By:-Shonkhogin (Hegin) Haokip
Maranatha Cottage Hebron Veng
Phaipijang Langol Imphal West.
9774096152.
Nangho danthu sunhole Pharisaiho sanga nachonphat nau achungnun joh louleh vangama nalut louhel dingu ahi.
Mt.5:20
Alhangpia gahvet dinga chu Pharasaiho hi michonphatah toh akilou uvin, ahinla atahtah a chu miphalhem ahibouuve. Mipha lhem kitihi itabangham itileh mimudinglai lai apha a ajep a mi mulouna khohsah louva sedeh a akoiju ahi. Hijeh a chu Bible in apolam Lhan kiloibang tabang ahiuvin, asunglam la mithigu le imanen aboh jouse adimsetne ati.Matt.23:27. Amaho chu alhangpia vetdinga chu, Pathena hat tah ngen tabang ahiuve. Ajehchu houin kaijong apotho uvin, maicham thilto thilpeh jong ahat uvin, anngola taona jong ahat uvin, bible simjong ahat uvin, nikho mandan jong khoutah a aman u ahin. Pathena hattoh akiloulheh uve. Ahivangin aphatnao ahatnao ho jouseu hi Pakai Jesu amatah in jong apahcha poi. Koi pachat sangin, ajumso so jengin ahi.
Aman hitin anajumso e, Ohe, danthu sunho le Pharisai mipha lhemho, nadau ahi ! Ijeh in em itileh nanghon Pudina le pathikhom, chuleh jira hicheng chu soma khat natoh jiuvin,dan thupeh lah alupen, thu adih a tanna, milungset ding chuleh kitahding hicheng chu nanahsaji pouve. Nanahsahji louhou chu bolmasatna nanghon nabolho u jong chu bolding ahijoi. Thilpha kibolho jouse hi, Pathen tahsan jalla, kibol ahibouvin, Ama itahsanna jalla thu adihdih a tana, kitahtah a hinkho mana chuleh mihepi kitihohi ineilou leh polama thilpha neokhat gahbol maimaija Pakai lunglhai theiding chi chu ahitapoi. Asung adihlouleh apolam itabangin kijempahleh jongleh imachading atipoi. Amhochu miphalhem atibou uve. Aman nanga kona adeichu, asunglam adih ding adeije. Asungjong apojong adihding adeije. Mimuding sehseh jep hoija lunglhai pathen chu ihou u ahipoi. Hijeh a chu, Bible in, Vo, Pharisai mitcho ho, khonle lheng chu asunglam silngim masa leu chun apolam jong ngim ding bou ahi ati. Mathew.23:26.
Pharisaihon aboipipen u hi apolam bou ahi. Amaho chonphat na hi apolam bou ahin, asunglam imacha ahephapouve. Ahinla tunia Pathen cha eihon Pharisai ho bailam tah a ikhokhel na dingu hi ipi ham itile, Pathen chonphatna chu apolam sehseh hilouva asunglam naneina hi Pharisaiho sanga Pathen angsunga santheia iumna diu hi, dihtah a penthahna neiho house chun, asung thenna/chonphatna le apo thenna/chonphatna chu aneitei tei ding ahi. Pengthah kahi tia asung thenna neilou kitichu Pharisaiho toh akikhehna umlou lai ahi. Bible in nangho Pharisaiho sanga nachonphatna asanjoh louleh Pathen lenggam nalutlou helding ahi ati. Pharisaihohi Pathena thase ahihih beh uve, Pathena dinga thingamleu ahiuvin, ahinla ahou danuhi mimuding bou akhohsah pen u ahi.
Abang khatloi deh deh jong chu, Jesun ahousen, Ohe, danthu sunhole Pharisai miphalhemho,nadau ahi ! ijeh in em itileh nang hon miho masangah vangam nakhah un, nanghola nalutpouvin ahi. Mt.23:13.Hiche thupeh jonghi tijat umtah ahi. Tulaija jong umdalou ahi. Mi pengthah dihtah lou chun, iti penthah thu aseithei dingham ? Lhagaotheng natohna amatah in ahetlouleh iti lhagaotheng thu aseidingham ? Ajehchu Penthahna le Lhagao hinkho kitihi Lhagaotheng natohna ahin, lhagaotheng tohkhahna channa kona chonset kihetdoh, chonset kihetdoh a kona chonset ngaidamna kimu, chonset ngaidamna kimu a kona Pathen thupeh ho hahsahen lang nomjongleh juidinga nopna pehjing hicheho Pathen chate chena lhongpi ahi ahi. Pathen lhagaothengin ilungthim sunga na atoh theina dinga hi ilungthim pumpi ilhagao pumpi kipehlut angaije. Chutengle bou Pathen in na hintoh pat bep ahi. Pathenin asimho jouse phatthei bohtahen.
