Home Lelen Kipgen PENKIT SENKIT NUNG TENG KHANKHO’N EITOH TANTE

PENKIT SENKIT NUNG TENG KHANKHO’N EITOH TANTE

644
0

PENKIT SENKIT NUNG TENG KHANKHO’N EITOH TANTE


-Lelen Kipgen
(7629033890)

Part-IV

Kakisuhkhahna ho adam lou lai jeh chun khangpheiya ka-ihmu jin, jan teng khosung golhang ho ahung kholaileng jiuvin, amahon jong kahinkho thusim ahet u ahijeh chun eingailu thei lheh uve. Keijong kahung damdoh tan, natoh natham kahin bolthei tai. Tulaiya Kani-lei ibol bang uva hichelaiya jong chu Ganja-lei ana kibol ji ahi. Kaumnate chu chapa neilou ahijeh un eihomtho lheh uve. Atoh lel atham lel jouse’u katongin, kabol in, kaneova pet natong mi kahijeh chun kakisin thei lheh uve. Sun leh kilungtoh tah in lou kakon khom un, jingkal nilhah in Lhingnu twikhai thingpoh in kakithopi ji’e.

Ganja meh phat ahitan, sun teng loubuh ah nungah golhangho toh Ganja kameh jiuvin, jan teng jong leh hiti chun Ganja kameh un, nehthei kakisem un anom lheh ji’e. Ahinlah kanaonu kangaiyin, Themnu kangaiyin lunghel in hinkho kamang jinge. Keihi athia eikoi diu ahitan, kanaonu hin ipiti hinkho amang tadem? Themnu hin ipiti hinkho ana mang tadem tin phattin in lunggim nan kadim jingin ahi.

Lhingnu toh asun ajan a kakivop jing lhon phat chun aguh in kahin lungset doh tan, aman jong aseilou vangin aumchan, akhan chan a konin alunggel, alungthim akihe theiye. Chuleh khosung mi nu leh pa, loi le gol hon jong eiphatsah lheh uve. Ahinlah phat sotpi kimuto lou hi lhon tajong leng Themnu toh kingai kahijeh chun, dongma neiya Themnu suhmil jeng ding chu kanom kit pon ahi.

Jan teng chung Chollha vah nuoiya loi le gol cheng toh guitar kakipoh un kamao jiuve. Thinglhang a chun anopna tah khat ahi. Tulaiyin vang thinglhang hijong leh guitar kipoh a kholai dunga mao, guitar kipoh a som-leng hi umbehseh taponte.

Ganja bolphat jong akichai tan, keijong inlam kaphah nom lheh tan ahi. Umnom lheh jong leng inlam kaphah lou akhoh dan ho kaseiyin ahile, kaumna ten ei-itt lheh uve. Ahinlah alou theilou ahitah jeh chun eiphalpeh tauvin, keijong inlam che dingin kakigong tan ahi. Jan in loi le gol ho ahung kholaileng un, lunghel tah in kahung kilha tauvin ahi.

Jingkal an neh jouvin che dingin kaum tan ahi. Lhingnu in Thel-na ah buchun eigonpeh in, inneipan vailhahna taona eimanpeh in, keijong kahung kipatdoh tan ahi. Khosunga kona gamlha beh lou munkhat a hin kemdo khat aumin, Lhingnu in hichelai kemdo chan chu eihung thah e. Kemdo a chun chomkhat katou lhonin,

LHINGNU: “Heuboilen, nang naum leh ilungmong a tua nang nachedoh ding chu hahsa kasa val e, kan-itt val e”

KEIMA: “Lhingnu, ken jong kan ngai uvin, kadalha jou poi. Hijong leh alouthei louva inlam kaphah angai tai”
tin kadonbut in, aumchan amaiso kavet leh alungthim a um aseinom seidoh theilou ahi chu kahen, “Lhingnu, ven inlam kaphah ding insung mite toh kahung kihoutoh ding nang puiya kahung kit ding ahi” kati le mailhaisel in eiven,

LHINGNU: “Heuboilen, nahung kile ding kinemtah a kana nga jing ding nahiye. Damselin chen lang Pathen in nalhonpi jing hen”

KEIMA: “Lhingnu, ekimuto kit kahsen Pathen in eiumpi jing lhon hen, keijong kachena ding asaovin, ajokhat tou leh vaigei kha ing kate, che tange o”

Hiti chun lunghel tah in kahung kilha lhontan, keijong inlam kahinjon tan ahi. Kakho-u chu nikhat a lhun jou na thei ahilou jeh chun khokhat a kageh pa in ajing in kakho-u kajontan ahi.

Kakho-u jot jeng ding chu kalung anom pon, kanaonu kom joh kajon tan ahile nilhah lam nidan 4.00pm vel in kagalhung e. Leitol kaphah in kanaonun eimu phat in ahung lhaidoh in, kangong akoiyin achuti kaa tan ahi. Amachun athia eikoi ahitan, athisa kinung mukit tobang kahitai. Thil umdan ho kaseipeh in, chuin maicham khat kasem uvin, kanaoteni in a kaumtan ahi.

Ajing in ka-inn itobang nam gave inge tin inlam kajontan, kagalhun leh ka-in jong ana kiphe lha tan, anaum tapon ahi. Haosapi le Haosapu thilbol ahiding kagingmo thim in, lhase tah in ka-in mun a chun kana lhisoh in ahile kaloipa ahungin kei eimu mu chun lungdong tah in eive e. Kakom ahung lhun in chebai kakibol lhonin ama jong alhisoh liuve.

Chu in kakihoulim lim lhonin, kenjong thil umdan ho imajouse kaseipeh in ahile aman jong “O, chuti chuba hinte, nang nahung puidoh jou u chun Haosapu jong ahung puidoh uvin athat tauve” aumdan chu kathepmona umlouva eihehset jeh a chu ama joh chu CID dinga aginmo uva, amajoh anatha dan u ahitai.

Kei eihung puidoh ni-u ajinga chu Haosapi le Haosapun kei hi athitai tia kholhang asap lhon a ka-in jong aphet lhon a, kanei kagou jouse jong ana suhchatvei deh lhon dan ahitai. Hiti chun kakihoulim lim lhonin, kei hitia eibol nau jong Haosapi le Haosapu jeh ahi kagolpan jong kicheh tah a ahet doh phat in Haosapi leh Haosapu chunga alunghang lheh e.

Chu in Themnu dam a um hinam? ipiti hinkho aman em? tin kamunom jeh chun kagolpa kadong in ahile ama jong amai muoldeh in akunlha’n tol lang ave tan ahi. Kagolpa hitia aumphat chun kalung adongin kadong kittan ahile “nang nathi thu ajah phat in ama jong lhase akisa val’in ama leh ama akithat tai” tin eiseipeh kittai. Hiche thu kajah phat chun kalha ase val’in hakan kakap tan, anu leh apa chunga kalung ahang lheh jenge.

Chomkhat jouvin Themnu lhan a che din kaseiyin ahile ama jong anom in Themnu lhan kajon lhontan ahi. Lhanmol kalhun lhonin alhan-song kakoiyin Chapang kan kakap tai. “Themnu, kan-itt nalom lom e, ibola hitia hi kisa jeng nahim? Na lhagao khankho ding jong kigel tangem. Ibola hibanga hi lungmol nahim?” tin thu jong seithei louvin lhase tah in kakap kap tan ahi. Kaha kaa behseh jeh chun kamit kamai apom leu tan, chuphat in kagolpan eilhem in, ahinlah lhepbi jouhoi kahi tapoi. Nilhah lam ahitai “Themnu, lhase hih in eini kilungset lou jong ihipoi. Nachun le najo lungmol jeh a hichangei thil lhung ahitai. Kahin lha tai, lunglhaisel in chetan” tin kalhadoh in, inlam kahinjon lhon tan ahi.

Lhan a kon kahung kumsuh lhon, lampi kahin phah lhon hin lou langa konin Haosapi in thing ahin po in, kei eimu mu chun athilpoh chu tol’ah alehlha in, kakom ahin naipheiyin lhisoh pumin ngaidam athum e. keijong kalung ahang val’in “itia kisih thei hih le chun kilom a” katin thudang seilouvin kaumin ahile, ataotho phat chun “thil jouse ase ding sejouta, abel ding bel jouta, ibola tua ngaidam nathum ham? Mi cha thi hen iti leh eicha joh thi ahi. Mi chunga thilse igon leh eichunga lhung ahi. Imajouse kichai ahitai. Akoi akoiyin chihtheina a inei diu ahimeiye.” tin kahin dalha lhontan ahi.

Keijong ka-in kalou aumlou phat chun khosung’a jong kaum nom tapon, kanaonute kholang kajon kittan ahi. Hitichun kanaoteni koma kaumin, amanin jong eihomtho lheh lhon e. Kanun jong dam a in kahung kile thu ajah phat in ahungin, “boi, nei ngaidam lhonin, kei jeh in nagenthei lhon val e, nachunnu ti dingin jong kalhingjou poi. Boi, nei ngaidam lhonin” tin kei leh kanaonu kom ah ngaidam athum in “Henu, ibola ngaidam nathum ham? ngaidam nathumna ding aum poi. Munchom a naum vangin nacha nei ngailu lhonin, nei khohsah lheh lhon e. Henu, nacha hichangeiya nei ngailu jal lhonin kakipah e” tin ka-inkouvin maicham kasemkhom tauvin ahi.

Phat chomkhat jouvin ka-inkouvin kakihoutoh uvin, keijong Lhingnu kipui dingin kache tan ahi. Lhingnu jong kei eimu mu chun akipah lheh jenge. Anu le apan jong kakichen lhon ding aphatsah lhon jeh chun kahinkho’a kachenkhompi dingin Lhingnu kahin kipui tan ahi. Anu le apa jong chapa neilou ahilhon jeh chun acha bangin eikisem lhonin, kenjong kanu kapa bangin kingainan kaneiyin, kingailutah in hinkho kamang tauvin ahi.

πŸ”šπŸ”šπŸ”šTHEπŸ”šENDπŸ”šπŸ”šπŸ”š

©️2020, Lelen Kipgen, All Right’s Reserved

Previous articleJANLAI LENGNU
Next articleMINTHANG HUNG KIMAN CHAH DAN