PENKIT SENKIT NUNG TENG KHANKHO’N EITOH TANTE
–Lelen Kipgen
(7629033890)
Part-III
Hitia eibol chai un kho jong ajing tan, kakhut kakeng akan kit un, bora/anchang bag sung khat a hin eikhum lut uvin, Buh neokhat sunga chun kot eikam khum un eidalha tauvin ahi. Kapumin thisan kahitan, eijen ding eisasah ding koima aum tapoi. Kathisan ahalon behseh jeh chun kadang achah in, ahinlah twi khon khat cha jong eihin dop peh ding mi koima aum tapon ahi. Jan asot tan kapum’a thisan kahiphat chun Sihmi/Chenai ten eihin bop tauvin, amaho chun athi eihisah’u ahitai. Katin-na maha ho eijep nau maha pon cheh chuh lah chu ahin pet tauvin ahile anat dan, anat dan.
Haosapi le Haosapu chung’ah kalha ase’n “Kei jong nakho changa lhon kahi hilou ham? Kapa adamlaiya nangni dinga kitah tah a pan alah a, nangni’n jong namonpi pen lhon hilou ham? Ibola tua ama aumtah lou phat a adamlaiya atohphat naho nasuhmil lhon a mona neilou acha kei jeng jong neitha lhon hitam? Kanei kagou, ka-inchen ka-louchen nasuhgep lhon bangin nangni nei le gou, inchen louchen jong gamhel hen. Kei mona neilouva neitha lhon bangin nangni jong min nathat lhon hen” tin kap pumin kalhaset valjeh chun kasam-se jah jah lhonin ahi.
Jankim lang ahitan Bora sunga chat thei louva kikhumtup chah kheh kahijeh chun kathajung ho akonin kilhon-jang ding kanop lheh vangin Bora neocha khat sunga kikhum a kikan chah kheh kahijeh chun kachat thei tapon, chapang kan kakap tan ahi. Mihem hilou Gancha jeng jong hitihin kibol lom lom ponte. Ibola kei hibang lom lom a hi eikibolse hitam? O-leh kei hi Gancha sang’a jong nemnung jo kahi hitam? tin kakap kap tan ahi. Jingkho hung vah leh eikithat ding ham? Oleh dam’a eikilhadoh ding hinam tin lunggim nan kadim e. Mona neilou kahijeh chun jingkho hung vah leh damin eikilhadoh nante, tin kinemin jingkhovah kal chu kangah lel lheh jenge.
Kathoh lel behseh teng chapang kan kakap jin “O, kahinkho, Idia genthei hahsat nan bou eilonvuh jing ham? O, chung Pathen hitia genthei kathoh jing sangin kahinkho hi lamang jeng tan, kathoh jou tapoi, kathoh-gim val tai” tin kakap jitan ahi. Hitichun jankhovah in lhiso kanan hinkho kamang tan ahi.
Jingkho avah tan, damin inlam eikisol tante tin kinepna lentah kaneiye. Golhang mithum ahung un eikhumnau bora/anchang bag sunga kon chun eiladoh uvin kakhut kakeng kikanna khao ho alham un ahile Jankhovah a bora sunga kikhum chah kheh kahijeh chun kathajung ho akon den in, kachat thei tapon ahi. Kapumin thisan kagep bet but in, kamit kamai apom in kho jong kamu tapoi. Hitichun chomkhat kaumin ahile kathajung ho ahung kilham jep jep in, kahung chatthei jep jep tan, chu in dingdoh in, eitiuvin “golteho tua hoiya iche diu hitam?” tia kadoh leh eidonbut pouvin, keijong kadingdoh in lamjot ding kagot leh lam kajot thei tapon ahi. Chuphat in kakhut in eiman uvin, katum katel in eikaidoh tauvin, a-Camp nunglang u, gammang langa chun eikai tauvin ahi.
Mun-janglai khat a hin eikailut uvin “golteho hilaiya hi ipi ibol diu ham?” tia kadoh le alah uva khatpan “golpa nopmo sah hih in, naphat alhing tai” tia eidonbut phat chun kakap thongje-ju jeng tan ahi. Ken kanahet phah lou vanga chu kathi phat analhing dan ahitai. Chu in mikhatpan lekha khat leh pen khat eipen “na-inkote navailhahna nom, naseinom aum leh hiche lekha a hin jih in” tin lekha le pen chu eipe tan ahi.
Lekha le pen chu kakilah in, midang tampi um jong leh kanaonu din lekha kahin jih tan ahi. “Boi, tunin hepa komah kei anache masa tange. Kakitepna naosen Walker kachohpeh theilou ding ahitai, nei ngaidam tang o boi…!!!” tin kalhi, kanap toh lekha kahin jih tan, kamit a kho athim in, kho kamu tapon ahi. Kahaina-hu abei kon a lhahna thu hung kisei chu seiding atam lheh jenge. Kanaonu kangaiyin, kanu kangaiyin, kalungsetnu Themneo kangaiyin kakap kap tan ahi. Kanu leh kanaonun kapotdoh lam jong ahet lhon lou, kei hilai gammang nuoiya Gamsa thi’a kathi jeng ding chu na kasa nalom lom e!
Pasal kahi vang chun kineosah tah in kap pum pumin lekha eipe pa, golhangpa jah a chun eitha louna diuvin kataovin, ahinlah aphachom tapoi. Hitichun lekha kajih jou phat chun lekha leh pen chu kakoma konin eilahpeh tauvin, kakhut kanung langa akan un, kamit akan un, kanung’ah mikhat in AK.47 khat in kap jeng din eidoi tan, eikap kigotan ahi. Kathina ding second khat second ni, tia simtheiya aum phat chun lhaset nan kadimin, haka’n kakap tan ahi. Penpi lungsetna kanei hin gentheina tincheng eilhut khum tai. O, PENKIT SENKIT NUNGTENG KHANKHO’N EITOH TANTE.
Hitia kana boi cheh chuh laitah uvin, “khongai tadi un, kap nai hih un” kiti O-khat kaja’n, kamit kikanna ahin lham un ahile alamkaipau anahi in, thudoh eibol kit e. Ken jong kathikon ahivangin kahina louva kahiye tithei ponge, tin kapang chah kheh nalaiye. Hichan geiya eibol vang uva kapan chah kheh phat chun aman jong ahet them hitantin “hin nung puiyun” tin eidalha tauvin ahi. Alamkaipau room a eipuilut tauvin, chu in alamkai pauvin 1000/- eipen, ngaidam akithum in, eihin lhadoh tauvin ahi. Eihin lhadoh phat uvin agang gangin a-camp u kahin dalha tan ahi.
A-Camp uva kona kahung pot vang chun hoilang gam ahi jong kahe tapon, lampi khat chu kahin moh jui tai. Kathajung ho akonin, eivoh nau kathoh lel val jeh chun lam jong kaha jot thei pon, ol-tah in lam kahinjot tan ahi. Kathisan ahalon val jeh chun kalung avaiyin, kamit kamai, kapum’a kapom jeh chun kho jong kaha muthei pon ahahsa lheh jenge. Hitichun hahsatah in lam kahinjot tan ahile Go ahung ju kittan, eivoh nau maha ho’a gotwi ahung chan ji chu anat ji dan, anat ji dan. Kathoh lel val teng kakap ji tan ahi. An nelou twi don louva kaumna asot tan, kathisan ahalon val kit leh, eivoh nau kathoh lel val jeh chun katha abeiyin, kalung avaiyin munkhat a hin kho helouvin kalhu den tan ahi.
Kalekha thot kanaonu kom alhung tan, an nelou twi donlouvin kapul anadou tan ahi. Sopi pasal khat seh keibou kingaina a einei ahin, ka-lekha thot amua kathi ahet phat in, lung ngapna ding neilouvin genthei tan in hinkho anamang tan ahi. Alangkhat a kei eihung puidoh niu, ajing chun Haosapi leh Haosapun keihi athitai, tia kholhang anasap lhon le khosung lhiso le kanan ana dimtan ahi.
Hitichun keijong kahung khangdoh in ahile tapkong kom, khangpheiya kana ihmu in, sam-buh ah nungah khat in chang anasu e. Kakhah ahet phat in kipah tah in ahung lut in, amel chu kaven ahile Themnu toh akilou lheh jenge. “heu, natho hitam? nithum lang kho helouva nalup ahitai. Heu nagilkel em?” tin eidongin, kakitho doh kigot leh kakithou thei pon, chuphat in aman eihung phong doh in, “kadang achah e” katile twi khon khat ahin soh in eihin donsah e. Akihe kha bon kihilouva kam fel-jet a eidonbut chu kidang kasa lheh e.
NUNGAHNU: “Heu, nang min ipi ham? kei Lhingnu kahiye”
KEIMA: “Kamin boilen ahiye. hoilanga kona hilaiya hi um kahi ham?”
LHINGNU: “Nikhat a chu henu le hepa toh loukon a kahung u le lampi’a kho helouva nanaum a chuphat a in a kapuiyu nahiye”
KEIMA: “O, kakipah’e. Nangho umhih leu chun hitia kadam doh jou ding katahsan poi. Ahile henu le hepa hoiya che lhon hitam?”
LHINGNU: “Louva ache lhon e. Kei nang umpi dinga eidalhah lhon. Heuboilen, nagilkel em?”
Kakhut kakeng ho jong angoiyin, achat thei pon chuphat in aman bu einehsah in, hitichun kangaichat ima jouse thanomtah le pontho tah in eibol peh e.
Nilhah in anu leh apa jong ahung lhung lhontan, ken kho kanahet chu akipah lheh jeng lhon e. Kakisuhkhahna ajeh ho eidong lhonin, kenjong thil umdan ho imajouse kaseipeh lhonin ahile amanin jong inlam kile louva amaho koma kaumden din eijol lhonin ahi. Inlam kile jong leng umna ding lhunna ding kanei tapon, umden ding chun kakigellha tai. Amani hin chapa anei lhon lou, chanu khatbou anei lhon ahin eihomtho lhon ding chu kahen, inlam kile louva umden ding kanopdan ho kaseiyin ahile akipah lheh jeng lhon e. Amaho jal’a damdoh kahijeh chun natoh natham a kithopi ding kadei jeh a jong umden ding kigo kahi.
Kakisuhkhahna ho adam lou lai jeh chun khangpheiya ka-ihmu jin, jan teng khosung golhang ho ahung kholaileng jiuvin, amahon jong kahinkho thusim ahet u ahijeh chun eingailu thei lheh uve.
Banjomkit ding.
©️2020, Lelen Kipgen, All Right’s Reserved
