Home Kuki Black Day Story Pu Lalkhohen Thangeo thi dan thusim

Pu Lalkhohen Thangeo thi dan thusim

27
0
Pu Lalkhohen Thangeo
Pu Lalkhohen Thangeo

13TH SEPTEMBER, THE KUKIS BLACK DAY

By- L. Seikholen Khongsai,
Tuibong, Churachandpur.

5th September, 2018 (Wednesday)

Thubul chomcha:-
Mihem limnle mel putdan kibahlou dungjui in lunggel ngaito leh natoh thilbol jong akibang jipoi. Pu Lalkhohen jong Namsubga dinga miooimo tah khat chu anahi e. Mizo National Front (MNF) ah Senator anahin ajo chanin pan analan, MNF min a Mizoram Statehood ahinmu phat un, alunggel athakang anatoh athilbol jouse tuchan hin Mizoten ipia apansah lamu hetdoh ahi naipoi.

Chubanin Kuki namsunga boina jouse ah alhaile leh khonunga Nampi kihuh hing theina din thachol louhel in analhailen, thil hahsa tampi ahin galkaipi banjom in NSCN (IM) hon India sunga Politics ahin bol uvin, Sah-Solam Gamkai atamjo hi Naga History a kibulphu sahding lunggel anri laitah un, History ho anungvet uleh Kuki te thusim leh Kibulphu na ngensen ahiphat in India Govt.injong Muivah jah ah Gam leiset nadelna jong Kuki te ahin Politics nabol hi phachom ponte ngadoh tan anati peh ahi. Chuphat a Kuki te hi akisuhmang louleh khonunga achanding umlou ahetphat a 1990-1997 sung chu lungmonga cheng Kuki te chunga buhnem changsuh atho a mi chujat eina tha khah u ahi.

Hiche apat a chu 1993 kuma Kuki Inpi ahinchohing kit uva, Nagaten Kukite chunga sum lepai adon uva mitha mimat abol u angah uva Chamna thu seija, kihoutoh a kicham ding anati laitah uva chu Pu Lalkhohen Thangeo jong Kuki Inpi Manipur, Vice President panmun anatuh laitah ahi. Chujeh a Nampi thalhenga kalsonna chan a chollou hela vaikon jing chu anahi e.

Chutia kitha kimat aban achalbe nalou dinga kiloikhomna khat anasem doh u ahi. Hichi Committee for Restoration of Normalcy [CRN] hi Kuki Inpi le UNC cham na thu sei na dia kiloikhom na kiloikhomna dinga alangto gel a kinoptona noiya anasem doh u ahi.
Hiche thu a jong Pu Lalkhohen chun “Hatleo hen chamna thu sei ngailou ahi,” tin anaseije.

Pu Lalkhohen in CRN a kicham nadia ijat kisei jong le Muivah a kon kicham na aum thei lou ding ahet phat in Tangkhulte lunggel dih lou chu Naga dangho hetsah ding ana gon ahi. Hijeh chun 4th April 1994 nia KCC
Assembly Hall a CRN kikhopna a chun hitin ana sei e, “Kicham na aum na thei din a district sunga Kuki thiho le in le lou kihal lha ho longman le thilman chu a district a um Nagahon pe hen lang, chuti ma chun Naga athi le in le lou mangho chu Kukihon aman pe hen,” Tamenglong leh Chandel a kon lamkaiho chun hitin ana donbut u ve, “Keiho mithat in la kapang pou vin, kho hal in la kapang pou vin iti longman le thil mangho man chu kapeh diu ham?” anatiuve. Chule Naga dangho kom a Muivah politics bol aphatchom lou ding dan ho ana seipeh ji in, “Muivah in a changseh a ipi aboldoh ding ham, aphat chom dingle Tangkhul sunga neocha bou phat chom na apohlut jou ding ahi.”anati.

MEETINGA AJAODAN:-
Nisim 2nd October 1994 nia CRN kikhop na a kihoulim na ding chu – National Highway 39 a kitha kimat ngah nading, chu anahi e. [Kukis and Nagas appealed to make all highways safe for all [CRN]. Hiche ni a chun Pu Lalkhohen che dia kigo chu chekit talou in Kangpokpi bus parking agaphan in ana kile kit tan ahi. CRN kikhop nachu 6th October nia din vohchon ahin, hiche a ding chun kou na amu kit in ahi. Pu Lalkhohen ajaolou le kikhom thei lou ding gei in thu aum in, hijeh chun ama jong kikhop na a chun aga pang in ahi. Hiche pet a chu Kangpokpi le Imphal kikah chu bus tou man Rs. 20/- ana hi in, Pu Lalkhohen achanute khat hin Rs. 40/- bus touna man din ana kipoh e. Kuki Christian Church office ah alutpa in Pastor Khuphen Chongloi in CRN kikhop na mun, Manipur Baptist Convention gate chan scooter a aga thah in ahi. Gate’a chun pasal thum le li ana dingu amaho chun – lamkaipu, nahung gei lheh e, kikhop na akipan tai, ana ti u ve. Hiche nikho masang jep a chun Kuki / Naga gamho jon ding bus parking chu mun chom cheh in ana um in, ahin hiche kah a chun bus parking jouse chu Khumanlampak Bus Terminal a thakhat a ahung kikoi khom in, Pu Lalkhohen akimat jou a kipat bus parking chu achom cheh in ana kibol kit tai.

PU LALKHOHEN AKIPUI MANG LE KITHA:
Nisim 6th October 1994 nia MBC Conference Hall a akikhop nilhum ujong akichaitan, Kikhopna kin jouse jong akichaitan hijeh chun Pu Lalkhohen chu Kangpokpi last bus a chedin Khuman Lampak Bus Parking mun anajon in, hiche a chun last Bus chungah atoudoh tan ahi. Aman jong kichamna ding lekha leh poster jouse leh ijakai apoh a thachol tah le gimtah a uma, bu nelou lai ahijeh jong hintin thachol tah Bus amalang touna achun akinung ngaijin akichol tai. Nidanga nilhah lam pung 3:30 a Kangpokpi Last Bus cheji chu Oct, 6, 1993 nilhah vangchun pung 4 ahitah vangin Bus chu akipatdoh naipon ahi.

Pi Lhingneilam Lhouvum, Kangpokpi toh kakihouna lhon a athilmu ho jouse asei dan in, Maruti Car khat ah pasal phabep ahung lhailut uvin Bus window a konchun Pu Lalkhohen chu akou kou jeng tauve. Hinlah amajong ache pon atouth beh in ahi. Chutia donbut louva a umphat in pasal khat chu Bus chungah ahung kaldoh in, “Hepa ipidinga nakikouva nahung kumlhah louham, tunia kikhopna chu seilouva khoh khat a umin, iseichai tengu leh che nan nate” atin aman jong, “Seidinga lom jouse kisei chai ahitan tun seiding a um tapoi” anatipeh ahi.

Hichun pasal mi 4 langchu Bus ah ahung kahdoh uvin Pu Lalkhohen chuahung puodoh uvin ahi. Pasal khatpa chu Pistol aladoh in, koima nachaloh thei loudiu ahi atin pistol achun mi adoi le le jengin, hijeh chun Bus sunga tou koima apaongam jong a um tapoi. Hiti chun akailhauvin Maruti Car sunga chun ahenglut un, ahivangin Pu Lalkhohen jong akitom in, akeng langkhat gari sunga alut loulai jeh chun Gari jong achesoh vah theipon ahi. Akidel nalam un gari jong akihot lap lap jengin akipatdoh vah thei tapouve. Hichun nah nah in agari uchu akipat doh in, amuh akam asip peh vangun Pu Lalkhohen chun O sangtah in ahinsamin “Kuki Chapa Khatbeh na um lou uham” tin apengin apeng mangjel jengin ahi. Iti lainat um hitam hichenikho pichu, koima ahuhdoh ding jong a um tapon, huh hing na ngaiya apen ging jengjong mohseh anahitai. Hichun Khuman Lampak Bus Terminus apat chu Lamlong langah ana kipoh mang tauve.

Hichun Pi Lhingneilam Kangpokpi jong numeise cha ahivangin Bus a kon chun akichom lhan Maruti Car nung chu adel jengin, apeng in, Eimi khatbeh na um lou uham hungdoh unlang anung del tauvang tin apeng jengin Khuman Lampak achun suhlhai toulhai atho jenhin ahi. Police Seciruty ho koma jong aseijin hinlah koiman adonpeh deh pon, koima ima seingai a umpoi. Hichun Misao gas langa alut in Imphal sunga Kuki veng ho komah Landline phone anabol uvin phat chom khat jouvin mi phachompi akisutouve.

October Nisim 6, 1994 nilhah chun Kangpokpia aji le a chaten apa Pu Lalkhohen vailhun ding anangah uvin hinlah athil alo tilou imadang ahung vailhung tapoi. Hichun Pi Lhingneilam in insung mite kom ah thilsoh umdan chu hoitah in seingamlou sasan kiphalam tah chun anaseipeh in thu umdan chu analhut in ahi.

Nini nithum chu gamtin gamtang akihol in, Kukite kiloikhomna chom chom le Imphal sunga Eimi veng gollhang hon iti ahol vangun mudoh leh hetdoh ima ana um tapon ahi. Khonung vainung a thu kihe chu ahile Pu Lalkhohen chu Joyland [tongkoi] kiti khomun a hi kithat a along chu Hafta War Cemetery kom a twilah a Bora a alol kitansa chu anakoi u ahitai.

POST-MORTEM REPORT:
Post-mortem report dungjui in amachu Nisim 8th October 1994 jingkah matah a kithat a, atahsa a chun chemcha a akisut chen chen naleh ki-at chan chan na mun 45
atahsa ah maha apon ahi. Hitia chu Pu Lalkhohen Thangeo chun Kuki Nampi khonung khankho ding gelkhohna jala lunggel tampi leh aphat tampi sumanga na tampi anatohna ban a Kuki mina galmite khut a ahinkho anato doh ahitai.

Tunichan in ama kitha thu hi Govt.langa kon hihen hoilangsanga kon hijong le seilouva umjing nalai ahin, vannoi mi hetkhat chule Kukite dinga na tampi leh thil tampi anaboldoh Pu Lalkhohen Thangeo thina thua ama insung miten tuni chan a lunggila chamna anei thei lou nau hi umjing nalai ahi. Leiset ah thutan vaihom neijou hih jong leuhen, Chung Pathen in adalhah insung mite phungvuh intin, Nampi a din apa tohbangkhai tongthei ding chanupha chapa pha kisep hen lang, khang kichaini geijin Pathenin lungmon lhamon naleh damnan umpi jo tauhen…

Articles hi anom lheh e nati le anoiya “LIKE” button khu meh in writer ho na support nau vin, chule seinom nanei le anoiya comments nahin bolthei u ahi.

Site nalut a notification pop up hung potji ho allowed anabol ji uvo maban a thusim thah ahung ki post teng notice namu ji diu chule Bell button a subscribe kiti chu meh un.

Previous article28th OBSERVANCE OF THE KUKI BLACK DAY 13THSEPTEMBER2021
Next articleLHALAM CHOLLHANU-II

LEAVE A REPLY

Please enter your comment!
Please enter your name here