Home N Lhungdim POLITICS A KISUH GENTHEI LEH KIPHULAH HI THILPHA HAM?

POLITICS A KISUH GENTHEI LEH KIPHULAH HI THILPHA HAM?

39
0

Hiche hi politician tamtah in abolvangin aga apha akimupon ahi.

Asun
N.Lhungdim
Thangting House
Molnom-West

n lhungdim
N-Lhungdim

5th August 2022

2014 apat in kum tamtah Congress hon vai ana hom uchu ahung kikhel in BJP in gamvai ahinpo in ahi. BJP lamkai Narendra Modi Prime Minister ahung hi in thil tamtah na ahin tongin anatoh lah a 2016 a Demonitization abol chu ahoimo pen leh aphamo penkhat ahi. Aman atup chu black money suhbei nadinga kabol ahi ati in ahinla demonitize kibol sum chu 97% sanga tamjo bank ah akinungmu in ahi. Hiche langchu achom in kikoi tadi leh BJP Govt. ni na ahung kipat in Home Minister Amitsah kiti toh ahung kitho leh mi tamtah ahin sugenthei in adehin India sunga 14% bou cheng Muslim hon athohlal penin ahi. BJP ho geldan a India sunga hi 80% hi Hindu ahin Hindu ten vai ahomdiu ahi ti achepi jeh uvin Hindutva kiti min in na tamtah atong uvin atup thupi pen uhi Hindu state Hindu gam hisah dinghi atup pen uh ahi. Muslim honjong athohlal behseh jeh uvin Hindu ho mun 2 mun 3 ah melse tahin ana that uvin ahinla amaho dingin jong thilpha ahidehpon ahi ajehchu aphalou bol jouse Govt. in amandoh in amaho dingin hesohna cheh alhungtan ahi.

Tuni a iseinom pen uhi Govt. Agency Income Tax ahilou leh Enforcement Directorate mangcha in politics a amuda jouseu raid abol uvin hiche lah a athohlal penchu Nehru family ahin ahi. Tuthah in Enforcement Directorate in Sonia Gandhi leh Rahul Gandhi vei tamtah akou uvin thudoh jatchom chom tamtah ana dong uvin ahi. Hiche holah a aboipi khat uchu National Herald kitileh Young India Limited kiti company chungchang a thu kholdoh tampi anei uvin hiche ki engbolna hi achombeh a amaho family hi suhnem ding leh suh kichat ding tihi atup pen uh ahi. Nehru family hi India chamlhat muna dinga sacrifice habol pen chuleh political suffer no.1 hidiu ahi. Prime Minister masapen Pandit Jawaharlal Nehru ahin aban ah Indira Gandhi anahi kitin abankit ah Rajiv Gandhi anahi in aban kit ajong Sonia Gandhi Prime Minister hidinga hithei hijongleh ama lhengin Dr. Manmohan Singh ana ngense in vangset umtah in Indira Gandhi leh Rajiv Gandhi hi ana kikaplih in amani lah ajong Rajiv Gandhi chu akithadan melse tahin ana kiso in ahi. Hitobanga family politics a thohgim hi India ah family dang aumpon ahi. Tun Modi leh Amitshah in vai ahin hom in amani hi politics a imacha thohgimna neilou ahilhon bou in ahi. Ahinla anatoh lhon in aval behseh ta in Tehse hon mu neiding atiu ho tobang toh akilou in ahi. 2024 leh General Election umkit ding ahi in BJP Govt. choikit ding atiu hi atup pen uh ahi in ahinla aumchan uhi ivetleh tahsan aumpon ahi.

Anaijep eiho Manipur ajong 2017 apat in BJP Govt. ana um in Chief Minister N.Biren Singh in ana lamkai in ama jonghi seiset theilou mihem khat ahunghi in ama seise jouse police amatsah in asugenthei in ahi. Adeh in amahi Pro Naga ahijehin Naga ho asuhgenthei akihepon ahi. Ahinla asuhgenthei hohi Kuki chate ahin ahi. Eiho hetthei dinga victim no.1 chu George Thangkholal Haokip kitipa chu ahin in thinglhang miho kivahna loulho chungchanga athusei chu ajahda jehin police ho amatsah in ni 5 tah lockup ah a um in chuleh Indira Gandhi Tribal University a Professor ahina suspend abol in chuche keo hilou in a Govt. quarter muding jong a cancel peh in ahi. Pu George Thangkholal injong bolding ahetlou manin politics ah alut in tukum MLA election atet in ahinla vangset umtah in ana kai tapon ahi. Victim no.2 hetthei penchu Mark Thangkhomang Haokip Human Right Activist hiche pa jong chu Police ho amatsah in tuni chan in jail ah aum nalai in ahi. Chuche tailou jong koi tobang ama jahda ding thusei ho jouse police in aman in suhgenthei in ana um jui in ahi. Anukhahpen in hiche Manipur Autonomous District Council Bill chungchang ah ATSUM leh KSO General Headquarters ho dei dungjui a Bill pass ding douna in ATSUM lamkai 4 leh 5 aman in tuni chan in police khut ah aum nalai in ahi.

Hiti ho jouse hi ivetleh Manipur ahi thinglhang gam achom a kipohna Soo noi a umho leh Govt. of India kihouna noia Territorial Council kitihi akumu bailou leh Manipur a thinglhang gam le go ho forest ho alahsah ding kigot a chuleh thinglhang miho thaneina ahithei chan a lahpeh ding agot hi vangset umleh da umpen ahin ahi.

Achaina in iseinom uchu politics a ki engbolna kisuhgenthei nahi asugenthei hohin aga amu hi apha in akihepon ahi. Hiche hi ivetleh Manipur a N.Biren Singh vaihomna jonghi asotding tahsan aumpon ahi ajehchu achaloh danhi mi kithopi ding khantousah ding hilou a suhgenthei ding suhnem ding tihi athupi joh ahi. Ahinla kidangtah a BJP ho slogan hoitah chu VIKAS atiu khantouna kiti hi ahin hiche hi ivetleh amin mai mai a kisei a atohhi mikhantouna ding hilou mi suhgenthei nading hijoleh akilou in ahi.

Articles hi anom lheh e nati le anoiya “LIKE” button khu meh in writer ho na support nau vin, chule seinom nanei le anoiya comments nahin bolthei u ahi.

Site nalut a notification pop up hung potji ho allowed anabol ji uvo maban a thusim thah ahung ki post teng notice namu ji diu chule Bell button a subscribe kiti chu meh un.

Previous articleTangkem /Kemchon / Kem
Next articleMANIPUR AUTONOMOUS (HILLS) DISTRICT COUNCIL (ADC) THU A MANIPUR GAMSUNG BOINA

LEAVE A REPLY

Please enter your comment!
Please enter your name here