By Shonkhogin (Hegin) Haokip
Maranatha Cottage Hebron Veng
Phaipijang Langol Imphal
9774096152.
Chuleh themmo achan nau chu hiche ahi, van noi’ah vah ahungin, ahi vangin achonnau phatlou jehin, mihon vah sangin muthim adeijou vin ahi. ijeh inem itileh achon phalou jousen vah ahoi, achon phatlou chu kiso sal khante atin,vah’a chun hungjong ahungji poi.
John.3:19-20
Pakai Jesun aseijin, Keima vannoi vah kahi, koihijongleh kanung hinjui chan chu, muthima vahle louva hinna vah chu amu ding ahi. ati. John.8:12. Jesu chu vah ahileh achena jouse aumna jouse chu vah hijeng ding ahi. Vah kitihi koimacha adeimo aumpon, chuleh koimacha muthim lah a umnom jong aumpoi. Mikhat in vah ahin deilou kitichu thildang ahitapoi, danin aphallou thilkhat bolding agot ham ahilouleh abolhitam ? tichu hetsa ahi. Achutilouva ahileh, vah le muthim atekahpi na ding imacha aumpoi. Hitabanga chu, tunia nangin jong ijem tia vah sanga muthim deijohna nanei poupouleh, Pathen danthun aphallou ipiham khatvang naboltai ahilouleh nabolding ahitai ti hetsa ahi.
Hijeh a chu, Bible in achonphalou jouse chun vah ahoi/adeipoi, ijeh inem itileh vah chun achonsetna ho jouse chu ahinsosal ding jeh a chu, mihon vah chu adeilou ahibouve. Chutia chonset naho kichatpithei jachatpithei, themmo channeithei vah in ahinsosal thei chu aumding nahet’a a ahileh, chuche naki chatpithei, najahchat pitheileh, themmo nachanpithei ho chu nakisihpi’a aphatcha a ngai dam nakithuma pha hilou ham? mi tamtah hi achonsetna ho Pathen lhagao thengin ahetdoh sah ham, Pathen thu a kona kichehtah aumchan kiseidoh pih ham ahilouleh akisosal pih phatjongleh keneosah a kahinai nei ngaidamtei teijo tia ngaidam kithum sangin, akiletsah cheh’a, ahina laitah akisei doh pih jeh a lunghangloi jong aumdapoi. Aumchan Pakaijin ahin hetsah chu kisihpuma hinna a neipi sanga thina a neipi atamjoi. Hichehi kiletsah jeh ahi.
Bible a Saul Lengpa leh David Lengpa hinkho a konin gahveu hite, Saul lengpa chu, Samuel them gaovin, athemmona amatdoh chun, ama iti kisih am veuhite, “Chu phat’in aman keima ka chonsetai, hitajongleh katao ahi, kamite upaho masanga neijabolin lang, na Pakai na Pathen chu kahouthei na dingin kei ma toh kinungle kitin ati” I.Samuel 15:30. Kiletsah tah a kisih ahijeh chun, akisihna chu Pathenin asanpih tapoi. Alang khatna David achonsetna akona Nathan themgao pan aga sosala chu, ipi aseijem, “ Chuin David’in Nathan henga, Keima Pakai dou nan kachon setai, ati. 2.Samuel 12:13. Achonset akisihpi a akiphondoh goh keo hilouvin, Pakai koma Pathen tuchung kachon setna ho hi neingai dam pih poupouleh keita banga chonseho tamtah jong nahenga hungkile diu ahi anati. Hiche goh keo hi louvin, achonset naho achen achai 2 Samuel 12 sunga abon chan akisune.
Hijeh a chu, sopi, Pathenin, thu nangaija kona michonse nahina ho hihenlang, nangma chonchan apha ase nahetdoh sah teng olleh bol nange, tin phat vo chon kitihi bolhih beh in, ajeh chu Vohchon kiti thuchenghi Satan man chah ahoipen loi khat ahi. Hiche vohchonna thuchenga hi mitamtah amat-u ahitai. Bible’in, tunia nanghon a aw najah uva ahileh nalung tahsah hih un ati. Hebrew 4:7b. Pathen kouna awnem ahilouleh Pathen milungsetna a amivilna, tichu nahina nahetsah nahohi man tamtah ahin, nahsahmon bolhih behin, Avella namu kit loumaithei thil ahi ti geldoh jingin. Pathenin asimho jouse ahina dihtah phondohna dinga galjona petahen.
