kana um’un ahi. Nikhat hi, kidang tah in melma ten lekha thot khat eihin peuvin, hiche lekha thot a chun hiti hin thucheng akijih in ahi. “Jingle koima khosung dalhaa, nana potdot theilou diu ahi. Kho le veng kinaichaa chengkhom ihi jeh un, kimelhet to gomin, ankong sohkhom na jong neikhom ding lung kagel’uve. Gamgi ho semtoh ding jong pha kasaove. Hijeh chun koima ana potdoh hih-un. Nidan ijatle kahunglhun thei diu ham? tivang keihon jong kasei thei pouvin, hijongle thon louva kahung tei teidiu ahi. Khat le khat kingailu utin, ikihetsah bang’uva umcheh dingin jong kigong cheh u hite.” Hiti hin thu eihin thot un ahile keiho ding chun lungkham aum lheh jengtan ahi. Ajehchu masanga bon imacha hin seikhalou uva, tua hitia lekha thot eihin peh jengu chu keiho dinga lungkham louthei chu ahipoi. Ahin, hiche khanglaiya chu gal le tol kiti kiseikha nailou ahi kit jehchun, thilse ahung vailhung ding vang ana kitahsan pon ahi. Hijeh chun amaho sei banga um jengdin kaki phatsah tau un ahi.

Jingkho ahungvah in, Haosapu Semang pan kholhang ahin samin “Khosung mipi tuni koima khosung dalhaa, ipotdoh theilou diu ahi. Mi hungding ahi jeh a, khosungmi kimdel’a ium cheh diu ahi. Ankong sokhom na jong umding ahin, hijeh chun Pate hon chempong hin kichoiyun lang, sabol dingin hung kigo cheh uvin. Chule Nute hojong buhon twikhai dinga kinganse nahi jeh un, agang lamin hung cheh din kigouvin. Koitobang thu kisei nahsah moa koiya, khosunga kona potdoh aum khahleh, Haosapun achungthu atanding ahi.” tin kholhang ahin samin ahi. Hijeh chun keihon jong an kaki hon loiyun, an kama neh tau un ahi. An kaneh jouvun, ka Chunnu le kajopa chu milah a an sem’a pang dingin, aki gongdoh lhontan ahi. Chuin kanao Kimbem chu kapuiyin, kalengol cheng toh kaki chem khom kit tauve. Sunkim geijin jong kamingah hou ahunglhung deh pouvin, hijeh chun ka Chunnu koma kache in, ajah-a
KEI: “Henu, kanao Kimbem to vacha thang kakam ho, kagavet lhon dihe. Neisol lhon’o”.
CHUNNU: “Boi, min potdoh louding seiya, napot doh lhonle phading hinam?”
KEI: “Henu, kathangkam’a vacha ana oh khale, uiding hichula. Kahung kile vah lhon ding ahi.”
CHUNNU: “Boi, napa koma gaseiyo. Napa in naphatsah lhonle bou che lhonin.”

Chuin keijong ka Jopa koma kache kit in, ajah a
KEI: “Hepa, vacha thang kakam ho, kanao to kaga vet vah lhon dihe.”
JOPA: “Boi, potdoh da lhon jengo. Imingah hou itih phatle hung diuham? Hetthei ahilou toh injole, napotdoh kah lhonin hung vailhung kha leu, mi ichung’uva lunghang kit diu ahi.”
KEI: “Hepa, thanga vacha ohle, ana monding ahi e. Naicha ahibouve hepa. Neisol lhonno. Kahung kile vah jet lhon ding ahi.”
JOPA: “Boi, ahile che lhonin lang, hung kino lhon ta o? Injole hung vaigei kha lhon le chun, Haosa ho ichung’uva lunghang kitdiu ahi” eitin, chuin kenjong kapa jah a kaseiyin
KEI: “Henge hepa, hung umsot lhon pong’e. Ahile hepa kache lhon’e” katin, kanao Kimbem khut chu banjet in katuh in, kathangkam na munlang chu kajon lhon tan ahi.

Kache kache lhonin ahile Thingponse phung noiya gam-Vapal thang kakam hoa chun gam-Vapal tampi ana oh-in ahi. Hichun keini jong kakipah lheh jeng lhonin ahi. Thanga gam-Vapal oh ho chu kasut lham loijin, athah a kakam phat kit jouvin, keini jong kache kit lhonin mechangthang kakam ho chu kagave kit lhonin ahi. Gal’a pat a ka mechangthang kama Ahpa oh a, akitom tom chu kamun ahile kakipah valin, thangmun lang chu kadel loitan ahi. Vangset umtah in thingkul hem khat a, kangalpeng katat in ahile akhupbo set in, tolse nan kaki-nei jengin ahi. Kangalpeng kata kohnaa, thisan aha lonval jeh in, chapang lunggel’a chun kichatnan kadimin, ka kap kaptan ahi. Chuin kanaonu in eihin del loiyin, thingna louna ho chu anoi pen’in, katina maha hoa chun eibeh peh in ahi. Ipi einupeh vangin thisan long chu akang theipon ahile katha alhomin, kalung jong avai doh leo jengin ahi. Thodoh loiya inlanga kinungle kit ding kanop vangin, kaki suhkhah na maha ho kathoh lel val jehchun, lamjong jot thei louvin, kalhuh namun na chun kamoh touden tan ahi. Chuin kanaonu in kajah a aseiyin,
KIMBEM: “heu, kino tango. Ivai geitai.”
KEI: “Boi, nang ana che jengo. Keivang lam jong kajot ngap tapoi.”
KIMBEM: “Heu, kachanga cheding kakicha e. Inlanga kinungle loi hite.”
KEI: “Boi, nang che in lang, hepa ga kouvo. Hepa in eihung poh loule, lamjong kajot thei tapoi” katin ahile kanaonu chu achanga cheding akichat jehchun, thipchet in aumtan ahi. Akichat jeh a, athipchet ahi chu kenjong kahethem’in, hijeh chun ima kaseibe tapoi.

Nila lhum paiding ahi jengtan ahin, kakisuh khahna maha kathoh lelval jehchun lamjong kajot theipon ahile kahinkho chu ahahsa lheh jengin ahi. Chuin kanaonu koma “Boi, mol khat neihin lah peh o. Tenggol’in kiphunge. Achuti loule, muikho thim paiding ahitai” katin ahile kanaonu in mol khat eihin lahpeh in, chuin kenjong tenggol kahin kiphu in, thanga oh Vacha ho chu kahin po lhonin, ol olin inlang kahin nung jot lhon tan ahi. Kakisuh khahna maha kathoh lel jehchun, kahat theipon ahile vaigei tah in, kakhosungu chu kaga vahlut lhonin ahi. Vo henu, ipi vanga kanei lhon ham? Kajanmang dinga jong kadeilou, kakhosung mite thilong chu ana akijam chap jengin ahile lunggel thangvang sanga lai alengin, lungsung thimpi bangin ajing jengin ahi. Chuin mitlhi long pumin kanu le kapa kahol lele in ahile aning langkhat a chun ana jalkhom lhonin, tongdon thei hilou khulsin mel’in eina lamto lhon tan ahi.

Kaginchat phahlou laitah le kagel phahlou laitah a Chun le Jo, chule khosung miten khulsin mela eina lamto jengu chu lunggel ahah in, ana ngeiye. Van kavetle asangin, Lei kavetle anemin ahile lunggel jeng jong nei thei louvin, angol bangin kaum tan ahi. Ka Chun le Jo longdamsa chunga chun sennao bangin kakap in, “Henu le Hepa, ibola neina dalhah lhon jeng ham? Nacha nanao Kimbem le ken, koi henu hepa tia kakou lhon ding hitam? Nangni jao louva, ipi kati lhon ding hitam? Ipi kaneh lhona, iti kaki hinso lhon ding hitam? Aw hitobang thilsoh hi, kajanmang dingin jong kadei poi. Ipi jeh a, hitobang thilsoh hi hung lhunga, hibanga nat nahi hung vailhung jeng ham? Keini jong neipui lhon’o. Aw Sangga Hinkho mang dinga laitan kahi jenghi, geldan kathem pon, kasangpha jou poi. Koiham ka Chunnu le ka Jopa thisan so hi? Koijat koinam nahiu ham? Kahung khanlet phatle, phuba kalah thou thouding ahi.” katin, kaplai bangmon sennao bangin kakap kap tan ahi. Lunglai geltwi bang avot in, hinkho jong athisa tobang ahi jengtai. Kanaonu Kimbem kavetle, akaje a ije jong hethei louvin, tijat lungdon nan adimin, abangle kei eiven, abangle kanu le kapa longdamsa chu aven, abang komle khosungmi longdamsa ho chu ave kit in, lungdong tah in aumin ahi. Keijong kumget bep kahi nalai jehchun, kamalam khankho ding kagelle, thimpi meipi ajingin, lungdon khoisat nan kadimset jengin ahi.

Kaka kanan kamit kamai apomsoh jengin ahile kachol lheh jengtan ahi. Chomlou kah in muikho jong ahung thim paitan ahi. Chuin kanao Kimbem kakouvin, “Boi, hungo henu le hepa kikah in tujan kicholdo hite. Boi veta, henu le hepa hi athi hilhon tachu. Tujan bou akom lhona, icholdo theiding ahitai. Hungin boi, ichol valtai. Ihmu tai hite” katin, kanaonu sam chu kajut peh in ahile chomlou kah in, a ihmu tan ahi. Keivang maimit jeng jong sing thei louvin kaumin, kalunggel sanval jeh a, angoldoh paiding kahi jengtai. Jankho asot tah jeh in, ju le va ham ho jong athip jou tau un ahile thilong lah a, kachangseh a kamit kahah chu kichat aum lheh jengin ahi. Kakichat val jeh in kamit jong kahah doh ngam tapon, hijeh chun kamit kasingin ahi. Kamit kasin jeng vangin ka-ihmu thei dehpon ahile kalunggel chu agenthei lheh jengin ahi. Kachang changin kaki lhemin, “lonlhi pum’a maimit sinding hah lheh jongle, maimit sing ing ting, samang jal tange. Jankho asot tah jeh in, keidin kichat tijat aum valtai” katin, kei le kei ihmu dingin kaki solin, kamit kasingin chatloh loubeh in kaum tan ahi. Kacholval behseh jehchun kahetlou kah in, kana ihmu miltan ahi.

Aban jingle sim kit tau hite. Lunglut tah a, simjouse chunga kipathu kaseiyin, Pathenin phatthei naboh cheh tauhen. Kakipah e.

Thusim hi anom lheh e nati le anoiya “LIKE” button khu meh in writer ho na support nau vin, chule seinom nanei le anoiya comments nahin bolthei u ahi.

Site nalut a notification pop up hung potji ho allowed anabol ji uvo maban a thusim thah ahung ki post teng notice namu ji diu chule Bell button a subscribe kiti chu meh un.

Previous articleFOOTBALLER KAHUNG HI TENG-II
Next articleIDEI DEI NEISANG A I NEINEI DEI JOH DING AHI

LEAVE A REPLY

Please enter your comment!
Please enter your name here