Home L Seikholen Khongsai PU PAOTHANG KHONGSAI, GELNAL THUSIM CHOMCHA

PU PAOTHANG KHONGSAI, GELNAL THUSIM CHOMCHA

28
0
PU PAOTHANG KHONGSAI
PU PAOTHANG KHONGSAI

Thusim Manlu

(Hinkho le phat)

By- L. Seikholen Khongsai,
Tuibong, Churachandpur.

September 11, 2021 (Saturday)

Pu Paothang Khognsai hi a-um talou Pu Kimpao Khongsai chapa anahi e. Amahi Twilang gamkai sunga khominthang Gelnal Kho a cheng ahin tujeng injong adamjing nalaijin ahi. Amahi milui loitah khat jong ahin, hetthei din Mizo National Front (MNF) 1961 kum October 22 nikho a Pu Laldenga lamkai na a anakiphu doh a hiche ajong nasatah a pan analah ahi. Hiche MNF a pan ahinlah a, Mizoram Accord June 30, 1986 masang ngeija Jampi kho mun a Army hotoh akikap to nauva anakap khah uva kona MNF apan chu anangah ahitai. MNF apan lai Galthu khoh laitah nikhat Jampi kho a MNF ho a umlaitah uva Indian Army hon ahung bulu uva, hiche a chu nasatah a kikaptona ana um ahi. Jampi camp kibulu nia amal teni Army hon anakap khah uva, nasatah a machanga aloihon anahuh doh u ahi. Amal teni akap khah phat uva chat thei louva uma, Lhakhat val gamlah songko a akijen ahi. Akijen ahungdam jouva pat Pathen’a kikhelna hinkho ahin neija hinkho thah ahin manpan ahitai. Ama thusim isei nom napen u ajeh chu 2021, 13th September – Kuki Black Day ahung lhun toh kilhon a 13th September 1993 nikho a Gelnal Khopi NSCN (IM) hon anabulu uva, kho le veng halvam chai keiding anatiuva, hiche a Pu Paothang Khongsai pan lahdan chomcha isei doh nom u ahi.

September 13, 1993 nikho jingkah matah in NSCN(IM) thingnoi mi 100 val jen in Meipum hoitah tah kichoi jin Gelnal Khosung ahung bulu tauve. Hinlah Pathen jal in Khosung pumpi lonvuh joulouvin amaho jong athi amang tampi pum in ana kinungle tauvin ahi. Hinlah Vangset umtah khat chu nunao chapang le khosung mi phabep in thina anatoh tauvin tuni chan in Khosung mite din kumseh 13 September nikho leh ngailut vetsahnan geldohna nikho amang jing nalaijun, milmona mitlhi jong abangthei nai pouvin ahi. Khopi sung hi mi khat le ni jeh a huhdoh a ana um ahipon, Khosunga Upa Gollhang gal-hangsan tampi kithokhom naleh pan lahkhom jeh a khopi sung chu huhdoh leh vendoh a ana-um ahi. Gollhang tampi le Upa tampin jong Thal tampi alha un, a umna cheh uva galmi te lethuhnan thal alha un hijeh chun galmi te NSCN (IM) thingnoi phabep injong ahinkho anachan lo tauvin ahileh Galmi te jong thilong pumin Khopi lonvuh chai joulouvin ana kinungle un ahi. Khosung pasal ho kilungtona um lou hileh galmi te khut a khosung halvam a um, athi amang jong tampi umdiu ahitai. Hiche chunga Pu Paothang Khongsai panlah dan jong chomcha itahlang nom khat chu NSCN (IM) lamkai lenkhat akap lih naleh insunga nunao chapang tampi thiding dinmun a umho anahuhdoh jeh chu ahi.

Hitia NSCN (IM) thingnoi hon khosunga Inho meija aban ban a ahin hal phat un Pu Paothang Khongsai te in veng lang jong ahinpha tauvin ahi. Amaho in a chu amaho invengse se numei chapang mi 30 val jen kitih khom uva thakhat a umu ahi. Hitia chu Pu Paothang te inchu NSCN (IM) thingnoi khat hin meija ahin hal pan ahitai. In chu meijin jong ahin kapantan, insunga kisel nunao chapang hojong akichat lheh vangun kapjong kap doh ngam louvin minu ten achate kam akhut uvah asip peh uvin ahi. Ajeh chu chapang hochu hung kapdoh uleh Thingnoi hon ahinhet uva target a a umdiu akichat jeh uva hitia chu abol u ahi. Hiche pet tah a chu Pu Paothang hi intom Kotcha langa panga galmi te chu aven ahin chuleh Pu Janglal chun inmailang Kelkot langa a galmi te aven ahi.

Amasan inmai lamma kelkot na chun galmi NSCN (IM) thingnoi khat ahung kaldoh in upa Janglal chun hiche thingnoi pa chu anakap lhatai. Anungthop hon thingnoi mipa thilongchu ahung domdoh un apomang pai paitauve. Aban jomtah in intomlam kot’ah NSC(IM) thingnoi mi khat in kotchu kapkeh a insung a lutding ati laitah in Pu Paothang Khongsai in ameithal in akap lhu pai jengin ahileh hiche pachun kot phung laitah chu akikhap den jengin athidan tan ahi. Hiche a thipa vanghi Naga ten athilong jeng jong akilah doh jou tapouve. Thingnoi mipa Meithal chu Pu Paothang Khongsai loinun insunga konna galmi thipa thilong kijam chu ahin muphat in tija tah in ahung vahdoh in, NSCN (IM) thipa thal AK-56 Rifle chu ahin kilah doh in, magazine chengse toh honlang Tuisum buh pangah ahinsel doh in, Thingna go ho ahinkhu khum in chule insunga kisel ho jouse jong munchom’ah aga kisel doh kit taove. Hiche a thingnoi thipa chu NSCN (IM) lamkai len khat ahin amachun thina anato lou hileh hiche Pu Paothang Khongsai insunga kisel numei chapang mi 30 val hojong hingdoh lou dingu chule AK-56 Rifle khat jong Kuki te khut a umlou ding ahi. Hichepa thilong jong galmi ten kilahdoh louva anadalhah den u ahitai.

Hitobanga MNF gallaija pat Gallouthem Pu Paothang Khongsai hi 13th September- Kuki Black Day thusim kisei chan a suhmil thei hi lou pasal gal-hang ahina jong hi geldoh dia lomtah ahijingjeh a tunia ama thusim chomcha iseiju ahi. Pu Paothang hi kum 74 alhing tan Pathen jal in tuni chan injong adamjing nalaijin, aji achate jong chule atute jong adamsel sel nalai un ahi. Pathen in khonunga atu achate jong phat thei boh jing henlang Nam le gam ngailut na lungthim hinpe jing tauhen.

Articles hi anom lheh e nati le anoiya “LIKE” button khu meh in writer ho na support nau vin, chule seinom nanei le anoiya comments nahin bolthei u ahi.

Site nalut a notification pop up hung potji ho allowed anabol ji uvo maban a thusim thah ahung ki post teng notice namu ji diu chule Bell button a subscribe kiti chu meh un.

Previous articleHINKHO LAMLHAH THUCHIN PHABEP-XIV
Next articleDINGPI LHANG’A KALUNGSET PAHJEM-III

LEAVE A REPLY

Please enter your comment!
Please enter your name here