By Shonkhogin (Hegin) Haokip Maranatha Cottage Hebron Veng Phaipijang Langol Imphal
Nanghon ja vang ja nauvin natin, Angaina je nahet lou dingu,Muvang munaovin natin, Nahet doh lou ding u ahi. Matthew 13:14.
Hichethu hi, Pathenin Isaiah Themgao koma anahetsah masat ahitai. Pakai Jesun, aseijui 12 lah a kona mikhat’in eisei lep ding ahi tihi ana hetsah ahitan, hijehchun, aman ipi aseijem itileh nalah uva kona mikhat chunla neiseilep teitei diu ahitan, amavang aseilep dingpa chu adana e ada na e, ama chu apenna penda hileh amading phajoding ahi anati ahi. Hitabang gol chun, achunga kisei thucheng jonghi, mi phabep khat dinga kisei ahin, koi hingjongleh hitabang gaosapna achunga chuho jouse chu adana e adana e, amapa chu apenna penda hileh ama dinga gamchenga phajo hing ding ahi.
Sopiteho, tunin veleu hen, mi tamtah hi Pathen thu ngai ngai jenga, ipi kiseinaham hethei lou, Pathen ama koma ipi aseinomham ti jong hethei lou, veve jenga mutheilou tamtah aum tai. Ipi dinga hitiham itileh Pathen thutep chu ama ho chunga guilhung ahitai. Adihtah a seidinga chu, hiche hi nangchunga chuding ahipoi, hiche na chunga aguilhun tah jeh in, adana e adana e kitiho chu nahi ahitai. Hiche vangset na thilho hi koi ma tumdinga hungjong ahidehpoi, akiging louho leh akigolouho jouse chung a hung chu ji ahibouve. Kingaiton, sopi, ipi dinmun na nadin ham ? Thu kiseiho hi nahetthei hinam ? chuleh namuthei hinam ?hinna a naneipi hinam? Naphat chompi mong hinam?
Mitamtah in thukisei ahetthei louna le amuthei louna hi, thildang tamtah umjongleh tulaikhanga dinga akhoh pen tah chu ahileh, mobile a ngolho, adeh a pornography, tichu milim phalou vejing ho chun, Pathen thuchu imacha hetna umtalou ding ahin, ahin vanga athisa tabang hiding ahi tai. Hiche hi tulai dammo na akhohpentah jong himaithei ahi. Hijeh a chu, hiche milim phalou ho a nakitim thei lou dinga nahileh mobile pumchoija choida chu, nangdinga gamchenga phajoding ahi. Hichehi, thilbai ahipoi, Pathen lenggam nalut nom leh, nalungthim sung nakigon tup angaije, achutilouleh Pathen thu nahetthei lou hel ding ahi.
Hijehchun, sopiteho, Pathen thu nahethei louna hi nahinkho then loujeh leh chonset kichep na a naneijeh ahi. Atah tah seidin, ahinkho theng lou, amit thenglou, alung thim thenglou, anakol thenglou ho jouse din Pathen thu hi het a het doh thei hoi ahipoi. Hiche thuhohii achen achai na het nomleh Muchi thepa thulema namuding ahi.
*_Rome 1:24-27 chu ivetna ahileh, hitin aseije. “Hiche jeh a chu alahuva atiu ja umloutah a bol dinga, amaho lunggot lam then louna lama Pathenin apehdoh ahitai,. Amahon, Pathen thutah chu jouvin alhengun, chuleh Asempau khellin thilsemjoh ahouvun ajen letaovin ahi. Hiche jeha chu Pathen in amaho ja chat umtah huhna lama apedoh ahitai, anumeiho jongun apenpi ngai mong a achonnau apaijun aka leh lamin achonun ahi. Pasalho jong angai monga numeito achon nau apailjun huh lama alip un, pasal le pasal jachat umtahin akibolun, achon gitlounau amahon ati chunguva akisan tao vin ahi._* Hitabanga chon ho lungthima chun, Pathen thu hettheina lungthim him him aum poi. Hijeh a chu, Pathen thu ngai ngaija hethei lou kitilona chu ahi. Pathen IN asimho jouse chunga Pathen thu het them thei na eihin petao hen..
