~Story By
Nick Hangshing~
Masang lai achun khosung khat ahin nungah melhoi tah khat hi ana um in ahi. Hichi nungah nuchu amel hoidan leh aphat dan chu akhosung in ana kithang in ahi. Ahin amahi nule pa neilou chaga ahijeh chun aneo apat in nehleh chah kihol thu in gam ah ana kon ji in ahi. Chuleh chaga ahijeh chun khosunga ma tabang chaga leh migen theiho chu ana ngailu in ana kitho p jing in ahi. Nikhat hi ama jong mae ho a achi ngai bang a gamlah a mahol a achi kit tan ahi. Hichi nichun nidang toh bang talou in amehol namun achun mae ana um tapo ahi. Ama jong ahol lou leh aneh lou d ahijeh chun, mehol ding in achi gamlhatan ahi. Achi2 leh amajong nisa sat toh adang ahung chah in atui kipoh jong abei tah jeh chun, galah dunga tuisam put don thei chu ahin hol peh tan ahi. Hiti chun mae hol toh don ding tui hol tokop in gamlah achun avah le2 in ahileh, mun khat achun mae ajat aga kimu doh tan ahi.
Aman jong mae hochu ahin ban kilo pan tan ahileh, agal lama munkhat achun tui kivei khat amu tan ahi. Hichun ama jong tui kivei nalang chun, adang chah wal jeh chun tui don ding chu achi phei tan ahi. Hichun ama jong amun alhun2 chun tuichu adon wa set in chuleh lampi kah a adon ding injong athui poh na achun ahin kithal dim set tan ahi. Hichun aman jong tui adon chai2 hun a chun mae chu aga kilo kit tan ahi. Chom loukah in hetman lou in nisa ahung lhum tan ahi. Aman jng kho thim lhah masang a inn lhun tei d agot jeh in, innlam achun akile pai2 tan ahi. Ama jong inn aga lhun leh kho jong athim lha paitan ahi. Ama jong aki sutheng pai2 in bu leh nae ahin kihon pai2 tan ahi. Bu amin2 chun neh ding atia e t aneh wang achun asunga alut but mong2 tapon, bu chu adu thei mong2 tapon ahi.
Ama jng agil akel lheh wang chun bu neta lou in, jaan leh agin ahung kel khat le tin, nilhah lam a nehding in akikoi tan ahi. Agel bang chun nilhah lang ahin agil ahung kel tahbeh tan ahi, hichi agil ahung kel tah a vang chun bu jong adu cha tapon ahi. Duchat khat anei in ahin adu chat chu asei doh thei tapon ahi. Hiti chun khovah gei gil kel thoh in aum tan ahi. Jingkah kho ahung vah2 changa um ahijeh chun ainn kom ten saa akitha got jeh uchun nehkhom p ding in ahung kou taou un ahi. Amajong an nedinga akou jeh uchun akitho pi ding in achi tan ahi. Ainn kom te chun ahcha lentah khat tha ding ati uvin, achapa uchun ahchal khat ahin khai doh in, alol asan tan p in ahileh, hichi ahcha athi chu numei nu kam sunga chun alut tan ahi.. numei nun jong set lhah ding ati leh akam a chun thisan du na ahin neitan ahi. Hichun achapa innsunga tuisa dom a alut kah chun, numei nu jong kitim jou lou in ahcha alol akon a hunglong doh thisan chu achop tan ahi.
Inn neite chapa chu ahungdoh masang in amuh ho akisuh theng tan ahi. Hichun saa chu asem khom hon in, bu aneh uva chun jong bu nelou in saa bou chu ane tan ahi. Ama jong an aneh chai2 a innlang akile achun aum chan chu akigel leh ama le ama jong aki dat mo tan ahi. Hichun atha ahung chol in ama jing lup na achun akimoh jam2 leh ana emu lhutan ahi. Hichi amang achu pusal thum hi ahung in gamlah a alo mae toh tui chu amaho a dan in asei in, hichi chu seilou a adon leh akilo jeh in, bule mae nethei talou ding, amihem hina mang louding ahiwang a saa hing leh thisan a bou kivah ding in agao sap khum uchu ahin seipih tao un ahi. Chuleh amahon aseibe na achun, hichi agaosap naochu alungset pen leh a itt pen kha thisan achop kang teng lebou mang ding injong asei p tao un ahi. Hichun ama jong ahung khah2 chun amang tochn aum chan chu agel leh atah hiding in ahin gingmo tan ahi.
Hichi nilhah chu angai bang in bule mae akihon in ane kit gan ahi, ahiwang in nilhah masa a bang chun ane lut but mong2 tapon ahi. Hichi phat chun ama jong gilkel thoh jou talou in, ainn kom te u ahcha chu alot apet tan in athi achop in asa jong ane chai kei tan ahi. Hiti chun nilhah seh leh abol num lou wang in, agil kel kitim jou ji talou in mi ahcha chu aguji in hiti chun aki vah va jitan ahi. Chuleh koiman amat doh nalou ding in amul ho phata avui ji in ahi. Phat ahung chi2 leh ahcha ho abou ava joujilou phat in, gamleng a chi ho chu guhthim in anung ajui jin, saa akap ji jou chu amahon akilah masang un, numei nuchun aki kai mang thu2 jitan ahi. Hitia gamsa a ahung kivah phat chun atha jong ahat cheh2 tan ahin. Atha ahung hat ngal tah achun gamsakap ho nung jui talou in ama in saa akimat tho jitan ahi.
Nikhat hi hichi nungah nun jong saa achan ngai bang in saa ahin chang kit tan ahi, sot p achan wang in gamsaa khat cha amu tapon ahi. Hichi pet tah chun nanglah khat hi ahung chat poh lah2 in ahi, aman jong gamsa hiding in aging mo in, ahung doh2 leh bokhum a pe lih pai2 ding in akigotan ahi. Ahin ahung doh leh ama ginchat toh bang lou in chapang khat vacha kap a hung khat jo ahin ahi. Hichun aman jong chapang pa keng chu avet leh ling akichot khah na a athi ahung doh leh, thisan nam chu aja tan ahi. Hichun aman jng chapang pa chu akou in, lou a kimang nado khat chu anui in chapang pa thisan chu asuh theng pih in lou chu abeh p tan ahi. Hichun chapang pa kihei mang2 achun akhut a athi mat chu aleh in ahileh, mihem thisan tui dan chu ahin hetan ahi. Hichun chapang pachu ahin velel tan ahi. Ahin mihem atoh khah num lou jeh chun akitim in chapang pa chu inn lam a asol tan ahi.
Hichi nia pat achun mihem thisan tuinaleh duchat na ahin neipan tan ahi. Hichi jeh chun amajong agil kel masang in khosung dalhan gamlah langa saa man ding in akal tou jitan ahi. Nikhat hi saa achan na in mi pen khat ahin jan ahi. Aman jong mipen gin ajah nalang chun achi in ahileh pusal khat kol a ana kileh lha in, akeng aki suh boh chu amu tan ahi. Hichun numei nun jong pusal pa um nalang chu adel phei in pusal pa chu aga kithopi tan ahi. Hichun numei nun jong pusal pa kom a chun a inn adong in ahileh pusal pan jng ainn chu asei pih phat in numei nun jong pusal pa chu apoh in a inn gei aga thah tan ahi. Inn alhun hon phat achun pusal pan agel leh numei nu jong lel lou a inn gei apoh lhung chu pusal pan jng adat mo lheh in ahin ema vang asei pon ahi.
Numei nun jong pusal pa inn chu avet leh thil ho chu acheh lah2 in, hichun a inn kote adoh leh, innsung mi neilou, achanga um ahidan jong ahin seipih tan ahi. Hichun numei nun jng ama tabang a chaga ahi ahet chun alungset najong asang lheh tan ahi. Chuin numei nun jong changa um ahijeh a akeng boh toh ema abol thei lou d jeh chun akeng dam tokah a din pusal pachu aum pitan ahi. Aum khom sung lhon achun numei nuhin ama dinga bu akihon kop jipon ahi. Ahin amahin gamlah a gamsa ho aga nejin ahi. Ahin pusal pan wang a inn langa aga neh ji in agel in ema khoh ana sabeh pon ahi. Hitia numei nun pusal pa sun nilhum a abuipi jing chu pusal pan agel leh alungset na ahung kipan tan ahi. Hitia aum khom lhon sung chun ahung kingai doh lhon in pusal pa akeng ahung dam2 chun ama ni jong aki cheng pai2 hun tan ahi.
Hitia aki chen jou lhon achun amani jong gamlah ahin mae hol a achi ji lhon in ahi. Maehol a achi seh hun leh numei nuhin saa ahin man2 jeng ji in, pusal pan jong adoh leh thang akam a athang kam na a oh bang jn asei pih jin ahi. Nikhat hi pusal pahin adam mo jeh hin apot thei lhon tapon, numeinu jong pusal pa dam lou jeh chu neh hol dingin apot thei tapon ahi. Hichi nilhah chun numei nun jong pusal pachu bu ho aneh doh sah in akichol sah tan ahi. Chom khat jouin ama jong agil ahung kel tan, gamlah a saahol a chi ding la pusalpa damlou toh, hung khang leh ahol mo d jeh in achi num tapon ahi. Ahin achai2 nan agil kel chu athoh joulou phat chun, a vohcha vah hun chu numei nun athat in, athi achopkang set in asa jong ana netan ahi.
Ajing jingkah a pusalpa ahung tho leh ajinu muh a thisan mat chu amutan ahi. Aman jong ema a gel lou in apot pai2 tan ahileh avohcha vah lhon chu athisa ana um a asa jong ana kine chu amutan ahi. Hichi amu2 chun ajinu muh a thisan mat tochun, ajinu um chan dan ho chu agel2 leh ajinun atha hiding in ahin ging mo tan ahi. Hichun ajinu jong ahung thoupai2 tan, ahung tho2 chun ajipa avoh cha kul kom a ana din chu amutan ahi. Hichun ajipan jong ajinu kom a chu, e p nahi ham tin adong tan ahi. Hichi pet tahchun numeinun jong seidi ahetapon ahi. Ajeh chu aman agel a chun asei doh pou2 leh ajipan akhen ding chu akichat p tan ahi.
Ahin seilou jijong ahithei louphat chun ajipa kom achun maehol a achi na ah atui don holeh, a maelo ho thu tochun, amanga pusal thum hung a hitia gaosap na achan hochun ahin seipih tan ahi. Ahin numei nun agel tobang lou in pusal pan numeinu kom achun hiti chu ahileh nasei wah mo ham, chuti hileh saa nakap p ingtin, inna num tah in nenan nate. Gamlah a nachi2 angai tapoi atin, niseh in ajipan ajinu neh ding gamsa kap in achi ji tan ahi. Hitia niseh gamsa ahin poh jing chu akhomiten amu jing uvin, hichun golhang pa kom achun niseh a saa akap khu e tih2 kah a naneh jou ji ham tin adong tao un ahi. Golhang pan jong alep in ajinu inn kote jong athot jidan in asei in ahi. Hichun golhang pan jong khosunga achen sot theilou ding ahet phat in, nilhah ma2 in ajinu akipui in gamlah lang chun apui in, gam mng lah achun achen khom pi tan ahi.
Hitia saa atha2 hun phat chun saa jong alhom cheh2 tan.. numei nujong atam jon ema nelou in aun jitan ahi. Pusal pan jong saa e t achan wang in gamsa aum mong2 lou phat in ajinu jong gilkel wal jeh in atahsa jouse chu ana in, asung jong meiam sat in asa jeng tan ahi. Hichun ajipan ajinu um chan avet joulou phat in ajinu kom a chun hichi nagao sap naohi aphat nathei lampi umlou ham tin adong tan ahileh, ajinun jong ema seilou in athip beh jeng tan ahi. Ajipan jong adoh2 phat chun aman jong amanga hung mithum ho sei bang2 chun, kalungset pen leh ka itt pen thisan kachop kang a asa kaneh lebou kadam doh thei ding ahi tin ahin seipih tan ahi. Pusal pan jong ajinu dinga alungset pen leh a itt pen ama tailou koima dang aum lou chu ahet jeh chun, ajinu umchan chu avet leh athoh joulou phat chun, ajinu dam doh nadi leh ajinu gaosap na akon a akilhap nadin ama le ama akipe doh tan ahi. Ahin ajinun jong alungset wal jeh chun ana nup p tapon ahi. Alang khat a ajipan ajinu chu avet leh gilkel wal a thipai ding ahi ahet phat in, ajinu kom a kathi jouphat leh kathi dong inlang, katah sa ne inlang ng ma kihuh hing tan atin, ajinun jng ema asei masang in akom a chem chu ala in ama le ama alol aki aat tan ahi. Numei nun jong ama gaosap najeh a ajipa athilo chu avet leh apo naval in, alungset khat thisan don a atah sa nehmang sang in atin, ama jong atahsa chunga anat nachu athoh in, athoh joulou phat in ama jong athi pai2 tan ahin.
~BEITA~
