67 Years Life Journey of
PU PAKANG HAOKIP
(SINGKHOKHAI)
26th May 1920 – 26th May 1987
By – Pu Chungkholun Mate, Tengnoupal
Sim masat banjom…!…Achaina
PU NEHLUN LETTER THOT PU PAKANG IN ANA MU MAN TALOU:
Vangset um tiding ham lhaset um tiding ham Pu Pakang thini kho 26th May 1987 nikho toh kitoh chet in Pu Nehlun Kipgen in Apa Pakang chu lekha khat ahin thot in, alekha thot thuchang chu ahileh,,! “Hepa Nampi natong dia kigel lha mong mong kahitoh kilhon in, tuchung iki hou nau leh ithilgon hou chung chang’a thina leh manna hin toh ium khah uleh nampi min’a thi lou pia thi hi ding a itih’a nampin amin kisumil talou ding, chuleh Nampi thusimbu’a mangmo a kijih lut ding ahitai. Pathen in Kuki Nampi phatthei eiboh tauhen” tin lekha ahin thot in hinlah Apa Pakang in ana muman tapon ahi.
Pu Pakang thi jou alhakit in hangsan tah leh lunglha dai deh louvin Pu Nehlun Kipgen chu Maokot lhang ahung lhung kit tan, Pu Pakang in Nampi min in thina ana toh tajongleh eiho i-olmo lou hel diu ahitin gamsung mipi ana lhamon in, chuleh lhangsung khosung’a ana damlou cheng jong taona ana man peh cheh in, hangsan tah in Thingphung, Songphung tin ah “KUKI HOMLAND” tin ahin jih in Pu Pakang thita jong leh atohban imolso tei diu ahitin asam in Organised ana bol pai yin Kol le Phai ana lhah kah in a khovei 1988 kum in Kachin jottheina ding tin Maokot mun’a Nampi ponlap khai doh ding ana tichu apa pakang thi toh gamsung huinun dan ana phat tah lou jeh chun phat kilem chang (convinance) ve in Molnoi kho Burma gam ah 18th May 1988 nikho chun Nampi ponlap ana khaidoh un Volunter 60 toh KACHIN ana jon tauvin ahi.
KIA 6th Battalion ana lhung uvin, KIA second in Chief Brang Seng toh akimuto uvin kihouna chu ana pan lhontai. Pu Nehlun Kipgen in Kuki Homland Map asem chu ahin ladoh in, hichu KIA Chief patoh avekhom lhon in, Pu Nehlun Map sem chun Northeast 7-State atoh khah soh kei jeh chun KIA Chief pachun MAP chu reject ana bol peh’e. Aman adonbut na ah “Keiho Kachin/Singpho hohi kachen nau tichu tua gamtum kathum nau mun ahi compact a cheng tobang kahi vang uvin ahahsa nalaije, hiche sang chun BURMA kap khom’u hitin, Kachin ten Burma gam thanei Military Junta khutnoi noija kon Independence kahin muteng uleh Sagain Division se khu KUKI STATE adin nakhin lhah peh uving’e” tin Pu Nehlun chu ana jol in, hinlah KIA chief Pu Brang-seng thusei chu Pu Nehlun in ana datthei tapoi.
Pu Nehlun Kipgen in KIA second in Chief pa kom ah “ India gam’a kami kasa khujat lah’a hiche Sagain division mun’a kami kasa bon umlouva iti Burma kakap ma India gam’a um kamite kasuhmil thei ding ham” tin ana donbut in, iti akihou lhon vang in Pu Nehlun bidoi leh Pu Brang Seng bidoi lunggel ana kitoh tapon, ajonan, Pu Brang-seng in kinungle uvin lang High Command hotoh Decession hinthah lah uvin lang hung kit un tin ahin vailhah tauve.
Pu Nehlun Kipgen in Kawl/Burmese Pao ahet lou jeh chun KIA second in Chief Pu Brang Seng toh akihou na chu Pu Thangkholun leh Pu Paulneo in Eipao vin ana ledoh pehji lhon in, Molnoi akon Kachin alhun thei nau jong hi Kawlpao he Pu Thangkholun, Pu Paulneo, Chuleh Pu Mangneo leh Pu Seilal, Pu David hojal ana hije.
Ahung kinung le kon uchun KIA lamkai Pu Brang Seng in Pu Thangkholun kom ah “tua na lamkaipau Pu Nehlun Kipgen hi hin nung pui da tauvin ajeh chu kalunggel hon akitoh poi” ana tipeh jeh chun avaikon kit na uva chu Pu Thangkholun Haokip lamkaina ana che uva lunggel guilhun nathei ding leh aphajo ding gelna jal’a Pu Nehlun Kipgen chu ana dalhah’u ana hije.
Ajeh chu Brang Seng in guhtim’a Kol paova ana seipeh uchu Pu Nehlun kisei peh jongleh lunghang ding nom chom chom lou ding ama hung jao kit leh ahi thei poi tia training pelouva ahin nung sol thou thou diu chu Pu Thangkholun in ana het ahi. Ajeh chu hiche lai tah’a Nampin akingah lal pen chu Map leh thu sang’a Training leh meithal joh chu mipin ana kingaisang pen joh chu ana hije.
Pu Thangkholun kiti pahi Pu Pakang ding’a koi chom hilou achate thoh ana hin, ama jong hi gamsung leh namsung ngailu tah chuleh lhagao lam’a penthahna dihtah neija athi nikho geija apa Pakang bang’a Sunday nikho seh leh An-ngol hinchepi jing lungchang neitah mi khat chu ana hije. Namdang ten eihin noise u pona tah’a ana um toh kilhon na ama dia Angailut tah apa Pakang NSCN-IM hon ahintha nikho uva hi Molvailup ten Seltho ana get nikho’u ahin, athu ajah phat chun lainat vetsahnan, Amasang’a Laitoi khat chu ana bantong in “HEPA naphu kalah man IN-GAM ING’E” tia ana kihahsel’a Nampi khonung ding khankho tona jal’a ana vaikon a nampi kinepna masapen Kachin akon hemle thal ahin pohlutna nam gal ahinsat na tuni channa Nampin ihin chepiu hi hung hi peh ahitai.
Achutia ahileh Kukite dia Pu Demkhoseh Gangte kicholdo jou nung’a ama advice nanoija Kuki thingnoi thah phudoh na dia muthei leh hetthei tah’a Kuki Army nam sepai hinsem doh hi (L) Pu Pakang Haokip (L) Pu Nehlun Kipgen leh (L) Pu Thangkholun Haokip ahi tia Kuki nampin ipomcheh uva Founder and Leaders of Kuki Army in Second Generation tia Title ipeh uva a itih’a mang talou ding’a Nampi Songpi leh thusimbu a ijih lut diu hi khonung’a Kukite dia iphat theina ding uleh idamtheina diu hitalou ding ham?
Achainan, NAMPI LUNLAI Pu Pakang Haokip, Pu Nehlun Kipgen leh Pu Thangkholun Haokip hohi tu le khonung geiyin koiman khen da hen ajeh chu tunia Kuki Nam in Revlutionary movement bolna lam’a hichan ihin phah nau hi ama ho thum jal ahi.
– GAM SUNG NGAILU CHU NAM NGAILU AHI –
By – Late Pu Pakang Haokip
MAOKOT PA
Source:
KHOHUI News
