67 Years Life Journey of
PU PAKANG HAOKIP
(SINGKHOKHAI)
26th May 1920 – 26th May 1987By – Pu Chungkholun Mate, Tengnoupal
Sim masat banjom…….!
POLITICS LAM’A AHINA LEH APANLAH NAHO:
Kitahna nei tah in Pu Yangmasho Shaiza toh party khat Janata Party ana hi khom lhon in ajo chan lhon in Pu Rishang Keishing ana tetlhon in, aloipa Yangmasho athi jou nung kisan in aman thangtom tah in Pu Rishang Keiching chu anasu jing nalaije. Pu Rishang in ana jol jol vang in ana nom poi. Ajeh chu Communal feeling naneije tin ana donbut’e.
Vetsahnan; khatna: Kukite kholui peh anahi Phaisat chu Phungyar ana son, Nina: Chassad chu Kamjong anaso kit’e. Athumna: Maokot SDC HQ chu Sahomphung anaso kit in, ahinlah Pu Pakang in Gawahati High Court na Case ana bolkhum leh CM anahi jeh’a namphua CM Power la Inaugurate ana bol vang in function ana hi tapoi. Ajeh chu Maokot na ding’a Pu Yangmasho khang’a Govt. order No. 41/1/75 – R(11) Date 19/6/1979 nikho a ana soh ahi tan, Inaugurate bol na ding’a Song jong kikheng chaija kitung ahitan, Date jong fixed kibol la chuleh Maokot mun’a jong Selchal leh vohcha alop na ding’a gontupsa kikoi ana hitan, Akisei nikho chu alem chang lou khat ana um jeh chun aphat chom khat extent ahin bol leh hiche kah chun a Government ahung lhutan, thensona ana bol man tapon ahi.
Yangmasho Government ahung lhuh toh kilhon in, Next Government chu Pu Rishang makaina Congress ahung hitan, hichun Pu Yangmasho Shaiza in ana thenso man lou Maokot SDC chu Pu Rishang Keishing CM ahung hi phat in Maokot akon aladoh in, Khumlhang/Sahomphung kho ah ana koitan, hinlah Case ana um tah jeh chun Maokot SDC Khumlhang/Sahomphung a akichonlut vang chun ana function thei pon ahi.
Anam chanpi Tangkhul hon CM Rishang kom’a Inaugurate bolta itia aban chal thei lou nahi hitam tia adoh uleh “Oya Pakang siba matungda” ana tipeh ji un ahi. CM ahi vang’a Pu Pakang toh High Court na ana kiheh lhon leh ajolou phat in “Ukhrul District da Kuki Khul ama khak lei” ana tin hichu Maokot kho aseina ana hije. Hiche hi Pu Pakang ding’a Politics a agaljona lenpen khat chu ana hitai. Chenkhompi Tangkhul hon Pu Pakang ahin mukhel nau ajeh pipen chu SDC HQ case akon hung kipan ana hije.
Pu Pakang hi LP Oya ahina ban ah; Politics lam hihen Religious lam hijongleh kineppi um tah leader khat na hetthei tah mi hijongleh athini geijin, ei thinglhang Pa natoh loulho, thingpoh ana nga chompon ahi. Farm khat anei in, Komla, Champra, Apple, Mot phung 300 val ana tudoh in, Inmun a kon 4 km a gmlha gam lah ah Ngakul khat jong ana boldoh in, hiche Ngakul chu tuni chan geiyin avesui aum jing nalaiye. Hiche kalval in nikhat nilhum kei Kenglam ah (Gamnom apat Maokot) chan Dukan thil Kolnam in ana po jin, athini geijin Dukan ana bol’e.
Maokot AR Post a Captain Arjun Raj in athil poh ana mun “Raja nang lom lom in hitin thil po hih in, naki lompoi tukal Imphal apat Thil Bus a nahin tol tengleh Gamnom AR Post ah Report bol in lang Portal/potpo ding in RP pa kom ah message hin bolsah jin, keihon najinu (Rani) kom ah gasei peh ji uleng mi nadei jat jat chu Rani in potpo ding mi ahin sol ji’a pha hilou ham” atin hiche nia pat chun Imphal akon thil ahin tolsuh tengleh Gamnom Post a RP pa chu Message lekhapeh neokhat a kijih chu aga pe jing tan, ahileh Bus a tou Tangkhul hon amu mu ji uvin ipi agapeh hechen louvin, CID Report apehji hinte tin ana gingmo mo jing tauvin ahi.
Agin mo jing nau toh kilomsel in hitia Pu Pakang in apeh jou ajing athaiyin NSCN ho Camp AR hon nivei Bulhu (Attack) ana bol kha uvin ahi leh Oya Pakang Report jeh hinte ana tipei un, amanla Potpo ding message joh lungtheng sel’a ana pehji joh ana hije. Pu Pakang hi Education lam ah hetna sang ana neilou vang in Custom khankho leh Nunkho ana hen anuleh apan phungmin ana putsah toh kilhon in thusei leh houlim ana them in, gamle nam phungle chang ngailutna sang tah ana neijin ana hong phal in amaiso leh athuseija kon in mihem lungmon naleh kipana ana pe jouvin Kol le Vai, Sap le Leng hon jong ana ngaisang lheh uve.
BANJOM DING………..
Source:
KHOHUI News
