Rapture vision kanei dalhah a kana um

Jangmang Haokip,
Gospel thulhangsam

Hiche Rapture kamua dalhah a kana um thu masangin themkhat kana seitan miphabep a kon avel a vel a seikit dinga ngehna aum tolhonin chomchan seikit uhite.

Thumakai –
Keihi Christa a penthahna kanei nung kum 7 vel Pathen thu jenga kakimanchah nunga kanung lhah (backslide) kit a chapa vah mang pa thulem kisei banga Pathen hongsung dalha a keima nop natah a anavah mang kahi.

Hiche kava mang sung hin Pathen dei ja hinkho mang tah louva thinalam jon a kache che tah jeh in Pakai jin avel vel in nung kouna eineijin hinlah kana japha tapon ahi. Pathenin mi akou kiti hi midang dinga itabang ahidem kahepon keidingin vang nopna thu him him ana jaopoi. Bible Hebrai 12 sunga Pathen in agimbol ajep gim chu kisung se na joh ahi hinlah gimbol na jouse hi apet tah a nopna thu ahijipoi kiti khu adih lheh jenge. Keijong Pathenin einung kouna ho kajah phah tah loujeh a Rapture vision chu eimusah hinte tin kagel e.

Rapture (mitheng kilhendoh) vision katipen hi April 2014 Pallen Molnoi haosapu pa Chongthang Manlun inn a inbahara a ka umlai thilsoh ahi. Hiche kathilmu hi nam natong holah a lamkai khat a ka umlai ahin hitabang thu mong mong kagel phah lou laitah ahi. Janmanga thil kimuhi ilungthima igel brhseh ho jong akimu nomin chujeh in miloi khat in mangthu ho hi ipibehseh in agel jipon keijong hitabang michu kahi ahi. Kei thilmu hi jan imutpet a kimu thil ahijeh a jan mang kati thu ahin kathilmu gim neidan le anasat dan chu jan mang mai mai (normal dream) vang ahipoi.

Janmang hi ajat jat akinei jing thou nai hinlah hitabang mang gim nei le nasa hi kahinkhoa katokhah lou ahi.

Kathilmu chu anasabehseh in kamang ahivangin kathohlel behseh in aseije umlouvin kagim lheh jenge. Kamang ahivang chun atah beh toh akikhehna imacha aumpoi. Atahbeh a genthei hesoh kithoh tabang bangin kathoh gim lheh jengin hitabang thoh gimna chu kahinkho a katoh khah lou lai ahi. Kathilmu chu kati ajabehseh in kahung khahdoh in jong mikoma moh seidoh ding jong anasat behseh jehchun kaseidoh ngampoin ahi. Chuche pet tah a kakimanchah le kahin kho man dan jong chu hichetabang thil mudinga ginchat jong akihipon kiseijongleh koiman eitahsanpih loudingin kagel in kaseidoh nom lheh vangin seidoh theilouvin ka um e. Pallen a upa khat (amin kahai mil tai) komah hotel a cha kadon honpet in kasei leh aman jong lamdang asalheh in “Ojapu na mang pichu moh jan mang mai mai ahipoi Pathenin nakouna hileh akilom bouve phaten kigel in” atin ahi.

Nam natong lah a lamkai khat a ki um ahijeh chun hitabang kamangin ka mu e kiti jongleh ipi nasei ham jong eikitikit lou ding ahin guh thimin kaboilheh jenge. Toh khompi loi lamkai khat ko ma kamang thu chu kaseijin ‘kamangin rapture analhungin dalhah in ka umin kagenthei lheh e’ kati leh aman jong “nang tabang michonse rapture a dalhah a na umlou le koi ba umding ham” eitipih bepseuvin totna bep dan a eineipih jeh chun avel in mikoma kasei nomtapon sei jong kasei le le tapoi. Ahimongin jong kathilmu chu agim neibehseh in phate doma seina thei mun khat a thupidom a akisei louleh pamai kasah ahi ajeh chu miloi khat in totnabep a eineipih thei ahi.

Imphal Games Village a ka umna houbunga vang khat vei thupi seija kapan chun kaseijin angaiho chun ipia agel diu ham agel loudiu ham vang kahepoi. Masang jep lai phat khatchun Watsap group ho a kana sei leh nupi khat in semthu mang pou nasei le leu ve ati jeh in kavel seinom behseh lou ahitai. Hinlah atahsan lou mi umjongleh angainom loi jong aumjeh in avel a him post kit dinga ngehna aumjing jeh a kahin seikit ahi. Pathenin pha asah le jing lang leh kathil mu gim neidan ho chu kahinsei ding ahi. Tunilhah hi thumakai tabanga isei u ahi. Rapture (mitheng kilhendoh) kamu thu khat vei chu bulhing thima kana jih le phone sedeh duh khat kachoilai ahijeh in lel tah a kajih jouse deibanga thotdoh manlouvin amang thah gam tan thah jih kit ding kangapcha tapon ka khongai ahitai. Hiche kathilmu chu midinga jong kitil khou na ahiding kaging chan keidingin vang thina lam jon a kache na a konna Pathenin einung kouna in kagellin thupi kasalheh e.

Hichu April 2014 kumchu ahitan Pallen Moulnoi village haosate pu Chongthang Manlun in a kapansat lai ahi.

Ka jan mang chun rapture ahung lhungtai ti thu ahung kiseitai. Hichu kenjong mitheng ho cjepet chu la kimu phalou ahitan amaho chenalang hidinga kagel lampi khat a chun kache che le moul ni kisuh to nalai khat a lampi chu abeitai. Hichun lungdongtah a kakihei le le leh mikhat in lampi aumpoi nung chetan atin kei nop le da thu umtalouva hung kinung le kahitai. Kahung nung chun vannoi leiset thilsoh gim nei lung don na meipin atom chu kahin mu pai paitai. Vannoi gamtin a miho ban neichan kamu in kamuho chu hiche gam khuche gam miho ahi tichu kahesoh keije. Agam toh agamsung mi kahet tha keu ahipon amaho mi hi na hojong kahesoh keije. Tekah na in mi ama ama position and profession toh kahet thacheh ahi. Hiche hi thil kidangtah ahi koima eiseipih leh eihil jong umlou ahivanga kamu jouse agam mi hi na (country & nationality) toh kahet thacheh chu ahi.

Kamu miho chu aboncha lung gimna lung khamna dimset ahiuvin alung gimdan u alungkham dan u chu atepi ding aumpon ahil chet je jong aumtheipoi. Amaho lunggim dan chu anasa behseh in koima akihoulim apaopoh ngapcha jong aumpon mijouse chu mai mol deh jeng hinkho ahitai. Hotabang miho chu gal a imujong leh thoh hahsa khopset ahitan athoh hahsat nadehset chu keima tah jong kajao ahitai. Thil gimnei thoh hahsa ho hi athua ijah mai mai le anasa behseh pon imit tah imuleh nasajep kit in eimtah athoh lah a ipan khah le aseije beija hahsa chu ahitai. Hiche din munchet chu kei din mun ahitai. Miho chu amai amol deh jenguvin lung khambehseh jeh a koima apao poh ngam umtalou akihoulim jong umtalou anneh je tuidon je tahbeh jong umtheilou ahitai. Hichepet chun leiset chunga ngaicjat deichat thil khat cha aumtapon akingai chapen chu Pathen thubou seh ahitai. Hichu aumloupen akimujou loupen tah chu ahikit e.

Mihaosa ho sum le pai tamtah tah neihon jong asum apai u apanna ding ahetapouve. Koimachan sum le pai sana dangka adeitapoi. Kimoh peh jongleh akilah ding umlou ahitai. Mihaosa inn thupitah tah le hoitah tah a chengho jong koima ainnsunga aum mom tapouve. Jeep le Car man tamah tah neiho jong koima garia lhai le jong aumtapoi. Neh le chah atui tui ho jong koiman a nenom tapon nopsahna kitiho jong koimachan imacha ding ati tapoi.

Loupina let na Lal na minthan na ho jong apanna ding umlou ahi gamtai.

Tumasanga free a Pathen thu ngai nomlou Hou inn kai nomlou hou nn a 40 minutes tou ngapcha lou hon jong Pathen thu seiding aumleh minute-5 seh seh seisah a dangka crore khat peh ding hijongleh mi kichu thodingin aumtan hinlah Pathen thu aseiding koimacha umlou ahitai. Pathen thu hi tupetna thuhing thumantam hinna a neithei ahivanga rapture nung tengleh phachom talou a validity kichai dan ahitai. Hiche a kamu miho lah a chun Pathen thusei Pathen natong pastor reverend ho phabep jong kamuthouvin hinlah amahon Pathen thu mong mong aseitapouve ajehchu a warranty kichaisa chu kisei jongleh phachom talou ahi.

Tunia hi Pathen thu hi kinepna dimset thu ahijeh a ingainom uva iphatchompiu ahin rapture nung teng leh vang aphatchomna bei hel ahitah jeh in aseiding mi akimu joutapoi. Leiset chung hi kinepna jeh a bou mihemte hi ihin thei u ahin hichepen hi abeitengleh koimacha ahinnom tapoi tichu kamudoh khat ahi. Tupet a koimacha athinom ki umlou ahin rapture nungin vang ahinnom koima cha aumtapon hinlah koimacha athi theikit tapoi.

Keichu kagenthei behseh in thidoh jeng tange katin hinlah thina ding mun kamunjou him himpoi.

Eithat theiding mi umleh paisa lakh 10 peh a kithasah ding hijongleh kinom ma ma ahitan hinlah hicheding jeng jongchu koima kikimujou lou ahitai. Mitheng kilhendoh nunga leiset a um mihemho hindan ahahsat dan anop lou dan dan chu aseije umlou ahilchet be je jong umlou ithinom vanga kithei lou ahitai tichan chu inaseitauve. Thi noma thi theilou kiti chu aban seibeding umlou hinkho ahitai. Mihemin thiding kichat umpen ahin hichan gei kichat sanga kithi thei leh nom joding ahi kitichu upai umlou hinkho ahitai. Dalhah a ka um chun mi kamu jouse chu ami hi na toh kamutha cheh e ti jong kanaseitai. Kami muho chu amasapenin hou natong (Pathen natong) ho ahiuve. Amaho hi phabep pi kamun hinlah atambehseh pouve. Khonunga kagel doh chu amaho hi atamlang hi rapture a che doh himaithei junte tichu ahi.

Ahin dalhah a umcheng ho vang chu ajahcha lheh uve mi mai jong ave ngampouve ajehchu amaho khut a mi ijat ham khat anapengthah jong hiteiding ahin amahotah dalhah a aumkhah u chu hadohna ngam hitalou ahi. Anichanna kamuho chu miloupi mihaosa miminthang ho ahiuve. Amaho hi tamthimtah kamun amai moldeh jenguvin kikhotonan adim uve. Masanga chu achedoh le nau hihen hoilai hileh mijouse gel sang leh ngaisang chang ahiuvin hiche rapture nungin vang koimachan vetding jong agong tapouve. Ahideh a popular singers. Film stars, sports stars leh adang dango tulai a min avet nom a adel le le miho chu koimachan vetding jong agong tapoi.

Abanin politician ho kamun amaho hi katam mulheh e. Leiset a politician ho kal a lending thunei ding leh thaneiding koimadang umlou ahin hiche rapture nungin vang aloupi nau aletnau chu ehtum (a mole hill of dung) tabang bep ahitai. Lakhat in “Aw leiset a lal techu tonsot gam lhung thei louding” kitichu kagel doh e. Hinlah amaho chu chomkhat beh leiset a analen ana thunei ahouvin keivang leiset hinsunga jong nopna toh lou tunia dalhah a ka umkit kati le kalai anabehseh in ka ka lhah jeng kigot vangin katha abeijin kap jong kap lha theikit poi. Politician ho katam munajeh hi khonunga kagel leh rapture a khat chabeh jong che lou hidiu ham tin kagel e. Ajehchu amaho hindan hi atamlang Pathen thu toh kigam lalheh jeng ahiuve.

Numei le pasal jon leh kit a kivop ho (illegal love affairs neiho) aki oimoto tampi jong kamui. Nang jeh nang jeh a hichan kaphah ahi chutilou hile tunia dalhah a ka umlou ding ahi akitiuvin aki oimoto sou sou tampi kamui. Hinlah hichenia thil kidang khat chu koimacha akidel akivoto kamupoi ajehchu mijouse chu total hopelessness a pum dim a adim gam phat in mitoh kidel ngapcha jong um loudan ahitai. Hichenia kamu chu koima thil se bol thilpha bol ti jong aumthei itapoi ajehchu ipi kibol jong leh aphachom ding asechom ding aumtapoi. Emajouse chu akichai ahitai.

Thilpha nabol e tia eikipachatna ding umtalou thil se nabol e tia eikisei setna ding jong umdeh talou ahijehchun koimachan imacha abol be nomtapoi.

Hichenia kidangtah khat chu koimachan sana dangka sum le pai jong adei tah lou chu ahi. Tunia vannoi mihem jouse deipen leh kiseimo napen sum le pai koiman adeitah lou chu akidang lheh jenge. Hiche kathil mua konna kahet doh khat chu hinkho hi kinepna (hope) a kihing bou ahin hiche kinep napen abeitah jeh a chu hinkho chu akaleh lama umdoh dan ahitai. Vannoija mijousen angaisang pen leh adeipen tah sum le pai sana dangka hiche rapture nungchun koimachan adeitapoi ti thu inaseitauve. Hiche mijousen adeipen koiman adeitah louva konna chu mihem hinkho chu ichan gei aphah hitam tichu seitam louva het jeng thei ahitan ahi.

Hiche rapture chu athua ahung kisei phat a bou kahetdoh ahin Bible a kisei Sumkon gin kitiho imacha kajapon ahi. Aumdan chu mitheng ho kikou khomna sumkon gin chu kei jah phah hiloudan ahi. Kathil mu leh Bible a rapture umding dan kiseichu akikheh poi ajehchu Sumkon gin nunung pen a mitheng jouse thakhat tah a thoudoh ding ahing nalai hojong van vou va kikhelna umding ti ahin ken kahin hetdoh chu mitheng ho acheding jouse ana che chai nungu ahitan Sumkon gin kitiho chu kei jah phah hiloudan ahitai. Sumkon gin kajah lou keu ahipon mitheng ho jong khatcha kamuphapoi. Van a leng tou u ham vanleng tabang khat in ahung poh tou u ham kenga che hiu ham meilom khat tou vin ahung puitou u ham khat cha kamupha pon ahi.

Chung langa cheu ham noilang ajot u ham pheilang ajot u ham jong kahepoi. Athu kajah phat a bou amaho che na hiding ham katina lampi khat a chu kamoh che ahibouve. Mikhat touvin khulangah acheuve atijong ahipoi keima ginchatna lampi khat chu kamoh jui ahibouve. Kaseibangin kachena lampi jong moul ni kisuh to nalai khat a abeitan che bena thei ahitapoi. Rapture nunga kami muho umdan chu khatvei ka houbunguva kasei leh ka houbung upa khat in eiho houbung miho koi koi na mu am eitin ahi.Hichu doh theitah ahinan hinlah chutia seitheija kamu ahikit poi. Atahbeh hitichan geichun kimu jongleh hichepa hichenu kamui tiding chu kiseinom louding ahi ajehchu akimu jouse chu dalhah a um kihisoh kei ahi.

Ahimonga jong mihem chu dalhah ding mong monga hung peng koima umlou ahin apenthah leh apenthah loudung juija bou umding ahijeh chun mi khat by-name a seithei kimu louding mong ahi. Kami muho chu amincheh a kamu ahipon amaho category wise tiding ham joh a kamu ahijoi. Tekah na in politician ho, Pathen natongho, lasa minthangho, film fare ho, mihaosa ho miminthang ho tia a group wise a kamu ahibouve. Chunikho a kamuho jouse chunga kibang chet a kamuchu lunggimna lungkhamna sangpen pen in alonvuh a mijouse mai moldeh a aum chu ahi.Mijouse chu akisih behseh uvin only half minute khatcha hijongleh lung heina phat eikipe kit le tichu mijouse ngaichat pen ahi tichu miho maiso ivet chun akihethei jenge.

Keijong dalhah a um kahijeh chun miho hahsat dan le ngaichat ding ho chu seilouvin kahejenge.

Akhohtah khat chu mijouse thiding nomcheh a thina jong aumthei kit louchu ahi. Eithat theiding khat aumleh dangka crore ijat hijongleh kipenom ahitan hinlah koima eithat ding kikimu jou kit lou ahi. Rapture aumtai ti kahet jouchun vannoi mihem ho ban neicha a kahinmu tah chun kalung akidang vut jenge ajehchu ma sanga athua ana kisei sei inakol a anakijajing tunia vang atah beh a hung lhung ahitai tichu ahitai. Mitheng kilhengdoh ho kimupha ahiloujeh chun amaho umding dan akisei theipon hinlah ginchat a seitheidol pen chu kipah lheh diu ahi ajehchu athua ana kisei sei jing jeng tahmel a mukhah lou thilpha chungnung khat chu chang kha ahitauve. Langkhat a dalhah a umho vangchu seibeding beihel a kisihna nikho ahitan mihem ho chu koima anneh je tuidon je umtheilou khop a lungdon nan alodim kitichu ahitai.

Cenima kive tabang hileh thoh nomjep ding ahin keimatah athoh holah a jao kahijeh chun hahsa kasabehseh jenge.

Ahahsai tia kidoi ahitapon thil jouse kagel leh kakisih behseh in chem hem khat a kisut chan chan ding kagel in hiche jeng jongchu phachom louhel ding ahikit jeh chun kabol theikit poi. Pathen komah kataovin ” Vo Pathen hatchungnung tonsot kumkhoa dinga neipaidoh jeng hi kathoh joutapoi second khat beh hijongleh lungheina phat neipekit in ” tia katao tao vangin aphachom tapoi. Taona jong hi aphatchom louhel ding ihet le kitao theikit lou ahi. Rapture nunga taona chu agobet but in ataoje jong umtheilou ahi ajehchu lungsetna khang huh hihing na khang kichai ahitah jeh chun Pathen koma tao phat chu hitalou ahi.

Taona kineija eimatah in eikisanpih louhel ding ahi ti kihekit chu atao ding dan mong mong umtheilou ahi.

Houbung la khat in “Sochatna kong nikhat leh kal touding hung kilelou ding kou jong lechun kongachun hung kallin ule nau Jesu sochatna kong chu che le nang nakading tuikhanglen gal a ” kitichu atah beh hung sohdoh ahitai. Houbung la khat in ” Kalhin kamai phet jongleng phachom talouding” ati chu atah beh a hung lhung ahitahjeh chun athoh hahsa behseh in aseije ahilchet je aumtapoi. Rapture nunga hinkho chu ahahsat dan chu ipito kitekah ding hitam kahethei him himpoi ajehchu anasat behseh jeh chu ahi. Atekah pithei thei umlou thoh hahsa kitichu tumasanga kihekhalou ahin rapture nung hinkho chu hiche chet chu ahitai. Hitabang thoh gimna jehchun kalhalhop jengin ding jong kading theipon tou jong katou theipon lum jong kalum theipoi.

Thijong kithi theilou hing jong kihing theilou din mun ahitajeh chun aseije umlouva hahsa hinkho chu ahitai.

Chutia kathoh gim behseh jehchun katahsa chu amonlha tabang khun aumin athi la kihilou ahivanga amonlhasa hinkho hikit ahijeh chun ipitoh kitekah ding ham kagel leh papah monlha tabang khu ahi. Mihem hinkho value aumtah loudan chule nei le gou sum le pai ho jong apanna ding aumtah loudan chu papah(mushroom) tuitah amonlhah nung tabang khu ahitai. Gamlah a papah tuitah tah tah althet thet ho jong amonlhah tengleh lahthei ahiloudan tabang khu mihem hinkho ahitai. Chu in keima jong kathoh gimna hojeh chun kalhop lha jengin athitabangin kaki jamdentai. Hitahchun kalung sung gil lang khat a chun thil khat hetsahna eihung kipekit in hitin ahung kiseije, “hiche hi ahunglhung ding thil nakivetah bou ahin atah ahihih laije” ti eihung kiseipih tai.

Hitah chun kathilmu chu atah ahipoi ti kahedoh in kahinkho agoplhasa amonlhasa tabang chu athahbeh in ahung hel doh kit tai. Hinlah akidangtah khat chu kathil muho chu saopikhat achejom jing nalaije. Atah ahipoi tia miho koma seina thei din mun jong kaneikit lou ahi. Chutia ei kiseipih nungchun thil soh gimneiho chu cenima vet tabanga kavet ahitan keima tah athoh lah a jaotalou kahi.

Ka jan mang chun kamang thilsoh kamu ahi tichu kahetan ahivangin kamangchu saopi khat ache be nalaije.

Rapture aumtai ti kahet jouchun vannoi mihem ho ban neicha a kahinmu tah chun kalung akidang vut jenge ajehchu ma sanga athua ana kisei sei inakol a anakijajing tunia vang atah beh a hung lhung ahitai tichu ahitai. Mitheng kilhengdoh ho kimupha ahiloujeh chun amaho umding dan akisei theipon hinlah ginchat a seitheidol pen chu kipah lheh diu ahi ajehchu athua ana kisei sei jing jeng tahmel a mukhah lou thilpha chungnung khat chu chang kha ahitauve. Langkhat a dalhah a umho vangchu seibeding beihel a kisihna nikho ahitan mihem ho chu koima anneh je tuidon je umtheilou khop a lungdon nan alodim kitichu ahitai.

Rapture nunga hinkho chu ahahsat dan chu ipito kitekah ding hitam kahethei him himpoi ajehchu anasat behseh jeh chu ahi. Atekah pithei thei umlou thoh hahsa kitichu tumasanga kihekhalou ahin rapture nung hinkho chu hiche chet chu ahitai. Hitabang thoh gimna jehchun kalhalhop jengin ding jong kading theipon tou jong katou theipon lum jong kalum theipoi. Thijong kithi theilou hing jong kihing theilou din mun ahitajeh chun aseije umlouva hahsa hinkho chu ahitai. Chutia kathoh gim behseh jehchun katahsa chu amonlha tabang khun aumin athi la kihilou ahivanga amonlhasa hinkho hikit ahijeh chun ipitoh kitekah ding ham kagel leh papah monlha tabang khu ahi.

Mihem hinkho value aumtah loudan chule nei le gou sum le pai ho jong apanna ding aumtah loudan chu papah(mushroom) tuitah amonlhah nung tabang khu ahitai. Gamlah a papah tuitah tah tah althet thet ho jong amonlhah tengleh lahthei ahiloudan tabang khu mihem hinkho ahitai. Chu in keima jong kathoh gimna hojeh chun kalhop lha jengin athitabangin kaki jamdentai. Hitahchun kalung sung gil lang khat a chun thil khat hetsahna eihung kipekit in hitin ahung kiseije, “hiche hi ahunglhung ding thil nakivetah bou ahin atah ahihih laije” ti eihung kiseipih tai. Hitah chun kathilmu chu atah ahipoi ti kahedoh in kahinkho agoplhasa amonlhasa tabang chu athahbeh in ahung hel doh kit tai.

Hinlah akidangtah khat chu kathil muho chu saopikhat achejom jing nalaije. Atah ahipoi tia miho koma seina thei din mun jong kaneikit lou ahi. Chutia ei kiseipih nungchun thil soh gimneiho chu cenima vet tabanga kavet ahitan keima tah athoh lah a jaotalou kahi. Ka jan mang chun kamang thilsoh kamu ahi tichu kahetan ahivangin kamangchu saopi khat ache be nalaije.

Ka jan manga gim neitah a mitheng kilhendoh kamu a dalhah a kana um na thu abong abai hijongleh isei tauve. Watsapp group hoa saotah akijih theijipon chujeh a part by part a ijih u ahin asim nom hon lunglut tah a akisuh to thei u ahin adang sen vang ipi ning nohsah a hiche jong hi kisei jing ham tiloi jong ium thou nauve. Keidinga chu thilsoh gimnei kato thil ahijeh a kaseidoh loule nungle Pakai aanga thepmo kachan thei ahijeh a kasei ahi.

Aseinading mun platform kineilou ahijeh a hiche media mangcha a kahin sei ahi.

Media ho hi news ho kinelna ho kihoulimna ho bou mi athanom in thugil tah tah seina dinga thaset aumdapoi hinlah lampi dang aumloujeh a hung kisei ahi. Kathilmu gim nei le thupidan leh mitampin imacha a agel lou dan hi kitoh mo lheh jeng ahi hinlah lunglut a sim nom khat le ni hoding gel khohna jal a kiseimo sa sa a kahin post ahi. Hiche kathilmu chun nasatah in eisugim in mikoma kisei jongleh phachom ding ahipon tahsa thu nam thu politics thua kakisah boina jouse chu nikhat le meilhum sunga kakigovam thading bep bou ahi ti kamudoh tan ahi. Hitahchun kalung gel apumpin akikhel tan leiset thu tahsa thu ho hi kalung ahalut joutapon ajehchu hiche ho hi aphatchomna lhomcha le chomcha bou ahi ti kamudoh tai.

Hichelaitah a chu practical tah a nam natong ho lah a um kahin kathilmu chu mikoma sei le le ding jong koima nakol a lut lou maithei chukt le ka una katohna jong chu baitah a moh dalhah thei hilou ahikit in koima het pih louvin kaboi lheh jeng ahi. Keichu kasei banga penthah na nei mi kahin Pathen hongsunga ana umsa Pathen family membership nop dan ho hesa kahin khonunga lhepna tingjoulouva phatchom khat ana nunglhah (backslide) kahi ahi. Backslide kahisung chun tahsa thua ichan ham khat ana lut thuh man kahitai. Hiche phatsung hin kahin kho saopi ana suhchatvai man ahitai. Hinlah kalunggil sung langah amang thei lou muchi khat ahing jingin tahsatah a muthei ja kapohdoh jou tah louvang chun kalung gil sung langah chun munchom khat eiki kopih jing jeng ahi.

Hiche rapture kamu masangin jong Pakai kouna ajat jat kanatoh tan hinlah khahdoh nan kana nei dehtapoi.

Rapture vision kanei nung chun thildang jousea katha anom tapon Pathen kina taona jalla kanatohna mun a kon a lhakanga kahung um a tunia hi lhasam pum pum hijongleng kathingpel kiput a Christa nung juidinga um kahitai. Nam matohna sangin Pathen najoh tong range katichun toh khompi loi le pai hon eidonbut nau chu – ” Nangin iti Pathen na namoh toh theiding ham Pathen natong ding kitichu abul a pat kigot tupna angaijin, jinei chanei jong Holy Marriage angaijin, penthah na angaijin, Pathen kouna angaijin, thil tampi angaijin tua nangin ipi le ipi nasuhto a Pathen na natoh ding ham? ” eitiu ahi. Athusei u chu adihmo na aumpoi ajehchu katoh khomna sunguva eimudan u le eihet dan u chu mipengthah lim a eimu lou u ahi. Kenjong hiche lim le mel chu kana put lou ahitai.

Keima sung gil langah thil tampi aumchu amahon aboncha ahet lou u amulou u ahin amuthei sun sun u chu mipengthah hindan hilou amahotoh thakhat chet kahi ahi. Achomlam a seidingin taona thei theijin kahung tao vin ka toh na a konin lhakang kahung hitai. Ajehchu lung lut lousa sa a natoh kitichu mitmo kitah lang nabep bou ahi.thanomtah a na itoh le bon koima lunglhaina kihilouva kati ahi Tunin sum le pai nei le gou thua vang zero position kahi. Hinlah nam na katoh lai ahin social field akalhai lai ahin tupet tabang bang hi kahijinge imacha aum chomdeh poi. Min nam na atoh le innchen louchen kisemdohnan aneitheije. Social field a lhai honjong chutima chun abol theije keivang hitichu ahithei him him poi.

Tun nam natohna le thildang sangin Pathen lunglhaina joh a ka um hi kalung alhaipen e. Pathen na tong tange katichu hiche hi kaseina ahi. Miloi khat chun pastor khat kisoh kigo dan a eigeljeh uva nangin Pathen na iti nmoh toh thei ding ham eitiu ahi. Sopite ho rapture a dalhah a ka um thu bulhing loutah jijongleh seithei kham kham kaseitai. Pathenin pha asah le lekhabu khat a publish bol ding kati ahi.
Epi hile kalungtup pen chu rapture thu hi athu mai mai ahipoi atahbeh thilsoh ding ahi itih nia ahung lhunding bou kisei theilou ahi ikigot tup lou u le keibanga nakisih ding ahi tichu ahi.

Keichu mivang phatah kahi ajehchu kathilmu chu jan mang bou ahi tua nanghon nahinto khah tengule jan mang hitalouding ahi. Chutengleh tunia hiche Jangmang kitipa mangsem thu kimu jing keitah hi ning noh aumtauve theida aum e nati nalaitah u chu naka nau hung hiding ahi.
Asim jouse Pathenin phat thei naboh pih tauhen.

Hiche article sim a kaphatchompi e ti jousen anoiya “Like” button khu ana meh u tin seinom nanei khah a jong le Comments a khu nahin seithei u ahi.

Thusimbu Machal jing thei na ding a pan lanom ho kipah tah in lem ahijing in ahi anoiya button “Click Here” khu meh utin details anasim ute.