By Shonkhogin(Hegin) Haokip
Maranatha Cottage, Hebron Veng,
Phaipijang, Langol Imphal West
9774096152.
Mihem douthei kal val lhepna nachung uva achukhapoi; Pathen tahsan umtah ahin, natha in adoujou kalvalin lhepna nachung uva chuhsah ponte: hijeh chun nathoh jouna dingun, lhepna chutoh kilhona nakihuhdohna dingu lampijong nasempeh dingu ahi.
I.Corinth.10:13.
Pathenin chapa khatseh seh aneijin, chonsetna beihel ahin, ahivangin lhepna le patepna a konin ana ongdoh dehpoi. Achu tileh ama tahsan chate jousehi aneo alet thu chom ahin, lhepna le patepna hi itosoh keidiu va um ahin, hiche lhepna ho ahilouleh hiche patep na hohi ijosoh keidiuvin ikitil khouve. Hiche patep naho hi ijo uva ahileh ama katah sane itinao jong chu aphotchetna khat hiding ahi. Ajehchu Pathen thun, nadoujou lou dingu kathohsah lou diu ahi atihin, ahungsoh jousehi ijotheiju ahi ti ikilahjeng dingu ahi.
Hijeh a chu, patepna umlouva Pathen katah sane tihi aphot chetna umlou tahsan tabang ahin, Pathen katahsane natileh Ama natahsan natoh kitohlou tampi namasanga hung ding ahin, alet aneo chu thuchom ahin, Pathen thutoh kitohlou kitiphot chu natinjeng dinghi na kin ahi. Aneove alene tihih in, aneova kona alen hungding ahibouve. Direct a alen hungchulou maithei ahi. Ipi patepna ahilouleh lhepna hijong leh najo toupeh poupou leh Pathenin, natahsan kalse chu ama a dinga miman tam nahi jingding ahi. Hijehchun, hiche patepna dingahi kigosa dema na umjing angaije.
Tahsan kitihi mu loulai, kinepna thil khat aum monge ti phochetna ahi. Hiche tahsan jalla thil kibol jallin Abraham tahsan chu Chonphatna a kisim peh ahitai. Tua jonghi Pathen chu mukha louhel la ngailu a, mulou hella tahsan chu ihiuve. Imu khah louhel vanguva ama adinga thanom tah a ipan u ahi. I.Peter.1:8. Pakai Jesun, mulouva tahsan hi mua tahsan sanga gamcheng a phajo ahi ati. Bible in, Sopi deitahte, dettahin, suhlong hoi hilou helin pangun, gunchu tahin Pakai na tongjingun, natoh gimnau chu Pakaija moh ahipoi. I.Cor.15:58.
Achaina in, mulouva tahsan tekahna neocha gahnei ju hite. Aitih ana kehe khalou numei khat leh pasal khat kicheng dinga ahung kitahsan to lhonhi, tahsan jalla bou kicheng lhon ahi. Jinga ipi ahungsoding akhat josang in jong ahelhon poi. Ahinla ahetlhonlou vangin, tahsan jallin, kitepna sangtah tah anei lhonin, kichalou hellin, Amanu amapahi hinkhoa chenkhompi ding genthei ni hihenlang nopsahni hi jongleh thina in eikhan tokah a ding dingin kaki tepme atilhone.
Atahtah a kitemho jouse chu hinkho lampia lhepna jatchom chom umjongleh athichan geija kichenglhum mitamtah imu uve. Hichehi tahsan jalla kitepna chu tuhchah na dinga lungkhat seh seh pua aumjeh lhona galjona baitah a um ahi ti imuve, moh hihi ahipoi. Hitabanga chu, Pathen chate jousen jong, itahsan uhi genthei hatsat nikho hijongleh thina in eikhan tokah a ding dinga itahsan phat uleh lhepna jatchom chom hung henlang hi jongleh Pathen ingailut na chu koiman eisukhan pih thei loudiu ahi. Hiche jeh a chu Pathen cha kahi ahi lou leh Pathen katahsane itiu chu photchetna imu jiu ahibouve,moh hihi ahi poi. Pathenin asimho jouse thichangeija dingin galjona eipetao hen.
Thusimbu Machal jing thei na ding a pan lanom ho kipah tah in lem ahijing in ahi anoiya button “Click Here” khu meh utin details anasim ute.
