KIHIL NATHEI THUSIM
Seiboi Khongsai
8473864702
Khosung khat ahin Nungah Melhoi tah khat ana umin, amanu chu ahileh aneo apat Pathenin ama Vahchoi ding leh a Loupi na thupha sei phong le ding in ana lheng doh in ahijeh chun Nungah melhoi tah in asem’in, chu jong leh thusei thep nale laa sah thep na jong ape than ahi. Hi bang chun Nungah nun jong athusei thep nale a laa sah thep naho chu ahin mangcha pan tan, akho sung uva Houin kikhop naho dung in thu ho ahin sei yin, la ho jong ahin sa pan tan ahileh akho sung miten jong ahin ngaisang pan tauvin ahijeh chun houin kikhop na keu hita lou vin kin le dong anei u jong le thusei nale laa sah naho chu ape jing jeng tauvin ahi. Hiti chun Nungah nun jong Pathenin apeh Thusei thep na, La sah thep na chule amelhoi naho chu ahin mangchan Function neo neo ho lah in aga jao jin hiti chun akhanghoi lai chu Pathen Vahchoi nan limtah le kipah tah in ahin mangcha jing tan ahi.
Nikhat agam sung uva hin La sah kitet na Gospel I CON thupi tah khat hi ahung um tan, gamsunga Pathen vahchoi lasah na lama thanom jouse jong aki go cheh uvin, hi bang chun hiche Nungah nu jong lasah na lama lunglut mi ahi jeh chun gajao ding chu atha anom lheh jeng in ahijeh chun anu le apa komin phal na aki thum min, anu le apan jong achanu lhon chu lasah na lam hoa athanop chu ahet peh lhon jeh chun ama ni nupan jong anop peh lhonin, chu leh thakhat a ga che khom ding in jong achanu chu asei peh lhon tai. Nungah nu jong nasa tah in aki goin la sah ding dan le umchan ding dan ho chu aphat ahi masang in ain mun uvin aki them chuh chuh jeng in ahi. La sah kitet na ding nikho ahung lhin phat in anu le apa toh kipah tah in ache khom tau vin, amun aga lhun uvin mipi chu atam lheh jengin, chuleh aki tet khom pi ding Nungah Gollhang jong atam lheh jeng uvin ahi. Hiti chun ama ho jong laa sah chu ahung ki tet tet jeng tauvin mi 50 lah a chun mi 25 to bang chu akai jou tapou vin akhon khon nan Nungah nu pum min mi 11 bou ahung kai jou tau vin ahi. Chu in ama ho se jong nasa tah in athep na cheh ule a aw nei cha sun’u mangchan ahung kitet pan kit tauvin ahileh mi 6 chu ahung kileh lha kit tau vin, hi phat chun mi 5 bou chu Finale ki tet ding in ahung um doh tan hijeh chun lamkai hon jong jing mama le Finale round chu nom tah a che pi kit ding in asei uvin, khat vei ding in Icon chu akhah tau vin ahi. Nungah nu te jong akho lang uva aki nung le diu chu ahah sat jeh chun akho neiten pha tah in Haosa pu te in chun alhun sah tau vin, Haosa pun jong Nungah nu chu amelhoi nale ala sah thep dan chu aguh a ana ngai noma ana hoisah jeh chun aman jong Nungah nu kom chun hitin asei tai “Boinu, mi chu jat lah a Finale na hung kai jeng chu kahin pahcha lheh jenge, na melhoi jong gah hou kit nalai chule nala sah dan jong nathem lheh in kei tah in jong ka ngai nom lheh jenge, Gospel ICON hi na chan tei ding ahe Boinu” ati peh in Nungah nun jong “Kipah ume hepa, nang beh in them nei nasah ah, nei hin pachat hi kaki pah lheh jenge” atipeh in ahi.
Ajing nikhon angai bang in Finale round chu ahung um kit tan, la kitet nave dingin amasa asang in michu asang ajan ahung tam cheh tan ahijeh chun Nungah nu jong aki song lel lhen jeng in hi jong leh aneo apat Pathenin thusei thep nale lasah thep na ana peh jeh chun aki sonlel na jouse chu apai lhan lunglen tah in aloi ho chu toh Gospel ICON la ding chu ahung kichu uvin, athep na cheh ule a aw nei cha sun’u mang chan nasa tah in laa sah chu aban ban’in ahung ki tet pan tau vin ajo na pan in Nungah nu phat chu ahung hitan aman jong Pathenin apeh lasah thep nale a aw gei na chu nasa tah in ahin mangchan laa chu ahin sapan tan ahileh, la kitet nave a pang examinal hon jong Nungah nu la sah dan chu pai ding ima cha amu doh pou vin chule mipi ahung kikhom jousen jong a lasah thep na keu hita lou va amel jong ahoi jeh chun Nungah nu lasah ngai nom ma chu mi atam lheh jeng uvin ahi. Hiti chun Nungah nun jong la chu geitah in ahin oilha jou tan, chu in lamkai ho akonin Result phon doh na ahung umtan vangphat um tah in hiche Nungah nu chun Gospel ICON chu ahin mu tan, chule anu le apa jong mipi mu ding le het ding in stage chunga akou doh uvin, Nungah nu jong pha tah in atilkhou uvin thil peh doh na jong anei pai pai tau vin ahi.
Hiti chun Nungah nun jong Gospel ICON ahin lah apat chun amin ahung ki thang in koima ahe lou aum tapon ahijeh chun mi jousen kin anei u jong le hiche Nungah nu bou chu akou kou jing ji tau vin ahi. Hi tia mihet thei le mi min thang khat ahung hidoh phat chun kiletsah nale hoitho nan hinkho ahin mang pan tan, min ngaichat na neitah a ahung kou teng u jong le amasa pen in sum athum jin, athum jat ape jou lou ding ho koma chun ache ji pon ama tijat jat lhingset a ape jou ding ho kou na in bou ache jo ji tan ahi. Mi min thang tah ahung hina jong ahung sot cheh cheh tan ahijeh chun Pathen jong ahin sumil doh tan, chuleh Pathenin thusei thep na, Lasah thep na, chule Hoina apeh ho chu Pathenin eipeh ahi ti hepha louvin kiletsa nale hoitho nan ahin mangchan, hi bang chun Gollhang kichem chavai lele hoto chun nop sah nan a khanghoi lai chu mang in chule che lou na ding ding leh bol lou ding thil ho ahin bol jing tan ahi. Phat sot tah Pathen hepha talou va ama nop sah na lam pi jenga hinkho ahin man na jong ahung sot cheh cheh tan ahijeh chun Pathen lunghan na nasa tah in ahung chang in, Pathenin jong ama vahchoi ding le ahin na thupha sei phong le dia ana deilhen sa ahi jeh chun ama hepha louva hinkho aman na akonna ahung khah doh kit a avel la ama ahin vahchoi kit na ding le akisih a apenthah thei na ding in phat chom khat abol gimin atahsa chung in nat na alhun sah in ahi.
Hi bang chun Nungah nu jong hoima cha pot thei talou vin ain uvin aum thim beh jeng tan, chu leh hi banga mihoinu chu ahoina jong aniseh in achul lha houi houi jeng in, ni dang bang talou vin tehse abang jeng tan ahi. Hiti chun niseh in anat na chun ahin lel cheh cheh jeng in Doctor them tah tah hon jong iti ajen uva Lou le ai ijat aneh sah uva injection ijat akap chai vang uvin apha chom him him ta pon ahijeh chun Doctor hon jong alo naje ahe tapou vin ahi. Hi banga anat tah vang chun alunggel him him akhel naipon aki letsah nale ahoi tho na chu abol jing in ahijeh chun Pathen pa jong alunghang cheh cheh in hanat in ahin nat sat tan ahileh Nungah nu jong athi ding bangin ahung um doh tan iti auma ipi abol vang chun anop sah thei him him tapon an le twi jeng jong aneh lou na jong ahung sot thim jeng tan ahijeh chun pao jong apao jou tapon thale jung jong anei thei tapon ahi. Nikhat itih a aum khah lou le ahet khah lou beh Pakai lhacha Pastor khat hi Nungah nu te in na chun aga chen Nungah nukom chun hitin aga sei tai.
Pastor pu : “Sopi ipi jeh a hito banga dammo nahim?”
Nungah nu : “Kahe poi Pastor pu. Ipi jeh a dammo kahim nahet le neisei peh in”
Pastor pu : Aphai sopi naki het lou ding mong ahi. Ipi jeh a dammo nahim nahin sei peh tange, nang hi naneo apat Pathenin ama vahchoi ding le hinna thupha sei phong le dinga nahin deilhen jeh a thusei thep na, lasah thep na chule melhoi na, nahin peh ahin, hinlah nangin na thusei thep na, na melhoi na chule na lasah thep naho chu nape pa Pathen na suh mila nang ma chih nale thep naa na hung kison na Pathen deilou lama hinkho nahin mang khah tah jeh a na chunga Pathen lung hanga hiche nat nahi na chunga alhun sah ahi tai. Hi jong leh Pathenin nang hi ahinna thupha sei doh ding le a vahchoi la sa dinga na deilhen mong mong ahi jeh in phat nape nalai yin kisih inlang Pathen komin ngaidam kithum le chun nadamo nahi hung bei ding ahin, hin lah na chonset na hole Pathen deilou va hinkho na hin man naho naki sih louva ngaidam naki thum lou le na hinkhoa hiche nat nahi nachin jinga akhon nale Tonsot a Damun na ngah ding ahi” tin asei peh in ache doh pai pai kit tai.
Nungah nun jong Pastor pa thu hung sei chu ache doh akon chun agel gel jeng tan ahileh dih asa lheh jengin, ama jong mitlhi va chut chut pum min a room sunga chun Pastor pan asei bang chun Pathen komin kisih in Tao na amang in Ngaidam akithum tan ahi. Hiche nia pat chun anat na chu ol ol lin ahung pha pha in, amel jong ahung hoi pan pan kit tan ahi. Jan ahung kiphat in Nungah nun jong anu le pa komin jong Ngaidam aki thumin maicham jong asemkhom uvin, ama ho jong alup na cheh uvin aki chol tauvin ahi. Jankhang lang hin Nungah nu chun amang to bang atah to bang hin Cinema a kive bang khun ana chonset naho le Pathen hepha louva ama nop sah na lampi jenga ana kiman chah na ho jouse chu hoi tah in aban nei chan ahin kimu doh tan, apet pet in ama nu jong haki sih in aki sih in lhiso pum le kap pum chun avel’in hitin Pathen komin Ngaidam aki thum kit in “Lungset them ka Pakai ka Pathen nangma hepha louva kana chon naho le kaset na jouse neihin ngaidam in, ka hinkho a na deilam pi kajui thei na ding le kaneo apat na hinna thupha sei phong le ding le na vahchoi la sa dinga neina deilhen na banga avel la nangma song jing puma nahin nathu le na vahchoi la ho kahin sah kit thei na ding in, Phat chom khat neipe kit in Pakai” tin atao vin phat aki thum tan ahi. Ki sih puma ngaidam akithum jeh chun Pathenin jong atao na asan peh in Nungah nu jong anat na akonin ahung dam doh in ni dang bang bang in amel jong ahung emsel jeng kit tan chuleh Tahsa lam hihen lang Lhagao lam hi jong le ahal mama jeng in Penthah na dih tah jong ahin nei tan, ahijeh chun gam sung hoa Pathen thupha sei phong le ding le Pathen vahchoi la sa ding in a khanghoi lai phat chom cha sung chu dih tah le kineo sah tah in Pathen thu le la ho in ahung ki mang cha pan kit tan chule mitam tah in jong hiche Nungah nu lasah ho le athusei naho a kon chun ki semthah nale Pathen kimu doh nan ahin nei lo tau vin ahi. Hi bang chun apenthah masanga a aw ngeina le a lasah thep na sangin ahung penthah jou hin a aw jong ahung angei cheh cheh in thusei hihen lang lasah hi jong le amasa a sangin ahung them cheh cheh jeng tan chu jong leh min jong ahin ngai sang cheh cheh jo tauvin ahi. Pathenin jong Phatthei aboh jingin Lhagao vin jong ahal mama jengin hiti chun phat chom cha anei sung hin Pathen Thusei nale Pathen Vahchoi nan akhut, akheng, alei akam chule atahsa pum pi chu Pathen Vahchoi nan amang cha jing jeng tan ahi.
KICHAI TA.
Lunglut tah a asim jouse Pathenin Phatthei naboh u hen lang chu leh Thusim akon na kihil nathei hohi Kisem Thah nale Phat chom pi nan ana mang cha tan.
Thusimbu Machal jing thei na ding a pan lanom ho kipah tah in lem ahijing in ahi anoiya button “Click Here” khu meh utin details anasim ute.
