67 Years Life Journey of
PU PAKANG HAOKIP
(SINGKHOKHAI)
26th May 1920 – 26th May 1987
By – Pu Chungkholun Mate, Tengnoupal
Sim masat banjom…….!
PU PAKANG LEH PU DEMKHOSEH GANGTE KIMUTO:
Pu Pakang Imphal ahung jinn a Kuki namsung’a lamkai luboh phabep toh ahung kimutoh jou un, PU DEMKHOSEH GANGTE Divisional Organiser DO. VVF (Homeguard) toh ahung ki muto lhon in, thingnoi bol ding dan thuguh ahin seikhom lhon tai. Chu jouvin atupa Ngamthang akipuisah kit in Mizoram ah MNF lamkai luboh Pu Laldenga aga kimupin, Pu Laldenga in MNF Arms Down Cassette ahin vetsah kit in ahileh chua kon chun Pu Pakang chu nasatah in ama leh ama ahung kitil khou cheh cheh tan ahi.
Mizoram ache kon in Kangla a um Assam Rifles DIG pa kom alutpan “DIG sap Mizoram kache ding Pu Laldeng sap toh kaga kimuto ding ahi, ahin lah nangma douna thu vang ima cha kahin sei lou ding, Kukite dia aphachom ding thu bou kahin sei ding ahi” aga tileh DIG pan jong Raja chen tin kipatah in ana vailhah’e.
Mizoram ahung kile lam in Pu Demkhoseh Gangte toh ahung kihoulim kit lhon in amasapen in Maokot Chassad lhang COMBING OPERATION bol masat phot a suhtheng jep angaije tin ahung kiphat sah lhon tai. Chuleh Pu Demkhoseh in jong Kuki nampi angailut mama ana hijeh in Kachin le China a Meithal ana dalhah ho ahin sei peh in, hinlah Pu Pakang chu ana sonlal jep jehchun “Pakang lamkai ding lekhathem khat naki hol angaije” ana tipeh in ahi. Chu jouvin Maokot ahin jon in thanom tah in anoidou se se toh akimuto uvin avaikon doh naho kipah tah in report ana bol in ahi.
Phat chom khat jouvin Imphal lam’a lekha them hol’a ache kon in Maokot Hou Inn ah Lhangphong tah in “ Nampi lamkai ding lekhathem hol’a che ding kahin, hijeh chun Lamkai pha kahinmu theina din Houbung miten taona mang’u hite” tin Taona ngaichat ana phong in Maokot houbung miten kilungtoh tah in Taona ana mang un, ajing nikhon aman Imphal lam ana jon tan ahi.
Hapta khat jouvin kipah tah in ahung kinung le tan Maokot Houbung ah kipathu asei kit in “Namlamkai ding lekhathem mini kahin mu’e. Mivom cheh cheh athepna hon jong kibang amin hon jong kibang, khat Nehlun Kipgen, khat Nehlun Khongsai anilhon in athanom cheh lhon in, ahinlah Hepa phat chom khat hung kigel hon tadi ing’e ati cheh lhon in” kenjong a gei pen na Lhakhat sung’a neihin sei chen peh lhon ding ahitin kahin vailhah lhon in, Koi joh Pathen in Kukite lamkai dia pha ahinsah ding ham tunin Houbung miten taonan kop kit’u hite tin taona ngaichat ana phong kit in ahi.
Hiti chun aphat seh in Captain Arjun Raj toh akimuto jing lhon in alunggel leh athil gon ho im-chep umlou hel in ana seijing in captain pan jong hatah in atil khou khou jing tan ahi.
Thil kidang khat chu, hitia aguh’a Kukite thingnoi neina ding Programme agon jing toh kilhon in athi ding hi alha in jong ana mahet sah hintin, a itih a gari lhai talou British raod lui semphat na ding ahin ngaiton, captain pa kom ma asei leh athanom lei kit in Maokot to Phaimol via Chatric Khullen, C.Khunou, Mongpi, chuleh Nampan Vadung pal galkai nading lei 400/500 metre asao chu tulaija NRGES job natoh toh tekah theijin Maokot lhang Tangkhul Kuki kho jouse kitho’a sem din Captain pa toh Order abol lhon in gam lah ah akho akho in Camp akisah sah soh kei uvin, nehleh chah Ration leh Hawai chuleh Ahlu ninglhing set in Captain Arjun Raj in supply ana bol in lampi selai jouse chu ana semphat sah soh kei lhon in, chuleh Lei (Bridge) jong gari lheina thei din Thingphung len tahtah ho jong aphuhsah lhon in chuleh asui pehsah lhon in Lei chu thupi tah in ado doh sah un, Imphal to Maokot nom tah in gari ana lhunsah lhon in Lei chu Kangla DIG pan loupi tah in ahung thenson ahi. Hiche kibol lai phat sung hi March/April 1987 lhasung ana ahije.
Phat chom khat jou Pu Nehlun Kipgen Saihapoh Haosapu Pu Holkholet Kipgen NSCN hon anatha pau thigal din Asopi pasal 11 toh Kenglam in ahung un, Saihapoh ahung kile lam un Pu Pakang umna Maokot kho ahung phan, hitoh kilhon in Pu Pakang injong Houbung mite taona bang chun Pathen in Kukite lamkai dia Pu Nehlun Kipgen hi eihinsol peh’u hitante tin Pu Nehlun Kipgen chu kipah tah in ana vailhun tan, Kuki National Assembly Maokot Block a natong ama noidou ho chutoh Pu Nehlun Kipgen chu Kukite Sepai lamkai first C-IN-C adin 4th April 1987 (Saturday) nikho chun Pu Pakang in ama leitol mun ah nilhah lam khojin kon chun Pu Nehlun Kipgen luchung ah Khut ana ngam-un, Kihahsel sahna OATH TALKING CEREMONY chu ana nei sah un, Pastor Sonlet Haokip in Pathen heng ah taona ana man peh uvin Kuki National Front -KNF jalamkai adin Pu Nehlun chu Namdetna ana nei tauvin ahi. Hiche jouvin Pu Nehlun Kipgen chu thil ijakai kigontup din Imphal lam ahin le jot kit tan ahi.
Pu Demkhoseh Gangte toh Pu Pakang ana kihou mat nalhon COMBING OPERATION bol tei ding ana tilhon toh kilhon in Pu Demkhoseh in VVF sung’a jatdang jouse suty in ana sol doh in Kuki/Eimi cheh volunteer 500 Maokot, chassad lhang ah ahin toldoh tan Pu Demkhoseh chu Aishi kho ah volunteer 100 toh aum in adang 400 chu Sanagal la kho um ho Mollen, Kashung, Gampal, Phungtha ah VO khat cheh lamkai nan Volunteer 100 cheh chu post mun li ah ana um tauvin Operation bol ding in gotsan ana um tauvin, hiche laitah a Manipur CM leh Home panmun ana tuh chu Rishang Keishing ana hije.
BANJOM DING………..
Source:
KHOHUI News
