Home Crosby Haokip PHOLVA TE NUPA THUSIM

PHOLVA TE NUPA THUSIM

141
1

(The Hornbill Story)

By- L. Seikholen Khongsai,
Pantha Chowk, Srinagar,
Nisim 29th September, 2017 (Gansemni)

Masang tehse hon nupa kingailu ho hinkho amuji tengu leh Pholva te nupa bangin akingailu lhon e tin anasei jiuve. Ipi jeh a kisei ham tia kagel gel ji teng leh Pholva te thusim khat ana um dan kahin hedoh tai. Vacha hijat lah a Pholva tenupa kingai lut dan leh Pholva achalpa in anu nu angailut danhi mihem nupa khat kikah a kingailutna sanga thupijo in ahung kilangdoh joji in ahi.

Hiche Pholva tenupa thusim hinkho thupi dan leh loupi dan imudoh theina diuvin Pholva thusim chomcha anasim ute.

Vacha lah ahin Pholva tehi hina jatchom beh khat aneijuve. Amaho hi gancha dang banga anu (female) leh apa (male) kimoh chen chen kimoh mat mat ahipouve. Mihem te banga kicheng uva, hiche akicheng teni chu adamsunga koima dang toh kitimat jong bol lou, kinaitah a kivop jong abol lou helu ahi. Amani jupa bouchu munkhat a gehkhom a, lha khom jilhon ahi.

Amani jong atuithah phat ahung lhingtan hijeh chu Achal pa chun anu tuithahna ding in Thingko avupeh tan ahi. Hiche thingko avuchu thing-go ahin thing len thimtah ahi. Api tuithahna kham ahiphat in ajinu chu thingko sunga chun a umsah tan ahi. Hichun achalpa chun thingko chu thingnai ahol in ol ol in ahubit bit tan ahi. Ahuhbit jouchun ajinu muhseh (peak) seh seh donakham bou ahomsah tai.

Hiche nikho apat achu achalpa chun anudinga chu neh le chah ahol peh a an athah peh tho ahitai. Ajeh chu Pholva chalchun ajinu alungset dan chu an le twi ijakai jouse gim le chol’a sun nilhum lhum a ahol peh a nengchet a athah peh jou ahi. Ajeh chu atui athah a anou akeu kahse a ajinu chu koimacha toh akimuto sah jilou ahi. Apichun atui athah a a op kit a anou ahung keu doh jou hapta khat jouteng leh thingko ahuhbit naho chu akho lhah kitji ahitai. Hiche akholhah dan chu twi alhoh a, thingnai toh ahal a thngko a abeh hochu ol ol a aah doh ji ahi.

Hiche nikho apat chu anupa lhon a anoute ding an ahol lhon ahitai. Avhal chun gamlha tah tah a kon a anoute nehding an ahinpoh ji a apichun kotbul a kon a anoute chu avahva ji ahi. Pholva jong Vakhu banga anou tamlou ahi. Atamtah le 3 ahiji e. Anou te ahinvah khang lhon tan lha li lha nga ahiphat un ako akon in ahung kichom doh un alengle thei taove. Hiti chun kipah tah in atui thah a pat in anou keu gei imacha boina umlouvin ahung khanglen taove.

Akum kit in atuithah phat anou keuphat ahung lhing kit tai. Achal injong abol ngai bangin thingko avut kit in ajinu chu thngko sungah alutsah in ako ho chu amuh dona kham bou a onsah in ahubit kit tai. Apin jong atui atha’n a optai. Atui oplaitah in Pholva chal jong nikhat ahung kile tapoi. Jan khovah in angah in ahung kile tapoi. Ajingin angah kit in ahung kile kit deh poi. Nithum nin jong ahung kit tapoi. Hichun Pholva pinjong agel in, kajipa hin eidalhah a mundanga Pholva anudang toh kidei hitan te tin agel in akap kap jeng tai. Amala Thingko homsunga um a leng doh thei louvin a umin agil kal tan, alungkham tan akap kap jeng tan ahi. Akom avel a ama gentheina hetpeh dingla a koima um tapon, thingko sunga apen pen vangin koiman ajah peh tapoi. Ajipan adalhah mang jelchu agel leh alha asie behseh jengin achainan ni 7 lang ahiphat in gilkel a thidinga a um phat chun atuiho chu khat khat in adon ji ji tan ahi. Ni 1O alhing tan ajipa ahung deh tapoi. Hichun nehding jong anei tapon, lunggel seithei la ahipon, aka aka jeng phat in nelou chalouva a umna nikho asot toh ahileh ahet lou kah chun alungset pen angailut pen ajipa dalhan akosunga chun anathi den tan ahi.

Alang khat a Pholva chal chun angailut tah ajinu dinga sun nilhum lhuma neh le holna a kisei mo a, gunchu tah a alungset pen ajinun atui a op a gentheisah louhel a anou keusah ding atilai tah chun gamleng pasal khat in anakap lih khatan ahi. Gam lengpa la akipa lut lut in kho ahepon ahi. Alangkhat a kilungset tah a hinkho mang teni Pholva te nupa chu tonsot a dia kikhen na nikho anahi tai. Lungset umtah Pholva te nupa vang thinan akhen lhon tai. Athi nikho lhon chun achal chu kho heman louva thi ahin anuvang chu lhase tah a thi ahitai. Thinan akhen lhon chu lungset dihtah ahi.

Mihem te hinkho ahin gentheina tampi a umin ahi. Neh le chah hol hojong agentheijin, insunga inna tongho jong thilnom ahipon, gentheina tamtah umhen lang gimna tam jeng jongleh nupa kah a kitahna lhaso lou Pholva te nupa banga kingailu kikungset chun gimna ho le genthei naho jong kipah tah a athoh jou thei ahi.

Moral:- Naji chunga nakitah nachu lhaso hih in, thichan geija dia kitahsan nahi lhon tai.

©️ copyright: Hiche articles hi asunpa phalna bei a mundang a publish louding in temna ahung kinei in ahi.

Articles hi anom lheh e nati le anoiya “LIKE” button khu meh in writer ho na support nau vin, chule seinom nanei le anoiya comments nahin bolthei u ahi.

Site nalut a notification pop up hung potji ho allowed anabol ji uvo maban a thusim thah ahung ki post teng notice namu ji diu chule Bell button a subscribe kiti chu meh un.

Thusimbu mobile app ki install nom hon Google playstore a “thusimbu” tia search nabol u le namu lei diu ahi.

Previous articleBOINA MEIPI AJING’E
Next articleHeo! Icha teni beh kichen sah hite

1 COMMENT

  1. Athusim k ngai nom in hin la lhing jep k sa hih e them kht bulhing deu in jih be lechun kati
    K dem ahipon k lung nachim lou ahe nei hethem in
    Kaki pah e.

Comments are closed.