REIGN OF TERROR
Story by Thangboi Lhungdim
Ka college kai lai, inn kilha ngai ma2, Oct/Nov suty lai thanom tah a inn a hinkho akimang chu. Nilhah khat gelphah lou beh in jan 2:30am don in kamit laitah toh kisuto’a torch light hattah a ahung kikho jeh in kakin khang in. Thu ihung kidong masapen chu
“koi nahim, a inn neipa nahim”_ ti ahi. Kinjong kapa asei u kahisah in, inn neipa kahipoi katileh hung potdoh tadin, kihou nading khat aum e tin room a pat thal kichoi mini chu apotdoh hon in common room lah ah chun avahle hon e. Keoseh a underwear bou a kilum ahijeh chun kalupna kom a meilhei diel khat kakichen in. Keijong bolkhel le themmo na neiloubeh kahijeh chun thingnoimi hat laitah ahivangin kicha louvin, kalupna room a pat kapotdoh leh, koi ahi kihelou amai pomvom a kitom teni chun, hung aw hilang ah khun chomkhat gakihou u hite atikit hon in. Keijong leitol a kihou ding atiu hinte tin, kho helou in kotpi a kon chun kapot doh leh achepei jel kit hon in, kavet le2 leh inn ning innkah a kipan meithal kichoi tampi ahung potdoh sou2 uvin. Keijong hampoh loubeh in innocent thet in anung hon kajontai.
Thipbeh a anung hon kijui chu houin leitol kaga phah u leh mikhat a elkalep a kisom a lum chu kamun. Jan ahijeh chun koi ahi kahe theipoi. Hinlah ahinvoh uva ahungka chun koi ahi, a awgin a konin kahedoh tan, koima dang hilou katupa anahi. Keijong lum tang ihintiu vin, isonlhu jeng tauve. Jan adaptoh vonlum khatbeh jong kikivon lou’a banian leh diel paset2 khat bou kikivon a tol dap a ilupsah jeng u chu kada lheh e. Kihou ding tia eipui u ahin, thu changkhat jong donglou in, Kachalpang le AK-47 nitah asuto uvin rifle jong chu cock abol u leh apoh chah2 in, kalunggel amangjel tai. Kamai chang chu jungle boot in malai savun football dan in deimo peh in suhpeh toupeh atho uvin. Kachungah akichom uvin, mol in katungtun le katophel jong ajep uvin. Mikhat pan rifle butt a kaluchang asuh got chu hin supei pou2 leh kathi tahbah ding anahi tai. Jungle boot a eipeh2 nauva Kamit kamai jouse chu pom a dup ahitan, khojong kamuchen thei tapoi. Kakom a katupa vang chu chapang jep ahijeh chun naokan akaplha jengin, keivang chu chubanga eipeh, eilho vang uvin kakap dih poi.
Athu umdan chu hiti hi ahi. I thingnoi hou rivalry san laitah, eimaho le eimaho galmi banga ikithim philto laitah uva. Kagangpa hi gollhang holah a ipi Secy hamkhat a anapang kha ahin. Kapute khat jong hi group khat a lamkai lang mama anapang ahi. Amani mimal hina, kitomona neokhat jong neilou ahihon e. Hinlah amaho Group rivalry jeh a chu tucha nupa jong thadinga kihol tou ahin, kagangpa chu ka inn uva umkha ding ham tia, Jankhat hi ka inn u round abol uva, khovah kon a chu kot ahinkeo u leh kanao khat jan imu thei lou chun kot anahon peh a insung jouse akhol uva. Kei kapi toh room khat a nomtah a lum chu eiginmo jeh uva eikaidoh uva hitia chu einabol u anahi ahi.
Kahung kinung lelou na, asot thim phat a kanao chun kapa imu chu athodoh a aseipeh leh, kapa chu ihol a hung ahin. Kapa jong chu akham uvin, ahutum uvin alutsah pouve. Hinlah kapa chu mihet khat influential ahijeh in, kapan navoh pao hi kachapa ahi. Idia navoh u ham ati phat a, aw nang chapa ahileh tia, eihin lhadoh u ahin, katupa vang chu akipui pei tauve. Eivoho lamkaipa chun , kapa chu koi ahi phatah a ahet ahi, jan ahitoh amai u akikan jeh uva koi ahi kihelou thu ahi.
Hicheni jan a ka inn u round hungbol lah a alamkaipa chu koima dang jong hilou keidinga kapupa mong2, kapi leh kanu nungsang te ahin. Thadia ahung hol pau jong chu koima dang hikitlou kani jipa kagang hikit ahi. Inn kalhun in eivohna hou chu kanun eijen in. Jingkah a Kapi tehse in thil umdan ho ahet phat chun lunghang mama, laina beh hitin agol samset uve.
Keijong gollhang chapang lungphing kahi jeh chun, kalung ahang maman. Lung damthei talou a, hicheho loi kaplih ding bou chu kalunga um ahitai. Chomkhat jou in Kahung damdoh tan, phulah chu keidinga akana jong umchom lou ahi kageldoh in. Kalekha sim joh kaki boipi tai. Hinlah lhaset umtah in phat chomkhat jou in. Kapupa jong athitan, kagangpa jong athitan, along beh jong tuni chan a kimulou in aumtan. A lungset tah aji teni chapang chan ameithai hon in, angailut tah achateu chaga hinkho genthei tah in amang tauvin. Igel leh lainat aum in, voujeng nat jong aum e. Aji achateu genthei tah a akhosah vang uvin, nampin kithopina siki jong ape ta pon, avangse kiti chu ahijeng tai.
Hiche hinkho avel a hung kile kit ding jong hilou, ahung peng kit ding jong kihi talou, it umtah hiche hinkho khat seh2 ineisun u, Nampi cause jong hilou, galmin eitha u jong hilou a eimaho le eimaho mohseh a ikitha uva. Hinkho mantam tah ichan uva, meithai louding ameithai a, chaga louding achagat hi pohnat umpen tah ahitai. Tua ilah uva umtalou amaho chun nampi natonga thi kahi tin kigel u jong leh. Anatoh u chu nampi natoh ham, koi natong ham? Utu pacha kithat to, tucha nupa kithat to chu nampi natoh ham, ipi natong ham tichu unanswered Q khat hi jing ahi tai.
Hiche kaseilo nahi. Vannoi a kiphinna jat chom2 lah a akhonkheh le a dongkheh a kikphinna chu meipum dop a kiphin hi ahi. Hinlah hiche adongkheh a meipum idop vang uva nampi tup le doi (target) kicheh tah hi umlou ham, ahilouleh ipiham ti ihet lou jeh uva, meipum long chun sopi ule nao adoikhah ji ahi. Amilip in nampi thu isei uva, nampi natoh itiu jong hi “ipi pen hi nampi natoh hiham” tihi review ngai ahitai. Hiche nampi target lhunna dia Political thought and ideology kibah lou jeh a lampi chomcheh juichu thilchom ahin. Hichu hilou a thil neocha2 narrow minded jeh a, phung, personal interest etc jeh a achom2 ihiu hin, hoima cha kilhung ponte.
Fictional story by: Thangboi Lhungdim
Thusimbu Machal jing thei na ding a pan lanom ho kipah tah in lem ahijing in ahi anoiya button “Click Here” khu meh utin details anasim ute.
