By Shonkhogin (Hegin) Haokip
Maranatha Cottage Hebron Veng
Phaipijang Langol Imphal West
9774096152
Hijeh chun, I kaneh dingu ham ! I kadon dingu ham ! I kasil dingu ham ! tin lungkham hih un,…nanghon hicheng chu na ngai u vana um na Pauvin ahe nai, Ahivang in amasatah in amagam le chonphatna hol masau vin, chutengle hichengse jong chu nakipeh be ding u ahi.
Mathew.6: 31-33.
Mihem ten hinkho damlai sunga ahinboipi penkhat chu ipi ham itileh, ipi kaneh a ipi kadon ding ham chuleh ipi kaki chen ding hitam tihi iboipi pen u chu ahi. Hijeh chun mihem khat in inchen louchen alunga ahin vop a patna aboina pipen chu hiche hi ahi jenge. Ahinla Pathen in hitihin eiseipih uve, hitiho jouse nangaichat u chu keiman kahenai, nangho seh seh nahipouve, chidang namdangten jong angaiju van a um napauvin ahenai, Amavang amasatah in ama gam le a chonphat na hol masauvin, chu tengleh hichengse jong chu nakipeh be diu ahi ati. Chunga leng vahcha ho khu ngaitouvin, ama hon tula atupouvin, ima cha akikhol pouvin ahinla nelouchalouva athilamu akijakhapoi, amaho sang a nangho manlujo nahi lou u ham ? Chuleh lou jaova molhoipah khu ngaitouvin, hiche ho khun ahoina diuvin imacha la akibolpouvin, jingkah a pah emsella nilhah leh gomlha dingbon khu bangtah a Pathenin akhohsahleh nangho hiche pahcha ho sanga mantamjo nahilou uham ? Imacha ahahsa aumpoi, aman nanga kona adeichu amasapen tah in Ama lenggam leh Achonphatna holdoh masan chutengle nangai chat adangho jouse chu nakipeh tha diu ahi ati.
Amasa penin Pathen lenggam chu itabang ham gahveu hite. Pakai Jesun Pathen lenggam hi Gou-kiselguh tabang ahi. Hiche gou kiselguh chu mikhat in aga mudoh phat in kipah tahin a inlamah achen, anei agoujouse abonchan ajoh in hiche gou kisel guh chu akichohtai akiti. Hiche Pathen lenggam hi aman tamdan chu ima cha atekah pi beihel ahi, na in nalou chuleh nanei jouse sanga mantamjo ahi.(Matt.13:44). Anichan na a Pathen lenggam lut ding akhohdan chu ita banga khoh hitam itileh Pathen lenggam lutmona dinga natibah khat tichu namit langkhatin nasuh moleh kaldoh in lang paidoh jengin, mitni neija damun meidilla chesang in mit khat seh seh neija Pathen lenggam lut apha joi atinalaije, ichangeija khoh hitam. Mark 9:47. Athumchanna a din, mi koijongleh Pathen leng gam jalla anei agou, aji acha, anu apa, a-u anao, chuleh sumle pai hihen, neile gou hijongleh Pathen lenggam jalla adalhah ham, amansah ham, achaan ham leh hiche achaan (amulou/amansah) jeh a chu amansah jat chu tu hinlai sunga ajatja amube ding chuleh khonunga tonsot hin kemlou amuthading ahinalaije.Matt.19:29. Hichan geija hi Pathen lenggam hi mantama, lutlou akhohdan chuleh iluttheija ahileh aphat chomdan ho kichentah in imu uve.
Pathen lenggam lutlou akhohdan imutao vin, tua hi iti kilut ding hitam itileh, Pathen leng gama lutna dinga pen thah angaije,John.3:7 in Koi hijong leh twija le lhagaova apenthah lou leh Pathen lenggam lutthei lou ding ahi. Pathen lenggam lut theina dingin Pathen lhagao theng angaije. Lhagao theng kithopina jalla kona chonset kihet dohnale kisihna dihtah neija, Ama kom bella ichonsetna ho jouse kiphondoh a nungbol kit tahlou dinga, ngaidam thum ding kitihi penthah na lampi ahi. Adihtah a Pathen cha nahiphatleh nachonsetna Pathein nangaidamnaho phot chetna twija Baptize channahi Ama thina lima amatoh kivuitha a ihi taove. Ama thilima banga ithiuleh ama thodoh lim banga ithokit diu ahi. Rome.6:4-5. Ahinla achonphatna atihi ahileh Pathen chonphat na hi asung apo aphatna kibang ahi. Alangkhatna seidinga chu ahileh Pathentoh ikiguijopna (relationship) thengsel leh dihtah a koiding tina jong ahi. Hicheteni hi ikisuhtup phatuleh hiche promise tichu, ama leng gam le achonphatna hol doh masauvin, chutileh adangse nakipeh tha diu ahi ati chu guilhung thei ding ahi.
Hijeh a chu, Pathen cha hina dihtah ineija Pathen lenggam chena lhongpiho phatecha a ichepiuleh lenggama ichandiuva lomho jouse tahsa lam hihenlang lhagaolam hijongleh aboncha ichan diu ahi tihi keima hinkho a konin jong neocha kahin tah lang nome. Keijong Ama chakhat hina jallin, ka khangdon laija patin, Pathenin kachan dinga lom, keima theple thep lou thu hilouvin Aman akitohchet chet in eina got peh in tua kanung vet leh kidang kasan Pathen sangtahin kathangvah e. Aman kakivahna ding natoh einapen, jile cha einapen, amaho vahna dinga akhohle akulho jouse einapen,ka pension nunga kachenna ding injong einapen, adang kangaichat ho jouse jong akhoh dung juijin eina pen, kanung vetna ahileh kidang kasa lheh jeng e. Keima milhasam tah bon hichen geija Pathenin thil pha eipeh leh koi hijong leh Pathen lenggamle achonphatna kimujouse chu hisanga hoijo phajo akimu ding ahi ti kasei nom ahi e. Pathenin asimho jouse Pathen lenggam le achonphatna aki holdoh theina dingin chihna le het na petahen.
Article hi anom lheh e nati le anoiya “LIKE” button khu meh in writer ho na support nau vin, chule seinom nanei le anoiya comments nahin bolthei u ahi.
