NUNGAH KAHI TAPOI

Life Story

By: Naocy Haokip (9957110489)

(Part-V)

Recap: Chuin car sunga alut’in airport jondin akitol mang tauvin alhum mang kahsen kave mang hel’in, hiti chun kasenji ngaitah injong gamdang jondin eidalha kit tan ahi. 😭

SANGGA GENTHEI KAHINKHO

Hitia kaji injong eidalhah kit phat chun lung ngapna ding kanei tapon, phattin lung lengvai tah-in hinkho kamang jingtan ahi, alangkhat’a kajipa sopinu Rosy chu chapang cha ahivangin thil umdan ahethemin hijeh chun eilungset lheh jengjin, kabol katoh chan eikithopi jin, katehpin eisolna mun jousea eilhonpi jin ahi.

Kajipa potdoh jouva konin katehpin eigimbol jin, abang le an nelouvin kaumjin, an neh ding phat jongle toh ding umlou sasan agong thu thujin, an neh dikon le eibol sahjin, an anehval jouseu twi anasun khum jitan, gilkel kathohna nikho jong atam lheh jengjin ahi, abangle kong le bel sop ding chu molsang tah bangin asethom jengjin, vonsop ding jong machine in nikhat sung asop ding abahsah jin, ajat jat’in eigimbol jin ahi, hijongle kajipan eilungset danho kagel jin, chule ama koma kakitepna ho jal’in jong lhasetnan kanei dehpon, insunga eichensah pouleu ahijenge, tin kathoh ham ham jin ahi.

Kajipa potdoh jou lhakhat ho jouva konin kalung avai vai jengjin, kaloh asoh jin, an jong kadu jipon, imacha bol ding jong kalungjo pon, ka ihmut bou asoh soh jengjin, hitia genthei tah a kaum lai pet chun, nilhah khat khojin ding kon ahitan, katehpin eihung kouvin, lunghang tah-in hitin ahung seiye
Katehpi:
Naokhocy, gang chelin chen lang bazaar a me ding gacho loiyin, akin thei penin hung kino in.
Kei:
Henu, kho jing ding hita hi o, ka changa kache ding chu kahung khojin ding ahitan jingle che tange, jan noiya changa vale ding chu jukham tamji toh kadat thei poiye.
Katehpi:
Chen katile chetang, numei thase ipi ham thu akisei seh le kilepna ding nahol jing, hin kiche loiyin,
Tin sum jathum eipen, choh ding list kavet le jathum man kitoh chet ajih kit’in kenjong
Kei:
Henu, auto beh a kache lou ding ham? Hung kino in neitin kenga kache kit le itih le kahung lhun ding ham o?
Katehpi:
Hilai kah a auto nasei nahlai onk..! Sun le janin kavah jingin auto sauto kasei khapoi, nasum du lom lom hi phuiiiii….
Tin achil eiphi khumin keijong hand bag khat chu kaki choiyin kachetan ahi.

Gate kagah khel chun kanao Rosy chu tution a kon ahung kile in, kei eimu phat chun eihin juigo in, kenjong
Boi, kenga kache ding ahi, hungda tan Henu in naphal lou ding kei eipho kit ding ahi.
Rosy: Uu, agamlhat toh kengin che hih o, nalel ding ahe.
Kei: Boi, bahara ding sum umlou chu o, henu in akitoh chet dinga eipeh ahi, anaumtan gache vah inge, kahung gei le Henu in eipho lhon ding ahi, katile abag sung chu amai maiyin sum somnga ahin ladoh in,
Rosy: Uu, bahara in hin mango, kengin che hih o, kalungse val’e.
Kei: Boi, hoiya sum nalah ham? Kon napeh ham?
Rosy: Uu, jingkah a school a kache a Henu in eipeh kaman nailou ahi.
Kei: Ohhh, chutile kikoi ta boi, Henu in nadong le ipi nasei ding ham? Kikoi tan che tange.
Rosy: Uu, kilah o tia kanung ahin del’a eipeh phat chun, ka mitlhi kakitheh in, abeng kachop in.
Kei: Kakipah e, kanao damsot’in, nangin nei lungset behseh e.
Tin keijong kache tai, bahara ding umta jongle che lang beh kengin kiche hen tin, gari man louvin kache tan ahi.

Lamkim lah kaphah chun, kakom tah a bike khat ahung kinga phut’in, pasal khat’in eihin houve
Pasal: Excuse me, hoija che ding nahim? Hung touvin, seat a onge.
Kei: Me cho ding mai mai kahibouve, nei ngah hih-in, chetan.
Pasal: Sister, nakiphatlam ham? Hung tou jengin, bazaar lhun nading saotah aum nalaiye.
Kei: Bro, neihin khoto kakipah e, hijongle lampi dunga nungah ho joh ana lapa tan, Kei NUNGAH KAHI TAPOI, che jengin akhoh tapoi.
Pasal: Sister, atahbeh a nupi nahi hitam?
Kei: Henge, bro nupi kahitai.
Pasal: Sister, I’m sorry tin a bike a start in achepai tai.

Genthei tah-in bazaar kagalhungin kino tah-in thil ho kachon, kanaovin sum eipeh chun nehthei ama dingin somthum man kachoh peh-in, somni chu bahara dingin kaki koiyin, kakile phat’in auto in kakile tan ahi.
Compound chan auto a lut ding chu gamtin kija kit ding ahijeh chun intoh kinai vel’in kakumin, hichan auto a kahung vang chun ka thil choh chu ka domlut lel lheh in ahi.

Nah changsal a in kilhunga katehpi chu ahung kisen kit’in
Katehpi:
Hibanga kigil kel ta a, tugeiya buhon nailou, hoilang mi thase room sunga chu athiden go nahim? Kin tah-in buhon min loiyin.
Kei:
Kahung lhun pan chu o, Henu, von kakikhel ahibouve.keijong kagil kel valte.
Katehpi:
Min gilkel aseile akelsa, toh ding akisei le kijahmo sah inlang
Tin aphun bel bulin, hichun kanao chu ahungin
Uu, einin an hon hite o, atin nehthei chu kapen ken kitchen kajonin kino tah-in an kahonin me kahon khoh laitah in, ka room sunga ka phone aging ging jengin kaga pickup le kajipa anahin
Kei:
Hello
Kajipa:
Cy, hijatvei ki call a ibol’a na pickup lou ham?
Kei:
Kaboi jep a hichu o..! Uhaopu nahi hammo?
Kajipa:
Ummmm, kahiye, keinao nadam hinam? Itoh nabah ji hinam? Bangalore kalhunin ka sim card chu akimang thei tapon, kahin hou theilou tua chu sim card athah kakisem doh bep ahi.
Kei:
Kalhi kitheh pumin Uhaopu kapha jing nauve, dama naum jingle kakipah lheh e, taonan kahin kop jinge, kahin ngai jidan.
Kajipa:
Kenjong kangailou nahisah ham? Nang beiyin hinkho nomin kamang poi, ti he jingin nao.

Phat chomkhat seh kakihou lhon nalaiyin, katehpi ahung lunghang kit tan, phone ngenin boiyin lang, namehon aka chai ding hita tin ka phone chu ahin satlha in cement chung senaa ahin neile achipdeh jengin, hichangei jong chun akenga achon chip deh in sim jong aheh bal’in kachungsenan aneiyin tu chun phone in haboiyin boitang tin eidalha tan ahi.

Kalhase behseh jengin hakan kakap tan, kajipa toh kikihou mat pana ipi kati ding hitam tin kalhase behseh jengin, ka phone chu ka op toh kasip beh-in kakap chai thei tapon ahi.

Kajipa potdoh jou kal lhathum avaltan keijong kakihet lou vanga naovop chu kana hitai, phat le nikho ache jingin, katehpi le katehpu kachunga lunglhai theilouvin aumjingin, jankhat kitchen a an kahon laiyin katehpi chu koi toh kihou ham vang kahepon phatah a kangaile
Haopu teni chu, pha pha lhon hinam? (………) Apha lheh e akivop khom jing lhon poule hung kingai lhonin tin ahung kile phat le hin juisah tauvin, ahin tichun kalung amongmo lheh jengtan kajipa kahou nomin phone la kanei tapon, taona kamangjin nitin kahin kho chu lhilon nan bou kamangin ahi.

Jankhat hi katehpi le katehpu kihou lim gin kajan phatah a kangaile hitin asei lhone
Katehpi: Haopupa, imihemnu ujong hi naovop dan hile akilom e, Haopu umsunga la gai louva, akihet doh lou vanga hi jan noiya vah vah a min ahin jolgai kit hitante.
Katehpu: Hida ding ham? Jingle hospital a puiyin lang naovop ahile suhlhah peh ding ahi.
Katehpi: Hichuba kagel ahe, achuti loule Haopu chunga kilep intin, imi isa hilou chunga kiboi naisai ponte.
Katehpu: Hichu Chapa khatseh kineiya hiche numei chavai jeh-a hi minset lo ding ahi, anaovop suhlhah ding anop loule insunga kona nodoh ding ahitai.
Katehpi: Ahijenge, um umle inkal kichoi leuva eikigap lo diu ahi.

Hitia thudih loutah a akihou lim lhon kajah chun kalaina behseh jengin, jan ihmu louvin kajanka tan, laina tah-in kataovin
Pathen ibol’a hibang lom loma vangse kahim? Insung mi bel dingla kanei tapon, tuhin kalaigil ga somai muding kinema kigaldot jinga, hitia kacha kasunga bulhing nailou eikithapeh kit ding hitam? Ahiti ding thou thou le kei hinkho lamang jengtan, tin lonlhi in kalong khovah keiyin ahi.

Ajingin hospital a eipuiyun, kanaovop lhathum val ahitah dan eiseipeh uvin, hichun katehpin Doctor pu komin nao chu suhlhah peh uvin noti ahijeh a gai ahibouve, ahintin kakicha behseh jengin Doctor pu kenga kaboh khup’in Doctor lungset’in kacha neisuh mangpeh hih-in, tia kataole Doctor pu chun nangho inlangin cheuvin lang suhmang ding natiu jongle hospital mun danga gabol tauvin tin apot tan ahi.

In kalhun lhon chun katehpin ei dongin
Katehpi: Nao nasuh lhah ding ham? Ahiloule in nadalhah ding ham?
Kei: Henu, kanao vop hi kaUhaopu toh kacha dihtah ahinai, nei suhmang peh hih beh-in, in hi kadalhah a hoilai kajot ding ham? Henu lungset tah-in neisoldoh hih o.
Katehpi: Chutia nao nasuh mang lou dingle Haopu cha ahipoi tin, signature bol’in ahilou le kasuhlhah peh thou thou ding ahi.
Kei: Henu, lungset tah-in hiti chun neibol hih-o, kajipa hung kile teng ka chunga lhase ding ahi.
Katehpi: Haopu in sot’in jidang aneitai, moh a nang lungset tah banga asei vanga keiho kihoutoh dim dema kabol thu ubou ahi, Haopu hi naji ahi tapoi, apute chanu toh kicheng ahitai.
Kei: Henu hithei ponte, hibanga eilungset a ibol’a jidang anei ding ham, kakoma akitep naho jong sumil ponte.
Katehpi: Hahaha, kasei tah chula, aman anaovop jong Kei cha ahipoi, anasuh mang peh tauvin, kaum sunga chu alungdam dam nadinga kalungset bol maimai ahi, atibouve, hin hiche hi sign nabol loule nao kasuhlhah peh diu ahitai, Doctor kakou ding ha? Ole sign nabol ding ham? ati phat chun hakan kakap in,
“Uhaopu, neilungsetna chu hichan bouva kichai ding hitam? Hinkhoa nang tailou numei dang ve taponge neiti hilou ham? Tunia nathisana kijil nacha hinkho suhmang jeng dinga thu nasei ngam hi nakidange, hinven, kei khankho ding nagel lou tah jongle nalaigilga khankho ding beh nagel le iti ham? Na thisanna kijil nacha hi nang dinpi jou hih jongle chun keivang kasenji nang dingle icha masapen dingin hinkho phal ngamin kapang jinge, angdang koiyin lang nacha hinkho suhbei din go jongle chun, nang cha ahina mang deh ponte, nada sasan hepa tin nahin kousah deh ponge, tunin nasilung mol jeh-in nacha ding jong jaocha nasotai, nikhat le kacha hin ti hih beh-in o, dalheh jong leng kacha khankho ding gelnan hiche sign hi kai tange, tin HAOPU CHA AHIPOI tin sign chu kabol tan ahi.

Hichun, katehpun insunga jong hitia kichem chavai dehduh a mi nakijol gaisah insung suminse nahi, tujan maman kipot jengin insunga naum theilou ding ahitai, tin kasamin eikaiyin gate pam langa eisondoh in gate asung kam tan ahi.
Hichun ka tha neisunin kakap in, hepa kot neihon peh o, hoilang kasuh ding ham? Bel ding sopi khatbeh jong kaneipoi, hepa neilut sah kit’o tin gate panga chun sotpi kakap’in ahi,

Hinla keiya dingin kot ahung kihongdeh tapon, jankhang lang ahung hitan, dap kasa lheh jengin, athahbeh-in ka-Ugin kalunga ahung kilangin,
He-U, tuni geiya neihin hol tah lou hi athi nahim? Ahing nahim.? Khatvei beh nei kihetsah le ipi tiham? Tia kaka jing laiyin kajipa nao Rosy chu ahungin gate ahong theipon, eihin kouvin
Rosy: Uu, tin lhasetah-in ahung kap’in
Kei: Boi, ibol’a nahung pot ham? Kile loiyin Henu in navoh ding ahi.
Rosy: Uu, ka-U phone bol’o, Henu ihmut kah a guhthim cha Henu phone kahin lah ahi atin
Kajipa chu kin tah a ka call le ring ache che jengin hinla a pickup mong mong pon, chuin kintah in message ka type in hitin kaseiye
“Uhaopu, neilungsetna hi achom tangeiye na, hinkhoa dia iki lungsetna tuni hi hinkho lhing hitam? Uhaopu, angdang belin neimil ta jongle chun, kadamsung kum khon neibolna hi hin sumil ponge, lung lengvaiya nahung kile kit niteng keijong thingna apulsa hung mit thah kit bangin ajat som a hoijon ana mit thah kit tange, chuni tengle kasenji le kacha tin neihin kou kit tahih in, na angdang san nan hung hamjang phatan, bel ding neilouvin sangga ken jansot noiyin bel ding ki holin kana chetai, ka message hi namu tengle keila ana um tapong katin, hin reply tahih-in.
Sangga kei Naocy

Hitin message kathot’in a deliver phat’in ka delete in kanao komin hitin kavailhah e.
Kei: Boi, kakipah e, nangin neilungset in, thil umdan jouse nahesoh keiye hijeh chun He-U hung kile nile phaten ana seipeh inlang, ajithah nutoh nomtah in hung chengkhom tauvin, kei nulepa neilou kahi jeh-in Henu le hepa lung lhaina kachang joupoi, chetan boi, nikhat le nang kahung vil kit ding nahi.
Rosy: Uu, kangai val’e, kenla imacha kasei theipon, damsel to Uu, tin lhase tah in akap in, amitlhi katheh peh in kasol tan ahi.

Jan sot ahitah jeh chun gari lhaile jong aum tapon, khoto pen a dukan khat’a chun katouvin khovah kangah tan ahi, daplai ahijeh chun kadap sah-in kakithing khovah hel’in ahi, ajeh chu ponve khamtang khat kakive in del padih deh khat kaki-o ahin sweater jong kaki-ah lou ahi, kasam asao jeh chun kasam chu kalham lhan kasam chu kakisil mai maiyin jingkah khovah thim thim ahitan kungbul le mi kimah don hin gari jong khat le ni alhai pantan ahi.

Chuin kiumsot le min eimun te tin hoilai jot ding jong helouvin road chu kamoh jui jui jengtan ahi, nisa ahung sohdoh tan hoilai mun kaphah a hoiya um kahi ham jong kahepon, sun nisa noiyin jong kalungdon manin road kajui jui jengin kagil akelin katha him him aum tapon, nilhah lang 2;00pm vel ahiphat’in kalel behseh jengin lampi koma thingphung khat noiya chun katouvin kakap’in lampi a gari lhaile ho chu mi-ngol bangin kamoh vet vet’in ahi.

Chutia phat sotpi katou jing laiyin kanung langa bike khat ahung kinga in, pasal khat helmet akhuh jeh chun koi ahi kahepon ama chun eihin houvin
Bike tolpa: Hello tin eihin thamin
Kei: Hello.
Bike tolpa: Hoija che ding nahim? Hilaiya chu ipi nabol ham? Tin meilhei paovin eihin houvin
Kei: Hoija kache ding kahepoi, suhna ding hetmo manna hilaiya tou kahi.
Bike tolpa: Nakho hoilai ham?
Kei: Ka chenna pen kho jong aumpoi, hilai hi ipi kho ham? Tin amajoh kaledoh in ahile
Bike tolpa: Hiche lai hi kho ahipoi, Naga ho gam ahibouve, ipi tia kho nanei lou ham? Angol thim nahim?
Kei: Ahipoi, angol chu kahipon kaji neina a kainko ten eihin nodoh uvin keila nulepa neilou kahin che na ding kahet lou ahitai, tin kaumdan le kathil to ho aboncha kaseipeh phat chun.
Bike tolpa: Chuti ahile keiho in hin beltan, tua kho jing ding hita umna ding naneideh loule ken napui tange, tia a helmet ahin lahdoh le high school kakai laiya ka class teacher pu anahin
Kei: Sir, katile lungdong tah-in eiven
Ka Sirpa: Nei het ham?
Kei: Henge, Sir kahe e, tin school minle ijakai kaseipeh phat chun
Sir pa: Ohooo, Naocy kilom lou tah-in, lungkham hih-in kajinu jong mipha ahin, Kei koma naum ding ahi tichun kakipah lheh jengin ahi, chuin ajinu phone abol’in
“Hello, ka student ho khat suhna ding helouvin aumin, nikhat sung an nelou twi donlou ahitai, kahin pui ding ahin, an tuitah anahon peh-in, atin hiti chun ka Sirpa bike a chun katouvin a inlanga eipuitan ahi.

In kalhun lhon chun agamlha lheh jengin, jan 7:00pm alhing tai,ajinu chun phaten eina lemin, kisilna ding twi jong anasem tup’in, kakivon ding vonkhel tampi jong eipen eilungset dan chu kidang kasan kipah jong kakipah lheh in ahi, room ong khat chu kei umnadin agongtup in, an kaneva set’in lungmong tah-a kaum phat chun eihoulim pin
Madamnu: Nao, ipi tia hitia naum ham? Thu themkhat nasei thei ding ham?
Kei: Madam themkhat hilouvin abonchan seipeh inge, tin kahinkho thusim abonchan kaseipeh tan ahile, amajong amitlhi akitheh-in.
Madamnu: Cy, lungneo hih-in, keini koma lungmong tah-in umin, nain bangin gelin lang, kiphalam hih beh-in, insunga hin nang nabolse ding koima aumpoi, keijong na-Unu bangin eigelin, kanaonua kasem nahitai.
Kei: Madamnu keng katuh-in mitlhi pumin kipathu kaseiyin ahile.
Madamnu: Cycy, lhisoh hih-in, nalhiso ding kaphal poi, itih a kihekhalou tin gel hih-in, nahin dan ijakai kahesoh in nang sangin na kasajoi, tin kamitlhi eitheh peh-in, eilhamonin nomtah in kicholdo tan, nalel behseh e, tin eilup sah-in ama apot tan ahi.

Hichejan chun, Pathen koma taona kamangin kipathu kaseiyin, hibanga eingailu ding mi eikoipeh Pathen chu kathangvah in ahi, hichenia pat chun kalungnat kalhaset naho kamil domtan, Pathen lungset in kanaovop jong lha sagi ahitan damsela kanavah nadingle kasunga naocha damnadin katao jingin ahi.

Next Episode
KANAVAH LEH KA-UGIN TOH KAHUNG KIMUTO

*NUNGAH KAHI TAPOI Part-V*
Hichan hin akichai tai, aban jingle sim jom kit taute, lunglut tah-a simchai jouse chunga kakipah-e, asim jouse Pathenin phatthei naboh cheh-u hen.