Thusim Lui
BY: Smartmyn Doungel
Masang laijin, Chaga gollhang khat ana um min, ahi. amahi insung khat nin achang seh in achengin hiti chun thinglhang lei abollin , gen ngaitah in na atong ngin ahi.
Hiti chun alou tolanga thang akam jin, jule va apoh hochu, a insah a inlhang ho toh kilung to tah in anekhom jin ahi.
Nikhat hi athang kam aga ve kit tan ahile, vangphat umtah in, sakhi khat ana oh tan, ahin pon, akho avengho akhom min, sakhi chu aki hon taovin,ahi.
Hinla sa semma panghon, amal khat, chang khat pu ding chun akoi doh peh taovin ahi.
Hiti chun, sakhi mal chu changkhat pun, kihon ta louvin, jalchunga amoh pheh tan, ahi.
Angai bangin, changkhat pun jong hiti chun na atong jingin, kiseh tah in na atong jingtan, bule me jong kihon manlou ,insung jong theh manlou, kongle bel jong hetup manlou, jen nin, lou na atong ngin ahi.
Hiti a aum jing laihin, nilhah khat vai ahung lhung tan ahile, ain sung chu ana kihetup chet jengtan, kongle bel jong ana kisu ngim seltan, avon hojong thengset nin ana kisop ngim min ana kilhep tup chet2 jengtan, ahi. bubel mebel agah hondoh le amin san ana umkit tan, aman jong ageltan, aw ka insah ka inlhang ho eingai lukhat touvin eina bol peh hinte atin, lungmong selle kipah tah in, aumtan, an chu vaset nin anen,
aneh jouphat nin kholai aga leng tan, khoto apat khonah geijin, ahin chon tou peh in, tuni ka in neihe ngim peh uvem tin adong le tan, hinla koiman, kei kahi ti aumta pon ahi.
kei kahije timalah in, hibang kaboijin etih kah a nang in kahe ngim ma na bukahon dingham….keija bon ki2 bolman lou tin ana don but soh taove.
Hiti chun in ahung kinung lekit nin, ajing kho ahung vah phat nin, angai bangin, lou akon kit tai.
Nilhah vai ahung lhun kit le, atuibel jouse tui dimset setnin ana kitung un, thing jong tampi athing hon na ana umbe kit tan ahi.
gollhang pan jong koijong ahita dem hiti a eingai lu kadoh jousen la keikahije ti aumpon, tin alung dong lheh jeng tai.
hichun a insah te aga dong kit tan ahile, a insah nun, tuni chun , sun nin na insunga mikhat apoh lah2 in keichun nang nahi ham katin kaga vepon donle daijin jong kanei poi anati peh kit tai.
aman jong alung agel pantan, keila migen thei michaga , sille chen neh le chah jong mibanga neijou kahipon, kalim le mella koidei chat thei jong kahipon, hiti a eigah ngailu thei la khosung mi aumkit pon, tin alung agel gel jengtai.
Hiti chun jingkho ahung vah kit tan ahile, ama jong nidang bangin , loukon din ahung kigo doh kit tan, khomol agei phat nin agah tuh san, chom khat aki tha ollin thinglim noija atoutai.
Alung ahin gelpan tan, tuni vang hiti a eiki thopi hi kamat doh tei2 got ding ahi atin, loulang nga chepai talouvin, inlam joh a ahung kinung letan, kunjih in akisel lin, bang ongkah in, insung chu avelhi tan ahi.
Hita khosung mi te jouse vai ahungkon thip soh phat nuchun, jal/gaplheng chunga kipheh go sakhi mal chu , ahung kumlha tan, nungah melhoi tah khat ahung soh tan ahi.
Hichun asam saopi tah akong gei phajeng asam kikap jangpet chu, samthi alan akipojol sellin, thao akinun, aki sep tup chet jouphat nin, muntheh akilah in a insung chu ahin theh pan tan ahi.
Numei nuchu ahung paotan, kaden insung jonghi eti etheh vangin angim jouhih beh e….chapang lhat na abange tin…insung ahetup tuplai tah in,
changkhat pun jong hichi hiba hiveh ta ong atin, kot ahong ngin achop le amat atho jengtan ahile…numei nun jong neilhan neilhan ati vangin, pasalpan, lha ponge , neiki chen pin tin aseitai.
hichun numei nun jong,
nahin kichen pi jong le nikho khat le, chi sakhimal neihin tiding kahe masa e ati peh tai.
hichun golhang pan jong tiponge ati phat nin, numei nun jong chang khat puchu aki chen pitai.
Amani ahung kichen na kipat nin, ani anin a inchen hon akhang tou jing tan ahi.
sel le loi, uile kel, uicha , vohcha , ahcha avah hon nin, ani nin apung tul2 jengtan ahi.
hiti chun alou bol hon jong gajouse aphan, kumdang sang2 ngin, gasoh ahoijon, ahao lheh jenglhon tan ahi.
hiti chun kumle lha ahung chal jingin ahile, kho sunga ding chun mihao sapen ahung soh doh hon tan, ahi.
anei agouhon pun jingto lhon nin, chapa melhoi sel ni jong anei hon tan ahi.
Hiti a ahung haoval phat nuchun, changkhat pun jong masang lai agenthei laini hin kho asumil doh tan, ahung kam nom pan tan ahi.
Hiti chun junom sanom ahin nepan tan, inlang lou lang jong hepha talou,
a insung le, aji acha teni geijin asumil tan, som aleng ngin, ju akibuh in nungah ho phei chung akikhap min, hapta khat cheng inle lou don louvin hinkho amang tan ahi.
Hiti a hinkho ahin man jing phat nin, ajinu jong acha pa alenjo pa akou vin, Boi chenlang napa gakou tem min, kanun hungin ati e gatin atile…achapa jong achen..ahile apa ju anakham tan nungah ho phei chung ana kikhap min ahi. chapang pan jong , hepa in na hungo kanun eihung kousah ahije atile, apan jong, chedoh….chi sakhi mal tenu cha ho , ana kitung thim mun ahinti peh tai.
chapang pa jong lhase tah in , ahung kinung letan, a nun boi , napan epi aseijem atile…achapa jong achih thei tah jeh chun…apa thusei chu a imtan…heno , kapan ol leh hungtange ati atipeh tai.
Hichun, anun, aneojo pa akouvin asolkit tan ahile..
apan asei ngai bangin ahin don but kit tan…in ahung lhun phat nin, anun ana dongkit tan,…Boi napan epi aseijem atile…heno kapan na…agah tile…a upan ahin mit lhep tan ahile…anaopan asei ngam tapon…hichun anun jong adong kit nin…boi…seita2 atile…hichun kapan na sakhi malte nucha anaki tung thim mun ati e…ati phat nin…anu jong alung na beh set jengin…kagin chat peh2 ahije atin…alungsat chutoh ahile, insunga aki dung pei akivai peitan ahile, changpang, akho muh a atat khatan…achang pangu amang del tai.
hichun insah inmai ja alhai to in kanei kagou jouse manghen ati le…anei agoujouseo sel le loi gancha jouse amang tan…a in jong malai a in bang2 asoh tan…khosung vengsung jong angai bang2 asoh kit tan akam veh jengtai.
Hichun anun jong acha teni kom ma tunia napa hi edalhah dio tai atile…achapa alenpan…heno kapa kalung asevalle hiti a hinkho aman ding kave joupoi ati phat nin…chuta napa nalungset le atin…sakhi malkhat da lhah peh kit naote atin..achateni chu sakhi aso sah tan ahi.
Hichun , anun aseijin kachop chop na a nahung chop hon ding , kamei nahin kituh hon ding ahi tin…amei chu achapa atuh chah sah in eti jong le nalha so louding nalha pou2 le nathi jengding ahi tin asei peh tai.
a lenpa mei chu aneopa atuh sah in hiti chun ahung chom pan taovin ahile, anu chu, kollah mumlah a asuh chop atouchop jengtan ahile…aneo penpan atuh jouta pon a upa meichu alha le athilo tai.
Hichun anu chu achop na jouse a achapan ajuitan ahile…khosung len tah khat aga chom lut hon tan…anun jong boi nei ngai lut le kasei sei bollin atipeh tai.
Hichun achapan epiham heno atile…tun keima hi neithat nin lang…kathi san kagil ho invel la hin thethang ngin…chule katah sahi sem chen2 nin lang khosunga injouse a hin , inkhat na phekhat cheh galeh lut nin…chujou teng phe thum lan lang…jalla pheh in ati peh tai.
Hichun achapan anu tha ding chu agelle agelthei tapon hinla akitep nasa ahi jeh chun, anun asei bangin , anu chu athat tan…agil , asung , chule athisan jouse, invella aga thethang deh in, atah
sa chu anun ahil bang2 ngin asem tel2 lin khosunga injouse chun phe khat2 agasep lut peh in ajonan phe thum chu anun ahil na bang2 ngin gaplheng a aga pheh tan ahi.
achapa jong anu atha chu a gel2 le akisih beh set jengin aka kale ana kap emutan…a emut lan kah in anu thisan, agil , asung, in vella athe thang jouse chu, ganhing ahung soh un, in velchu, sel le loi , ahcha, voh cha, adim thethu jeng tan…in khat na anu phe aga selut jouse chu mihem ahung soh un…in jousen mi ahung umtan…gaplheng/jal chunga anu phe apheh chu anu le nungah hoitah khat chule anao pa ahung soh un ahi.
Jingkho ahung vah tan ahile…a emupa jong ahung khang tan amit ahung hadoh le..lupna nomtah chunga ana lumtan, aking dot jengin ahung kitho doh le inthupi tah khat sung ana hitai. lungdong tah a aumlaijin anu ahungin boi lung dong hih in tunia hi hichi khopi sunga nang ma haosa na pan ding kei nanu , hichi khu ven nanao pa , hichi khu na ji ding, tin inmaija ahin pui doh in, sel le loi, bong ho avet sah in, ven kathisan ho invella nathe thang hochu hichi ho khu ahitai ati.
chule ven, hichi khopi lentah sunga injouse khu nakho chaga hiding ahitai atin, akhopi sung chu vet chil na din, saipi chunga anutoh, ajiding nutoh , anaopa toh atoudoh un , kho to apat akipan nun ahin chon tou peh taovin ahile, inkhat ahin phah chan nun, alha lhonan sa athapeh un ani chon sah peh un ahile, khosung vei khat avel chaiju chu, kum thum alut man nin, a in nu ahin phah leo kum thum ana che man tan, akhopi sung avel kah u, in ahung nung lhun kah un, chapa ni anei manin hiti chun loupi tah le nom tah in akho satao ve.
Alangkhat na, apao, changkhat pu ada lhah pao chu, ajukham na akon ahung lim don tan, nungah phei aki khap chu agah vet le, chang long tum anahitai.
Hichun, a inlam jon na ahung le, a injong anase deh duh jengtan,
hitah chun , aji achate ana houna ho ahin ban geldoh tan, aji achaten ana dalhah tah u ahet vangin amadin phat jouse ana che mangsoh tai.
Hichun , insung agah valut le, gaplheng chunga Sakhimal kikhai khat ahin mutan, sakhi mal chu atuh a aka ka jeng le…ana emumil tan…jankhang kim don nin, hichi sakhimal chu,…tehsepi kongkon bet khat ahung kisoh in,
genthei tah in chang khat puchu toh acheng khom hontan ahi.
Moral:
Lalngailou lal anai
Hichi thusim ma kon emu doh uchu ahile, koihita le, mikhat chu, haosa jing lou ding, khat jong chu vaijing louding ahije.
Migenthei khat chu ahinkho ahung kile doh phat teng le etabang mi anahiham ti asumil ji taovin, anompao vun, kho ahe jita pouve.
Hijeh chun , Ehi thei lainikho, ehaosat lainikho teng le, masanga etabang mi kahiham eti hinkho kana man na hichan kahung geiham…tihi suhmil loudin kanam mite kahin tem muve.
kakipah e.
keima , smartmyn Doungel in hichi thusim hi keima het dan2 na kahin sut ahin, nangho het to akito lou jong le eina hethem maijun.
THE END
